И СЕКИРАЦИЈА шај те овел сар јекх пхаро товар ко амаро вило (Изр. 12:25). Дали некогаш осетинѓан баро пхарипе упри туте адалеске со сиан сине секиримо? Дали адава пхарипе сине добором баро со мислинѓан туке кај нашти више те издржине? Ако тано аѓаар, акава на случинела пе само туке. Бут џене амендар осетинѓе пе баш аѓаар таро различна причине. На пример, несаве шај аракхена некас тари фамилија сој тано насвало. А јаверендар муло некој сој ленге паше, доживинѓе несави природно катастрофа или шај накхена тари јавер ситуација која со уморинела лен ко физичко, психичко хем емоционално поглед. Со шај те поможинел аменге те издржина кеда сием секириме? a

Таро пример е царескоро е Давидескоро шај бут те сикљова башо адава сар те икљова ко крајо е секирацијаја. Ов накхља таро бут пхаре ситуацие, чак некобор пути лескоро живото сине ки опасност (1. Сам. 17:34, 35; 18:10, 11). Со поможинѓа е Давидеске те издржинел кеда сине секиримо? Сар шај те џа пало лескоро пример?

Е Давиде сине ле повише проблемија ко исто време. Размислин ки сави ситуација аракхлило џикоте нашела сине таро цари о Саул кова со мангела сине те мударел ле. Кеда о Давид хем лескере мануша иранѓе пе тари јекх борба, шокиринѓе пе кеда дикхле кај о душмања чорѓе лендар са со сине лен, тхарѓе ленгере кхера хем леле ленгере фамилиен. Сар реагиринѓа о Давид? Ки Библија читинаја: „О Давид хем о мануша со сине леа почминѓе гласно те ровен џикоте на сине лен више сила ројбаске“. Упро са адава, лескере мануша „мангле те каменујнен ле“ (1. Сам. 30:1-6). Акана, е Давиде ко исто време сине ле трин баре проблемија: Лескири фамилија сине ки опасност, лескере мануша мангена сине те мударен ле, хем о цари о Саул понадари да мангела сине те астарел ле. Замислин само кобор бут сине секиримо о Давид!

Со керѓа о Давид? Ов одма „родинѓа помош таро пло Девел о Јехова“. Сар керѓа адава? Е Давиде сине ле навика те родел помош таро Јехова ки молитва, хем те размислинел башо адава сар ов више англедер поможинѓа леске (1. Сам. 17:37; Пс. 18:2, 6). О Давид џанља кај ваљани те родел водство таро Јехова, адалеске пучља е Јехова со те керел. Откеда добинѓа водство таро Јехова, ов одма постапинѓа спрема адава одговор со добинѓа ле. Сар резултати, о Јехова денѓа берекети леске хем лескере манушенге хем ола успејнѓе те спасинен пумаре фамилиен хем те иранен са адава со чорѓе лендар (1. Сам. 30:7-9, 18, 19). Дали приметинѓан кола трин буќа керѓа о Давид? Ов молинѓа пе е Јеховаске баши помош, размислинѓа башо адава сар о Јехова англедер поможинѓа леске, хем постапинѓа спрема е Јеховаскоро водство. Сар шај амен те џа пало е Давидескоро пример? Те дикха трин начинија.

1. Молин тут. Секогаш кеда ка почмина те осетина амен секириме башо нешто, шај те молина амен е Јеховаске баши помош хем мудрост. Шај ки јекх побари молитва те вакера е Јеховаске са амаре секирацие. Адава ка поможинел аменге те осетина амен пошукар. Или, шај кратко те молина амен ки аменде ако о околностија на дозволинена аменге те кера нешто повише ко адава моменти. Секогаш кеда родаја помош таро Јехова сикаваја кај иси амен доверба сар со сине е Давиде кова со вакерѓа: „О Јехова тано... мли тврдина хем мло спасители. Мло Девел тано мли карпа. Ки лесте шај те гаравав ман“ (Пс. 18:2). Дали и молитва чаче поможинела? Јекх пхен со викинела пе Калија, која со служинела сар пионери, вакерела: „Откеда ка молинав ман, осетинава андруно мир. И молитва поможинела манге те размислинав аѓаар сар со размислинела о Јехова хем те овел ман побари доверба ки лесте“. Чаче, и молитва тани јекх бут шужо поклон таро Јехова која со поможинела аменге те икљова ко крајо е секирацијаја.

 2. Размислин башо адава сар о Јехова англедер поможинѓа туке. Ако размислинеа башо адава со случинѓа пе туке англедер, сигурно ка сетине тут ко пхаре ситуацие коте со успејнѓан те издржине само адалеске со о Јехова поможинѓа туке. Кеда размислинаја башо адава сар о Јехова поможинѓа аменге хем пле слугенге таро пурано време, тегани осетинаја панда побаро андруно мир хем амари доверба бајрола ки лесте (Пс. 18:17-19). Јекх старешина со викинела пе Џошуа вакерела: „Иси ман списако таро са о молитве со сине манге одговориме. Акава поможинела манге те сетинав ман ко ситуацие кеда конкретно молинѓум ман е Јеховаске башо нешто хем ов денѓа ман баш адава со ваљани сине манге“. Кеда размислинаја кобор пути о Јехова поможинѓа аменге англедер, тегани добинаја и сила која со ваљани аменге те шај понадари да те борина амен амаре секирациенцар.

3. Постапин спрема е Јеховаскоро водство. Англедер те одлучина сар те постапина ки несави ситуација, шај те истражина ко е Девлескоро Лафи те шај те добина о најмудро водство (Пс. 19:7, 11). Бут џене халиле кај кеда истражинена несаво конкретно стихо, полокхе шај те хаљовен сар шај те применинен адава стихо ко пло живото. Јекх старешина со викинела пе Џеред, објаснинела: „О истражибе поможинела манге те дознајнав повише буќа башо несаво стихо хем те хаљовав со мангела те вакерел манге о Јехова. Адава бут влијајнела упри манде хем поможинела манге те постапинав спрема лескоро водство. Кеда родаја водство таро Јехова преку лескоро Лафи хем применинаја адава ко амаро живото, ка овел аменге полокхо те истрајна кеда сием секириме.

О Давид халило кај те шај те издржинел кеда иси ле секирацие ваљани леске е Јеховаскири помош. Ов добором бут ценинела сине е Јеховаскири поддршка со сине поттикнимо те вакерел: „Кеда поможинела ман о Девел шај ко ѕидо те укљав. О чачутно Девел тано адава кова со дела ман сила“ (Пс. 18:29, 32). Шај амаре проблемија изглединена аменге сар уче ѕидија кола со нашти те накха лен. Ама кеда о Јехова поможинела аменге, шај те икљова ко крајо секоле пхаре проблемеа. Кеда молинаја амен е Јеховаске баши помош, кеда размислинаја башо са адава со керѓа аменге англедер, хем кеда постапинаја спрема лескоро водство, шај те ова сигурна кај ов ка дел амен сила хем мудрост кола со ваљани аменге те шај те истрајна кеда сием секириме.