СТАТИЈА ПРОУЧИБАСКЕ 38
Авен ки манде хем ме ка дав тумен сила
Авен ки манде, сарине со сиен уморна хем со иси тумен пхарипе, хем ме ка дав тумен сила (МАТ. 11:28)
ГИЛИ 17 „Мангава“
БАШО СО КА КЕРА ЛАФИ *
1. Спрема Матеј 11:28-30, саво ветување денѓа о Исус?
О ИСУС денѓа бут шужо ветување јекхе група манушенге со шунена ле сине. Ов вакерѓа ленге: „Авен ки манде... хем ме ка дав тумен сила“. (Читин Матеј 11:28-30.) Акава ветување на сине само чуче лафија. На пример, размислин сар поможинѓа јекхе џувљаке со мучинела пе сине пхаре насвалипаја.
2. Сар поможинѓа о Исус јекхе џувљаке со мучинела пе сине ла пхаре насвалипаја?
2 Акале џувљаке ваљанѓа бут помош. Ој мучинела пе сине више 12 берш хем гели ко бут докторија мислиндор кај ка сасљол, ама никој на успејнѓа те поможинел лаке. Освен адава, спрема о Закони со денѓа ле о Јехова преку о Мојсеј, ој на сине чисто (3. Мој. 15:25). Кеда шунѓа кај о Исус шај те сасљарел са о насвалипа, ој гели те родел ле. Кеда аракхља ле, астарѓа ле таро шеја хем одма састили! Ама освен со сасљарѓа ла, о Исус керѓа нешто повише. Ов понашинѓа пе лаја шукар хем адава керѓа те осетинел пе мангли хем поштујми. На пример, кеда керѓа лаја лафи ов сикавѓа лаке кај мангела ла хем поштујнела ла адалеа со вакерѓа лаке „ми чхај“. Са акава сигурно бут охрабринѓа акале џувља! (Лука 8:43-48).
3. Башо кола пучиба ка кера лафи?
3 Приметин кај и џувли сине адаја со гели ко Исус. Авдиве да тано исто — амен мора те трудина амен те „џа“ ко Исус. Ко амаро време, о Исус на керела чудија те сасљарел о насвалипа адаленгере со „џана“ ки лесте. Ама, ов панда викинела амен: „Авен ки манде... ме ка дав тумен сила“. Ки акаја статија ка добина о одговор башо панџ пучиба: Со мора те кера те шај „те џа“ ко Исус? Со мангља те вакерел е лафенцар: „Лен мло јарем упри туменде“? Со шај те сикљова таро Исус? Соске осетинаја амен шукар џикоте кераја и задача со денѓа ла аменге ов? Хем сар шај понадари да те добина сила тело е Исусескоро јарем?
„АВЕН КИ МАНДЕ“
4-5. Ко саве начинија шај те „џа“ ко Исус?
4 Јекх начин сар „џаја“ ко Исус тано аѓаар со трудинаја амен кобор со шај повише те сикљова башо адава со вакерѓа хем со керѓа (Лука 1:1-4). Никој јавер нашти те керел адава аменге ко тхан — мора амен коркори те проучина акала библиска извештаија. Исто аѓаар, прифатинѓем и покана те „џа“ ко Исус адалеа со одлучинѓем те крстина амен хем те ова е Христосескере ученикија.
5 Јавер начин сар „џаја“ ко Исус тано аѓаар со родаја помош таро собраниска старешине кеда ка ваљани аменге. Преку акала „мануша денде сар поклон“, о Исус грижинела пе пле бакхренге (Еф. 4:7, 8, 11; Јован 21:16; 1. Пет. 5:1-3). Ако дикхаја кај ваљани аменге помош, амен коркори ваљани те џа ко старешине. Нашти те очекујна ола те читинен амаре мисле хем те џанен со ваљанела аменге. Размислин башо јекх пхрал со викинела пе Џулијан. Ов вакерела: „Мора сине те мукхав и бетелско служба соске сине ман проблемија састипаја. Адалеске јекх амал денѓа ман предлог те родав пастирско посета. Ко почеток мислинѓум кај на ваљанела манге адава. Сепак, покасно родинѓум помош, хем адаја посета сине јекх таро најшукар поклонија со добинѓум“. О верна старешине, сар о дуј со посетинѓе е Џулијане, шај те поможинен аменге те размислина сар о Христос, јавере лафенцар, те хаљова сар размислинела ов хем те сикљова сар те џа пало лескоро пример (1. Кор. 2:16; 1. Пет. 2:21). Адава чаче тано јекх таро најшукар поклонија со шај те добина.
