1-2. а) Кој сине и Евника хем саво предизвик сине ла? б) Коментирин и слика тари насловно страна.

 ИАКО и Библија на вакерела аменге ништо башо е Тимотеескоро крстибе, сепак шај те замислина аменге кобор бахтали сине лескири дај и Евника ко адава диве (Изр. 23:25). Замислин само кобор дичинела пе сине џикоте дикхела е Тимотее сар терѓола ко пани. Ој асала џикоте е Тимотеескири баба и Лоида тани узи лате хем гушинела ла. Тари возбуда едвај дишинела кеда дикхела кај о Тимотеј тано тело пани. Одма пало адава ов уштела таро пани, а ој таро бахталипе нашти више те икерел пле асва. Иако сине ла баре предизвикија, и Евника успејнѓа те поможинел е Тимотееске те мангел е Јехова хем лескере Чхаве, е Исус Христосе. Саве пхарипа сине ла џикоте сикавела сине пе чхаве?

² Е Тимотеескере родителен на сине лен и исто религија. Лескоро дад сине Грко, а лескири дај хем баба сине Еврејке (Дела 16:1). Веројатно, о Тимотеј сине тинејџери кеда и Евника хем и Лоида уле христијанке. Ама лескоро дад на прифатинѓа о христијанство. Која религија ка биринел о Тимотеј? Веројатно сине доволно баро те шај коркори те одлучинел. Дали ка биринел пле дадескири религија? Дали ка икерел пе ко еврејска обичаија кола со сиклило лен таро тикнипе? Или ка овел е Христосескоро следбенико?

3. Спрема Изреки 1:8, 9, сар дикхела о Јехова ко адава со трудинена пе о даја те поможинен пумаре чхавенге те овен леа паше?

³ Авдиве да о даја со служинена е Јеховаске бут мангена пумаре фамилија. Хем највише таро са, ола мангена те поможинен пумаре чхавенге те овен паше амала е Јеховаја. А  амаро Девел бут ценинела ленгоро трудо. (Читин Изреки 1:8, 9.) О Јехова поможинѓа буте дајенге те сикавен пумаре чхавен те манген ле хем те служинен леске.

4. Саве пхарипа иси е дајен авдиве?

⁴ Нормално тано јекх дај понекогаш те пучел пе дали лакере чхаве ка одлучинен те служинен е Јеховаске сар со керѓа адава о Тимотеј. О родителија тане свесна кобор баро притисок керела е Сатанаскоро свето упро ленгере чхаве (1. Пет. 5:8). Освен адава, буте дајенге тано пхаро те воспитинен пумаре чхавен соске нане лен ром, или ленгоро ром на служинела е Јеховаске. На пример, јекх пхен со викинела пе Кристина b вакерела: „Мо ром сине шукар дад хем домаќини, ама на дозволинела манге сине те воспитинав е чхавен сар о Јехова со мангела. Бершенцар ровава сине хем пучава ман сине дали ме чхаве некогаш ка почминен те служинен е Јеховаске“.

5. Со ка дикха ки акаја статија?

⁵ Ако сиан дај, ту да сар и Евника шај те поможине тле чхавенге те манген е Јехова хем те служинен леске. Ки акаја статија ка дикха сар шај те џа пало лакоро пример хем те сикаве тле чхавен тле лафенцар хем тле постапкенцар. Хем исто аѓаар ка дикха сар о Јехова ка поможинел туке.

6. Спрема 2. Тимотеј 3:14, 15, со поможинѓа е Тимотееске те овел христијани?

⁶ Кеда о Тимотеј сине тикно, лескири дај дела пестар сине са те шај те сикавел ле башо „света списија“ аѓаар сар со хаљовена лен сине о Евреија. Џанѓола пе, ој на џанела сине бут, соске на пенџарела сине е Исус Христосе. Сепак, адава со сиклило о Тимотеј таро света списија сине доволно те шај те прифатинел о христијанство. Ама дали керѓа адава? Ле сине ле право коркори те одлучинел дали ка овел христијани. Сигурно јекх таро причине соске о Тимотеј уверинѓа пе ко чачипе башо Исус сине адава со лескири дај бут трудинѓа пе. (Читин 2. Тимотеј 3:14, 15.) И Евника сигурно сине бут бахтали со успејнѓа те сикавел пле чхаве башо Јехова иако сине ла бут предизвикија. О анав Евника авела таро јекх лафи со значинела „победа“. Хем ој чаче успејнѓа те побединел или те накхел о пхарипа хем те поможинел е Тимотееске те мангел е Јехова хем те служинел леске.

