1-2. Сој тани и откупнина, хем соске ваљани аменге?

КЕДА о совршено мануш о Адам грешинѓа, ов нашавѓа и прилика те живинел вечно, ама на само ов него исто аѓаар лескере идна чхаве. Е Адаме на сине ле изговор башо адава со керѓа. Ов одлучинѓа те керел грево. Ама, сар и тано лескере чхавенцар? Ола на сине ни бијаме кеда о Адам грешинѓа (Рим. 5:12, 14). О Адам заслужинѓа те мерел башо адава со керѓа. Ама, шај ли сине о Јехова те керел нешто те шај е Адамескере чхаве те живинен вечно? Оја! Кратко откеда грешинѓа о Адам, о Јехова постепено откринѓа сар ка спасинел е Адамескере чхавен таро грево хем таро мерибе (1. Мој. 3:15). Ко време со одрединѓа о Јехова, ов бичхалѓа пле Чхаве таро небо „те дел пло живото сар откупнина буте џененге“ (Мар. 10:45; Јован 6:51).

² Сој тани и откупнина? Ко Христијанска грчка списија, и откупнина тани цена која о Исус платинѓа ла те шај те иранел адава со о Адам нашавѓа ле (1. Кор. 15:22). Соске ваљани аменге и откупнина? Адалеске со е Јеховаскоро мерило баши правда родела сине те дел пе живото башо живото (2. Мој. 21:23, 24). О Адам нашавѓа пло совршено манушикано живото. Те шај те задоволинел пе е Девлескири правда, о Исус денѓа сар жртва пло совршено манушикано живото (Рим. 5:17). Аѓаар ов уло о „Вечно Дад“ са околенгоро со сикавена вера ки откупнина (Иса 9:6; Рим. 3:23, 24).

3. Спрема Јован 14:31 хем 15:13, соске о Исус сине спремно те жртвујнел пло совршено манушикано живото?

³ О Исус сине спремно те дел пло живото сар жртва адалеске со бут мангела сине пле небесно Даде хем амен. (Читин Јован 14:31; 15:13.) Адалеске со сине ле асавко мангипе, ов сине одлучно те ачхол верно џи ко крајо хем те керел пле  Дадескири волја. Аѓаар, е Јеховаскири првобитно намера башо мануша хем баши Пхув ка овел исполними. Ки акаја статија, ка дикха соске о Девел мукхља о Исус те цидел добором баре муке англедер те мерел. Исто аѓаар, ка дикха кратко о пример таро апостол Јован кова со бут ценинѓа и откупнина. Хем ко крајо ка дикха сар шај амен те сикава благодарност баши откупнина хем сар шај панда повише те ценина и жртва со денѓе ла аменге о Јехова хем о Исус.

4. Опишин сар муло о Исус?

⁴ Замислин туке саве сине о последна диве таро е Исусескоро живото ки Пхув. Иако ов шај сине те викинел милиоња ангелија те заштитинен ле, сепак ов дозволинѓа те астарен ле о римска војникија кола со марѓе ле бизи нисави милост (Мат. 26:52-54; Јован 18:3; 19:1). Ола марена ле камшикоја колеа со чхинена лескере маса. Покасно, дена ле ко пло ратвало думо те пхиравел јекх пхаро стубо таро каш. О Исус почминела те пхиравел акава стубо џи ко тхан коте со ваљани те овел мудардо, ама пало кратко време о римска војникија заповединена јавере манушеске те пхиравел о стубо леске ко тхан (Мат. 27:32). Кеда ресела о Исус ко тхан коте со ваљани те мерел, о војникија ковинена лескере васта хем лескере пре ко стубо. Кеда о Исус тано ко стубо, и тежина таро лескоро тело керела те чхинѓон о ране со иси ле таро шајке. Лескере амала хем лескири дај ровена, ама о еврејска водачија асана е Исусеске (Лука 23:32-38; Јован 19:25). О Исус цидела муке некобор саатија. Адалеске сој тано обесимо, лескоро срце хем лескере плуќа на функциониринена шукар хем са попхаро тано леске те дишинел. О Исус џанела кај сине верно хем кратко англедер те мерел ов молинела пе е Јеховаске последно пути. Тегани тељарела пло шеро хем предајнела пло живото (Мар. 15:37; Лука 23:46; Јован 10:17, 18; 19:30). Адава чаче сине јекх бавно, понижувачко мерибе, кова со бут дукхала!

5. Со сине панда полошно е Исусеске таро начин сар мударѓе ле?

⁵ Е Исусеске о начин сар сине мудардо, на сине и најпхари бути со трпинѓа ла. Леске попхаро сине баши причина соске осудинѓе ле те мерел. Ов сине погрешно обвинимо кај на сикавела поштовање спрема о Девел или спрема е Девлескоро анав (Мат. 26:64-66). Е Исусе мучинела сине и мисла кај о мануша обвининена ле кај ов на поштујнела е Девле хем надинела пе сине кај лескоро Дад нане те дозволинел леске те овел понижимо ко асавко начин (Мат. 26:38, 39, 42). Соске о Јехова дозволинѓа лескоро мангло Чхаво те цидел муке хем те мерел? Те дикха трин причине башо адава.

