1. Со дикхела о Јехова ко пле слуге?

О ЈЕХОВА сикавела „верно мангипе пле слугенге“ (Пс. 149:4). Акава керела амен чаче бахтале! Ов дикхела амаре шуже особине, дикхела саве мануша шај те ова ки иднина хем поможинела аменге те ова попаше леа. Ако ачховаја верна леске, ов ка ачховел паше аменцар засекогаш (Јован 6:44).

2. Соске некаске пхаро тано те верујнел кај о Јехова мангела ле?

² Некој шај вакерела: „Џанава кај о Јехова мангела пле народо сар група, ама сар шај те овав сигурно кај о Јехова мангела ман лично?“ Соске некој шај те пучел пе акава пучибе? И Оксана, * колаке со случинѓе пе лошна буќа ко тикнипе, вакерела: „Сиум сине бут бахтали кеда крстинѓум ман хем почминѓум е пионерско службаја. Ама 15 берш покасно почминѓум те сетинав ман ко лошна буќа со случинѓе пе манге сар тикни. Адалеске мислинѓум кај о Јехова нане више задоволно мандар хем кај на мангела ман више“. Јекх пионерка, со викинела пе Џули хем која со сине ла исто бут проблемија ко тикнипе, вакерела: „Денѓум лафи е Јеховаске кај ка служинав леске адалеске со мангљум те керав ле бахтало. Ама, сиум сине уверими кај ов никогаш нашти те мангел ман“.

3. Со ка дикха ки акаја статија?

³ Шај ту да сар акала верна дуј пхења мангеа бут е Јехова, ама на сиан сигурно дали ов мангела тут. Соске тано важно те уверине тут кај ту сиан чаче скапоцено леске? Хем, со ка поможинел туке кеда мислинеа кај о Јехова на мангела тут? Те дикха о одговорија ко акала пучиба.

4. Соске тано опасно те сумнина амен кај о Јехова мангела амен?

⁴ Ако сием увериме кај о Јехова мангела амен хем поддржинела амен, ка ова мотивириме те служина леске најшукар со  шај, чак кеда амаро живото тано пхаро. Ама, ако сумнинаја амен кај о Јехова мангела амен, тегани амари „сила ка слабонел“ (Изр. 24:10). Хем ако сием обесхрабриме хем мислинаја кај о Јехова на мангела амен, тегани ка овел аменге пхаро те борина амен против е Сатанаскере нападија (Еф. 6:16).

5. Сар влијајнѓа упро несаве пхраља хем пхења адава со мислинѓе кај о Јехова на мангела лен?

⁵ Несаве верна пхраља хем пхења таро амаро време почминѓе те мислинен кај о Јехова на мангела лен хем на грижинела пе ленге, хем адалеске ленгири вера ули послабо. Јекх старешина, со викинела пе Џејмс, вакерела: „Иако служинава сине ко Бетел хем уживинава сине те служинав ко собрание ки јавер чхиб, пучава ман сине дали о Јехова чаче тано задоволно мандар хем таро адава со керава сине баши лесте. Ко јекх моменти почминѓум чак те пучав ман дали о Јехова чаче шунела мле молитве“. И Ева, која тани исто аѓаар ки полновремено служба, вакерела: „Халиљум кај тано опасно те мислина кај о Јехова на мангела амен соске адава ка влијајнел упро са со кераја леске ки служба. О сумње шај те тикњарен амари желба те учествујна ко духовна активностија, хем лена амаро бахталипе ки служба е Јеховаске“. О Мајкл, со служинела сар општо пионери хем старешина, вакерела: „Ако на верујнеа кај о Девел мангела тут, тегани шај те почмине те циде тут лестар“.

6. Со ваљани те кера ако мислинаја кај о Девел на мангела амен?

⁶ Акала примерија сикавена кобор бари штета ко духовно поглед шај те керел аменге асавко негативно размислибе. Ама, со ваљани те кера ако почминаја те мислина кај о Девел на мангела амен? Амен мора одма те отфрлина асавке мисле! Молин е Јехова те поможинел туке те циде тутар „о мисле со секиринена тут“ хем те дел тут „о мир таро Девел“ кова со ка аракхел тло вило хем тле мисле (Пс. 139:23; Фил. 4:6, 7). Хем ма бистре, на боринеа тут само ту асавке негативна мисленцар. Јавера да верна пхраља хем пхења боринена пе адалеа. Чак несаве слуге е Девлескере таро пурано време сине лен асавке чувствија. Те дикха со шај те сикљова таро пример е апостол Павлескоро.

7. Саве проблемија сине е Павле?

