СО КЕРЕА кеда мангеа те џане кобор о саати? Веројатно дикхеа ко тло саати. Замислин туке кај о саати тано јекх текваш палоручко. Со ка вакере несаве амалеске ако пучела тут: „Кобор о саати?“

Адава зависинела таро тхан коте со живинеа. На пример, шај ка вакере: „Акана тано 1:30“ или „Акана тано 13:30“. Ко несаве тхана шај ка вакере: „Акана тано екваш ко дуј“, со значинела кај иси панда 30 минутија џи ко дуј о саати.

Сар рачунинела пе сине о време ко периоди кеда пишинела пе сине и Библија? Сине повише начинија. Ко хебрејска списија користинена пе лафија сар сој: „рано сабајле“, „сабајле“, „екваш о диве“ хем „акшами“ (1. Мој. 8:11; 19:27; 1. Цар. 18:26). Ама понекогаш и Библија користинела попрецизна лафија.

Ко пурано Израел сине нормално те користинен пе стражарија, посебно раќате. О Израелција делинена сине и рат ко трин делија, колен со викинена лен сине „страже“ (Пс. 63:6). Ко Судиите 7:19 читинаја баши „средно стража раќате“. Ама ко време кеда о Исус бијандило, о Евреија делинена сине и рат ко штар страже, сар со керена сине о Гркија хем о Римјања.

Акала страже тане бут пути спомнине ко евангелија. На пример, „ки штарто стража раќате“, о Исус пхирѓа ко пани хем гело ко чамцо коте со сине лескере ученикија (Мат. 14:25). Ки јекх споредба о Исус вакерѓа: „Кеда о домаќини ка џанел ки која стража ка авел о чор, ов ка ачховел џангавдо хем нане те мукхел ле те кхувел ко кхер“ (Мат. 24:43).

О Исус спомнинѓа соштар страже кеда вакерѓа пле учениконге: „Овен џангавде, соске на џанена кеда авела о господари е кхерескоро, дали раќате, или ки екваш и рат, или англедер те пхравѓол о диве, или рано сабајле“ (Мар. 13:35, фусноте). И прво таро адала страже, „раќате“, трајнела сине откеда ка перел о кхам џи отприлика ко ења о саати раќате. И дујто „ки екваш и рат“, трајнела сине отприлика таро ења о саати џи ки екваш и рат. И трито стража, „англедер те пхравѓол о диве“ или „кеда ка гиљавен о башне“, трајнела сине тари екваш и рат џи отприлика ко трин о саати сабајле. Шај баш џикоте трајнела сине акаја стража, и рат кеда астарѓе е Исусе, гиљавѓа о башно (Мар. 14:72). И штарто стража, „рано сабајле“, трајнела сине таро трин о саати џикоте на икљола сине о кхам.

Значи, иако ко библиска времија на сине саатија сар со иси амен авдиве, сине лен начин сар те рачунинен о време.