1. Соске е Јеховаскере слуге тане бахтале? (Дикх и слика ко почеток тари статија.)

Е ЈЕХОВАСКЕРЕ СВЕДОКИЈА тане бахтало народо. Секогаш кеда тане заедно — ко состанокија, ко конгресија или кеда дружинена пе — ола тане бахтале, асана хем керена лафи. Соске тане добором бахтале? И главно причина тани адалеске со џанена е Јехова, е бахтале Девле. Ола служинена леске хем трудинена пе те постапинен сар лесте (1. Тим. 1:11; Пс. 16:11). Таро Јехова авела о бахталипе, адалеске ов мангела амен да те ова бахтале хем дела амен бут причине башо адава (5. Мој. 12:7; Проп. 3:12, 13).

2, 3. а) Со значинела те ове бахтало? б) Соске авдиве тано пхаро те ова бахтале?

² А сар тано туја? Дали ту сиан бахтало? Те ове бахтало значинела те осетине тут шукар хем те ове задоволно ко живото. И Библија сикавела кај околен со иси лен берекети таро Јехова шај те овен чаче бахтале. Ама, ко  свето ко кова со живинаја авдиве, шај те овел аменге пхаро те ова бахтале. Соске?

³ Несаве пхаре ситуацие ко живото шај те лен амаро бахталипе. На пример, шај муло некој таро тле најпаше или тано исклучимо таро собрание, шај развединѓан тут таро тло брачно партнери или нашавѓан тли бути. Исто аѓаар, шај те керел туке пхаро те ове бахтало ако ки тли фамилија често акошена тумен, ако тле колеге или соученикија асана туке, ако сиан прогонимо или ко затвор адалеске со служинеа е Јеховаске. Или шај иси тут проблемија састипаја, несаво хронично насвалипе или депресија. Ама ма бистре кај о Исус Христос, „о бахтало хем единствено Владетели“, мангипаја утешинѓа е манушен хем поможинѓа ленге те овен бахтале (1. Тим. 6:15; Мат. 11:28-30). Ки Проповед ки гора, о Исус спомнинѓа некобор особине со шај те поможинен аменге те ова бахтале чак кеда иси амен бут проблемија адалеске со живинаја ко свето е Сатанаскоро.

4, 5. Со ваљани те кера те шај те ова хем те ачхова бахтале?

⁴ И прво бути со спомнинѓа ла о Исус тани бут важно. Ов вакерѓа: „Бахтале тане окола сој свесна кај ваљани ленге о Девел, соске о Царство сој ко небо тано ленгоро“ (Мат. 5:3). Сар шај те сикава кај сием свесна кај ваљани аменге о Девел? Аѓаар со ка проучина и Библија, ка шуна е Девле хем и служба е Јеховаске ка чхива ла ко прво тхан ко амаро живото. Акала буќа ка поможинен аменге те ова бахтале. Ола ка бајрарен амари вера кај панда хари ка исполнинен пе е Девлескере ветувања. А и бут шужи надеж баши која со пишинела ки Библија ка охрабринел амен (Тит 2:13).

⁵ Ако мангаја те ачхова бахтале бизи разлика со случинела пе аменге ко живото, мора понадари да те кера позорало амаро амалипе е Јеховаја. О апостол Павле пишинѓа: „Секогаш овен бахтале ко Господари [о Јехова]. Хем палем вакерава, овен бахтале!“ (Фил. 4:4). Ако мангаја те ова паше амала е Јеховаја, ваљани те овел амен е Девлескири мудрост. И Библија вакерела: „Бахтало тано о мануш со ка аракхел мудрост хем о мануш со иси ле способност хаљојбаске... Ој тани каш е животоскоро околенге со ка прифатинен ла хем окола со зорале ка икерен пе ки лате ка овен викиме бахтале“ (Изр. 3:13, 18).

6. Со јавер ваљани те кера те шај те ачхова бахтале?

