1. Баши сави важно тема керѓа о Исус лафи англедер те мерел?

И РАТ англедер те мерел, џикоте сине пле учениконцар, о Исус скоро 30 пути спомнинѓа о мангипе. Ов вакерѓа пле учениконге кај ваљани те манген пе јекх јекхеа (Јован 15:12, 17). Ленгоро мангипе добором ка дикхјол со о јавера ка приметинен кај ола тане о чачутне христијања (Јован 13:34, 35). О мангипе башо кова со керела сине о Исус лафи нане само нешто кова со осетинаја ле него акаја особина сикавела пе постапкенцар сој самопожртвувана. О Исус вакерѓа: „Никас нане побаро мангипе таро акава: те дел пло живото пле амаленге. Тумен сиен мле амала ако керена адава со заповединава туменге“ (Јован 15:13, 14).

2. а) Пало со тане пенџарде е Девлескере слуге авдиве? б) Башо кола пучиба ка кера лафи ки акаја статија?

² Авдиве, е Јеховаскере слуге тане пенџарде пало ленгоро искрено самопожртвувано мангипе хем пало зорало јекхипе со иси лен (1. Јов. 3:10, 11). Е Девлескере слуге  ко цело свето чаче мангена пе јекх јекхеа бизи разлика тари сави нација тане, сави чхиб керена лафи или саво потекло иси лен. Соске о мангипе тано добором важно авдиве? Сар о Јехова хем о Исус керена амен позорале? Сар шај мангипаја те утешина хем те кера позорале е јаверен? (1. Кор. 8:1).

3. Сар влијајнела упро мануша адава со о живото тано пхердо проблеменцар хем пхарипаја?

³ Ко акала последна диве о живото тано пхердо проблеменцар хем пхарипаја (2. Тим. 3:1-5; Пс. 90:10). Бут мануша цидена добором муке со више нане лен желба те живинен. Секова берш, повише таро 800.000 мануша мударена пе — по јекх мануш ко секола 40 секундија. Жално тано адава со чак несаве таро амаре пхраља хем пхења осетинѓе пе аѓаар хем ко крајо мударѓе пе.

4. Кола верна слуге таро библиско време нашавѓе пли желба те живинен?

⁴ Ко библиско време, несаве верна слугенге сине добором пхаро таро ленгере проблемија со мангле те мерен. На пример, о Јов осетинела сине добором бари дукх со чак вакерѓа: „Мрзинава мло живото, на мангава више те живинав“ (Јов 7:16; 14:13). О Јона сине бут разочаримо хем вакерѓа: „Акана, Јехова молинава тут ле мло живото, соске пошукар манге те мерав него те живинав“ (Јона 4:3). Е пророко е Илија на сине ле нисави надеж хем вакерѓа: „Доста манге! Јехова, ле мло живото“ (1. Цар. 19:4). Ама, о Јехова бут ценинѓа акале верна слуген хем мангља те живинен. Ов на осудинѓа лен башо адава со осетинена пе сине аѓаар, него мангипаја поможинѓа ленге те овел лен палем желба те живинен те шај понадари да те служинен леске верно.

5. Соске авдиве е пхраленге хем е пхењенге чаче ваљанела амаро мангипе?

⁵ Авдиве, буте пхраленге хем пхењенге ваљанела амаро мангипе адалеске со накхена таро пхаре ситуацие. Несавенге асана или прогонинена лен. Јавера тане малтретириме или керена ленгоро лафи ки бути. Несаве тане бут уморна соске керена бут бути или иси лен бут стресно бути. А несавен палем, иси лен сериозна фамилијарна проблемија со лела ленгири сила. На пример, шај ленгоро брачно партнери на служинела е Јеховаске хем секогаш критикујнела лен. Адалеске со иси лен асавке хем јавера притисокија, бут џене осетинена пе уморна хем чак почминена те сумнинен пе дали врединена нешто. Кој шај те поможинел ленге?

6. Сар е Јеховаскоро мангипе керела позорале лескере слуген?

⁶ О Јехова уверинела пле слуген кај секогаш ка мангел лен. Замислин туке сар осетинена пе сине о Израелција кеда о Јехова вакерѓа ленге: „Ту сиан манге скапоцено, сикавди туке чест хем ме мангава тут... Ма дара, соске ме сиум туја!“ (Иса. 43:4, 5). Џанаја кај секова јекх амендар тано скапоцено е Јеховаске. * (Дикх и фуснота.) Ки Библија пишинела акава ветување: „Силно тано [о Јехова] хем ка спасинел тут. Бахтало ка викинел баши туте“ (Соф. 3:16, 17).

7. Ки која смисла е Јеховаскоро мангипе шај те спорединел пе е мангипаја јекхе дајакоро? (Дикх и слика ко почеток тари статија.)

