1. Соске ваљани те ова подложна е Јеховаске?

О ЈЕХОВА тано амаро Створители хем адалеске ваљани те ова леске подложна *. Ле иси ле право те вакерел аменге сар те постапина (Отк. 4:11). Ама иси амен панда јекх силно причина соске те ова подложна е Јеховаске — лескоро начин сар владинела тано најшукар. Ки цело манушикани историја, бут мануша владинѓе упро јавера мануша. Ама, кеда спорединаја ленгоро начин сар владинена е Јеховаскере владибаја, хаљоваја кај ов тано о најмудро, најљубезно, најмилостиво хем најсочувствително владетели (2. Мој. 34:6; Рим. 16:27; 1. Јов. 4:8).

2. Спрема Евреите 12:9-11, таро кола причине ваљани те ова подложна е Јеховаске?

² О Јехова тано амаро Дад кова со бут мангела амен. Адалеске, ов мангела те ова леске подложна таро мангипе, а на тари дар. Ко пло писмо џи ко Евреија, о Павле објаснинѓа кај ваљани секогаш „те ова подложна е Дадеске“ соске ов сикавела амен башо амаро шукарипе. (Читин Евреите 12:9-11.)

3. а) Сар сикаваја кај сием подложна е Јеховаске? б) Башо кола пучиба ка добина одговор?

³ Сикаваја кај сием подложна е Јеховаске кеда трудинаја амен те шуна ле ко са хем кеда боринаја амен е желбаја коркори те одлучина сој исправно, а сој погрешно  (Изр. 3:5). Кобор повише ка запознајна е Јеховаскере особине добором полокхе ка овел аменге те ова леске подложна. Соске? Адалеске со акала особине дикхјона ко са со керела (Пс. 145:9). Кобор повише сикљоваја башо Јехова добором повише мангаја ле. А кеда мангаја е Јехова, тегани на ваљани аменге списако башо адава со смејнаја, а со на смејнаја те кера. Трудинаја амен те џа пало е Јеховаскоро пример аѓаар со мангаја адава сој шукар, а мрзинаја адава сој лошно (Пс. 97:10). Ама, соске понекогаш аменге пхаро те ова подложна е Јеховаске? Исто аѓаар, со шај о старешине, о дада хем о даја те сикљовен таро управители о Неемија, таро цари о Давид хем тари Марија, е Исусескири дај? Ки акаја статија ка добина одговор башо акала пучиба.

4-5. Спрема Римјаните 7:21-23, соске шај те овел аменге пхаро те ова подложна е Јеховаске?

⁴ Јекх причина соске шај те овел аменге пхаро те ова подложна е Јеховаске тани адаја со сием несовршена, а адава керела те на манга секогаш те шуна е Јехова. Кеда о Адам хем и Ева на шунѓе е Девле хем хале таро забранимо плоди, ола биринѓе коркори те одлучинен сој шукар, а сој лошно (1. Мој. 3:22). Исто сар ленде, авдиве да повише мануша на шунена е Девле хем мангена коркори те одлучинен сој исправно, а сој погрешно.

⁵ Иако амен на сием сар ленде адалеске со пенџараја хем мангаја е Јехова, понекогаш пхаро аменге те ова леске подложна. О апостол Павле да соочинѓа пе акале проблемеа. (Читин Римјаните 7:21-23.) Исто сар о Павле, амен мангаја те кера адава сој исправно англо е Јеховаскере јакхја. Ама, мора секогаш те борина амен против и желба те постапина неисправно.

6-7. Која тани панда јекх причина со шај те керел аменге пхаро те ова подложна е Јеховаске? Вакер пример.

⁶ Јавер причина соске понекогаш аменге пхаро те ова подложна е Јеховаске тани о влијание тари култура ки која со барилем. О мануша ко свето вакерена аменге те постапина спротивно таро адава со вакерела аменге о Јехова. Адалеске ваљани бут те трудина амен те на размислина сар ленде. Те дикха само јекх пример.

