Шај ли те замислине туке о живото ки Пхув бизо кхам? О кхам дела енергија те шај о кашта те мукхен листија хем лулуѓа, а исто те ден плодија хем семе. Исто аѓаар, адаја енергија керела те шај о кашта преку пле коренија те циден о пани тари пхув хем те анен ле џи ко листија, а пало адава те мукхен о пани ко воздух сар пареа.

О бршим тано скапоцено поклон таро Девел кова со керела и пхув те бијанел храна. Адалеа со дела адава, о Девел задоволинела амари потреба башо хајбе хем керела амен бахтале.

Бут дада секиринена пе дали ка успејнен те обезбединен пле фамилијаке доволно хајбе хем шеја. Приметин со пишинела ко е Девлескоро Лафи: „Дикхен о птице ко небо, ола ни сејнена, ни жнејнена, ни ко амбарија кхедена, а палем тумаро Дад сој ко небо дела лен хајбаске. Зарем тумен на врединена повише лендар?“ (Матеј 6:25, 26).

„Приметинен е лулуѓен сар бајрона ко поле... ама вакерава туменге кај ни [о цари] о Соломон, ки цело пли слава, на сине уравдо добором шукар сар јекх таро акала лулуѓа. Ако о Девел аѓаар уравела о растенија ко поле... нане ли панда повише те уравел тумен?“ (Матеј 6:28-30).

Ако о Девел шај те обезбединел аменге хајбе хем шеја, сигурно шај те обезбединел аменге са о јавера да буќа со ваљанена аменге башо живото. Ако аменге најважно те кера е Девлескири волја, ов шај те дел амен берекети џикоте трудинаја амен те произведина хајбе или шај те поможинел аменге те аракха несави бути те шај те кина адава сој аменге потребно (Матеј 6:32, 33).

Чаче, кеда размислинаја башо кхам, бршим, птице хем лулуѓа, хаљоваја кај иси амен баре причине те манга е Девле. Ки следно статија ка дикха сар амаро Створители отсекогаш комунициринѓа е манушенцар.