1-2. Со случинѓа пе англедер о Исус те вакерел пле последна лафија сар мануш?

СИЕМ ко 14 нисан 33 берш а.е. Англедер, о Исус сине лажно обвинимо хем осудимо башо нешто со на керѓа. Акана о мануша асана леске, сурово мучинена ле хем ковинена лескере васта хем пре шајкенцар ко стубо. Чак кеда дишинела хем керела лафи иси ле дукха. Ама, мора те керел лафи соске иси нешто важно те вакерел.

² Те разгледина акана е Исусескере последна лафија со вакерѓа лен џикоте мерела сине ко стубо мучибаске, хем те дикха со шај те сикљова лендар. Јавере лафенцар, ајде те шуна ле (Мат. 17:5).

3. Ки касте о Исус веројатно мислинѓа кеда вакерѓа: „Мо Дад, простин ленге“?

³ Со вакерѓа о Исус? Кеда о Исус сине ко стубо, ов молинѓа пе: „Мо Дад, простин ленге“. Каске те простинел? Е Исусескере следна лафија поможинена аменге те хаљова ки касте мислинѓа. Ов вакерѓа: „Ола на џанена со керена“ (Лука 23:33, 34). О Исус веројатно мислинѓа ко римска војникија кола со ковинѓе лескере васта хем пре ко стубо. Ола на џанле кој чаче тано ов. Исто аѓаар, ов шај мислинѓа ко несаве таро мануша со родинѓе те овел мудардо, ама со покасно сикавѓе вера ки лесте (Дела 2:36-38). О Исус на дозволинѓа и неправда со доживинѓа те керел ле те овел хољамо хем те на мангел те простинел околенге со прогонинѓе  ле (1. Пет. 2:23). Наместо адава, ов молинѓа е Јехова те простинел околенге со мударѓе ле.

4. Со шај те сикљова тари е Исусескири спремност те простинел пле противниконге?

⁴ Со шај те сикљова таро е Исусескере лафија? Исто сар о Исус, ваљани те ова спремна те простина е јаверенге (Кол. 3:13). Несаве, коте сој вклучими амари фамилија да, шај противинена пе аменге адалеске со на хаљовена амаре верувања хем о начин сар живинаја. Ола шај вакерена ховајба баши аменде, понижинена амен англо јавера, уништинена амари литература или чак заканинена пе аменге кај физички ка нападинен амен. Наместо те икера холи, шај те молина е Јехова те поможинел околенге со противинена пе аменге те прифатинен о чачипе (Мат. 5:44, 45). Понекогаш, шај те овел аменге пхаро те простина ленге, посебно кеда понашинена пе бут лошно аменцар. Ама, ако ачховаја хољаме хем на простинаја кераја штета коркори аменге. Јекх пхен вакерела: „Халиљум кај те простинав е јаверенге на значинела кај одобринава адава со керѓе или кај дозволинава ленге те понашинен пе манцар лошно. Адава едноставно значинела кај одлучинѓум те на ачховав ленге хољами“ (Пс. 37:8). Кеда простинаја е јаверенге амен на дозволинаја о лошна буќа со случинѓе пе аменге те керен амен хољаме (Еф. 4:31, 32).

5. Со ветинѓа о Исус јекхе криминалцоске со сине узи лесте, хем соске ветинѓа леске адава?

⁵ Со вакерѓа о Исус? Дуј криминалција сине ковиме ко стубо узо Исус. Ко почеток, о солдуј асана леске сине (Мат. 27:44). Ама, покасно јекх лендар менинѓа пло стави хем халило кај о Исус на керѓа „ништо лошно“ (Лука 23:40, 41). А сој најважно, ов сикавѓа вера кај о Исус ка овел воскреснимо таро мерибе хем кај јекх диве ка владинел сар Цари. Ов вакерѓа е Исусеске: „Исус сетин тут ки манде кеда ка ове Цари“ (Лука 23:42). Акава мануш сикавѓа бари вера! А о Исус одговоринѓа леске: „Чаче вакерава туке авдиве, ту ка ове манцар [на ко Царство него] ко рај“ (Лука 23:43). Е Исусескере лафија сикавена кај коркори о Исус денѓа ле адава ветување. О Исус шај сине те дел надеж адале криминалцоске адалеске со џанља кај лескоро Дад тано милостиво (Пс. 103:8).