⁷ Ко несаве тхана е тернен иси лен баро притисок те заработинен бут паре. Јекх пхен со викинела пе Мери * сине ла асавко проблеми. Англедер те запознајнел е Јехова, ој студиринѓа ко јекх таро најшукар факултетија ки лакири пхув. Лакири фамилија керела сине лаке притисок те аракхел шукар платими хем ценими бути. Ој да мангела сине адава. Ама, откеда запознајнѓа хем замангља е Јехова, и Мери менинѓа пле целија. Сепак, понадари да ваљани те боринел пе коркори пеа. Ој вакерела: „Понекогаш добинава несави понуда буќаке коте со шај те заработинав бут паре, ама џанава кај ка чхинавел ман те служинав е Јеховаске аѓаар сар со служинава леске акана. О начин сар сиум сине воспитими понадари да керела манге пхаро те одбинав асавки понуда. Мора бут те молинав е Јехова те поможинел манге те боринав ман против о искушение те прифатинав бути која со шај те чхинавел ман те дав мло најшукар ки служба“ (Мат. 6:24).

8. Со ка дикха акана?

⁸ Сар со дикхлем, башо амаро шукарипе тано те ова подложна е Јеховаске. Ама околен со иси лен несаво авторитети, сар сој о старешине, о дада хем о даја, иси лен панда јекх причина те овен подложна е Девлеске — адалеа со ка овен подложна шај те поможинен е јаверенге. Те дикха акана некобор примерија тари Библија кола со сикавена сар  ваљани те користина о авторитети ко начин со керела бахтало е Јехова.

9. Саве проблеменцар соочинѓа пе о Неемија?

⁹ О Јехова денѓа е старешиненге важно одговорност те грижинен пе башо лескоро народо (1. Пет. 5:2). О старешине шај бут те сикљовен таро начин сар о Неемија постапинела сине е Јеховаскере слугенцар. Сар управители ки Јуда, е Неемија сине ле баро авторитети (Неем. 1:11; 2:7, 8; 5:14). Замислин туке несаве таро проблемија коленцар со соочинѓа пе о Неемија. Ов дознајнѓа кај о Евреија користинѓе о храми башо буќа коленцар со сикавѓе кај на ценинена о чачутно обожавибе хем на поддржинѓе е левитен аѓаар сар со родела сине о Закони. О Евреија исто аѓаар пхагле о закони адалеа со на икерена сине и сабота, а несаве мурша лена песке сине ромњен таро јавера народија. Сар постапинѓа о управители о Неемија ки акаја пхари ситуација? (Неем. 13:4-30).

10. Сар постапинѓа о Неемија е Девлескере народоја?

¹⁰ О Неемија на користинѓа пло авторитети те чхивел силаја е народо те прифатинел лескере мерилија. Наместо адава, ов родинѓа водство таро Јехова аѓаар со таро вило молинѓа пе леске хем сикавела сине е народо башо е Јеховаскоро закони (Неем. 1:4-10; 13:1-3). Освен адава, о Неемија понизно керела сине бути заедно пле пхраленцар аѓаар со поможинѓа ленге палем те градинен о ѕидија таро Ерусалим (Неем. 4:15).

11. Спрема 1. Солуњаните 2:7, 8, сар ваљани о старешине те понашинен пе е пхраленцар хем е пхењенцар ко собрание?

¹¹ О старешине шај нане те соочинен пе иста проблеменцар сар о Неемија, ама шај те џан пало лескоро пример ко бут начинија. На пример, бут трудинена пе те поможинен е пхраленге хем е пхењенге. Хем на мислинена кај тане пошукар е јаверендар адалеске со иси лен авторитети. Наместо адава, ола љубезно грижинена пе е собраниеске. (Читин 1. Солуњаните 2:7, 8.) Адалеске сој тане понизна хем чаче мангена е јаверен, љубезно  керена ленцар лафи. О Ендру, јекх искусно старешина, вакерела: „Приметинѓум кај кеда јекх старешина понашинела пе љубезно хем сар амал е пхраленцар хем е пхењенцар, адава позитивно влијајнела упри ленде. Акала особине поттикнинена лен те соработинен е старешиненцар“. Јекх јавер пхрал со викинела пе Тони, кова со бут берша служинела сар старешина, вакерела: „Трудинава ман те применинав о совет таро Филипјаните 2:3 хем секогаш те дикхав ко јавера сар побаре мандар. Акава поможинела манге те на понашинав ман сар господари е јаверенцар“.