„ЛЕН МЛО ЈАРЕМ УПРИ ТУМЕНДЕ“
6. Со мангља о Исус те вакерел е лафенцар: „Лен мло јарем упри туменде“?
6 Кеда вакерѓа: „Лен мло јарем упри туменде“, о Исус шај мангља те вакерел: „Прифатинен мло авторитети“ или: „Авен ки манде тело мло јарем хем заедно ка служина е Јеховаске“. О солдуј изразија сикавена кај ваљани бут те трудина амен те шај те служина е Јеховаске.
7. Спрема Матеј 28:18-20, сави задача тани аменге денди, хем ко со шај те ова сигурна?
7 Амен прифатинѓем е Исусескири покана кеда денѓем лафи кај ка служина е Јеховаске хем крстинѓем амен. Адаја покана важинела сариненге. О Исус никогаш нане те одбинел некас со мангела чаче те служинел е Јеховаске (Јован 6:37, 38). О Јехова денѓа е Исусеске задача те водинел о проповедибе, а амен сар ученикија е Христосескере иси амен чест те учествујна ки адаја задача. Шај те ова сигурна кај о Исус секогаш ка поможинел аменге те кера акаја задача. (Читин Матеј 28:18-20.)
„СИКЉОВЕН МАНДАР“
Поможин е јаверенге те овен силна исто сар со керѓа о Исус (Дикх о пасусија 8-11) *
8-9. Соске о понизна мануша осетинена пе привлечиме ко Исус, хем кола пучиба ваљани те пуча амен?
8 О понизна мануша осетинена пе привлечиме ко Исус (Мат. 19:13, 14; Лука 7:37, 38). Соске? Размислин сави разлика сине машкар о Исус хем о фарисеија. Адала верска водачија на сине љубезна хем сине горда (Мат. 12:9-14). О Исус сине љубезно хем понизно. О фарисеија мангле те овен пенџарде хем важна машкар о мануша. О Исус сикавѓа пле ученикон те на овен сар о фарисеија, него те овен понизна хем те служинен е јаверенге (Мат. 23:2, 6-11). О фарисеија злоупотребинѓе пло авторитети аѓаар со даравена сине е народо (Јован 9:13, 22). О Исус дела сине сила е јаверенге пле шукар постапкенцар хем љубезна лафенцар.
9 Дали џаја пало е Исусескоро пример? Пуч тут: „Дали о јавера мислинена кај сиум шукар хем понизно мануш? Дали спремно керава понизна задаче те шај те служинав е јаверенге? Дали сиум љубезно спрема о јавера?“
10. Сар осетинена пе сине окола со соработинѓе е Исусеа?
10 О Исус сине шукар хем љубезно пле учениконцар, хем сине бахтало со шај те сикавел лен (Лука 10:1, 19-21). Пле понашибаја о Исус керѓа лескере ученикија те осетинен пе слободна те пучен ле. Исто аѓаар, ов пучела лен сине пучиба соске мангела сине те шунел со ола мислинена (Мат. 16:13-16). О растенија ки јекх шукар одржими градина бајровена хем дена бут плоди. Слично, адалеске со о Исус грижинела пе сине пле учениконге, ола осетинена пе сине сигурна хем духовно шукар напредујнена сине. Ола шукар шунена сине лескере поуке хем дена сине плоди аѓаар со керена сине шукар буќа.
Ов пристапливо хем љубезно
Ов ревно ки служба
Ов понизно хем буќарно *
11. Со ваљани те пуча амен?
11 Ако иси тут несаво авторитети, пуч тут: „Сар понашинава ман е јаверенцар ки бути или кхере? Дали о јавера осетинена пе шукар кеда тане манцар? Дали о јавера осетинена пе слободна те пучен ман? Дали шукар шунава кеда вакерена манге со мислинена?“ Никогаш на мангаја те ова сар о фарисеија. Ола хољанена сине околенге со сумнинена пе сине ко ленгере лафија хем понашинена пе сине грубо адаленцар со на мислинена сине исто сар ленде (Мар. 3:1-6; Јован 9:29-34).
„КА ОВЕЛ ТУМЕН НЕВИ СИЛА“
12-14. Соске осетинаја амен шукар џикоте кераја и задача со денѓа аменге о Исус?
12 Соске осетинаја амен шукар џикоте кераја и задача со денѓа аменге о Исус? Иси бут причине, ама ка дикха само некобор.