6. Соске о Исус мора сине те овел обесимо ко стубо мучибаске?

⁶ Прво, о Исус мора сине те овел обесимо ко стубо те шај те ослободинел е Евреен тари јекх арман (Гал. 3:10, 13). Ленге сине денди арман адалеске со ветинѓе кај ка икерен е Девлескоро закони, ама на керѓе адава. Освен со заслужинѓе те мерен адалеске со сине е Адамескере чхаве, упри ленде сине исто аѓаар адаја арман (Рим. 5:12). Ко е Девлескоро закони со сине дендо е Израелцонге, пишинела сине кај ако јекх мануш керела грево со заслужинела мерибе, ов ваљани сине те овел мудардо. Пало адава ко несаве случаија е манушескоро муло тело сине обесимо ко стубо. * А адава значинела сине кај адава мануш дендо тано арман таро Девел (5. Мој. 21:22, 23; 27:26). Значи, адалеа со сине о Исус ковимо  ко стубо, ов леља упри песте и арман со сине денди е Евреенге те шај ола те овен ослободиме латар. Аѓаар, лен да шај сине те овел лен корист тари е Исусескири жртва иако ола отфрлинѓе ле.

7. Која тани и дујто причина соске о Девел дозволинѓа лескоро Чхаво те цидел муке?

⁷ Те дикха и дујто причина соске о Девел мукхља лескоро Чхаво те цидел муке. Ов обучинѓа е Исусе ки иднина те овел амаро Првосвештенико. О Исус лично дикхља кобор тано пхаро те ачховел пе послушно е Девлеске кеда иси бут баре испитија. Леске сине добором пхаро со молинела пе сине гласно хем асвенцар. Адалеске со о Исус цидинѓа бут баре муке, ов хаљола амаре потребе хем шај те поможинел аменге кеда сием ко искушенија. Амен сием бут благодарна е Јеховаске со денѓа амен јекх милостиво Првосвештенико кова со хаљовела амаре слабостија! (Евр. 2:17, 18; 4:14-16; 5:7-10).

8. Која тани и трито причина соске о Девел дозволинѓа о Исус те трпинел пхаре искушенија?

⁸ Трито, о Јехова дозволинѓа о Исус те цидел бут баре муке те шај те одговоринел пе ко јекх важно пучибе: Шај ли о мануша те ачховен верно е Јеховаске чак кеда иси лен пхаре искушенија? О Сатана вакерела на! Спрема лесте о мануша служинена е Девлеске таро себична причине. Ов верујнела кај ола на мангена е Јехова, исто сар о Адам со на мангља ле (Јов 1:9-11; 2:4, 5). Адалеске со сине ле доверба ки верност пле Чхавескири, о Јехова дозволинѓа о Исус те овел искушимо највише со шај те издржинел јекх мануш. О Исус ачхило верно хем докажинѓа кај о Сатана тано ховавно.

9. Саво пример денѓа амен о апостол Јован?

⁹ Бут христијања доживинѓе противибе хем сине лен различна искушенија. Сепак, иако сине пхуре, ола понадари да проповединена сине хем истрајнена сине адалеске со и откупнина керѓа ленгири вера позорали. Те дикха о пример таро апостол Јован. Веројатно повише таро 60 берш, ов верно проповединѓа о чачипе башо Христос хем баши откупнина. Кеда сине ле скоро 100 берш, и римско влада мислинѓа кај тано добором опасно со бичхалѓа ле сар затворенико ко остров Патмос. А со керѓа погрешно? Керѓа лафи башо Девел хем сведочинѓа башо Исус (Отк. 1:9). О Јован денѓа бут шужо пример баши вера хем баши истрајност.

10. Сар е Јованескере лила сикавена кај ов ценинела сине и откупнина?

¹⁰ Ко библиска лила кола со пишинѓа лен о апостол Јован, ов истакнинѓа кобор бут мангела сине е Исусе хем кобор сине благодарно баши лескири жртва. Ко акала лила повише таро 100 пути керела пе лафи баши откупнина или башо шукар буќа со добинаја лен тари откупнина. На пример, о Јован пишинѓа: „Ако некој керела грево, иси амен помошнико ко Дад, о Исус Христос, о праведнико“ (1. Јов. 2:1, 2). Е Јованескере лила, исто аѓаар нагласинена кобор тано важно те сведочинел пе башо Исус (Отк. 19:10). Јасно тано кај о Јован бут ценинела сине и откупнина. Сар шај амен да те сикава кај ценинаја ла?

11. Со ка поможинел аменге те борина амен против о искушенија?

¹¹ Борин тут против о искушение те кере грево. Ако чаче ценинаја и откупнина, нане те овел амен о стави: „Кеда сиум искушимо на ваљани бут те трудинав ма те на грешинав. Шај те грешинав, хем пало адава те молинав е Јехова те простинел манге“. Наместо адава, кеда сием искушиме те кера нешто погрешно  ка вакера: „На! Сар шај те керав асавко нешто пало са адава со керѓе баши манде о Јехова хем о Исус?“ Спрема адава, шај те рода е Јеховастар сила хем те молина амен леске: „Ма мукх те перав ко искушение“ (Мат. 6:13).