⁷ Дали понекогаш иси тут чувство кај иси  тут бут одговорностија, хем нашти ресеа са те завршине? Ако тано аѓаар, тегани ту шај те хаљове е Павле. Ов сине секиримо на само башо јекх собрание него башо „са о собранија“ (2. Кор. 11:23-28). Дали иси тут несаво хронично насвалипе кова со лела тли радост? Е Павле стално мучинела сине „каро ко тело“, шај несаво проблеми састипаја, кова со мангела сине о Јехова те цидел ле лестар (2. Кор. 12:7-10). Дали понекогаш осетинеа тут обесхрабримо адалеске со сиан несовршено? Аѓаар о Павле да осетинѓа пе понекогаш. Ов коркори песке вакерѓа кај тано „жалибаске“ адалеске со мора сине стално те боринел пе те керел адава сој исправно (Рим. 7:21-24).

8. Со поможинѓа е Павлеске те икљовел ко крајо пле проблеменцар?

⁸ Иако сине ле различна проблемија о Павле понадари да служинѓа е Јеховаске. Со денѓа ле сила те керел адава? Иако сине свесно баши пли несовршеност, ле сине ле силно вера ки откупнина. Исто аѓаар, џанља е Исусескоро ветување кај „секој со ка верујнел [ко Исус] ка добинел вечно живото“ (Јован 3:16; Рим. 6:23). О Павле сигурно сине машкар окола со сикавѓе вера ки откупнина. Ов сине уверимо кај о Јехова тано спремно те простинел чак околенге со керѓе сериозно грево ако искрено каинена пе (Пс. 86:5).

9. Со сикљоваја таро е Павлескере лафија пишиме ко Галатите 2:20?

⁹ Исто аѓаар, о Павле сине уверимо кај и откупнина тани доказ кај о Девел бут мангела ле. (Читин Галатите 2:20.) Приметин о утешна лафија ко крајо таро стихо. Ов вакерѓа: „Е Девлескоро Чхаво мангља ман хем денѓа пло живото манге“. О Павле на мислинѓа кај тано добором лошно со нашти те мангел ле о Девел. Ов на вакерѓа песке: „Хаљовава соске о Јехова шај те мангел мле пхрален, ама ман нашти те мангел“. Спротивно адалестар, о Павле пишинѓа е христијаненге ко Рим: „О Христос муло аменге панда џикоте сием сине грешникија“ (Рим. 5:8). Чаче, ништо нашти те чхинавел е Девле те мангел амен!

10. Со сикљоваја таро Римјаните 8:38, 39?

¹⁰ Читин Римјаните 8:38, 39. О Павле сине целосно уверимо кај о Девел бут мангела амен. Ов пишинѓа кај „ништо нашти те одвојнел амен таро е Девлескоро мангипе“. О Павле џанља кобор сине стрпливо о Јехова е Израелцонцар хем кобор сине милостиво спрема ленде. Значи јавере лафенцар о Павле вакерѓа: „Ако о Јехова бичхалѓа пле  Чхаве те мерел манге, тегани нане ман нисави причина те сумнинав ман кај ов мангела ман“ (Рим. 8:32).

11. Соске о Павле сине уверимо кај о Девел мангела ле, иако керѓа гревија сар сој спомниме ко 1. Тимотеј 1:12-15?

¹¹ Читин 1. Тимотеј 1:12-15. Веројатно о Павле понекогаш осетинела пе сине бут лошно кеда размислинела сине башо буќа со керѓа лен англедер те овел христијани. Ов вакерѓа баши песте кај тано „о најбаро грешнико“, а адава на изненадинела амен. Англедер те џанел о чачипе о Павле бут прогонинѓа е христијанен ко различна дизја, аѓаар со несавен чхивѓа ко затвор хем гласинѓа те овен мударде (Дела 26:10, 11). Шај ли те замислине туке сар о Павле осетинѓа пе кеда шај аракхља несаве терне христијане каскере родителија сине мударде адалеске со ов одобринѓа адава? О Павле каинѓа пе башо пле грешке, ама ов сине свесно кај нашти те менинел адава со уло. Ов верујнѓа кај о Исус муло баши лесте хем адалеске сине уверимо кеда пишинѓа: „О Девел сикавѓа манге шукарипе со на заслужинава ле хем адалеске сиум апостоли“ (1. Кор. 15:3, 10). Со шај те сикљова таро акава? Ваљани те ове уверимо кај о Исус муло туке хем денѓа тут прилика те ове паше е Девлеа (Дела 3:19). Е Девлеске тано важно со кераја акана хем со ка кера ки иднина, а на о грешке со керѓем лен поангле, бизи разлика дали ко адава време сием сине е Јеховаскере сведокија или на (Иса. 1:18).

12. Сар о лафија таро 1. Јованово 3:19, 20, шај те поможинен аменге кеда мислинаја кај на врединаја или на заслужинаја некој те мангел амен?