⁶ Ама, те шај те ачхова бахтале, бут тано важно понадари да те применина адава со сикљоваја тари Библија. О Исус сикавѓа кобор тано важно акава кеда вакерѓа: „Ако џанена акала буќа, бахтале сиен кеда керена лен“. (Јован 13:17; читин Јаков 1:25.) Ако мангаја те ова паше е Девлеа хем  те ачхова бахтале мора те кера адава. Ама, сар шај те ова бахтале кеда иси бут буќа кола со шај те лен амаро бахталипе? Те дикха со јавер вакерѓа о Исус ки Проповед ки гора.

7. Сар шај окола со тугујнена те овен бахтале?

⁷ „Бахтале тане окола со тугујнена, соске ола ка овен утешиме“ (Мат. 5:4). Шај пучаја амен: „Сар шај некој те овел бахтало кеда тугујнела?“ О Исус на мислинѓа ко сарине со тугујнена. Бут лошна мануша тугујнена башо проблемија со иси лен ко акава „бут пхаро време“ (2. Тим. 3:1). Ама, ола мислинена само песке а на башо Јехова, адалеске нашти те овен паше е Јеховаја хем те овен бахтале. О Исус керела сине лафи башо адала сој свесна кај ваљани ленге о Девел. Ола тугујнена соске дикхена кај бут мануша отфрлинена е Девле хем на живинена аѓаар сар со мангела ов. Исто аѓаар, џанена кај тане грешна хем хаљовена кај о лошна буќа со случинена пе ко свето тане адалеске со о мануша тане несовршена. О Јехова дикхела адален со искрено тугујнена, ов утешинела лен пле Лафеа хем дела лен бахталипе хем живото. (Читин Езекиел 5:11; 9:4.)

8. Сар адава со ка ове кротко ка керел тут бахтало?

⁸ „Бахтале тане о кротка, соске ола ка наслединен и Пхув“ (Мат. 5:5). Сар адава со ка ове кротко ка керел тут бахтало? Бут мануша понашинена пе грубо хем насилно, а адава шај те анел џи ко бут проблемија. Ама кеда шунена башо чачипе, ола менинена пе хем уравена и „неви личност“. Акана ола сикавена сочувство хем мангипе, љубезност, понизност, ачховена смириме хем стрплива (Кол. 3:9-12). Адава анела ленге андруно мир, е јаверенцар тане ко шукар односија хем бахтале тане. Исто аѓаар, е Девлескоро Лафи ветинела кај ола ка „наслединен и Пхув“ (Пс. 37:8-10, 29).

9. а) Со мислинѓа о Исус кеда вакерѓа кај о кротка „ка наслединен и Пхув“? б) Соске шај те овен бахтале окола сој „бокхале хем жедна баши праведност“?

⁹ Ки која смисла о кротка „ка наслединен и Пхув“? Е Исусескере ученикија сој помазиме ка наслединен и Пхув ки адаја смисла со ка владинен упри лате сар царија хем свештеникија (Отк. 20:6). Милионија јавера колен со нане лен надеж те живинен упре ко небо ка наслединен и Пхув кеда ка овел ленге дозволимо те живинен вечно ки лате. Ола ка овен совршена хем ка овел лен мир хем бахталипе. Акала тане о мануша баши касте со о Исус вакерѓа: „Бахтале тане окола сој бокхале хем жедна баши праведност“ (Мат. 5:6). Ленгири желба баши праведност ка овел целосно задоволими кеда о Јехова ка цидел са о лошнипе (2. Пет. 3:13). Ко нево свето, о праведна мануша ка овен бахтале хем никогаш више нане те тугујнен башо лошна буќа со керена лен о лошна мануша (Пс. 37:17).

10. Со значинела те ове милостиво?

¹⁰ „Бахтале тане о милостива, соске ка овел ленге сикавди милост“ (Мат. 5:7). Те ове милостиво значинела те ове пријатно, љубезно хем сочувствително, јавере лафенцар те овел туке жал околенге со цидена муке. Ама, и милост тани повише  него само чувство. Спрема и Библија, те ове милостиво значинела те кере нешто те шај те поможине е јаверенге.

