1-2. а) Соске на ваљани те дара таро Армагедон? б) Башо кола пучиба ка кера лафи ки акаја статија?

КЕДА шунена о лафи „Армагедон“, несаве мануша мислинена ки нуклеарно војна или ки еколошко катастрофа. Ама, ки Библија пишинела кај и војна Армагедон ка анел бут берекетија хем адалеске на ваљани те дара, него те ова бахтале! (Отк. 1:3). Ко Армагедон нане те овел уништими и манушикани раса, него ка овел спасими! Сар?

² И Библија сикавела кај и војна Армагедон ка спасинел и манушикани раса адалеа со ка анел крајо е манушикане владибаске, ка уништинел е лошна манушен а ка заштитинел е праведна манушен. Исто аѓаар, ка овен уништиме окола со уништинена и Пхув (Отк. 11:18). Те шај пошукар те хаљова акала чачипа, те кера лафи башо акала пучиба: Сој тано о Армагедон? Кола буќа ка случинен пе кратко англедер о Армагедон? Со ваљани те кера те шај те ова машкар адала со ка овен спасиме ко Армагедон? Хем сар шај те ачхова верна е Јеховаске џикоте о Армагедон авела са попаше?

3. а) Со значинела о лафи „Армагедон“? б) Спрема Откровение 16:14, 16, соске шај те вакера кај о Армагедон тано симболично тхан?

³ Читин Откровение 16:14, 16. О лафи „Армагедон“ појавинела пе само јекх пути ки Библија хем авела таро јекх хебрејско лафи кова со значинела „и планина ко Мегидо“ (Отк. 16:16, фус.). О Мегидо сине јекх диз ко пурано Израел (Ис. Нав. 17:11). Ама, о Армагедон нане  несаво дословно тхан ки Пхув. Акале лафеа конкретно мислинела пе ки ситуација кеда „о царија таро цело свето“ ка кхеден пе те боринен пе против о Јехова (Отк. 16:14). Ама, ки поопшто смисла, е лафеа „Армагедон“ исто аѓаар мислинела пе ки војна која со ка овел одма пало кхедибе е царенгоро ки Пхув. Котар џанаја кај о Армагедон тано симболично тхан? Прво, о подрачје околу о Мегидо тано бут тикно те шај те кхеден пе „о царија таро цело свето“, ленгири војска хем ленгоро оружје. Дујто, сар со ка дикха после ки акаја статија, и војна Армагедон ка почминел кеда „о царија таро цело свето“ ка нападинен е Девлескере слуген кола со живинена ки цело Пхув.

4. Соске о Јехова поврзинела пли последно бари војна е дизјаја Мегидо?

⁴ Соске о Јехова поврзинела пли последно бари војна е дизјаја Мегидо? Ко пурано време, ко Мегидо хем ки Језраелско Долина водинена пе сине бут борбе. Понекогаш о Јехова поможинела сине пле народоске те побединел ко адала борбе. На пример, „ко пања ко Мегидо“, о Девел поможинѓа е израелско судијаске е Варакоске те побединел е ханаанско војска која со водинела ла сине о Сисара. О Варак хем и пророчица и Девора сине благодарна е Јеховаске баши ленгири бари победа. Ола гиљавѓе: „О ѕвезде таро небо боринѓе пе... против о Сисара. О поток Кисон ингарѓа лен“ (Суд. 5:19-21).

5. Која бари разлика иси машкар и војна Армагедон хем и борба со водинѓа ла о Варак?

⁵ О Варак хем и Девора завршинѓе пли гили е лафенцар: „Нека овен уништиме са тле душмања, о Јехова! А окола со мангена тут нека овен сар о кхам кеда икљовела ки пли слава!“ (Суд. 5:31). Слично сар акаја борба, ки војна Армагедон ка овен уништиме сарине со противинена пе е Девлеске, а окола со мангена ле ка овен спасиме. Ама машкар акала дуј војне иси јекх бари разлика. Ко Армагедон е Девлескере слуге нане те боринен пе хем нане те овел лен оружје! Ола ка овен смириме хем ка овел лен доверба ко Јехова хем ки лескири небесно војска (Иса. 30:15; Отк. 19:11-15).

