Пучиба таро читателија
Ако јекх христијани развединела пе тари пли ромни бизи библиско причина хем пало адава кхувела ко брако некасаја јавереа, сар ваљани о собрание те дикхел ко претходно брако, а сар ко нево брако?
Ко асавко случај, о собрание ка дикхел ко претходно брако сар завршимо, а ко нево брако кај важинела. Те шај те хаљова о причине соске вакераја акава, те дикха со вакерѓа о Исус башо развод хем палем те кхувел пе ко брако.
Ко Матеј 19:9, о Исус вакерѓа која тани и единствено библиско причина башо развод. Ов вакерѓа: „Секова јекх со ка развединел пе тари пли ромни, освен башо сексуално неморал, хем кхувела ко брако јавераја, керела прељуба“. Таро е Исусескере лафија сикљоваја 1) кај о сексуално неморал тано единствено библиско причина башо развод хем 2) кај секова јекх со ка развединел пе тари пли ромни бизи библиско причина хем женинела пе јавераја, керела прељуба. a
Дали е Исусескере лафија значинена кај окова со керела сексуално неморал хем развединела пе тари пли ромни тано библиски слободно палем те кхувел ко брако? На ваљани те значинел. Кеда о ром ка керел прељуба, о брачно партнери со нане криво одлучинела дали ка простинел или на. Ако и ромни на простинела леске хем законски развединена пе, о солдуј тане слободна палем те кхувен ко брако откеда ка завршинел о процес башо развод.
Тари јавер страна, и ромни шај искрено ка мангел те ачховел ко брако хем ка вакерел пле ромеске кај тани спремно те простинел леске. Ама, со ако о ром кова со керѓа прељуба на прифатинела пле ромњакири понуда, хем мангела законски те развединел пе? Адалеске со ој тани спремно те простинел леске хем те ачховел леа ко брако, ов нане библиски слободно палем те женинел пе. Ако одлучинела те женинел пе јавераја, иако нане слободно те керел адава, палем керела прељуба. Адалеске о старешине ка ваљани палем те керен правно одбор хем те разглединен лескоро случај (1. Кор. 5:1, 2; 6:9, 10).
Ако јекх ром палем женинела пе, иако нане библиски слободно те керел адава, сар ваљани о собрание те дикхел ко претходно брако, а сар ко нево? Дали спрема и Библија, о претходно брако панда важинела? Дали о брачно партнери со нане криво панда шај те одлучинел дали ка простинел околеске со сине лаке ром, или на? Дали ко нево брако ка дикхел пе сар прељубничко брако?
Англедер, о собрание ко нево брако дикхела сине сар прељубничко брако са џикоте о брачно партнери со нане криво сине џивдо, на кхувѓа палем ко брако или на керѓа сексуално неморал. Сепак, о Исус на спомнинѓа е брачно партнере со нане криво кеда керѓа лафи башо развод хем башо адава палем те кхувел пе ко брако. Наместо адава, ов објаснинѓа кај окова со ка развединел пе тари пли ромни бизи библиско причина хем женинела пе јавераја, керела прељуба. Ко асавко случај, о развод хем о нево брако, колеске со о Исус вакерѓа кај тано исто сар прељуба, чхивена крајо е претходно бракоске.
„Секова јекх со ка развединел пе тари пли ромни, освен башо сексуално неморал, хем кхувела ко брако јавераја, керела прељуба“ (Мат. 19:9)
Кеда јекх ром ка развединел пе тари пли ромни хем ка женинел пе јавераја, нашти више лескири претходно ромни која со нане криво, те одлучинел дали ка простинел леске или на. Значи, ој на ваљани више те анел адаја пхари одлука. Исто аѓаар, е собраниескоро стави спрема о нево брако на зависинела таро адава дали и ромни која со нане криво пало несаво време мули, палем кхувѓа ко брако или керѓа сексуално неморал. b
Ко пример со дикхлем ле поупре, о ром керѓа прељуба хем адава анѓа џи ко развод. Ама, со ако о ром на керѓа прељуба ама развединѓа пе хем пало адава женинѓа пе јавераја? Или, со ако ов на керѓа прељуба англедер те развединел пе, ама керѓа адава откеда развединѓа пе хем пало адава женинѓа пе јавераја, иако лескири ромни сине спремно те простинел леске? Ко асавке случаија, о развод хем о нево брако, кова сој тано прељуба, чхивела крајо е претходно бракоске. О нево брако важинела англо закони. Ко англиско издание тари Стражарско кула таро 15 ноември 1979 берш, ки 32 страна, пишинела: „Ов тано акана ко нево брако хем нашти акана те иранел пе ки пли претходно ромни; о претходно брако завршинѓа адалеа со развединѓа пе, керѓа прељуба, хем пало адава палем женинѓа пе“.
Акале променаја ко хаљојбе на значинела кај акана дикхаја ко брако сар похари свето, или кај ки прељуба на дикхаја сар добором сериозно грево. Ако јекх мурш развединела пе тари пли ромни бизи библиско причина хем пало адава женинела пе јавераја, иако нане библиски слободно те керел адава, о старешине ка ваљани те керен правно одбор баши прељуба. (Ако лескири неви ромни тани Сведоко, лаке да ваљани те керел пе правно одбор баши прељуба.) Иако ко нево брако нане те дикхел пе сар прељубничко, сепак о пхрал бершенцар нане те добинел одговорностија хем задаче, адалеске со на пхерела о условија. Освен адава, са џикоте о јавера таро собрание тане вознемириме башо адава со керѓа ле англедер или мислинена кај на заслужинела те поштујнен ле, ов нане те добинел одговорностија или задаче. Англедер те ден ле несаве задаче, о старешине исто аѓаар ка ваљани те лен ко предвид о моментална околностија лескере претходно ромњакере, кола со шај мукхља ла ко јекх подмолно начин аѓаар со англедер планиринѓа те керел прељуба. Исто аѓаар ваљани те лен ко предвид е малолетна чхавен колен со шај мукхља лен (Мал. 2:14-16).
Адалеске со о развод бизи библиско причина хем палем те кхувел пе ко нево брако иси лен сериозна последице, о христијања сикавена мудрост адалеа со трудинена пе те овел лен сар е Јеховаскоро стави башо брако, јавере лафенцар те дикхен ле сар свето (Проп. 5:4, 5; Евр. 13:4).
a Те шај те овел поедноставно, ки акаја статија вакераја кај о мурш тано адава со керела прељуба, а и џувли тани о брачно партнери со нане криво. Сепак, ко Марко 10:11, 12, о Исус јасно вакерѓа кај акава совет важинела хем е муршенге хем е џувленге.
b Акаја тани јекх промена ко хаљојбе. Англедер мислинаја сине кај асавко брако тано прељубничко са џикоте о брачно партнери со нане криво на мерела, палем на кхувела ко брако или на керела сексуално неморал.