7. Сар шај сине и Евника те поможинел пле чхавеске понадари да те напредујнел откеда крстинѓа пе?

⁷ Кеда о Тимотеј крстинѓа пе, ов адалеа исполнинѓа јекх бут важно цел ко пло живото. Ама, и Евника понадари да секиринела пе сине пе чхавеске. Ко со ка посветинел о Тимотеј пло живото? Дали ка дружинел пе околенцар со ка влијајнен лошно упри лесте? Дали ка џал те школујнел пе ки Атина хем ка прифатинел о паганска сикљојба таро филозофија кола со сине адари? Дали ка трошинел пли сила, пло време хем пло тернипе те шај те барваљовел? И Евника нашти сине те анел одлуке е Тимотеескоро ко тхан, ама ој шај сине те поможинел леске. Сар? Ој шај сине понадари да те трудинел пе те сикавел ле те мангел е Јехова хем лескере Чхаве, е Исусе. Асавки задача нане пхари само околе родителенге каскоро брачно партнери на служинела е Јеховаске. Чак ако о солдуј родителија тане ко чачипе шај те овел ленге пхаро те поможинен пумаре чхавенге те служинен е Јеховаске. Со шај о родителија те сикљовен тари Евника?

8. Сар шај јекх дај те поможинел пле ромеске те грижинел пе башо е чхавенгере духовна потребе?

 ⁸ Проучин и Библија тле чхавенцар. Пхењален, ако тумаро ром тано ко чачипе, о Јехова мангела те поможинен леске те сикавел тумаре чхавен башо Јехова. Јекх начин сар шај те керен ле адава тано аѓаар со ка поможинен леске редовно те икерел пе и Фамилијарно рат. Керен позитивно лафи баши акаја подготовка, хем размислинен башо адава сар шај тумен те керен јекх шукар атмосфера коте со сарине ка уживинен. Дали шај заедно тле ромеа те планиринен јекх посебно библиско проекти баши Фамилијарно рат? Освен адава, ако несаве таро тумаре чхаве тане доволно баре те проучинен о лил Ов бахтало засекогаш, шај те поможине тле ромеске те шај редовно те проучинел пе е чхавенцар.

9. Со шај те поможинел јекхе дајаке колакоро ром нане Сведоко?

⁹ Ко несаве фамилие и дај мора те проучинел е чхавенцар, адалеске со тани коркори, или лакоро ром нане е Јеховаскоро сведоко. Ако акава тано случај тле фамилијаја, на ваљани бут те секирине тут. О Јехова ка поможинел туке. Користин о публикацие кола со дела амен преку пли организација те шај те проучине тле чхавенцар. Шај те пуче јавере искусна родителен сар ола користинена акала публикацие ки пумари Фамилијарно рат c (Изр. 11:14). Исто аѓаар, о Јехова шај те поможинел туке те џане сар те кере лафи тле чхавенцар. Молин е Јехова те поможинел туке те џане со те пуче лен те шај те дознајне со мислинена хем со иси лен ко вило (Изр. 20:5). Јекхе кратко пучибаја сар на пример: „Сој туке најпхаро ки школа?“, шај те почмине разговор колестар со ка дознајне бут буќа.

10. Ко кола јавера начинија шај те поможине тле чхавенге те сикљон башо Јехова?

¹⁰ Роде прилике те сикаве тле чхавен башо Јехова. Кер ленцар лафи башо Јехова хем вакер ленге башо бут шукар буќа кола со керѓа лен туке (5. Мој. 6:6, 7; Иса. 63:7). Акава тано посебно важно ако нашти редовно те проучине тле чхавенцар кхере. И Кристина кола со спомнинѓем ла англедер, вакерела: „На сине ман бут прилике те керав лафи е чхавенцар башо духовна буќа. Адалеске користинава сине секоја прилика со ка овел ман сине. Кеда џаја сине те пхира или кеда укљаја сине ко јекх тикно чамцо кераја сине лафи башо бут шуже буќа со створинѓа лен о Јехова хем башо јавера духовна буќа. Кеда мле чхаве уле хари побаре, поттикнинава лен сине коркори те проучинен и Библија“. Освен адава, кер позитивно лафи баши е Јеховаскири организација хем башо пхраља хем пхења. Ма критикујн е старешинен, соске адава со вакереа баши ленде бут ка влијајнел ко адава дали те чхаве покасно ка роден лендар помош кеда ка ваљани ленге.