¹² Кеда размислинеа башо адава кај о Исус муло те шај те овен простиме тле гревија шај вакереа туке: „Ме на заслужинава акава“. Соске шај те осетине тут аѓаар? Амаро несовршено вило шај те чхивел амен те  мислина кај на врединаја хем кај на заслужинаја некој те мангел амен. (Читин 1. Јованово 3:19, 20.) Кеда почминаја аѓаар те мислина ваљани те сетина амен кај о Девел тано „побаро таро амаре виле“. Кобор те овен силна адала негативна чувствија ола нане посилна таро е Јеховаскоро мангипе спрема аменде хем тари лескири желба те простинел аменге. Бут тано важно те уверина амен ко акава. Те шај те кера адава, ваљани редовно те проучина лескоро Лафи, редовно те молина амен хем редовно те дружина амен амаре пхраленцар хем пхењенцар. Соске тано важно те кера акала буќа?

13. Сар шај о проучибе е Девлескоро Лафи те поможинел аменге? (Дикх и рамка „ Сар е Девлескоро Лафи поможинѓа ленге“.)

¹³ Проучин е Девлескоро Лафи секова диве. Аѓаар ка шај пошукар те запознајне е Јехова хем те дикхе кобор шуже особине иси ле хем кобор мангела тут. Адава со секова диве ка читине нешто тари Библија хем хор ка размислине башо адава шај те поможинел туке те испрајне тле ставија хем те ослободине тут таро негативна чувствија, а аѓаар ка шај пореално те дикхе ко буќа (2. Тим. 3:16). О Кевин, јекх старешина, кова со мислинела сине кај на врединела вакерела: „Адава со читинава сине о Псалм 103 хем хор размислинава сине баши лесте поможинѓа манге те испрајнав мло начин сар размислинава хем те хаљовав сар о Јехова дикхела ки манде“. И Ева, која сој спомними поангле, вакерела: „Ко крајо таро диве одвојнава манге време те размислинав башо адава сој тано чаче важно е Јеховаске, а адава дела ман андруно мир хем керела мли вера те овел позорали“.

14. Сар шај те поможинел аменге и молитва?

¹⁴ Редовно молин тут (1. Сол. 5:17). Те шај те ове некасаја шукар амал ваљани редовно хем искрено те кере леа лафи. Адава исто аѓаар важинела башо амаро амалипе е Јеховаја. Кеда ки молитва вакераја сар осетинаја амен, башо со размислинаја хем со мучинела амен, амен сикаваја кај иси амен доверба ки лесте хем кај џанаја кобор бут мангела амен (Пс. 94:17-19; 1. Јов. 5:14, 15). И Џули, сој спомними поангле, вакерела: „Кеда молинава ман на вакерава е Јеховаске само со керѓум адава диве, него вакерава леске со чаче мислинава хем сар осетинава ман. Адава поможинѓа манге те почминав те дикхав ко Јехова сар Дад кова со бут мангела пле чхавен, а на сар директори тари јекх бари фирма“. (Дикх и рамка „ Дали читинѓан?“)

15. Сар о Јехова сикавела кај грижинела пе аменге?

¹⁵ Дружин тут е пхраленцар хем е пхењенцар. Ола тане поклон таро Јехова (Јак. 1:17). Амаро небесно Дад сикавела кај грижинела пе аменге аѓаар со денѓа амен јекх  духовно фамилија таро пхраља хем пхења кола со сикавена „мангипе ко секова време“ (Изр. 17:17). Ко пло писмо џи ко Колошања, о Павле спомнинѓа некоборе христијанен кола со „поможинѓе леске хем утешинѓе ле“ (Кол. 4:10, 11). Чак е Исусеске ваљани сине поддршка таро лескере амала, хем ангелија хем мануша (Лука 22:28, 43).

16. Сар шај о пхраља хем о пхења те поможинен аменге те ова попаше е Јеховаја?

¹⁶ Дали родеа хем прифатинеа помош таро пхраља хем пхења ко собрание? Кеда кераја лафи јекхе зрело христијанеа башо амаре проблемија адава на значинела кај сием духовно слаба, него адава шај те заштитинел амен. О Џејмс, кова со сине спомнимо поангле, вакерела: „О амалипе зрело христијаненцар поможинѓа манге бут ко живото. Кеда мучинена ман негативна мисле, адала скапоцена амала стрпливо шунена ман хем вакерена манге кај мангена ман. Преку ленде дикхава кај о Јехова грижинела пе манге хем мангела ман“. Чаче, бут тано важно те ова паше амала амаре духовна пхраленцар хем пхењенцар!

17-18. Касте мора те шуна, хем соске?

¹⁷ О Сатана мангела те откажина амен тари борба те постапина исправно. Ов мангела те верујна кај о Јехова на мангела амен, хем кај на врединаја те ова спасиме. Ама, сар со дикхлем адава нане точно.

¹⁸ О Јехова мангела тут хем ту сиан скапоцено англо лескере јакхја. Ако сиан леске послушно „ка ачхове ко лескоро мангипе“ засекогаш, исто сар о Исус (Јован 15:10). Адалеске ма шун со вакерела тло ховавно вило или о Сатана. Наместо адава, шун е Јехова, кова со дикхела о шукар ко секова јекх амендар. Ов уверимо кај „ов сикавела верно мангипе пле слугенге“, коте со сиан вклучимо ту да!