1. Соске сиан уверимо кај е Девлескоро Лафи тано силно? (Дикх и слика ко почеток тари статија.)

Е ЈЕХОВАСКОРО народо тано уверимо кај лескоро Лафи „тано џивдо хем силно“ (Евр. 4:12). Амен дикхлем кај е Библија иси ла моќ те менинел о живото ко пошукар. Англедер те овен е Јеховаскере сведокија, несаве амаре пхраља хем пхења чорена сине, дрогиринена пе сине хем живинена сине неморално. Јавера сине славна или бут барвале, ама осетинена сине кај нешто фалинела ленге ко живото (Проп. 2:3-11). Бут џене со сине бизи надеж акана иси лен чачутни надеж хем смисла ко живото. Уживинаја кеда читинаја ки Стражарско кула асавке искуствија ки рубрика „И Библија шај те менинел амаро живото“. * (Дикх и фуснота.) Чак кеда некој ка овел е Девлескоро слуга, ваљани понадари да преку и Библија те икерел зорало пло амалипе е Јеховаја.

2. Сар и сила таро е Девлескоро Лафи влијајнѓа упро мануша ко прво веко?

 ² На ваљани те изненадинел амен адава со бут мануша керѓе баре промене кеда шунѓе о чачипе таро е Девлескоро Лафи. Амаре пхраља хем пхења таро прво веко со сине лен надеж те живинен ко небо исто аѓаар керѓе асавке промене. (Читин 1. Коринќаните 6:9-11.) Кеда о Павле пишинѓа саве мануша нане те наслединен е Девлескоро Царство, ов вакерѓа: „А асавке сине несаве тумендар“. О Девел преку пло Лафи хем о свети дух поможинѓа акале манушенге те менинен пе. Ама, чак кеда уле е Јеховаскере сведокија, некој лендар керѓе пхаре гревија хем руминѓе пло однос е Јеховаја. На пример, ки Библија пишинела башо јекх пхрал со сине помазанико со ваљани сине те овел исклучимо таро собрание. Пало несаво време, ов менинѓа пе хем палем шај сине те овел примимо ко христијанско собрание (1. Кор. 5:1-5; 2. Кор. 2:5-8). Бут охрабринела амен кеда дикхаја сар е Девлескоро Лафи поможинѓа буте пхраленге хем пхењенге те керен баре промене.

3. Башо со ка кера лафи акана?

³ Е Девлескоро Лафи тано бут силно. Адалеске со авела таро Јехова, мангаја те да амендар са те користина ле шукар (2. Тим. 2:15). Акана ка дикха сар шај те мукха и сила таро е Девлескоро Лафи те влијајнел 1) ко амаро живото, 2) ки амари служба хем 3) кеда икераја говорија. Акава ка поможинел аменге те сикава мангипе хем благодарност амаре Дадеске сој ко небо, кова со сикавела амен башо амаро шукарипе (Иса. 48:17).

4. а) Со ваљани те кера те шај е Девлескоро Лафи те влијајнел упри аменде? б) Кеда аракхеа време те читине и Библија?

⁴ Те шај те мукха е Девлескоро Лафи те влијајнел ко амаро живото, ваљани редовно те читина ле. Ваљани те трудина амен те кера адава секова диве (Ис. Нав. 1:8). Бут џене амендар тане зафатиме, ама на ваљани те мукха ништо, чак ни амаре важна обврске, те чхинавен амен те читина и Библија. (Читин Ефешаните 5:15, 16.) Шај те аракха време те читина ла рано сабајле, дивескоро или раќате. Амен да осетинаја амен сар о псалмисти кова со пишинѓа: „Кобор мангава тло закони! Цело диве размислинава баши лесте“ (Пс. 119:97).

5, 6. а) Соске ваљани хор те размислина башо адава со читинаја? б) Со ваљани те кера те шај те овел амен корист таро хор размислибе? в) Сар поможинѓа туке адава со читинеа и Библија хем хор размислинеа?