 ⁷ О Јехова ветинела кај ка керел позорале пле слуген хем ка утешинел лен бизи разлика саве проблемија иси лен. Ов вакерѓа: „Ој ка пхиравел тумен ки ангали хем ка кхелел песке туменцар ко пле кочака. Сар јекх дај со утешинела пле чхаве, аѓаар ме да ка утешинав тумен“ (Иса. 66:12, 13). Размислин кобор сигурно осетинела пе о бебе кеда лескири дај икерела ле ки ангали хем кеда кхелела песке леа. О Јехова бут мангела тут хем мангела те осетине тут сигурно. Никогаш ма сумнин тут ко адава кај сиан бут скапоцено е Јеховаске! (Ерем. 31:3).

8, 9. Сар е Исусескоро мангипе керела амен позорале?

⁸ Иси панда јекх причина соске сием увериме кај о Јехова мангела амен. Ки Библија пишинела: „О Девел добором бут мангља о свето со денѓа пле единствено бијаме Чхаве, те шај секој со ка верујнел ки лесте те на овел уништимо, него вечно те живинел“ (Јован 3:16). Кеда денѓа пло живото аменге, о Исус сикавѓа кај ов да бут мангела амен хем акава мангипе керела амен позорале. И Библија вакерела кај ни и неволја, ни и мука нашти те „одвинел амен таро е Христосескоро мангипе“ (Рим. 8:35, 38, 39).

⁹ Понекогаш иси амен проблемија кола со уморинена амен физички или емоционално, или лена амари радост со иси амен ки служба башо Јехова. Ама адава со ка размислина кобор бут мангела амен о Исус, шај те дел амен сила те истрајна. (Читин 2. Коринќаните 5:14, 15.) Е Исусескоро мангипе дела амен желба понадари да те живина хем те служина е Јеховаске. Адава мангипе ка поможинел аменге те на откажина амен чак ако доживинаја  природно катастрофа, прогонство, сием разочариме или секириме.

10, 11. Кас иси одговорност те керел позорале е пхрален хем е пхењен сој обесхрабриме? Објаснин.

¹⁰ О Јехова исто аѓаар користинела о собрание те керел амен позорале пле мангипаја. Кеда мангаја амаре пхрален хем пхењен, сикаваја кај мангаја е Јехова. Кераја са со шај те уверина амаре пхрален кај тане скапоцена хем кај о Јехова мангела лен (1. Јов. 4:19-21). О апостол Павле пишинѓа: „Охрабринен тумен машкар туменде хем поможинен тумен јекх јекхеа, сар со више хем керена“ (1. Сол. 5:11). Акава шај те керен сарине ко собрание, а на само о старешине. Секова јекх амендар шај те џал пало пример е Јеховаскоро хем е Исусескоро аѓаар со ка утешинел е пхрален хем е пхењен. (Читин Римјаните 15:1, 2.)

¹¹ Несаве Девлескере слуге сој тане ки пхари депресија шај ка ваљани те роден помош таро доктори (Лука 5:31). О старешине хем о јавера ко собрание тане свесна кај иако нане обучиме докторија, и помош хем и утеха која со шај те ден ленге тани бут важно. Сарине амен шај те кера адава со пишинела ки 1. Солуњаните 5:14: „Утешинен околен сој обесхрабриме, поможинен околенге сој слаба, овен стрплива сариненцар“. Кеда амаре пхраља тане обесхрабриме, ваљани те трудина амен те хаљова сар осетинена пе, те ова стрплива ленцар хем те утешина лен. Дали трудинеа тут те кере е јаверен позорале? Сар шај те ове пошукар ки акаја бути?

12. Вакер пример некастар со сине охрабримо таро мангипе со сикавѓа леске о собрание.

¹² Јекх пхен тари Европа вакерела:  „Понекогаш авена манге мисле те мударав ман. Ама о пхраља хем о пхења таро собрание дена ман бари поддршка. Ола спасинѓе мло живото. Секогаш охрабринена ман хем сикавена манге мангипе. Иако само хари џене џанена кај иси ман депресија, о собрание секогаш поможинела манге. Јекх брачно пари тане сар мле духовна родителија. Ола бут грижинена пе манге хем дословно 24 саатија ко диве тане спремна те поможинен манге кеда ка ваљанел“. Џанѓола пе, нашти сарине те поможинен ки исто мера. Ама сарине амен шај бут те кера те поддржина е пхрален хем е пхењен. * (Дикх и фуснота.)

13. Со ваљани те кера ако мангаја те утешина е јаверен?

