1. Со вакерела и Библија башо Јехова, хем соске адава утешинела амен?

ДАЛИ би мангеа о мануша те судинен туке спрема адава сави боја иси тут ки кожа, сар изглединеа или кобор киле иси тут? Веројатно на. Кобор тано утешно со џанаја кај о Јехова на керела песке мислење баши аменде спрема адава со дикхјола пе само јакхенцар! На пример, кеда дикхља е Јесеескере чхавен, о Самоил на дикхља адава со дикхља о Јехова. О Јехова вакерѓа акале пророкоске кај јекх таро е Јесеескере чхаве ка овел цари ко Израел. Ама, кова чхаво? Кеда дикхља е најбаре чхаве, е Елијаве, о Самоил вакерѓа: „Сигурно англо Јехова терѓола лескоро помазанико!“ О Елијав чаче изглединела сине сар цари. Ама, о Јехова вакерѓа е Самоилеске: „Ма дикх адава сар изглединела, ни адава сој тано учо, соске ме отфрлинѓум ле“. Со сикљоваја таро акава? О Јехова вакерѓа: „О мануш дикхела адава со дикхјола пе јакхенцар, а о Јехова дикхела адава со иси ко вило“ (1. Сам. 16:1, 6, 7).

2. Спрема Јован 7:24, соске на ваљани те судина е јаверен спрема адава сар изглединена? Вакер пример.

² Адалеске со сием несовршена бут пути сигате кераја аменге мислење башо јавера спрема адава сар изглединена. (Читин Јован 7:24.) Ама, нашти те дознајна бут баши некасте само таро адава со дикхаја. На пример, чак јекх бут шукар хем искусно доктори нане те џанел са башо јекх пациенти само ако дикхела ле. Мора шукар те шунел ле те шај те џанел саве симптомија иси ле, сар осетинела пе или саве проблемија састипаја сине ле англедер. О доктори шај ка мангел те керел хем рендген-снимка те шај те дикхел о андруне органија. Ако на керела адала буќа, тегани шај те дел ле погрешно дијагноза.  Слично, амен да нашти те хаљова целосно амаре пхрален хем пхењен само ако дикхаја лен авријалдан. Мора те трудина амен те дикха адава со на дикхјола одма — саве тане андралдан. Џанѓола пе, амен нашти те читина е манушенгере виле, хем адалеске нашти никогаш добором шукар те хаљова е јаверен сар о Јехова. Сепак, шај те да амендар са те шај те џа пало лескоро пример. Сар?

3. Сар шај о библиска извештаија те поможинен аменге те постапина сар о Јехова?

³ Сар постапинела о Јехова пле слугенцар? Ов шунела лен. Освен адава, лела ко предвид ленгере околностија хем о буќа кола со доживинѓе англедер. Исто аѓаар, сикавела ленге сочувство. Те дикха сар керѓа о Јехова акава е Јонаја, е Илијаја, е Агараја хем е Лотеа. Пало адава ка дикха сар шај амен да те постапина аѓаар амаре пхраленцар хем пхењенцар.

4. Соске шај те овел амен лошно мислење башо Јона?

⁴ Адалеске со на џанаја са о буќа, шај те мислина аменге кај о Јона сине мануш колесте со нашти те верујнел пе, па чак кај нане верно. Ов добинѓа задача лично таро Јехова те вакерел осуда баши Ниневија. Ама, наместо те шунел ле, о Јона уклило ко броди со џала сине ки јавер страна те шај те нашел „дур таро Јехова“ (Јона 1:1-3). Дали ту би деа сине е Јонаске панда јекх шанса те поправинел пли грешка? Веројатно на. Ама, о Јехова мислинѓа кај акава пророко заслужинела дујто шанса (Јона 3:1, 2).

5. Со сикљоваја таро е Јонаскере лафија сој пишиме ко Јона 2:1, 2, 9?

⁵ Е Јонаскири молитва, џикоте сине ко е мачхескоро воги, сикавела аменге саво мануш сине ов. (Читин Јона 2:1, 2, 9.) Акаја молитва е Јонаскири — кова со сигурно често молинела пе сине — поможинела аменге те на дикха ки лесте само сар мануш со нашља тари пли задача. Лескере лафија сикавена аменге кај сине понизно, благодарно хем одлучно те овел послушно е Јеховаске. На чудинела амен адава со о Јехова на концентриринѓа пе ки лескири грешка! Наместо адава, ов шунѓа лескири молитва хем понадари да користинѓа ле сар пророко.