⁵ Нане доволно само те читина и Библија. Ваљани хор те размислина башо адава со читинаја (Пс. 1:1-3). Само аѓаар ка шај те применина о мудра советија тари Библија ко амаро живото. Адалеске, бизи разлика дали читинаја е Девлескоро Лафи ко печатимо или ко електронско облик, амари цел ваљани те овел адава со читинаја те влијајнел упри аменде.

 ⁶ Со ваљани те кера те шај те овел амен корист таро хор размислибе? Џикоте читинаја и Библија, ваљани те ачхова хем те пуча амен: „Со сикљовава башо Јехова таро акава? Сар применинава акава со читинава? Саве промене ваљани панда те керав?“ Ако хор размислинаја хем молинаја амен башо адава со читинаја таро е Девлескоро Лафи, тегани ка манга те кера адава со сикљоваја. Аѓаар ка мукха и Библија те влијајнел ко амаро живото (2. Кор. 10:4, 5).

7. Соске ваљани те користина е Девлескоро Лафи ки служба?

⁷ Важно тано бут пути те користина е Девлескоро Лафи џикоте проповединаја хем сикаваја. Јекх пхрал вакерѓа: „Кеда би проповединеа сине таро кхер ко кхер заедно е Јеховаја, дали цело време ка кере само ту лафи или ка мукхе ов да те керел лафи?“ Кеда читинаја некаске тари Библија, тегани мукхаја о Јехова те керел лафи. Јекх шукар биримо стихо шај повише те влијајнел ко станари него било саво лафи со ка вакера амен (1. Сол. 2:13). Кеда сием ки служба, дали трудинаја амен те читина тари Библија кобор со шај повише пути?

8. Соске нане доволно само те читина стихија тари Библија џикоте проповединаја?

⁸ Нане доволно само те читина стихија тари Библија кеда проповединаја е манушенге. Соске? Адалеске со бут мануша на хаљовена адава со пишинела ки Библија. Аѓаар сине ко прво веко, а исто тано авдиве да (Рим. 10:2). На ваљани те мислина кај о станари хаљовела о стихо со читинаја леске. Шај те поможина леске аѓаар со ка повторина о главна лафија или мисле таро стихо хем пало адава ка објаснина со значинена. Аѓаар, е Девлескоро Лафи ка влијајнел ко ленгере мисле хем ленгоро вило. (Читин Лука 24:32.)

9. Сар о лафија со ка вакера лен англедер те читина јекх стихо шај те поможинен е станареске те поштујнел и Библија? Вакер јекх пример.

⁹ О лафија со вакераја лен англедер те читина јекх стихо, шај те поможинен е станареске те поштујнел и Библија. На пример, шај те вакера: „Те дикха со вакерела амаро Створители баши акаја бути“. Ако кераја некасаја лафи со нане христијани, шај те вакера: „Те дикха со пишинела ко е Девлескоро Лафи“. Ако проповединаја некаске со на интересинела пе баши религија, шај те пуча ле: „Дали некогаш шунѓан акаја пурани изрека?“ Шукар тано ма те бистра кај секова мануш тано различно хем адалеске ваљани те трудина амен амаро увод те интересинел ле (1. Кор. 9:22, 23).

10. а) Со случинѓа пе јекхе пхралеске ки служба? б) Сар уверинѓан тут кај е Девлескоро Лафи иси ле бари сила кеда користинеа ле ки служба?

¹⁰ Бут џене дикхле кај е Девлескоро Лафи шај бут те влијајнел упро мануша. На пример, јекх пхрал посетинела сине јекхе попхуре мануше кова со  бершенцар читинела сине амаре списанија. Јекх диве, наместо само те дел ле и најневи Стражарско кула, о пхрал одлучинѓа те читинел леске јекх стихо тари Библија. Ов читинѓа таро 2. Коринќаните 1:3, 4, коте со вакерела: „О Дад сој пхердо милост хем о Девел секоле утехакоро... дела амен утеха ки секоја амари неволја“. Акала лафија добором погодинѓе е мануше со чак замолинѓа е пхрале панда јекх пути те читинел лен. Ов вакерѓа е пхралеске кај леске хем лескере ромњаке чаче ваљани сине утеха. Акала стихија керѓе о мануш те мангел те џанел повише баши Библија. Акава пример сикавела кај е Девлескоро Лафи иси ле бари сила кеда користинаја ле ки служба (Дела 19:20).

