1. Саве духовна целија шај те чхива аменге?

 АДАЛЕСКЕ со сием чачутне христијања, амен бут мангаја е Јехова хем мангаја те служина леске ко најшукар начин. Те шај те успејна ко адава ваљани те чхива аменге духовна целија сар на пример, те развина христијанска особине, те сикљова корисна вештине хем те рода начинија сар шај те служина е јаверенге. b

2. Соске ваљани те чхива аменге духовна целија хем те трудина амен те исполнина лен?

² Соске ваљани те манга духовно те напредујна? И најважно причина тани, адалеске со мангаја те кера амаре небесно Дадескири волја. О Јехова тано бахтало кеда дикхела кај користинаја амаре талентија хем способностија најшукар со шај ки лескири служба. Освен адава, мангаја духовно те напредујна те шај ки побари мера те поможина амаре пхраленге хем пхењенге (1. Сол. 4:9, 10). Бизи разлика кобор време сием ко чачипе, сарине амен шај духовно те напредујна. Те дикха сар шај те кера адава.

3. Спрема 1. Тимотеј 4:12-16, со поттикнинѓа о апостол Павле е Тимотее те керел?

³ О Тимотеј сине терно хем искусно старешина кеда о Павле пишинѓа леске о прво писмо. Сепак, о Павле поттикнинѓа ле понадари да духовно те напредујнел. (Читин 1. Тимотеј 4:12-16.) Џикоте читинеа е Павлескере лафија, ка приметине кај ов поттикнинѓа е Тимотее те напредујнел ко дуј буќа: те развинел о христијанска особине сар сој мангипе, вера хем чистота, хем те овел пошукар ко несаве вештине сар сој о јавно читибе, о охрабрибе е јаверен хем  о сикајбе. Џикоте размислинаја башо е Тимотеескоро пример, ка дикха сар адава со ка чхива аменге разумна целија ка поможинел аменге духовно те напредујна. Ка дикха исто аѓаар некобор начинија сар шај те бајрара амари служба.

4. Спрема Филипјаните 2:19-22, соске о Тимотеј сине корисно слуга е Јеховаске?

⁴ Соске о Тимотеј сине корисно слуга е Јеховаске? Адалеске со сине ле бут шуже христијанска особине. (Читин Филипјаните 2:19-22.) Таро адава со о Павле пишинѓа башо Тимотеј шај те дикха кај ов сине понизно, верно, вредно хем достојно баши доверба. Ов бут мангела сине е пхрален хем чаче грижинела пе сине ленге. Адалеске о Павле бут мангела сине е Тимотее хем на дарала сине те дел ле пхаре задаче (1. Кор. 4:17). Ако амен да развинаја шуже особине, о Јехова ка мангел амен хем ка ова покорисна е пхраленге таро собрание (Пс. 25:9; 138:6).

5. а) Со шај те поможинел туке те одлучине ки која христијанско особине те кере бути? б) Сар трудинела пе и терни пхен сој ки слика те овел посочувствително е јаверенцар?

⁵ Чхив туке конкретно цел. Молин тут хем размислин сар шај те ове пошукар личност. Бирин јекх конкретно особина колате со мангеа те кере бути. На пример, дали шај те ове посочувствително, или те овел тут побари желба те поможине е пхраленге хем е пхењенге? Шај ли те трудине тут те кере мир е јаверенцар хем те ове поспремно те простине? Шај бут те поможинел туке ако пучеа јекхе паше амале те вакерел туке сар шај те ове пошукар (Изр. 27:6).

6. Сар шај те развине несави особина?

⁶ Трудин тут те исполнине тли цел. Сар шај те кере адава? Јекх начин тано аѓаар со ка проучине баши особина која со мангеа панда повише те сикаве ла. На пример, шај нане туке локхо те простине е јаверенге хем адалеске мангеа те кере бути ко адава. Шај те почмине аѓаар со ка читине хем хор ка размислине башо библиска личностија кола со спремно простинена сине е јаверенге хем башо окола со на керена сине адава. Размислин башо е Исусескоро пример. Ов спремно простинела сине е јаверенге (Лука 7:47, 48). Исто аѓаар, на концентриринела пе сине ко ленгере грешке него дикхела сине саве мануша шај сине те овен ки иднина. Ама о фарисеија на сине сар о Исус, ола мислинена сине кај „о јавера на врединена“ (Лука 18:9).  Откеда хор ка размислине башо акала примерија, пуч тут: „Со дикхава ко јавера? Ко кола таро ленгере особине биринава те концентриринав ман?“ Ако пхаро туке те простине некаске, трудин тут те пишине со повише шукар особине тари адаја личност. Пало адава пуч тут: „Сар дикхела о Исус ки лесте? Дали ов би простинела сине леске?“ Ако кераја адава, ка менина амаро начин сар дикхаја ки адаја личност. Ко почеток шај ка ваљани бут те трудина амен те шај те простина некаске со поврединѓа амен. Ама со повише трудинаја амен те простина, сар ка накхел о време ка овел аменге полокхо те кера адава.

7. Сави бути завршинела о Јехова адалеа со користинела вешта работникон? (Изреки 22:29).

