Соске ваљани аменге е Девлескоро Царство?
Ко почеток тари манушикани историја, амаро Створители, колескоро анав сој тано Јехова, сине о единствено Владетели. Ов владинѓа мангипаја хем керѓа јекх бут шужи рајско градина коте со шај сине те живинен о мануша. Освен адава, денѓа лен бут хајбаске хем бути со керела лен бахтале (1. Мојсеева 1:28, 29; 2:8, 15). Те на отфрлинен сине о мануша е Девле сар пумаро Владетели, ки Пхув панда ка овел сине мир.
О прва мануша отфрлинѓе е Девле сар пло владетели
Тари Библија дознајнаја кај јекх бунтовно ангели, кова со покасно сине пенџардо сар Сатана о Бенг, вакерѓа кај е Девле нане ле право те владинел упро мануша. Ов индиректно вакерѓа кај о мануша ка овен побахтале бизо е Девлескоро водство. Жално тано со амаре прва родителија, о Адам хем и Ева, геле пало е Сатанаскоро пример хем противинѓе пе е Девлеске (1. Мојсеева 3:1-6; Откровение 12:9).
Адалеске со отфрлинѓе е Девле сар пумаро Владетели, о Адам хем и Ева нашти сине повише те живинен ко рај, хем нашавѓе и можност те овел лен совршено састипе хем те живинен вечно (1. Мојсеева 3:17-19). Исто аѓаар, ленгири одлука негативно влијајнѓа упро ленгере чхаве да со сине лен покасно. И Библија вакерела кај адалеске со о Адам грешинѓа, „о грево кхувѓа ко свето хем преку о грево о мерибе“ (Римјаните 5:12). Ама, о грево анѓа џи ко панда јекх сериозно проблеми кова тано пишимо ки Библија: „О мануш владинела упро мануш ки лескири штета“ (Проповедник 8:9). Јавере лафенцар, кеда о мануша владинена јекх упро јавер, секогаш иси лошна последице.
О ПОЧЕТОК ТАРО МАНУШИКАНО ВЛАДИБЕ
О Нимрод бунинѓа пе против о Јехова
О Нимрод сине о прво манушикано владетели со спомнинела пе ки Библија. Ов бунинѓа пе против о Девел. Панда таро време е Нимродескоро, бут џене користинѓе пли моќ те шај те керен штета е јаверенге. Околу 3.000 берш англедер, о цари о Соломон пишинѓа: „Дикхљум о асва околенгере сој мучиме хем на сине кој те утешинел лен. И моќ сине ко адала со мучинена лен“ (Проповедник 4:1).
Авдиве да ништо на менинѓа пе. Ко 2009 берш ки јекх публикација таро Обединета Нацие, вакерела пе кај о лошно начин владибаскоро тано јекх таро главна причине соске овена лошна буќа ко свето.
АЛО ВРЕМЕ БАШИ ПРОМЕНА!
Е светоске ваљанена пошукар владетелија хем пошукар владибе. Амаро Створители ветинѓа аменге баш адава!
Чак о најшукар владе на успејнѓе те решинен о сериозна проблемија е манушенгере
О Девел керѓа јекх Царство или влада која ка заменинел са е манушикане владен хем кова со „ка ачховел засекогаш“ (Даниел 2:44). Адава тано о Царство колеске со молинена пе милиоња мануша (Матеј 6:9, 10). Ама, о Девел нане те овел адава кова со ка владинел ки акаја влада. Наместо адава, ов биринѓа те овел о владетели некој со живинѓа сар мануш ки Пхув. Кас биринѓа о Девел?