11. Со сикљоваја тари споредба башо милостиво Самарјани?

¹¹ Читин Лука 10:30-37. Е Исусескири споредба башо милостиво Самарјани бут јасно сикавела со значинела те овел пе милостиво. О Самарјани тари жал хем таро сочувство поможинѓа е манушеске со сине ки неволја. Откеда денѓа акаја споредба, о Исус вакерѓа: „Џа хем ту да кер аѓаар“. Адалеске, шај те пуча амен: „Дали керава адава со керѓа о милостиво Самарјани? Кеда о јавера цидена муке, шај ли те керав нешто те поможинав ленге? На пример, шај ли те поможинав е попхуренге ко собрание, е удовиценге или е чхавенге каскере со родителија на служинена е Јеховаске? Шај ли те утешинав околен со иси лен депресија“? (1. Сол. 5:14; Јак. 1:27).

12. Сар адава со ка ова милостива е јаверенцар ка керел амен бахтале?

¹² Соске сием бахтале кеда сием милостива? Кеда сикаваја милост амен даја е јаверенге, а о Исус вакерѓа кај о дејбе керела амен бахтале. Исто аѓаар, џанаја кај адалеа кераја е Јеховаскири волја. (Дела 20:35; читин Евреите 13:16.) Баши окова сој тано милостиво, о цари о Давид вакерѓа: „О Јехова ка заштитинел ле хем ка икерел ле ко живото. Ка овел пенџардо сар бахтало ки пхув“ (Пс. 41:1, 2). Исто аѓаар, ако сием милостива хем сочувствителна спрема о јавера, о Јехова ка овел милостиво спрема аменде хем шај те ова бахтале засекогаш (Јак. 2:13).

13, 14. Соске тано важно те овел амен „чисто вило“?

¹³ О Исус вакерѓа: „Бахтале тане окола со иси лен чисто вило, соске ола ка дикхен е Девле“ (Мат. 5:8). Те шај те овел амен чисто вило мора те овен амен чиста мисле хем исправна желбе. Акава тано бут важно ако мангаја о Јехова те прифатинел амари служба. (Читин 2. Коринќаните 4:2; 1. Тим. 1:5.)

 ¹⁴ Околен со иси лен чисто вило шај те овен паше е Јеховаја, кова со вакерѓа: „Бахтале тане окола со тховѓе пле дугачка шеја“ (Отк. 22:14). Со значинена о лафија „тховѓе пле дугачка шеја“? Е помазаниконге значинела кај о Јехова дикхела лен сар чиста, ка дел лен бесмртно живото ко небо хем засекогаш ка овен бахтале. Башо баро мноштво, колен со иси надеж те живинен ки Пхув, значинела кај о Јехова дозволинела ленге те овен лескере амала соске дикхела лен сар праведна. Баши ленде и Библија вакерела: „Тховѓе пле дугачка шеја хем парнарѓе лен ко рат е Бакхрескоро“ (Отк. 7:9, 13, 14).

15, 16. Сар шај „те дикхен е Девле“ окола со иси лен чисто вило?

¹⁵ О Јехова вакерѓа: „Нашти о мануш те дикхел ман хем те ачховел џивдо“ (2. Мој. 33:20). Тегани сар шај окола со иси лен чисто вило те „дикхен е Девле“? О грчко лафи кова сој акате преведимо „те дикхел“ шај те значинел некој те замислинел, те хаљовел или те џанел. Значи, „те дикха е Девле“ значинела те хаљова сави личност тано ов хем те манга лескере особине (Еф. 1:18). О Исус совршено сикавела сине е Девлескере особине хем адалеске шај сине те вакерел: „Кој дикхља ма ман, дикхља ме Даде да“ (Јован 14:7-9).

¹⁶ Освен адава, „дикхаја е Девле“ кеда хаљоваја сар поможинела аменге ко амаро живото (Јов 42:5). Исто аѓаар шај „те дикха е Девле“ кеда концентриринаја амен ко бут шуже буќа со ветинѓа о Јехова околенге со ачховена чиста хем верно служинена леске. А о помазаникија дословно ка дикхен е Јехова кеда ка воскреснинен хем ка џан ко небо (1. Јов. 3:2).