6. Со сикљоваја таро е Исусескере лафија со вакерѓа лен е криминалцоске?

⁶ Со шај те сикљова таро е Исусескере лафија? О Исус тано исто сар пло Дад (Евр. 1:3). О Јехова мангела те простинел аменге хем те сикавел аменге милост. Ама, адава ка керел ле само ако чаче аменге жал башо лошна буќа со керѓем лен поангле хем ако сикаваја вера ки откупно жртва со денѓа ла о Исус Христос (1. Јов. 1:7). Несавенге шај пхаро тано те верујнен кај о Јехова шај те простинел ленгере грешке со керѓе лен поангле. Ако ту да некогаш осетинеа тут аѓаар размислин башо акава: Кратко англедер те мерел о Исус сикавѓа милост јекхе криминалцоске кова само со почминѓа те сикавел вера. Кобор повише ка сикавел о Јехова милост пле верна слугенге, кола дена пло најшукар те шунен лескере заповедија! (Пс. 51:1; 1. Јов. 2:1, 2).

7. Спрема Јован 19:26, 27, со вакерѓа о Исус е Маријаке хем е Јованеске, хем соске вакерѓа ленге адава?

⁷ Со вакерѓа о Исус? (Читин Јован 19:26, 27.) О Исус мангља те грижинел пе пле дајаке, која веројатно сине удовица.  Лескере пхраља хем пхења шај сине те грижинен пе башо лакере материјална потребе. Ама, кој ка грижинел пе сине башо лакере духовна потребе? Лескере пхраља тегани панда на сине лескере следбеникија. Ама, о Јован сине јекх верно апостоли хем јекх таро лескере најпаше амала. Е Исусескири духовно фамилија сине адала со заедно леа обожавинена сине е Јехова (Мат. 12:46-50). Адалеске со мангела сине е Марија хем грижинела пе сине лаке ов вакерѓа е Јованеске те грижинел пе башо лакере духовна потребе. Пле дајаке вакерѓа: „Аке туке чхаво!“ А е Јованеске вакерѓа: „Аке туке дај!“ Таро адава диве о Јован уло сар чхаво е Маријаке хем грижинѓа пе лаке  сар те пхене тани лескири дај. О Исус сикавѓа баро мангипе пле дајаке која со љубезно грижинѓа пе леске откеда бијандило хем која со сине паше узи лесте кеда муло.

8. Со шај те сикљова таро е Исусескере лафија со вакерѓа лен е Маријаке хем е Јованеске?

⁸ Со шај те сикљова таро е Исусескере лафија? Амаро однос со иси амен амаре пхраленцар хем пхењенцар таро собрание шај те овел посилно таро однос со иси амен амаре најпаше фамилијаја. Амари фамилија шај те противинел пе аменге или шај чак те отфрлинел амен. Ама, сар со ветинѓа о Исус, ако ачховаја паше узо Јехова хем лескири организација ка добина „шел пути повише“ таро адава со нашавѓем. Бут таро адала пхраља хем пхења ка овен аменге сар мангло чхаво, чхај, дај или дад (Мар. 10:29, 30). Сар осетинеа тут башо адава со сиан дело тари јекх духовно фамилија сој тани ко јекхипе адалеске со иси ла вера хем мангипе — мангипе спрема о Јехова хем спрема јекх јекхесте? (Кол. 3:14; 1. Пет. 2:17).

9. Со шај те сикљова таро е Исусескере лафија ко Матеј 27:46?

⁹ Со вакерѓа о Исус? Кратко англедер те мерел о Исус викинѓа ко гласо: „Девла, Девла, соске мукхљан ман?“ (Мат. 27:46). И Библија на објаснинела соске о Исус вакерѓа адава. Сепак, размислин со шај те сикљова таро акала лафија. Јекх бути со сикљоваја тани кај о Исус адале лафенцар исполнинѓа о пророштво со аракхљовела ко Псалм 22:1. * Исто аѓаар, адала лафија сикавена јасно кај о Јехова на „чхивѓа ограда“ те заштитинел пле Чхаве (Јов 1:10). О Исус халило кај лескоро Дад дозволинѓа околенге со мрзинена ле те испитинен лескири вера џи ко мерибе. Нијекх мануш на сине испитимо сар со сине о Исус. Исто аѓаар, акала лафија потврдинена кај ов на сине криво башо нисаво криминал, башо кова со заслужинела сине те мерел.