12. Соске тано важно о старешине те овен понизна?

¹² О старешине мора те овен понизна, исто сар о Јехова сој понизно. О Јехова тано о Владетели цело вселенакоро, ама ов „тељола“ хем „таро право ваздела е чороле“ (Пс. 18:35; 113:6, 7). Освен адава, и Библија вакерела аменге кај о Јехова мрзинела е горда манушен (Изр. 16:5).

13. Соске јекх старешина ваљани те пазинел саве буќа вакерела хем ко саво начин вакерела лен?

¹³ Јекх старешина кова сој подложно е Јеховаске ваљани те пазинел саве буќа вакерела хем ко саво начин вакерела лен. Ако на пазинела, шај ка керел грубо лафи некасаја со на поштујнела ле (Јак. 1:26; Гал. 5:14, 15). О Ендру, о старешина коле со спомнинѓем ле англедер, вакерела: „Сине ситуацие кеда мангљум те керав грубо лафи несаве пхралеа или пхењаја башо коленге со мислинѓум кај на поштујнена ман сар старешина. Ама, размислинава сине башо е Девлескере верна слуге тари Библија хем адава поможинѓа манге те хаљовав кобор тано важно те овав понизно хем кротко“. О старешине сикавена кај тане подложна е Јеховаске адалеа со љубезно хем шукарипаја керена лафи е пхраленцар хем е пхењенцар таро собрание, машкар кола сој о јавера да старешине (Кол. 4:6).

14. Сави задача денѓа о Јехова е даденге, хем со аџикерела лендар?

¹⁴ О Јехова чхивѓа е даден те овен поглаварија ки фамилија хем адалеске лендар аџикерела те сикавен хем те воспитинен пумаре чхавен (1. Кор. 11:3; Еф. 6:4). Ама, акава на значинела кај ола шај те користинен пло авторитети сар мангена. О Јехова керѓа и фамилија хем адалеске о дада ка одговоринен англи лесте башо начин сар постапинена пле фамилијаја (Еф. 3:14, 15). О дада сикавена кај тане подложна е Јеховаске аѓаар со користинена пло авторитети ко начин со керела бахтало е Јехова. Ола шај бут те сикљовен таро живото е Давидескоро.

15. Соске о цари о Давид тано шукар пример е даденге?

¹⁵ О Јехова на само со чхивѓа е Давиде  те овел поглавари ки пли фамилија, него чхивѓа ле те овел поглавари хем упро цело израелско народо. Сар цари, е Давиде сине ле бари моќ. Ко несаве ситуацие, ов користинѓа пли моќ ко погрешно начин хем керѓа сериозна грешке (2. Сам. 11:14, 15). Ама о Давид прифатинѓа о укор таро Јехова хем аѓаар сикавѓа кај тано подложно. Ов ки молитва вакерѓа е Јеховаске сар осетинела пе (Пс. 51:1-4). Освен адава, сине понизно хем прифатинела сине советија на само таро мурша него таро џувља да (1. Сам. 19:11, 12; 25:32, 33). О Давид сиклило таро пле грешке хем најважно ко живото сине леске те служинел е Јеховаске.

16. Со шај те сикљовен о дада таро цари о Давид?

¹⁶ Со шај те сикљовен тумен о дада таро пример е Давидескоро? Ма злоупотребинен о авторитети со денѓа туменге о Јехова. Признајнен тумаре грешке хем прифатинен о библиска советија таро јавера. Ако керена аѓаар, тумари фамилија ка поштујнел тумен адалеске со сиен понизна. Кеда молинена тумен заедно тумаре фамилијаја, вакерен е Јеховаске тумаре најхор чувствија. Аѓаар тумари фамилија ка шунел кобор баро мангипе иси тумен спрема о Јехова хем кобор ваљанела туменге лескири помош хем водство. А најважно таро са, ко прво тхан ко живото нека овел туменге и служба башо Јехова (5. Мој. 6:6-9). Тумаро шукар пример тано јекх таро најскапоцена поклонија со шај те ден лен тумаре фамилијаке.