⁷ Јавер цел со шај те чхиве туке тани те сикљове несави корисно вештина. Размислин кобор бут работникија ваљани те шај те градинен пе Бетелија, конгресна сале хем дворане. Бут џене сиклиле вештине аѓаар со керѓе бути искусна пхраленцар хем пхењенцар. Сар со дикхаја ки слика, хем о пхраља хем о пхења сикљовена вештине кола со ваљани те шај те одржинен пе о конгресна сале хем о дворане. Ко асавке хем ко јавера начинија, о Јехова, о Девел, „о Цари тари вечност“, хем о Христос Исус, „[о Цари] упро царија“, керена баре буќа адалеске со користинена вешта работникон. (1. Тим. 1:17; 6:15; читин Изреки 22:29.) Амен мангаја те ова вредна ки амари бути хем те користина амаре вештине те шај те славина е Јехова, а на амен (Јован 8:54).

8. Со ка поможинел туке те одлучине која вештина те сикљове?

⁸ Чхив туке конкретно цел. Која вештина шај те сикљове? Пуч е старешинен таро тло собрание хем ако мангеа е покраинско надгледнико башо адава која вештина шај те сикљове. На пример, ако вакерена туке те ове пошукар говорнико хем пошукар те сикаве е јаверен, замолин лен те вакерен туке ко со конкретно ваљани те кере бути. Пало адава, применин о совет те шај те ове пошукар. Те дикха сар шај те кере акава.

9. Сар шај те сикљове несави вештина?

⁹ Трудин тут те исполнине тли цел. Со ако мангеа те ове повешто ко сикајбе? Шај те проучине и брошура Ов са пошукар ко читибе хем сикајбе. Кеда ка добине несави задача ко состанок Амаро живото хем служба, шај те пуче несаве искусно пхрале те шунел тли задача англедер те икере ла хем те вакерел туке несаве предлогија коте со шај панда те кере бути. Ако спреминеа тле задаче доволно англедер, о јавера на само со ка дикхен кај сиан вешто него хем ка дикхен кај сиан вредно хем ка овел лен доверба ки туте (Изр. 21:5; 2. Кор. 8:22).

10. Вакер пример колестар со дикхела пе сар шај те ова вешта ки несави бути која со нане аменге локхо те кера ла.

¹⁰ Со ако мангеа те ове вешто ки несави бути која со нане туке локхо те кере ла? Ма откажин тут. Јекх пхрал со викинела пе Гери, нашти сине шукар те читинел. Ов сетинела пе кобор лаџала сине кеда пробинела сине те читинел ко состанокија. Ама ов бут трудинела пе сине те шај пошукар те читинел. Ов вакерела кај и обука со добинѓа ла таро искусна пхраља хем таро публикацие поможинѓа леске акана те икерел говорија ки дворана хем ко конгресија.

11. Исто сар о Тимотеј, со ка поможинел аменге да те прифатина повише одговорностија?

¹¹ Дали о Тимотеј уло бут шукар говорнико хем учители? И Библија на вакерела аменге. Ама шај те ова сигурна кај о Тимотеј уло са пошукар ко керибе пле задаче  адалеске со шунѓа е Павлескоро совет (2. Тим. 3:10). Слично, ако амен да развинаја амаре вештине, тегани ка ова поспремна те прифатина повише одговорностија.

12. Сави помош добинѓан јаверендар?

¹² Секова јекх амендар добинѓа несави помош јаверендар. Ако сием ки болница сигурно ка ова бут благодарна ако посетинена амен несаве старешине кола со служинена ко Одбор со поможинела машкар о докторија хем е Јеховаскере сведокија или ки несави Група со посетинела е пациентен. Кеда накхаја таро несаве пхаре ситуацие ко амаро живото, бут ценинаја кеда несаво љубезно старешина одвојнела време те шунел амен хем те утешинел амен. Кеда ваљани аменге помош башо несаво библиско курси, бут ценинаја кеда несаво искусно пионери авела аменцар ко адава курси хем дела амен несаве предлогија. Са акала пхраља хем пхења тане бахтале со шај те поможинен аменге. Амен да шај те ова бахтале ако сием спремна те служина амаре пхраленге. О Исус вакерѓа: „Повише иси бахталипе кеда дела пе, него кеда лела пе“ (Дела 20:35). Ако мангеа повише те бајраре тли служба ко акала или ко јавера начинија, со шај те поможинел туке те исполнине асавке целија?

13. Со на ваљани те бистра кеда чхиваја аменге несави цел?

¹³ Ма чхив туке цел која со нане конкретно. На пример, шај ка вакере: „Мангава те керав нешто повише ко собрание“. Ама, шај нане те џане сар те исполнине адаја цел хем нане те хаљове кеда исполнинѓан ла. Адалеске, чхив туке јасно хем конкретно цел. Шај чак те пишине туке адаја цел хем сар планиринеа те исполнине ла.

14. Соске ваљани те ова прилагодлива кеда чхиваја аменге целија?