6. Соске тано важно шукар те шуна е јаверен?

⁶ Те шај те шуна шукар е јаверен, ваљани те ова понизна хем стрплива. Иси амен најхари трин причине соске тано шукар те кера адава. Прво, нане те сиѓара те кера аменге негативно мислење башо јавера. Дујто, ка хаљова сар осетинела пе амаро пхрал или пхен хем соске керела нешто, а адава ка поможинел  аменге те ова посочувствителна. Хем трито, ка мукха те вакерел сар осетинела пе, соске аѓаар шај ка хаљол несаве буќа баши песте. Понекогаш коркори амен на хаљоваја амаре чувствија са џикоте на вакераја лен ко гласо (Изр. 20:5). Јекх старешина тари Азија вакерела: „Јекх пути случинѓа пе манге те вакерав нешто јекхе пхењаке бизо англедер те шунав ла. Вакерѓум лаке кај ваљани те трудинел пе те дел пошуже коментарија. Покасно халиљум кај на џанела шукар те читинел хем кај ни хари нане лаке локхо те коментиринел“. Акава сикавела кобор тано важно секова старешина прво те шунел те шај те џанел о фактија, а пало адава те дел совет (Изр. 18:13).

7. Со сикљоваја таро начин сар о Јехова постапинѓа е Илијаја?

⁷ Несаве пхраленге хем пхењенге нане локхо те керен лафи башо пле чувствија, адалеске со шај доживинѓе нешто англедер или асавко тано ленгоро менталитети или карактер. Со шај те кера те шај те вакерен аменге сар чаче осетинена пе? Размислин сар постапинѓа о Јехова е Илијаја кеда нашља тари Језавела. Накхле бут диве англедер о Илија те вакерел пле небесно Дадеске со мучинела ле. О Јехова шукар шунѓа ле, а пало адава охрабринѓа ле хем денѓа ле јекх важно задача (1. Цар. 19:1-18). Шај амаре пхраленге хем пхењенге ка ваљанел време те шај те овел лен доверба ки аменде хем те вакерен аменге сар чаче осетинена пе. Ама, ако сием стрплива сар о Јехова, ка шај те овел лен доверба ки аменде. Ко крајо, кеда ка овен спремна те керен аменцар лафи башо пле чувствија, ваљани шукар те шуна лен.

8. Спрема 1. Мојсеева 16:7-13, сар поможинѓа о Јехова е Агараке?

⁸ И Агара, е Сарајакири слугинка, почминѓа те постапинел неразумно откеда ули е Аврамескири ромни. Кеда ачхили кхамни почминѓа те дикхел сар потеле пестар е Сараја, кола со на сине ла чхаве. И ситуација ули добором лошно со чак и Агара нашља, адалеске со и Сараја почминѓа те понижинел ла (1. Мој. 16:4-6). Сар несовршена мануша шај бут сигате те мислина кај и Агара сине јекх злобно џувли која со добинѓа адава со заслужинѓа. Ама, о Јехова на дикхља ки лате аѓаар. Ов бичхалѓа лаке ангели. Кеда аракхља ла, о ангели поможинѓа лаке те менинел пло стави хем денѓа ла берекети. И Агара халили кај о Јехова цело време дикхела ла сине хем кај тано свесно со случинела пе лаке. Ој вакерѓа леске: „Ту сиан Девел со дикхела... окова со дикхела ман“. (Читин 1. Мојсеева 16:7-13.)

9. Со леља ко предвид о Јехова баши Агара?

⁹ Со дикхља о Јехова ки Агара? Ов сине свесно башо адава котар авела хем џанела сине са со накхља (Изр. 15:3). И Агара сине Египќанка која со живинела сине ко еврејско кхер. Дали некогаш сине ла чувствија кај на мангена ла? Дали фалинела лаке сине лакири фамилија хем лакири пхув? Освен адава, на сине само ој е Аврамескири ромни. Ко пурано време, несаве таро верна слуге е Девлескере сине лен повише ромња. Ама, ко почеток е Јеховаскири намера башо брако на сине асавки (Мат. 19:4-6). Адалеске, ни најхари на чудинела амен со ко асавке фамилие бут пути сине љубомора хем бари холи. Иако о Јехова на оправдинѓа адава со и Агара на поштујнела сине е Сараја, шај те ова сигурна кај леља ко предвид лакоро потекло хем лакере околностија.