13 Иси амен о најшукар надгледникија. Иако о Јехова тано о Најбаро Владетели, ов нане сурово господари кова со на сикавела кај ценинела пле слуген. Ов ценинела са адава со кераја ки служба баши лесте (Евр. 6:10). О Јехова дела амен и сила која со ваљани аменге те шај те кера и задача со денѓа ла аменге (2. Кор. 4:7; Гал. 6:5). Амаро Цари о Исус водинела амен аѓаар со денѓа амен совршено пример (Јован 13:15). А о старешине кола со грижинена пе аменге сар пастирија трудинена пе те џан пало е Исусескоро пример, „о баро пастири“ (Евр. 13:20; 1. Пет. 5:2). Ола дена пестар са те шај те овен љубезна, храбра хем те керен амен позорале џикоте сикавена амен хем заштитинена амен.
14 Иси амен о најшукар амала. Размислин башо акава: Иси амен и чест те соработина манушенцар кола со живинена спрема о најуче морална мерилија, ама на мислинена кај тане пошукар е јаверендар. Амаре пхрален хем пхењен иси лен бут способностија, ама на фалинена пе башо адава хем дикхена е јаверен сар побаре пестар. Ки аменде дикхена сар амала, а на само сар соработникија. Ола добором бут мангена амен со тане спремна чак те ден пло живото аменге.
15. Сар ваљани те дикха ки задача со кераја ла?
15 Иси амен и најшукар задача. Сикаваја е манушен о чачипе башо Јехова хем откринаја о ховајба со ширинела лен о Бенг (Јован 8:44). О Сатана чхивела е манушенге пхаре товарија кола со нашти те пхиравен лен. На пример, ов пробинела те убединел амен кај о Јехова на мангела амен хем кај никогаш нане те простинел аменге о гревија. Кобор пхаре ховајба кола со керена о мануша те овен бут обесхрабриме! Ама кеда „џаја“ ко Исус, амаре гревија тане простиме. Освен адава, о Јехова бут мангела секоле јекхе амендар (Рим. 8:32, 38, 39). Анела аменге баро бахталипе адава со шај те поможина е манушенге те сикљовен те овел лен доверба ко Јехова хем адава со дикхаја сар ленгоро живото менинела пе ко пошукар!
ПОНАДАРИ ДА ДОБИН СИЛА ТЕЛО Е ИСУСЕСКОРО ЈАРЕМ
16. Сави разлика иси машкар о товар со поттикнинела амен о Исус те пхирава хем о јавера товарија со мора те пхирава лен?
16 О товар кова со поттикнинела амен о Исус те пхирава ле разликујнела пе таро јавера товарија кола со мора те пхирава лен. На пример, ко крајо таро диве бут џене кеда иранена пе тари бути тане бут уморна хем нане бахтале. Ама бут појавер тано кеда сием зафатиме духовна активностенцар, тегани осетинаја амен побахтале хем позадоволна. Кеда иранаја амен тари бути шај сием бут уморна хем мора силаја те терина амен те џа ко состанок адаја рат. Ама, кеда ка ирана амен кхере пало состанок, бут пути осетинаја амен освежиме хем позорале. Исто бути важинела кеда трудинаја амен те проповедина хем лично те проучина и Библија. О берекетија со добинаја лен тане бут побаре таро трудо хем и сила со даја ла ко адала активностија!
17. Соске ваљани те ова реална, хем ко со ваљани те пазина?
17 Ама, сарине сием свесна кај амаре сила иси ла границе. Адалеске мора те ова реална хем мудро те проценина кобор буќа мангаја те кера. На пример, шај те трошина бут сила аѓаар со ка пробина те кхеда материјална буќа. Приметин со вакерѓа о Исус јекхе терне барвале поглавареске кова со пучља ле: „Со мора те керав те шај те добинав вечно живото?“ Акава терно мануш више сине послушно е Мојсеескере законеске. Хем сигурно сине шукар мануш соске ко евангелие спрема о Марко јасно пишинела кај о Исус мангела ле сине. Адалеске о Исус вакерѓа леске: „Џа, бикин са со иси тут... Тегани ава хем ов мло следбенико“. О мануш мангља те џал пало Исус, ама на мангља те откажинел пе таро пло баро имот (Мар. 10:17-22). Адалеске на прифатинѓа о јарем кова со нудинѓа леске о Исус хем понадари да сине робо е барвалипаске (Мат. 6:24). Со ка кере сине ту те ове сине ко лескоро тхан?
18. Со ваљани понекогаш те кера хем соске?