17. Сави улога денѓа о Јехова е дајенге?

¹⁷ О Јехова денѓа е дајаке јекх важно улога ки фамилија хем денѓа ла несаво авторитети упро чхаве (Изр. 6:20). Уствари, о лафија хем о постапке е дајакере шај те влијајнен упро лакере чхаве цело живото (Изр. 22:6). Те дикха со шај те сикљовен о даја тари Марија, и дај е Исусескири.

18-19. Со шај о даја те сикљовен таро пример е Маријакоро?

¹⁸ И Марија бут шукар пенџарела сине о света списија. Ла сине ла хор поштовање спрема о Јехова хем сине ла бут паше амалипе леа. Ој сине спремно подложно те шунел е Јехова, иако адава значинела сине кај целосно ка менинел пе лакоро живото (Лука 1:35-38, 46-55).

¹⁹ Дајален, тумен шај те џан пало пример е Маријакоро ко некобор важна начинија. Сар? Прво, ваљани те аракхен тумаро амалипе е Јеховаја аѓаар со лично ка проучинен и Библија хем редовно ка молинен тумен коркори. Дујто, ваљани те овен спремна те керен промене ко тумаро живото те шај те керен бахтало е Јехова. На пример, шај бајрарѓе тумен родителија кола со сигате нервиринена пе сине хем керена сине туменцар грубо лафи. Адалеске шај мислинѓен туменге кај  аѓаар тано нормално те постапинен тумаре чхавенцар. Чак откеда дознајнѓен сар мангела о Јехова те постапинен тумаре чхавенцар, шај панда туменге пхаро те ачховен смириме хем стрплива, посебно кеда сиен уморна, а ола на шунена тумен (Еф. 4:31). Ко асавке ситуацие, бут тано важно те молинен е Јехова те поможинел туменге. Јекх дај со викинела пе Лидија вакерела: „Понекогаш ваљани бут те молинав ман те шај те на вакерав нешто грубо кеда мо чхаво на шунела ман. Случинела пе манге те ачховав ки екваш реченица хем ки манде те молинав ман е Јеховаске те поможинел манге. И молитва поможинела манге те ачховав смирими“ (Пс. 37:5).

20. Саво предизвик иси несаве дајен, хем сар шај те икљовен ко крајо леа?

²⁰ Јавер предизвик колеа со соочинена пе несаве даја тано адава сој ленге пхаро те сикавен пле чхавенге кај мангена лен (Тит 2:3, 4). Бут таро адала даја бариле ки фамилија коте со ленгере родителија на сине паше пле чхавенцар. Ако ту да бариљан ко асавко начин, на ваљани те кере и исто грешка сар тле родителија. Јекх дај сој тани подложно е Јеховаске шај те сикљовел сар те сикавел мангипе пле чхавенге. Точно тано адава кај шај те овел лаке пхаро те менинел о начин сар размислинела, пле чувствија хем постапке. Ама, шај те успејнел те керел асавке промене, а аѓаар ка овел побахтали хем ој хем лакири фамилија.

21-22. Спрема Исаија 65:13, 14, саве берекетија добинена окола сој тане подложна е Јеховаске?

²¹ О цари о Давид џанља кобор тано корисно те овел пе подложно е Јеховаске. Ов пишинѓа: „Е Јеховаскере наредбе тане праведна, керена бахтало о вило, е Јеховаскири заповед тани чисто, пхравела о јакхја. Ола опоменинена тле слуга. Адава со икерела лен, ка овел бут наградимо“ (Пс. 19:8, 11). Авдиве, шај јасно те дикха и разлика машкар окола сој тане подложна е Јеховаске хем окола со отфрлинена лескере мудра советија. Окола сој тане подложна е Јеховаске тане бут бахтале. (Читин Исаија 65:13, 14.)

²² Кеда о старешине, о дада хем о даја тане подложна е Јеховаске, иси лен пошужо живото, ленгири фамилија овела побахтали хем ко собрание иси панда побаро јекхипе. А сој најважно, аѓаар керена бахтало е Јеховаскоро вило (Изр. 27:11). Нане побаро берекети таро акава.