6. Со шај о Јехова те користинел ко Армагедон те шај те побединел пле душманен?

⁶ Сар о Девел ка побединел пле душманен ко Армагедон? Ов шај те керел адава ко повише начинија. На пример, шај те користинел земјотрес, кукудик хем громија (Јов 38:22, 23; Езек. 38:19-22). Шај те керел лескере душмања те боринен пе машкар песте (2. Лет. 20:17, 22, 23). Исто аѓаар, шај те користинел пле ангелен те шај те мударел е лошна манушен (Иса. 37:36). Бизи разлика со ка користинел о Девел ки адаја војна, ов целосно ка побединел пле душманен. Сарине со противинена пе ка овен уништиме, а са о праведна ка овен спасиме (Изр. 3:25, 26).

7-8. а) Спрема 1. Солуњаните 5:1-6, сави објава ка ден о политичка водачија? б) Соске акава ка овел јекх опасно ховајбе?

⁷ И објава „мир хем сигурност“ ка случинел пе англедер „е Јеховаскоро диве“. (Читин 1. Солуњаните 5:1-6.) Ко 1. Солуњаните 5:2, е лафенцар „е Јеховаскоро диве“ мислинела пе ки „бари неволја“ (Отк. 7:14). Котар ка џана кеда ка почминел адаја неволја? И Библија вакерела кај о политичка водачија ка објавинен: „Мир хем сигурност!“ Адава ка овел о знако кај ка почминел и бари неволја.

⁸ Соске о политичка водачија ка објавинен „мир хем сигурност“? На џанаја точно. Дали о верска водачија ка учествујнен ко адава? Шај. Сар хем те овел, сигурна сием кај и објава ка овел панда јекх ховајбе кова со авела таро демонија. Ама, акава ховајбе ка овел посебно опасно соске ка керел о мануша те мислинен кај тане сигурна баш англедер те  почминел и најбари неволја ки манушикани историја. Уствари, тегани изненадено ка овен уништиме исто сар со астарена о дукха јекхе кхамне ромња. Со ка овел е Јеховаскере верна слугенцар? Иако е Јеховаскоро диве ка почминел изненадено, ола ка овен спремна.

9. Дали о Јехова таро јекх пути ка уништинел е Сатанаскоро свето? Објаснин.

⁹ О Јехова нане те уништинел е Сатанаскоро свето таро јекх пути сар со керѓа адава ко е Ноескоро време, него адава ка керел ле ко дуј фазе. Прво, ка уништинел о Баро Вавилон — са о ховавне религие. А пало адава, ко Армагедон, ка уништинел о јавер дело таро е Сатанаскоро свето коте сој вклучимо о политичко, о воено хем о трговско систем. Те дикха несаве деталија башо акала дуј важна настанија.

10. Спрема Откровение 17:1, 6 хем 18:24, соске о Јехова ка уништинел о Баро Вавилон?

¹⁰ „И осуда упри и бари блудница.“ (Читин Откровение 17:1, 6; 18:24.) О Баро Вавилон керѓа бут мануша те на поштујнен е Девлескоро анав. И ховавни религија сикавела ховајба башо Девел. Ој керела духовно блуд адалеа со поддржинела е манушикане владен. И ховавни религија користинела пли моќ хем пло влијание те мучинел хем те искористинел пле верникон. Освен адава, ој тани криво башо мерибе буте манушенгоро, чак хем несаве Девлескере слугенгоро (Отк. 19:2). Сар о Јехова ка уништинел о Баро Вавилон?

11. Сој тано о „лоло ѕверо“, хем сар о Девел ка користинел ле против о Баро Вавилон?