18 Понекогаш шукар тано те размислина сој аменге ко прво тхан ко живото. Соске? Те шај те ова сигурна кај мудро користинаја амари сила. Размислин башо јекх терно пхрал со викинела пе Марк. Ов вакерела: „Бут берша мислинава сине кај живинава едноставно живото. Сиум сине пионери, ама трошинава сине бут време хем сила те заработинав паре те шај те овел ман пошукар живото. Пучава ман сине соске мло живото уло пхаро. Тегани халиљум кај прво мислинава сине само манге хем кај е Јеховаске дава сине само добором време кобор со ка ачховел ман“. О Марк променинѓа пло размислибе хем пло начин сар живинела сине те шај те керел повише ки служба башо Јехова. Ов вакерела: „Понекогаш секиринава ман баши мли материјално ситуација, ама и помош со дена ман о Јехова хем о Исус поможинена манге те концентриринав ман ки служба башо Јехова“.
19. Соске тано важно те овел амен исправно стави?
19 Амен понадари да ка добина сила тело е Исусескоро јарем ако кераја трин буќа. Прво, ваљани те овел амен исправно стави баши задача со кераја ла. Ој тани таро Јехова хем адалеске кераја ла спрема о упатствија кола со дела лен ов. Амен сием работникија, а о Јехова тано о Господари (Лука 17:10). Ако пробинаја те кера адаја задача ко амаро начин, ка овел аменге бут пхаре соске аѓаар ка борина амен против о јарем. Чак јекх силно бико веројатно ка поврединел пе хем ка уморинел пе ако секогаш пробинела те џал ко пло правцо хем ако боринела пе против о јарем колеа со управинела лескоро господари. Тари јавер страна, ако кераја е Јеховаскири задача ко лескоро начин, ка кера буќа кола со мислинѓем кај нашти те кера лен хем ка накхава пхарипа кола со мислинѓем кај нашти те победина лен. На ваљани те бистра кај лескири намера сигурно ка исполнинел пе хем никој нашти те чхинавел ле ко адава! (Рим. 8:31; 1. Јов. 4:4).
20. Таро саво мотиви ваљани те пхирава е Исусескоро јарем?
20 Дујто, ваљани те служина таро исправно мотиви. Пхираваја е Исусескоро јарем соске мангаја те фалина амаре љубезно Даде, е Јехова. О мануша таро прво веко со џана сине пало Исус тари алчност или таро себична мотивија, бут сигате разочаринѓе пе хем отфрлинѓе лескоро јарем (Јован 6:25-27, 51, 60, 66; Фил. 3:18, 19). Поразлично лендар, окола со џана сине пало Исус адалеске со мангена е Девле хем е манушен, сине бахтале со шај те пхиравен адава јарем цело пло живото џикоте сине ки Пхув хем сине лен надеж кај ка служинен е Христосеа ко небо. Ако иси амен исправно мотиви, амен да ка ачхова бахтале џикоте пхираваја е Исусескоро јарем.
21. Спрема Матеј 6:31-33, ко со шај те овел амен доверба?
21 Трито, понадари да нека овел тут доверба. Амен коркори биринѓем те кера жртве хем те да са амендар ки служба башо Девел. О Исус предупрединѓа амен кај ка ова прогониме. Ама шај те овел амен доверба кај о Јехова ка дел аменге сила те истрајна ки секоја неволја. Кобор повише истрајнаја, добором попаше ка ова е Јеховаја (Јак. 1:2-4). Исто аѓаар, шај те овел амен доверба кај о Јехова ка дел аменге са адава со ваљани аменге, кај о Исус ка грижинел пе аменге сар пастири хем кај амаре пхраља хем пхења ка охрабринен амен. (Читин Матеј 6:31-33; Јован 10:14; 1. Сол. 5:11.) Ваљани ли аменге нешто повише таро акава?
22. Соске шај те ова бахтале?
22 И џувли која со 12 берш мучинела пе сине пхаре насвалипаја добинѓа емоционално хем физичко сила о исто диве кеда о Исус сасљарѓа ла. Ама ла сине ла прилика те добинел вечна берекетија само ако ачховела сине верно следбенико е Христосескоро. Со мислинеа, со керѓа адаја џувли? Ако одлучинѓа те прифатинел е Исусескоро јарем, замислин сави награда добинѓа — те служинел леа ко небо! Секоја жртва со шај керѓа ла те џал пало Христос чаче врединѓа. Бизи разлика сави надеж иси амен — те живина вечно ко небо или ки Пхув — шај те ова бахтале соске прифатинѓем е Исусескири покана: „Авен ки манде“.
ГИЛИ 13 О Исус, амаро пример
^ пас. 5 О Исус викинела амен: „Авен ки манде“. Со ваљани те кера те шај те прифатина лескири покана? О одговор ко акава пучибе ка добина ле ки акаја статија. Освен адава, акаја статија ка сетинкерел амен сар адава со соработинаја е Исусеа дела амен сила.