17. Соске тане бахтале окола со керена мир?

¹⁷ О Исус вакерѓа акава да: „Бахтале тане окола со керена мир“ (Мат. 5:9). Кеда амен прво кераја нешто те шај те ова ко мир е јаверенцар, шај те ова бахтале. О ученико о Јаков пишинѓа: „А и праведност анела плоди околенге со керена о мир кеда тани сејми ко мирно време“ (Јак. 3:18). Значи, ако туке пхаро те накхе шукар некасаја ко собрание или ки фамилија, молин е Јехова те поможинел туке те кере мир. Тегани, о Јехова ка дел тут пло свети дух кова со ка поможинел туке те сикаве о христијанска особине хем ту ка ове побахтало. О Исус сикавѓа кобор тано важно те кера мир кеда вакерѓа: „Ако ингареа тли жртва ко жртвенико хем адари сетинеа тут кај тле пхрале иси ле нешто против туте, мукх тли жртва англо жртвенико, хем џа прво смирин тут тле пхралеа, а пало адава иран тут хем де тло поклон“ (Мат. 5:23, 24).

18, 19. Соске о христијања шај те овен бахтале иако тане прогониме?

 ¹⁸ „Бахтале сиен кеда баши манде вреџинена тумен, прогонинена тумен хем вакерена разна лошна ховавне буќа против туменде.“ Со мангља те вакерел о Исус акалеа? Ов понадари вакерѓа: „Овен бахтале хем осетинен тумен бут шукар, соске бари тани тумари награда ко небо. Соске аѓаар прогонинена сине е пророкон англедер туменде“ (Мат. 5:11, 12). Кеда о апостолија сине марде хем сине ленге забранимо те проповединен, ола геле песке бахтале таро Судско совет. Нормално, ола на уживинѓе адалеске со сине марде. Ама сине бахтале соске „сине лен чест те овен мучиме“ ко анав е Исусескоро (Дела 5:41).

¹⁹ Авдиве, е Јеховаскере слуге исто аѓаар тане бахтале џикоте истрајнена ко прогонствија со иси лен башо е Исусескоро анав. (Читин Јаков 1:2-4.) Исто сар о апостолија, амен да на уживинаја те ова мучиме или прогониме. Ама, ако ачховаја верна е Јеховаске, ов ка дел амен храброст те истрајна. Размислин со случинѓа пе јекхе пхралеске со викинела пе Хенрик Дорник. Ко август 1944 берш, ов хем лескоро пхрал сине бичхалде ко концентрационо логори. Ленгере противникија вакерѓе: „Ко ништо нашти те убедина лен. Ленгоро мучибе керела лен бахтале“. О Хенрик објаснинѓа: „Иако на сине ман желба те овав мучимо, адава со храбро хем достоинствено издржинава сине о мучибе адалеске со мангава сине те ачховав верно е Јеховаске, чаче керѓа ман бахтало... О молитве таро вило керѓе ман панда попаше е Јеховаја хем ов сикавѓа манге кај шај те овел ман доверба ки лесте“.

20. Соске сием бахтале џикоте служинаја е „бахтале Девлеске“?

²⁰ Кеда радујнаја е Јехова, „о бахтало Девел“, шај те ова бахтале чак ако иси амен прогонство, ако и фамилија противинела пе аменге, ако насваљоваја или пхујроваја (1. Тим. 1:11). Исто аѓаар, бахтале сием соске амаро Девел кова „со нашти те ховавел“, денѓа амен бут шуже ветувања (Тит 1:2). Кеда о Јехова ка исполнинел пле ветувања, нане ни те сетина амен ко проблемија со иси амен акана. Уствари, нашти ни те замислина аменге кобор шужо ка овел о живото ко рај хем кобор бахтале ка ова! Чаче, ка уживина „ко баро мир“ (Пс. 37:11).