¹¹ О Јехова ка уништинел „е баре блудница“ преку „о лоло ѕверо“ хем лескере „деш шинга“. Адава симболично ѕверо преставинела е Обединета нациен. О деш шинга преставинена е авдисутне светска владен кола со поддржинена акале организација. Кеда ка авел о диве кова со о Девел одрединѓа ле, о светска владе хем о Обединета нацие ка нападинен е Баре Вавилоне — е ховавне религија. Ола „ка уништинен ла хем ка хуљавен ла нанги“  аѓаар со ка лен лакоро барвалипа хем ка откринен лакоро лошнипа (Отк. 17:3, 16). Адава уништибе ка овел добором сигате со ка дикхјол сар ка пхене „ко јекх диве“. Адалеске, акава ка овел баро шок адаленге со поддржинена ла, соске ој бут време фалинела пе: „Бешава сар царица, хем на сиум удовица, хем никогаш нане те дикхав жал“ (Отк. 18:7, 8).

12. Со нане те мукхел о Јехова хем соске?

¹² О Девел нане те мукхел е светско властен те уништинен лескере народо. Е Девлескере слуге дичинена пе со пхиравена лескоро анав хем шунѓе лескири заповед те икљовен тари ховавни религија (Дела 15:16, 17; Отк. 18:4). Исто аѓаар, ола бут трудинѓе пе те поможинен е јаверенге да те икљовен латар. Спрема акава, е Девлескере слуген нане те аракхел лен „лакере неволје“. Сепак, ленгири вера ка овел испитими.

13. а) Кој тано о Гог? б) Спрема Езекиел 38:2, 8, 9, кеда ка почминел и војна Армагедон?

¹³ О напад таро Гог. (Читин Езекиел 38:2, 8, 9.) Откеда ка овен уништиме са о ховавне религие, ки Пхув ка ачховел само јекх религија — е Јеховаскере сведокија. Џанѓола пе, о Сатана ка овел бут хољамо башо адава. Ов ка сикавел пли холи аѓаар со ка користинел „изјаве таро демонија“, јавере лафенцар ховавне информацие те шај те поттикнинел јекх коалиција таро са о народија те нападинел е Јеховаскере слуген (Отк. 16:13, 14). Адаја коалиција викинела пе „Гог тари пхув Магог“. Кеда о народија ка нападинен е Девлескере народо, тегани ка почминел и војна Армагедон (Отк. 16:16).

14. Со ка хаљовел о Гог?

¹⁴ О Гог ка сикавел доверба ко пло „телесно вас“, јавере лафенцар, ки пли воено сила (2. Лет. 32:8). Амен ка овел амен доверба ко амаро Девел о Јехова, а адава ка дикхјол глупаво е светско властенге. Соске ка дикхјол ленге аѓаар? Адалеске со о девела таро Баро Вавилон, кова со некогаш сине моќно, на спасинѓе ле таро „ѕверо“ хем таро „деш шинга“! (Отк. 17:16). Значи о Гог ка мислинел  кај локхе ка побединел. Ов ка нападинел е Јеховаскере народо „сар облакија кеда учхарена и пхув“ (Езек. 38:16). Ама, о Гог сигате ка хаљовел кај кхувѓа ки стапица. Слично сар о Фараони ко Црвено Море, о Гог ка хаљовел кај, уствари, боринела пе против о Јехова (2. Мој. 14:1-4; Езек. 38:3, 4, 18, 21-23).

15. Со ка керел о Исус ко Армагедон?

¹⁵ О Христос хем лескере небесна војске ка бранинен е Девлескере слуген хем целосно ка уништинен е Гогескере војска (Отк. 19:11, 14, 15). Ама, со ка овел е Девлескере најбаре душманеа, е Сатанаја, кова со ка ховавел е народон хем ка керел те нападинен е Девлескере слуген ки војна Армагедон? О Исус ка фрдел ле хем лескере демонен ки бездна, коте со ка овен пханле милја берша (Отк. 20:1-3).