12. Сар шај те применина о совет таро 1. Јованово 3:16-18?

¹² Манг тле пхрален хем пхењен. Кеда сикаваја мангипе, амен исто аѓаар сикаваја кај ценинаја и откупнина. Соске? Адалеске со о Исус денѓа пло живото на само аменге него исто аѓаар амаре пхраленге хем пхењенге. Ако сине спремно те мерел баши ленде, тегани јасно тано кај ола врединена бут англо лескере јакхја. (Читин 1. Јованово 3:16-18.) Амен сикаваја кај мангаја амаре пхрален хем пхењен адалеа сар понашинаја амен ленцар (Еф. 4:29, 31 — 5:2). На пример, амен поможинаја ленге кеда тане насвале или кеда доживинена пхаре неволје, сар сој о природна катастрофе. Ама, со ваљани те кера кеда амаре пхраља хем пхења таро собрание керена или вакерена нешто со поврединела амен?

13. Соске ваљани те простина?

¹³ Дали понекогаш туке пхаро те простине јекхе пхралеске или пхењаке? (3. Мој. 19:18). Ако аѓаар, применин акава совет: „Трпинен тумен јекх јекхеа хем цело вилеа простинен туменге чак кеда некој ка вреџинел тумен. Сар о Јехова спремно со простинѓа туменге аѓаар керен тумен да“ (Кол. 3:13). Секова пути кеда простинаја амаре пхралеске или пхењаке амен сикаваја амаре небесно Дадеске кај чаче ценинаја и откупнина. Сар шај понадари да панда повише те ценина акава поклон таро Девел?

14. Кова тано јекх начин колеа со шај повише те ценина и откупнина?

¹⁴ Ов благодарно е Јеховаске баши откупнина. Јекх пхен, и Јоана, која со иси ла 83 берш хем живинела ки Индија, вакерела: „Мислинава кај важно тано те спомнинав и откупнина секова диве ко мле молитве хем те благодаринав ман е Јеховаске баши лате“. Ко тле лична молитве размислин башо конкретна грешке со керѓан адава диве, хем тегани молин е Јехова те простинел туке. Џанѓола пе, ако керѓан јекх сериозно грево тегани исто аѓаар ваљани те роде помош таро старешине. Ола ка шунен тут хем ка ден ту совет таро е Девлескоро Лафи. Ола ка молинен пе туја хем ка роден о Јехова те простинел туке те шај палем те ове паше леа (Јак. 5:14-16).

15. Соске ваљани те одвојне туке време те читине баши откупнина хем те размислине баши лате?

 ¹⁵ Размислин баши откупнина. И пхен Раџамани која со иси ла 73 берш вакерела: „Секова пути кеда читинава башо муке со цидинѓа лен о Исус, мле јакхја пхерѓона асва“. Шај туке да тано пхаро кеда размислинеа кобор баре муке цидинѓа е Девлескоро Чхаво. Ама, кобор повише размислинеа баши е Исусескири жртва, добором повише бајрола тло мангипе спрема лесте хем спрема лескоро Дад. Те шај те размислине баши откупно жртва, соске на одвојнеа туке време ки тли лично студија те проучине повише баши лате?

16. Сави корист иси амен кеда сикаваја е јаверен баши откупнина? (Дикх и слика тари насловно страна.)

¹⁶ Сикав е јаверен баши откупнина. Секова пути кеда кераја лафи е јаверенцар баши откупнина, амаро ценење баши лате бајрола. Иси амен бут шуже публикацие хем видеоклипија со поможинена аменге те објаснина е јаверенге соске о Исус муло аменге. На пример, шај те користина и 4 лекција тари брошура Шукар хабери таро Девел! Акаја лекција иси ла наслов „Кој тано о Исус Христос?“ Или, шај те користина о 5 поглавје таро лил Со сикавела амен и Библија? Адава поглавје иси ле наслов „И откупнина — најбаро поклон таро Девел“. Хем, секова берш амен бајрараја повише амари благодарност баши откупнина адалеа со присуствујнаја ки Спомен-свеченост башо е Исусескоро мерибе хем адалеа со ревно канинаја е јаверен те овен присутна аменцар. О Јехова денѓа амен бари чест те сикава е јаверен башо лескоро Чхаво.

17. Соске и откупнина тани е Девлескоро најбаро поклон е манушенге?

¹⁷ Сигурно, иси амен бут шукар причине понадари да са повише те ценина и откупнина. Преку и откупнина, амен шај те ова паше амала е Јеховаја иако сием несовршена. Преку и откупнина, о буќа со керѓа лен о Бенг ка овен целосно уништиме (1. Јов. 3:8). Хем преку лате, е Јеховаскири првобитно намера е Пхувјаја ка овел исполними. Цело Пхув ка овел рај. Секоле јекхе со ка запознајне ка мангел е Јехова хем ка служинел леске. Адалеске, те ова одлучна секова диве те рода начинија те сикава кај ценинаја и откупнина — е Девлескоро најбаро поклон е манушенге!