10. Сар шај те запознајна пошукар амаре пхрален хем пхењен?

¹⁰ Шај те ова сар о Јехова аѓаар со ка трудина амен те хаљова амаре пхрален хем пхењен. Адалеске, запознајн лен пошукар. Кер ленцар лафи англедер хем пало состанок, џан заедно ки служба хем ако шај, викин лен ко госто. Аѓаар шај ка дознајне баши ленде нешто  со на џанеа. На пример, шај мислинеа туке кај несави пхен на мангела те дружинел пе, а ој тани само лаџутни. Шај мислинеа кај несаво пхрал тано материјалисти, ама уствари, ов тано бут дарежливо. Или палем, ка дознајне кај несави пхен чхавенцар, која со често каснинела ко состанок, иси ла противење (Рим. 14:4). Нормално, на ваљани те мешина амен „ко е јаверенгере буќа“ (1. Тим. 5:13). Сепак, шукар тано те џана нешто башо амаре пхраља хем пхења или башо адава со доживинѓе ко живото. Адава шај те поможинел аменге те хаљова лен пошукар.

11. Соске тано важно о старешине шукар те пенџарен пле пхрален хем пхењен?

¹¹ Посебно о старешине ваљани те џанен нешто повише башо пхраља хем пхења коленге со грижинена пе. Размислин башо пример е пхралескоро Артур, кова со служинѓа сар покраинско надгледнико. Заедно јавере старешинаја посетинѓе јекхе пхења колаке со мислинѓе кај тани лаџутни. О Артур вакерела: „Ој вакерѓа аменге кај некобор берша откеда кхувѓа ко брако лакоро ром муло. Иако сине ла пхаро живото, сикавѓа пле дује чхаен те манген е Јехова хем верно те служинен леске. Исто аѓаар, вакерѓа аменге кај иси ла проблемија јакхенцар хем кај иси ла депресија. Иако накхела таро са адава, сине јасно кај иси ла баро мангипе хем силно вера ко Јехова. Халилем кај бут шај те сикљова таро лакоро шукар пример“ (Фил. 2:3). Акава покраинско надгледнико гело пало е Јеховаскоро пример, кова со пенџарела пле слуген хем џанела ленгере дукха (2. Мој. 3:7). О старешине кола со шукар пенџарена пле пхрален хем пхењен тане ки пошукар положба те поможинен ленге.

12. Сар поможинѓа јекхе пхењаке тари Азија адава со пошукар запознајнѓа јекхе пхења таро собрание?

¹² Кеда запознајнеа пошукар несаве пхрале или пхења со шај нервиринела тут, веројатно повише ка хаљове ле. Те дикха јекх пример. Јекх пхен која со живинела ки Азија вакерела: „Ко мло собрание иси јекх пхен со керела бут гласно лафи. Мислинѓум кај ој нане културно. Ама, кеда сиум сине лаја ки служба, дознајнѓум кај англедер бикинела сине мачхе ко пазари заедно пле родителенцар. Мора сине те овел гласно те шај те привлечинел е муштериен. Халиљум кај мора пошукар те запознајнав мле пхрален хем пхењен те шај те хаљовав лен“. Точно тано кај ваљани те трудина амен те шај пошукар те запознајна амаре пхрален хем пхењен. Сепак, кеда шунаја о совет тари Библија те ширина амаре виле, џаја пало е Јеховаскоро пример, кова со мангела са е манушен (1. Тим. 2:3, 4; 2. Кор. 6:11-13).

13. Спрема 1. Мојсеева 19:15, 16, со керѓе о ангелија кеда дикхле кај о Лот задржинела пе, хем соске?