10. Саве поуке шај те сикљова таро е Исусескере лафија пле Дадеске?

¹⁰ Со шај те сикљова таро е Исусескере лафија? Јекх поука со шај те сикљова тани кај на ваљани те очекујна е Јеховастар те заштитинел амен таро искушенија со испитинена амари вера. Исто сар о Исус кова со сине искушимо највише со шај, амен да ваљани те ова спремна те докажина амари верност чак ако ваљани те мера (Мат. 16:24, 25). Ама шај те ова увериме кај о Јехова нане те мукхел те ова искушиме повише таро адава со шај те издржина (1. Кор. 10:13). Јекх јавер поука со шај те сикљова тани кај сар о Исус амен да шај те цида муке иако на керѓем ништо погрешно (1. Пет. 2:19, 20). Адала со противинена пе аменге на керена адава адалеске со керѓем нешто погрешно, него адалеске со на сием дело таро свето хем адалеске со сведочинаја о чачипе (Јован 17:14; 1. Пет. 4:15, 16). О Исус халило соске о Јехова дозволинѓа те цидел муке. Ама, јавера верна слуге е Девлескере понекогаш пучле пе соске о Јехова дозволинела те случинен пе асавке буќа (Авак. 1:3). Амаро милостиво хем стрпливо Девел џанела кај лен иси лен вера, ама ленге ваљани утеха која со само ов шај те дел (2. Кор. 1:3, 4).

11. Соске о Исус вакерѓа о лафија таро Јован 19:28?

¹¹ Со вакерѓа о Исус? (Читин Јован 19:28.) Соске о Исус вакерѓа: „Жедно  сиум“? Ов вакерѓа адава те шај те исполнинел пе јекх пророштво, со аракхљола ко Псалм 22:15, коте со пишинела: „Нане ман више сила уљум сар пхаго пхувјало чаро, мли чхиб лепинела пе манге ко гизија“. Исто аѓаар, пало са о муке со цидинѓа о Исус, коте сој вклучиме о баре дукха ко стубо, ов сигурно сине бут жедно. Те шај те на овел више жедно ваљанѓа леске помош.

12. Со шај те сикљова таро е Исусескере лафија „жедно сиум“?

¹² Со шај те сикљова таро е Исусескере лафија? Е Исусеске на сине лаџаво те пучел башо буќа со ваљани леске сине. Адалеске амен да на ваљани те лаџа. Несаве амендар шај на мангена те роден помош е јаверендар, ама кеда ка ваљани аменге помош амен на ваљани те лаџа те рода е јаверендар те поможинен аменге. На пример, ако сием попхуре или насвале амен шај ка ваљани те пуча јекхе амале те ингарел амен ки дуќана или ко доктори. Ако сием обесхрабриме шај ваљани те пуча јекхе старешина или зрело амале таро собрание те шунел амен или те вакерел аменге јекх „шукар лафи“ кова со ка охрабринел амен (Изр. 12:25). Те на бистра кај амаре пхраља хем пхења мангена амен, хем мангена те поможинен аменге „ко пхаре диве“ (Изр. 17:17). Ама, ола нашти те читинен амаре мисле хем те џанен со ваљанела аменге ако амен на вакераја ленге.

13. Со керѓа о Исус адалеа со ачхило верно џи ко мерибе?

¹³ Со вакерѓа о Исус? Околу трин о саати палоручко ко 14 нисан, о Исус гласно викинѓа: „Завршимо тано!“ (Јован 19:30). Е Исусескере лафија кратко англедер те мерел сикавена амен кај ов џанља кај керѓа са адава со родинѓа лестар о Јехова. Адалеа со ачхило верно џи ко мерибе о Исус исполнинѓа бут буќа. Прво, ов докажинѓа кај о Сатана тано ховавно. О Исус сикавѓа кај јекх совршено мануш шај те ачховел верно е Јеховаске бизи разлика со керѓа леске о Сатана. Дујто, о Исус денѓа пло живото сар откупнина. Адалеске со денѓа пло живото сар жртва, е несовршена манушен шај те овел лен јекх амалипе е Девлеа хем надеж башо вечно живото. Хем трито, о Исус докажинѓа кај о Јехова тано праведно владетели хем чистинѓа пле Дадескоро анав тари лаџ.

