Соске о Исус англедер те мерел вакерѓа е Давидескере лафија со аракхљовена ко Псалм 22:1?

Кратко англедер те мерел, о Исус вакерѓа о лафија таро Матеј 27:46 хем Марко 15:34: „Девла, Девла, соске мукхљан ман?“ Адалеа о Исус исполнинѓа е Давидескере лафија сој пишиме ко Псалм 22:1. Би овела сине погрешно те мислина кај о Исус вакерѓа акала лафија адалеске со сине разочаримо или адалеске со ко моменти на сине ле вера ко Јехова. О Исус халило соске мора сине те мерел хем спремно сине те керел адава (Мат. 16:21; 20:28). Исто аѓаар, о Исус џанља кај о Јехова нане те заштитинел ле ко последна моментија таро лескоро живото (Јов 1:10). Адалеа денѓа о Јехова прилика е Исусеске те сикавел кај ка ачховел леске верно бизи разлика кобор пхаро ка овел лескоро мерибе (Мар. 14:35, 36).

Тегани соске о Исус вакерѓа акала лафија таро псалм? Иако нашти сигурно те вакера соске о Исус вакерѓа акала лафија, те дикха кола шај те овен несаве причине. *

Акале лафенцар, о Исус шај мангља те истакнинел кај о Јехова нане те спречинел лескоро мерибе. О Исус ваљани сине те платинел и откупнина бизи е Јеховаскири помош. Ов сар мануш ваљани сине те мерел секоле јекхеске (Евр. 2:9).

Адалеа со вакерѓа некобор лафија таро псалм, о Исус шај мангља те сетинкерел е јаверен ко цело псалм. О Евреија ко адава време обично сикљовена сине бут псалмија ки  годи. Ако би шунена сине несаво стихо таро несаво псалм, одма би почминена сине те размислинен башо цело псалм. Ако е Исусе адава сине ки годи, тегани ов шај сине те поможинел пле следбениконге кола со сине Евреија те сетинен пе ко бут пророштвија таро адава псалм башо настанија сој поврзиме лескере мерибаја (Пс. 22:7, 8, 15, 16, 18, 24). Исто аѓаар, о последна стихија таро адава псалм, славинена е Јехова хем опишинена ле сар Цари упро са (Пс. 22:27-31).

Кеда вакерѓа е Давидескере лафија, о Исус шај мангља те истакнинел кај нане криво. Англедер те мерел, о Исус сине незаконско осудимо кај керела лафи против о Девел (Мат. 26:65, 66). О Судско совет сигате кхединѓа пе раќате хем судинѓа е Исусе бизо те икерел пе ко закони (Мат. 26:59; Мар. 14:56-59). Адалеа со пучља: „Девла, Девла, соске мукхљан ман?“, о Исус шај мангља те истакнинел кај на керѓа ништо башо со заслужинела те овел мудардо.

Адалеа со вакерѓа е Давидескере лафија, о Исус шај мангља те сетинкерел е јаверен, кај иако о Давид цидинѓа муке адава на сине доказ кај о Јехова нане задоволно лестар. Е Давидескоро пучибе на сикавела кај ов нашавѓа пли вера ко Девел. Откеда пучља адава пучибе, о Давид сикавѓа доверба кај о Јехова шај те спасинел пле слуген, а о Јехова понадари да сине леа (Пс. 22:23, 24, 27). Слично аѓаар, иако о Исус, „е Давидескоро Чхаво“, цидинѓа муке ко стубо адава на значинела сине кај о Јехова нане више задоволно лестар (Мат. 21:9).

Адалеа со о Исус вакерѓа адала лафија, ов шај мангља те сикавел пли жал адалеске со о Јехова цидинѓа пли заштита лестар те шај те докажинел кај тано верно ко са. Е Јеховаскири намера ко почеток на сине лескоро Чхаво те цидел муке хем те мерел. Адава сине потребно откеда о Адам хем и Ева бунинѓе пе против о Јехова. О Исус на керѓа ништо погрешно, ама ваљани сине те цидел муке хем те мерел те шај те одговоринел ко спорна пучиба таро Сатана хем те платинел и откупнина те шај палем те кинел адава со нашавѓа о Адам (Мар. 8:31; 1. Пет. 2:21-24). Адава шај сине те керел само ако о Јехова моментално цидела пли заштита лестар. Адава сине о прво пути со о Јехова на заштитинѓа пле Чхаве.

Адалеа со вакерѓа адала лафија, о Исус шај мангља те поможинел пле следбениконге те размислинен баши причина соске о Јехова дозволинѓа те мерел ко стубо мучибаске. * О Исус џанља кај бут џене ка сопкинен пе адалеске со муло сар криминалцо ко стубо мучибаске (1. Кор. 1:23). Ако лескере следбеникија концентриринена пе сине ки причина соске муло, тегани ка дикхен сине ки лесте сар Спасители, а на сар криминалцо (Гал. 3:13, 14).

Бизи разлика тари сави причина о Исус вакерѓа адала лафија, ов џанља кај, адалеа со мерела ко стубо, керела е Јеховаскири волја. Кратко откеда о Исус цитиринѓа адава псалм, ов вакерѓа: „Завршимо тано!“ (Јован 19:30; Лука 22:37). Адалеа со о Јехова кратко цидинѓа пли заштита, е Исусе сине ле прилика те керел са адала буќа башо кола со сине бичхалдо ки Пхув. Исто аѓаар, адава денѓа ле прилика те исполнинел са о буќа со сине пишиме баши лесте „ко е Мојсеескоро закони, ко Пророкија хем ко Псалмија“ (Лука 24:44).