11. Спрема Јаков 3:18, соске тано важно те да са амендар те шај те овел мир ко кхер?

¹¹ Де тутар са те шај те овел мир ко кхер. Редовно сикав тле ромеске хем тле чхавенге кај мангеа лен. Кеда кереа лафи башо тло ром, кер адава ко љубезно начин хем сикав кај поштујнеа ле хем сикав тле чхавен те керен о исто. Аѓаар ка кере јекх шукар атмосфера кхере, хем е чхавенге ка овел полокхо те сикљовен башо Јехова. (Читин Јаков 3:18.) Размислин башо јекх специјално пионери кова со викинела пе Јожеф хем служинела ки Романија. Кеда сине тикно, лескоро дад на мукхела сине  ле, лескере даја, е пхења хем лескере дује пхрален те служинен е Јеховаске. О Јожеф вакерела: „Ми дај бут трудинела пе сине те овел мир ко кхер. Кобор погрубо понашинела пе сине мо дад, добором пољубезно сине ми дај. Кеда ми дај ка приметинел сине кај аменге пхаро те поштујна ме даде хем те шуна ле, ој ка керел сине аменцар лафи башо Ефешаните 6:1-3. Тегани вакерела сиен аменге башо лескере шуже особине, хем поможинела сине аменге те хаљова соске ваљани те поштујна ле хем те ценина ле. Адалеске со ој постапинела сине аѓаар, бут пути избегинѓе пе расправие“.

12. Спрема 2. Тимотеј 1:5, сар влијајнѓа е Евникакоро пример упро Тимотеј?

¹² Читин 2. Тимотеј 1:5. И Евника сине шукар пример е Тимотееске. Ој сигурно сикавѓа ле кај и чачутни вера сикаваја ла амаре постапкенцар (Јаков 2:26). О Тимотеј шај сине те дикхел кај лескере дајакере постапке сине поттикниме таро лакоро баро мангипе спрема о Јехова. Ов сигурно шај сине те дикхел кај ој тани бут бахтали адалеске со служинела е Јеховаске. Сар влијајнѓа лакоро пример упро Тимотеј? О апостол Павле вакерѓа кај е Тимотеескири вера сине силно сар лескере дајакири. Ама, сар ало џи ко адава? Ов дикхела сине сар ој постапинела, хем адалеске сине поттикнимо те џал пало лакоро пример. Слично сар лате, бут даја авдиве успејнѓе „бизо лафи“ те поможинен пумаре фамилиенге те служинен е Јеховаске (1. Пет. 3:1, 2). Ту да шај те кере о исто. Те дикха сар.

13. Соске јекх дај ваљани те трудинел пе о амалипе е Јеховаја те овел лаке ко прво тхан?

¹³ Трудин тут о амалипе е Јеховаја те овел туке ко прво тхан (5. Мој. 6:5, 6). Ту да исто сар о јавера даја кереа бут жртве. Жртвујнеа тло време, тле паре, тло сојбе хем јавера буќа те шај те грижине тут башо тле чхавенгере физичка потребе. Ама никогаш на ваљани те ове добором зафатими акале буќенцар, со нане те овел тут време те кере позорало тло амалипе е Јеховаја. Редовно одвојн туке време те молине тут, те проучине и Библија хем те ове присутно ко состанокија. Аѓаар ка ове духовно позорали хем ка ове шукар пример на само тле фамилијаке, него хем е јаверенге.

14-15. Со сикљоваја тари Лина, тари Марија хем таро Жоао?

¹⁴ Те размислина башо некобор терне кола со сиклиле те заманген е Јехова хем те овел лен доверба ки лесте аѓаар со геле пало пример пумаре даенгоро. И Лина е Кристинакири чхај, вакерела: „Амен нашти сине те проучина и Библија кеда мо дад сине кхере. Ама ми дај секогаш сине присутно ко состанокија. Иако амен на џанаја сине бут баши Библија, лакере постапке поможинѓе амен те овел амен зорали вера. Џанлем кај акава сине о чачипе, панда бут англедер те џа ко состанокија“.

¹⁵ И Марија, колакоро со дад понекогаш казнинела лен сине адалеске со џана сине ко состанокија, вакерела: „Ми дај тани јекх таро најхрабра пхења колен со џанава лен. Сар тикни понекогаш на мангава сине те керав несаве буќа адалеске со дарава сине со ка вакерен о јавера. Ама лакири храброст хем адава со секогаш чхивела сине е Јехова ко прво тхан поможинѓа манге те на дарав више таро мануша“. О Жоао каскоро со дад на мукхела сине пле фамилија те керел лафи башо духовна буќа кхере, вакерела: „Мислинава кај највише охрабринѓа ман адава со ми дај сине спремно те  откажинел пе таро са те шај те угодинел ме дадеске — освен таро пло мангипе спрема о Јехова“.