16. а) Сар сикаваја кај пенџараја е Девле? б) Со ка овел е манушенцар со пенџарена е Девле ки војна Армагедон?

¹⁶ Бизи разлика кобор берш сием ко чачипа, те шај те ова спасиме ко Армагедон мора те сикава кај пенџараја е Девле хем кај шунаја о „шукар хабери башо амаро Господари о Исус“ (2. Сол. 1:7-9). Амен пенџараја е Девле кеда џанаја со мангела, со мрзинела хем кола тане лескере мерилија. Исто аѓаар, сикаваја кај пенџараја ле кеда сием леске послушна, кеда мангаја ле хем кеда сием верна само леске (1. Јов. 2:3-5; 5:3). Ако кераја акава, о Девел ка пенџарел амен, јавере лафенцар, ка овел амен лескоро одобрување (1. Кор. 8:3). Адалеске, ка ова спасиме ко Армагедон!

17. Со значинела те шуна „о шукар хабери башо амаро Господари о Исус“?

¹⁷ Ко „шукар хабери башо амаро Господари о Исус“, тане вклучиме са о чачипа башо кола со о Исус сикавела сине, а кола со аракхљовена ко е Девлескоро Лафи. Шунаја о шукар хабери кеда живинаја спрема лесте, јавере лафенцар кеда и служба башо Девел аменге ко прво тхан, кеда живинаја спрема е Девлескере праведна мерилија хем кеда проповединаја башо е Девлескоро Царство (Мат. 6:33; 24:14). Исто аѓаар, ваљани те  поддржина е Христосескере помазиме пхрален џикоте керена и бари одговорност со иси лен те проповединен о шукар хабери хем те поможинен е манушенге те овен е Исусескере ученикија (Мат. 25:31-40).

18. Ко саво начин е Христосескере помазиме пхрален ка овел лен прилика те иранен ко мангипе со сине ленге сикавдо?

¹⁸ Е Девлескере помазиме слуген панда хари ка овел лен прилика те наградинен „е јавере бакхрен“ башо мангипе со сикавѓе ле ленге (Јован 10:16). Сар? Англедер те почминел и војна Армагедон, са о 144.000 помазаникија више ка овен воскресниме ко небо сар бесмртна духовна личностија. Тегани ола ка овен дело тари и небесно војска која со ка уништинел е Гоге хем ка заштитинел јекх „баро мноштво“ Јеховаскере слуге (Отк. 2:26, 27; 7:9, 10). О баро мноштво ка овел бут бахтало со сине ле прилика те поддржинел е Јеховаскере помазиме слуген џикоте панда сине ки Пхув!

19-20. Иако иси амен проблемија, сар шај те ачхова верна џикоте аваја са попаше џи ко Армагедон?

¹⁹ Ко акала пхаре последна диве, бут џене таро е Јеховаскере слуге доживинена баре испитија. Иако случинела пе адава, шај те ачхова верна хем ко исто време те ова бахтале (Јак. 1:2-4). Јекх бути со бут ка поможинел аменге тани те молина амен таро вило (Лука 21:36). Освен со ка молина амен, ваљани секова диве те читина е Девлескоро Лафи хем те размислина башо адава со пишинела ки лесте, коте сој вклучиме хем о пророштвија башо адава со ка случинел пе панда хари (Пс. 77:12). Ако кераја акала буќа хем ако даја са амендар ки служба, ка овел амен силно вера хем зорали надеж!

²⁰ Замислин само кобор ка ове бахтало кеда о Баро Вавилон ка овел уништимо хем кеда ка завршинел и војна Армагедон! Сој панда поважно, кобор ка ове бахтало кеда секова мануш ка поштујнел е Девлескоро анав хем лескоро право те владинел! (Езек. 38:23). Чаче, о Армагедон ка анел берекетија адаленге со пенџарена е Девле, со шунена лескере Чхаве хем со истрајнена џи ко крајо (Мат. 24:13).