11. Сави одговорност иси е пхрален со икерена говорија?

¹¹ Сарине амен мангаја те џа ко амаре состанокија хем конгресија. И главно причина соске кераја адава тано те фалина е Јехова. Исто аѓаар, иси амен бари корист таро адава со сикљоваја адари. Адалеске, е пхрален со икерена говорија иси лен бари чест хем одговорност (Јак. 3:1). Ола ваљани те пазинен адава со сикавена те овел таро е Девлескоро Лафи. Ако ту да икереа говорија, сар шај те користине и Библија те поможине е пхраленге?

12. Со ваљани те керел јекх говорнико те шај лескоро говор те темелинел пе ки Библија?

¹² Најважно дело таро секова говор  ваљани те овен о стихија тари Библија (Јован 7:16). Адалеске, кеда икереа говор, ма мукх ништо — ни о искуствија ни о споредбе ни о начин сар икереа о говор — те лел побаро внимание тари Библија. Исто аѓаар, ма бистре кеда ваљани те сикаве тари Библија, нане доволно само те читине латар. Ако читинеа бут стихија, бут мануша нане те памтинен лен. Адалеске, шукар бирин кола стихија мангеа те користине. Тегани, одвојн туке време те читине, те објаснине, те вакере несаво пример хем те вакере сар шај те применинен пе (Неем. 8:8). Кеда иси тут говор таро нацрт, проучин шукар о нацрт хем о стихија сој адатхе денде. Трудин тут те хаљове сар о мисле хем о стихија таро нацрт тане поврзиме. Тегани користин несаве таро акала стихија те објаснине о главна мисле таро нацрт. (Шукар советија шај те аракхе ко лил Извлечи корист од образованието во Теократската школа за служба, 21-23 лекција.) А најважно тано те молине е Јехова те поможинел тут те вакере лескере скапоцена мисле тари Библија. (Читин Езра 7:10; Изреки 3:13, 14.)

13. а) Сар влијајнѓа упри јекх пхен јекх стихо со шунѓа ле ко состанок? б) Сар влијајнѓа упри туте несаво стихо со шунѓан ле ко амаре состанокија?

¹³ Јекхе пхењаке тари Австралија случинѓе пе бут лошна буќа кеда сине тикни. Адалеске, чак кеда ули е Јеховаскоро сведоко, панда сине лаке пхаро  те верујнел кај о Јехова мангела ла. Ама, ко јекх состанок, акаја пхен шунѓа јекх стихо тари Библија кова со бут погодинѓа ла. Ој хор размислинѓа хем проучинѓа башо акава стихо, аѓаар со читинѓа јавера да стихија сој поврзиме адале темаја. Аѓаар уверинѓа пе кај о Јехова мангела ла. * (Дикх и фуснота.) Дали некогаш шунѓан несаво стихо ко состанок или ко конгрес со влијајнѓа ко слично начин упри туте? (Неем. 8:12).

14. Сар шај те сикава кај мангаја хем ценинаја е Јеховаскоро Лафи?

¹⁴ Бут сием благодарна е Јеховаске башо лескоро Лафи, и Библија! Ов ветинѓа кај лескоро Лафи ка ачхол, хем икерѓа пло ветување (1. Пет. 1:24, 25). Адалеске, мангаја редовно те читина и Библија, те применина ла ко амаро живото хем те користина ла те поможина е јаверенге. Кеда кераја акава, сикаваја кај чаче мангаја хем ценинаја акава поклон, хем сој најважно, сикаваја кај мангаја лакере Авторе — е Јехова.