14. Сар ваљани те ова одлучна те живина секова диве? Објаснин.

¹⁴ Со шај те сикљова таро е Исусескере лафија? Мора те ова одлучна секова диве те ачхова верна. Дикх со вакерѓа о пхрал Максвел Френд, кова со служинѓа сар инструктори ки библиско школа Гилеад. Ко јекх меѓународно конгрес, ко јекх говор баши верност, о пхрал Френд вакерѓа: „Ма одложин тајсаске адава со шај те кере или те вакере авдиве. Дали сиан сигурно кај ка ове џивдо тајса? Живин секова диве сар те пхене адаја тани ти последно шанса те сикаве кај сиан достојно те живине вечно“. Те живина секова диве сар те пхене адаја тани амари последно шанса те ачхова верна! Тегани, чак ако мераја, шај те вакера: „Јехова, денѓум мандар са те шај те ачховав верно, те докажинав кај о Сатана тано ховавно, те чистинав тло анав тари лаџ хем те поддржинав тло право те владине“.

15. Спрема Лука 23:46, ко со сине сигурно о Исус?

¹⁵ Со вакерѓа о Исус? (Читин Лука 23:46.) О Исус целосно довербаја вакерѓа: „Мо Дад, ко тле васта дава мло духо“. О  Исус џанља кај лескири иднина зависинела таро Јехова хем ов сине сигурно кај лескоро Дад ка сетинел пе ки лесте.

16. Со сикљовеа таро искуство јекхе пхралескоро со сине ле 15 берш?

¹⁶ Со шај те сикљова таро е Исусескере лафија? Ачхов верно е Јеховаске чак кеда тло живото тано ки опасност. Те шај те кере адава ваљани те „овел тут доверба ко Јехова цело вилеа“ (Изр. 3:5). Те дикха о пример е Јошуаскоро, јекх Сведоко кова со сине ле 15 берш хем сине ле насвалипе колестар мерела пе. Ов одбинѓа те прифатинел медицинска третмања коленцар со би пхагела сине е Девлескоро закони. Кратко англедер те мерел ов вакерѓа пле дајаке: „Мамо, ме сиум е Јеховаске ко васта... Ме сиум бут уверимо кај о Јехова сигурно ка воскреснинел ман. Ов џанела мло вило хем ме чаче мангава ле“. Секова јекх амендар ваљани те пучел пе: „Ако мли вера тани испитими аѓаар со шај те мерав, дали ка мукхав мло живото е Јеховаске ко васта хем дали ка овел ман доверба кај ов ка сетинел пе ки манде?“

17-18. Саве поуке сиклилем? (Дикх хем и рамка „ Со сикљоваја таро е Исусескере последна лафија“.)

¹⁷ Амен шај те сикљова важна поуке таро е Исусескере последна лафија! Ола сетинкерена амен кај ваљани те простина е јаверенге хем кај ваљани те овел амен доверба кај о Јехова ка простинел аменге. Иси амен предност те ова дело тари јекх бут шужи духовно фамилија таро пхраља хем пхења кола тане спремна те поможинен аменге. Ама, на ваљани те лаџа те рода лендар помош. Џанаја кај о Јехова ка поможинел аменге те издржина секова проблеми. Исто аѓаар, дикхаја кобор тано важно секова диве те живина сар те пхене адава тано о последно диве со шај те докажина амари верност, увериме кај амаро живото тано сигурно ко е Јеховаскере васта.

¹⁸ Чаче, шај бут те сикљова таро е Исусескере последна лафија со вакерѓа лен џикоте мерела сине ко стубо! Кеда применинаја о поуке со сиклилем лен, ка ова послушна е Јеховаскере лафенге со вакерѓа лен башо пло Чхаво: „Лесте шунен ле“ (Мат. 17:5).