¹³ Ко јекх важно моменти таро пло живото, о Лот на шунѓа одма е Јеховаскере јасна упатствија. Дуј ангелија але ки лесте хем вакерѓе леске те икалел пле фамилија авријал таро Содом. Соске? Ола вакерѓе леске: „Ка уништина акава тхан“ (1. Мој. 19:12, 13). О јавер диве, о Лот пле фамилијаја панда сине кхере. Адалеске о ангелија палем предупрединѓе ле, ама ов понадари да задржинела пе сине. Шај те мислина аменге кај о Лот на халило сериозно адава со вакерѓа леске о Јехова, па чак кај на сине послушно. Ама, о Девел на откажинѓа пе лестар. И Библија вакерела: „Е Јехова сине ле сочувство баши лесте“. Адалеске о ангелија астарѓе ле таро вас хем иклиле тари диз. (Читин 1. Мојсеева 19:15, 16.)

14. Соске о Јехова шај сикавѓа сочувство е Лотеске?

¹⁴ Е Јехова шај сине ле повише причине соске те сикавел сочувство е Лотеске. О Лот шај на мангела сине те џал песке кхерал адалеске со дарала сине таро мануша сој тане авријал тари диз. Сине јавера да буќа со шај даравена ле. О Лот веројатно шунѓа кај ки јекх долина со сине паше, дуј царија пеле ко хор дупке кола со сине пхерде катранеа (1. Мој. 14:8-12). Сар ром хем дад, о Лот сигурно сине секиримо пле фамилијаке. Освен адава, ов сине барвало мануш, хем веројатно сине ле шужо кхер ко Содом (1. Мој. 13:5, 6). Џанѓола пе, нијекх таро акала буќа на сине изговор те на шунел одма е Девле. Сар и те овел, о Јехова на концентриринѓа пе ки е Лотескири грешка, него дикхела ле сине сар праведно мануш (2. Пет. 2:7, 8).

15. Наместо те судина е јаверен, со ваљани те кера?

¹⁵ Наместо те судине или те критикујне е јаверенгере постапке, трудин тут те хаљове сар осетинена пе. Јекх пхен со викинела пе Вероника керѓа баш акава. Ој вакерела: „Јекх пхен никогаш на сине расположими хем на дружинела пе сине никасаја. Понекогаш дарава сине те џав ки лате. Ама, мислинѓум манге: ’Те овав сине ко лакоро тхан, сигурно ка ваљанел манге амал‘. Адалеске одлучинѓум те пучав сар осетинела пе. Хари по хари почминѓа  те овел послободно манцар хем те вакерел манге сар осетинела пе. Акана хаљовава ла бут пошукар“.

16. Соске ваљани те молина е Јехова те поможинел аменге те ова сочувствителна?

¹⁶ Само о Јехова шај целосно те хаљовел амен (Изр. 15:11). Адалеске, молин ле те поможинел туке те дикхе е јаверен сар со дикхела лен ов, хем те џане сар те сикаве ленге сочувство. И молитва поможинѓа јекхе пхењаке со викинела пе Анжела те овел посочувствително спрема јекх пхен таро лакоро собрание колаја со на накхела сине шукар. И Анжела вакерела: „Најлокхо ка овел сине те почминав те критикујнав ла хем те избегинав ла. Ама, молинѓум е Јехова те поможинел манге те хаљовав ла“. Дали о Јехова одговоринѓа лаке ки молитва? Ој вакерела: „Сием сине ки служба а пало адава саатенцар керѓем лафи. Трудинѓум ман сочувствително те шунав ла. Акана мангава ла бут повише хем одлучно сиум те поможинав лаке“.

17. Ко со ваљани те ова одлучна?

¹⁷ Нашти те бирина кола пхраља хем пхења заслужинена те хаљова лен, а кола на. Шај несаве лендар — слично сар о Јона, о Илија, и Агара хем о Лот — коркори керѓе песке о проблемија. Ама, реално саринен сине амен проблемија кола со керѓем лен аменге коркори. Адалеске, разумно тано соске о Јехова аџикерела амендар те сикава сочувство е јаверенге (1. Пет. 3:8). Кеда шунаја е Јехова, кераја те овел позорало о јекхипе ки амари посебно меѓународно фамилија. Адалеске те ова одлучна те шуна шукар амаре пхрален хем пхењен, те запознајна лен пошукар хем те сикава ленге сочувство.