¹³ Ов спремно те шуне (Јак. 1:19). Сикаваја мангипе кеда сочувствително шунаја. Шај те пуче љубезна пучиба кола со шај те поможинен туке те хаљове сар осетинела пе тло пхрал. Чак таро тло муј ка шај те дикхел пе дали чаче грижинеа тут леске. Џикоте керела лафи, ов стрпливо хем дозволин леске те вакерел сар осетинела пе бизо те чхинаве ле. Ако стрпливо шунеа ле, ка шај пошукар те хаљове сар осетинела пе, а адалеа ка поможине леске те овел ле побари доверба ки туте. Аѓаар ка овел поспремно те шунел тут џикоте пробинеа те поможине леске. Кеда чаче грижинеа тут е јаверенге, ка шај бут те утешине лен.

14. Соске на ваљани те критикујна?

¹⁴ Ма критикујн. Околе со иси ле депресија ка осетинел пе полошно ако мислинела кај критикујнаја ле. Тегани, ка овел аменге бут пхаро те поможина леске. Ки Библија пишинела: „Окова со керела лафи бизо англедер те мислинел, сар те пхене посавела мачеа, ама и чхиб е гоѓаверенгири тани иљачи“ (Изр. 12:18). Иако никогаш нане намерно те дукхава амаре лафенцар некас со иси ле депресија, ама шај бут те дукхава ле ако кераја лафи бизо англедер те размислина. Ако мангаја те кера е јаверен позорале, ваљани те чхива амен ко ленгоро тхан (Мат. 7:12).

15. Коте шај те аракха лафија коленцар со шај те утешина хем те охрабрина е јаверен?

¹⁵ Користин е Девлескоро Лафи те шај те утешине е јаверен. (Читин Римјаните 15:4, 5.) И Библија тани таро „Девел кова со дела истрајност хем утеха“, адалеске тано нормално ки лате те аракха бут лафија кола со дена утеха. Исто аѓаар иси амен и публикација Прирачник за истражување на публикациите на Јеховините сведоци. Лате шај те аракха библиска стихија хем публикацие коленцар со шај те утешина хем те охрабрина амаре пхрален хем пхењен.

16. Кола особине ка поможинен аменге те охрабрина некас?

¹⁶ Ов сочувствително хем љубезно. О Јехова тано „о Дад сој пхердо милост хем о Девел секоле утехакоро“ хем иси ле баро сочувство пле слугенге. (Читин 2. Коринќаните 1:3-6; Лука 1:78; Рим. 15:13.) Адалеске со трудинела пе сине те постапинел сар о Јехова, о Павле денѓа амен шукар пример. Ов пишинѓа: „Сием сине грижлива спрема туменде, сар јекх дај која со хранинела  хем грижинела пе пле чхавенге. Аѓаар, пхерде мангипаја, сием сине спремна те да тумен на само о шукар хабери таро Девел него амаро живото да, соске заманглем тумен“ (1. Сол. 2:7, 8). Ако сием сочувствителна хем љубезна сар о Јехова, ов шај преку аменде те поможинел несаве пхралеске кова со молинѓа пе баши утеха.

17. Сар адава со ка дикха реално ко амаре пхраља ка поможинел аменге те охрабрина лен?

¹⁷ Ма аџикер те овен совршена о пхраља хем о пхења. Ов реално. Ако аџикереа те овен совршена о пхраља хем о пхења, ка разочарине тут (Проп. 7:21, 22). Ма бистре кај о Јехова тано разумно хем на аџикерела амендар повише таро адава со шај те кера. Адалеске, ваљани те ова стрплива јекх јекхеа (Еф. 4:2, 32). Никогаш на мангаја те кера амаре пхраља те мислинен кај на керена доволно ки служба башо Јехова или те споредина лен јаверенцар. Наместо адава, охрабринаја лен хем вакераја о шукар буќа со керена лен. Акава шај те поможинел ленге те овен бахтале џикоте служинена е Јеховаске (Гал. 6:4).

18. Соске мангаја те кера позорале е јаверен?

¹⁸ Секова слуга е Девлескоро тано скапоцено е Јеховаске хем е Исусеске (Гал. 2:20). Амен бут мангаја амаре пхрален хем пхењен, адалеске ваљани те ова ленцар сочувствителна хем љубезна. Те шај те охрабрина е јаверен ваљани „те да амендар са те кера о буќа со анена мир хем со поможинена секоле јекхеске амендар те овел позорало“ (Рим. 14:19). Едвај аџикераја те авел о рај коте со никој нане те овел обесхрабримо! Нане више те овел насвалипе хем војне. О мануша нане више те мерен таро грево со наслединѓем ле хем нане више те овел прогонствија, фамилијарна проблемија хем разочарување. Ко крајо таро милја берша, са о мануша ка овен совршена. Окола со ка ачховен верна ко последно испит ка овен прифатиме таро Јехова сар лескере чхаве ки Пхув хем ка добинен „и славно слобода е Девлескере чхавенгири“ (Рим. 8:21). Адалеске, те сикава мангипе кова со ка керел позорало секоле јекхе амендар хем ка поможинел амен те кхува ко е Девлескоро бут шужо нево свето.