16. Сар шај о даја пле примереа те влијајнен упро јавера?

¹⁶ Дајален, ма бистрен кај тумаро пример влијајнела упро јавера. Ко саво начин? Размислинен сар влијајнѓа е Евникакоро пример упро апостол Павле. Ов пишинѓа е Тимотееске кај прво лескере даја е Евника сине ла „искрено вера“ (2. Тим. 1:5). Кеда приметинѓа о Павле кај е Евника сине ла асавки вера? Веројатно џикоте сине ко пло прво мисионерско патујбе кеда шај дикхља е Лоида хем е Евника ки Листра хем поможинѓа ленге те овен христијања (Дела 14:4-18). Кеда о Павле пишинѓа е Тимотееске околу 15 берш покасно, ов понадари да сетинела пе сине ко постапке е Евникакере кола со сине поттикниме тари вера хем користинѓа ла сар пример пали касте со ваљани те џан. Дикхјола пе кај лакоро пример охрабринѓа бут е апостол Павле хем веројатно буте христијанен таро прво веко. Ако коркори бајрареа тле чхавен или тло ром нане е Јеховаскоро сведоко, ов уверими кај тло пример ка охрабринел хем ка поттикнинел околен сој околу туте.

17. Со ваљани те кере ако мислинеа кај тло чхаво на интересинела пе башо чачипе?

¹⁷ Со ако мислинеа кај тло чхаво на интересинела пе башо чачипе, иако бут трудинеа тут те сикаве ле? Ма бистре кај ваљани време те шај те воспитинел пе јекх чхаво. Сар сој сикавдо ки слика, откеда ка садине јекх семе шај понекогаш ка пуче тут дали  адава семе ка бајрол хем ка дел плоди. Иако на џанеа дали адава растение ка дел плоди, сепак ту понадари да чхивеа леске пани те шај те кере леске о најшукар условија те бајрол (Мар. 4:26-29). Слично, ту да сар дај шај некогаш пучеа тут дали ка успејне те поможине тле чхавенге те заманген е Јехова. Ту нашти те контролирине саве одлуке ка анен тле чхаве ама ту понадари да шај те де тутар са те шај те сикаве лен хем аѓаар те де лен о најшукар условија духовно те напредујнен (Изр. 22:6).

18. Сар шај о Јехова те поможинел тле чхавенге те овен леа амала?

¹⁸ Панда таро пурано време о Јехова поможинѓа буте терненге те овен лескере амала (Пс. 22:9, 10). Ов шај тле чхавенге да те поможинел духовно те напредујнен, ако ола мангена адава (1. Кор. 3:6, 7). Чак ако тле чхаве на служинена е Јеховаске цело вилеа, ов понадари да мангела лен хем ка пазинел лен (Пс. 11:4). Кеда ка приметинел чак о најтикно знако кај мангена те служинен леске, ов ка поможинел ленге те овен лескере амала (Дела 13:48; 2. Лет. 16:9). Ов ка поможинел туке те вакере о исправна буќа ко време кеда тле чхаве ка ваљани те шунен адава (Изр. 15:23). Или шај ка поттикнинел несаве љубезно пхрале или пхења таро собрание те поможинел ленге. Чак откеда тле чхаве ка бајрон, о Јехова шај те сетинкерел лен ко нешто со сикавѓан лен кеда сине тикне (Јован 14:26). О Јехова сигурно ка наградинел тут адалеске со понадари да сикавеа е чхавен тле лафенцар хем тле постапкенцар.

19. Со шај те уверинел тут кај о Јехова тано задоволно тутар?

¹⁹ Дали о Јехова ка мангел тут или на, на зависинела таро адава саве одлуке ка анен тле чхаве. Ов мангела тут адалеске со ту мангеа ле. Ако сиан дај која со коркори бајрарела пле чхавен, о Јехова ветинела туке кај ка овел Дад тле чхавенге хем тло Заштитнико (Пс. 68:5). Нашти те овел тут контрола упро адава дали тле чхаве ка биринен те служинен е Јеховаске или на. Ама ако понадари да иси тут доверба кај о Јехова ка поможинел туке хем деа тутар са, ов ка овел тутар задоволно.