¹⁴ Кеда чхиваја аменге целија ваљани исто аѓаар те ова прилагодлива. Соске? Адалеске со нане амен целосно контрола упро амаре околностија. Те дикха о пример е Павлескоро. Ов поможинѓа те керел пе јекх нево собрание ко Солун хем сигурно сине ле цел те ачховел адари те шај те поможинел е неве пхраленге хем пхењенге. Ама адалеске со сине ле противникија, о Павле мора сине те џал песке тари адаја диз (Дела  17:1-5, 10). Ов на ачхило ки адаја диз те шај те на чхивел пле пхрален ки опасно ситуација. Ама о Павле на чхинавѓа те поможинел ленге. Наместо адава, ов прилагодинѓа пе ко неве околностија. Покасно ов бичхалѓа е Тимотее те грижинел пе башо духовна потребе е пхраленгере ко Солун (1. Сол. 3:1-3). О пхраља таро Солун сигурно сине бут бахтале со о Тимотеј сине спремно те служинел адари коте со сине побари потреба.

15. Сар шај о околностија со променинена пе те влијајнен упро амаре целија? Вакер пример.

¹⁵ Таро е Павлескоро пример шај те сикљова јекх бут важно поука. Шај ка чхива аменге несави цел ама амаре околностија шај те менинен пе хем те чхинавен амен те исполнина ла (Проп. 9:11). Ако акава тано случај туја, ов спремно те чхиве туке јавер цел која со шај те исполнине ла. Акава случинѓа пе јекхе брачно пареске со викинена пе Тед хем Хајди. Ола мора сине те икљовен таро Бетел соске јекх џено лендар насвалило. Ама о мангипе спрема о Јехова поттикнинѓа лен те роден јавера начинија те бајрарен пумари служба. Ко почеток, ола почминѓе е општо пионерско службаја. Пало несаво време уле специјална пионерија, а о Тед добинѓа обука те овел заменико е покраинско надгледникоске. Пало адава сине керди промена џи ко кобор берша шај те служинен о покраинска надгледникија. О Тед хем и Хајди халиле кај нашти сине више те служинен е Јеховаске ки адаја задача. Иако на сине ленге са јекх, сепак халиле кај шај те служинен е Јеховаске ко јавера да начинија. О Тед вакерела: „Сиклилем кај иси повише начинија сар шај те служина е Јеховаске“.

16. Со шај те сикљова таро Галатите 6:4?

¹⁶ Нашти те овел амен контрола упро са адава со случинела пе аменге ко живото. Адалеске бут тано важно те на мислина кај сием вредна англо Јехова само адалеске со иси амен несаве задаче хем те на споредина адава со амен кераја адалеа со о јавера керена. И Хајди вакерела: „Ка нашаве тло андруно мир ако спорединеа тло живото е јаверенгере животоја“. (Читин Галатите 6:4.) Важно тано те рода начинија сар шај те поможина е јаверенге хем те служина е Јеховаске. c

17. Со ка поможинел туке те пхере о условија башо јавера задаче хем одговорностија?

¹⁷ Ка шај те кере повише ки служба башо Јехова ако живинеа скромно хем ако избегинеа те чхиве тут ко дугија бизи потреба.  Чхив туке потикне целија со ка поможинен туке те исполнине о побаре целија. На пример, ако иси тут цел те ове општо пионери, шај ли панда акана секова масек те служине сар помошно пионери? Или ако иси тут цел те ове слуга-помошнико, дали шај те џа повише време ки служба хем те посетине е насвален или е попхурен таро тло собрание? О искуство со ка стекнине ле акана ка пхравел туке о удар башо јавера задаче ки иднина. Ов одлучно те де тло најшукар ки било која задача со ка добине ла (Рим. 12:11).

18. Со сикљовеа тари Беверли? Дикх хем и слика.

¹⁸ Никој нане добором пхуро со нашти те чхивел песке духовна целија хем те исполнинел лен. Размислин баши јекх пхен со викинела пе Беверли со иси ла 75 берш. Ла сине ла јекх пхаро насвалипа колестар со на сине лаке локхо те пхирел. Ама ој бут мангела сине те учествујнел ки акција баши Спомен-свеченост кобор со шај повише. Адалеске чхивѓа песке конкретна целија. Кеда успејнѓа те исполнинел пле целија, сине бут бахтали. Таро лакоро пример о јавера да ко собрание сине поттикниме те керен повише ки служба. О Јехова бут ценинела о трудо е попхуре пхраленгоро хем е пхењенгоро, чак кеда ленгере околностија на дозволинена ленге те керен добором кобор со би мангена (Пс. 71:17, 18).

19. Кола тане несаве духовна целија со шај те чхива аменге?

¹⁹ Чхив туке целија кола со шај те исполнине лен. Развин особине коленцар со ка кере бахтало е Јехова. Сикљов вештине кола со ка поможинен туке те ове покорисно е Јеховаске хем лескере организацијаке. Роде начинија сар шај ки панда побари мера те служине тле пхраленге хем пхењенге. d Исто сар е Тимотееске, о Јехова ка дел туке да берекети хем тло напредок ка дикхен ле сарине (1. Тим. 4:15).