1. Сави чест иси амен?

АМЕНГЕ тани бари чест те ова дело таро е Јеховаскоро собрание! Амен сием ко јекх духовно рај кова тано пхердо бахтале манушенцар со мангена о мир. Кова тано тло тхан ко собрание?

2. Која споредба користинѓа о Павле ко некобор пле писмија?

² Шај те сикљова бут башо адава кова тано амаро тхан ко собрание тари јекх споредба со о апостол Павле користинѓа ла ко некобор пле писмија. Ко секова таро акала писмија, о Павле спорединела о собрание е манушикане телоја, а секоле јекхе ко собрание спорединела ле сар делија таро тело (Рим. 12:4-8; 1. Кор. 12:12-27; Еф. 4:16).

3. Кола трин поуке ка дикха ки акаја статија?

³ Ки акаја статија ка дикха трин важна поуке со шај те сикљова лен тари е Павлескири споредба. Прво, ка дикха кај секоле јекхе амендар иси ле пло тхан * ко е Јеховаскоро собрание. Дујто, ка дикха со шај те кера ако аменге пхаро те хаљова кова тано амаро тхан ко собрание. Хем трито, ка дикха соске тано важно секој амендар те исполнинел пле одговорностија ко е Девлескоро собрание.

4. Со сикљоваја таро Римјаните 12:4, 5?

⁴ И прво поука со шај те сикљова ла тари е Павлескири споредба тани кај секова јекх амендар иси ле важно тхан ки е Јеховаскири фамилија. О Павле почминѓа акаја споредба е лафенцар: „Исто сар со ко јекх тело иси амен бут делија, ама са о делија нане лен исто улога, аѓаар амен да, иако сием бут, јекх тело сием ко јекхипе е Христосеа, а сар поединција пханле сием јекх јекхеа“ (Рим. 12:4, 5). Со мангља те вакерел о Павле акалеа? Иако иси амен различна улоге ко собрание, секова јекх амендар тано скапоцено.

5. Кова „поклон“ денѓа о Јехова ко собрание?

⁵ Машкар окола со иси лен тхан ко собрание, тане вклучиме о пхраља со предводинена (1. Сол. 5:12; Евр. 13:17). Преку о Христос, о Јехова чхивѓа „мануша денде сар поклон“ ко пло собрание (Еф. 4:8). Акала мануша тане о членија таро Водечко тело хем ленгере помошникија, о членија таро Одборија е подружниценгере, о покраинска надгледникија, о инструкторија таро теократска школе, о старешине хем о слуга-помошникија ко собрание. Са акала пхраља тане именујме таро свети дух те шај те грижинен пе е Јеховаскере слугенге кола тане скапоцена хем те зајакнинен о собрание (1. Пет. 5:2, 3).

6. Спрема 1. Солуњаните 2:6-8, со трудинена пе те керен о пхраља сој тане именујме свети духоја?

⁶ О пхраља сој тане именујме таро свети дух грижинена пе башо различна одговорностија. Исто сар о различна делија ко тело, сар сој о васта хем о пре, со соработинена заедно те шај о тело те функциониринел, аѓаар о пхраља сој тане именујме таро свети дух соработинена заедно башо шукарипе е собраниескоро. Ола на родена о јавера те ден лен слава башо адава. Наместо адава, ола трудинена пе те изградинен хем те зајакнинен пумаре пхрален хем пхењен. (Читин 1. Солуњаните 2:6-8.) Бут сием благодарна е Јеховаске башо акала несебична, духовна зрела пхраља!

7. Саве берекетија иси буте пхрален хем пхењен сој тане ки полновремено служба?

⁷ Несаве ко собрание служинена сар мисионерија, специјална пионерија или општа пионерија. Уствари, ко цело свето бут пхраља хем пхења посветинѓе цело пло живото ко проповедибе. Адалеа поможинѓе буте џененге те овен е Исусескере ученикија. Иако побаро дело лендар нане лен бут ко материјално поглед, о Јехова дела лен бут берекетија (Мар. 10:29, 30). Амен бут мангаја акале пхрален хем пхењен, хем благодарна сием сој тане дело таро е Девлескоро собрание!

8. Соске секова јекх со објавинела о шукар хабери тано скапоцено е Јеховаске?

⁸ Дали о именујме пхраља хем окола со служинена полновремено тане о единствена со иси лен тхан ко собрание? Сигурно на! Секова јекх со објавинела о шукар хабери тано важно е Јеховаске хем е собраниеске (Рим. 10:15; 1. Кор. 3:6-9). Уствари, јекх таро најважна целија е собраниескере тани те керен пе ученикија амаре Господареске, е Исус Христосеске (Мат. 28:19, 20; 1. Тим. 2:4). Сарине сој тане дело таро собрание, хем о крстиме хем о некрстена објавителија, трудинена пе о проповедибе те чхивен ле ко прво тхан ко пло живото (Мат. 24:14).

9. Соске ценинаја амаре пхењен?

⁹ О Јехова сикавела кај ценинела е пхењен аѓаар со дела лен важно улога ко собрание. Е Јеховаске тане скапоцена акала ромња,  даја, удовице хем пхења со нане ко брако кола со верно служинена леске. Ки Библија тане спомниме бут џувља кола со угодинена сине е Јеховаске. Ола сине пофалиме баши ленгири мудрост, вера, ревност, храброст, дарежливост хем башо ленгере шукар буќа со керена (Лука 8:2, 3; Дела 16:14, 15; Рим. 16:3, 6; Фил. 4:3; Евр. 11:11, 31, 35). Бут сием благодарна е Јеховаске со ко амаре да собранија иси христијанке кола со сикавена акала шуже особине!

10. Соске ценинаја амаре попхуре пхрален хем пхењен?

¹⁰ Исто аѓаар сием бут бахтале со иси амен попхуре ко собрание. Ко несаве собранија иси пхуре пхраља хем пхења кола со верно служинѓе е Јеховаске цело пло живото. А јавера дознајнѓе о чачипе сигенде. Бут џене таро акала попхуре пхраља хем пхења боринена пе различно насвалипаја со анела о пхурипе. Адалеске нашти те керен бут ко собрание хем ки служба. Ама акала попхуре пхраља хем пхења дена пестар са те шај те проповединен хем трудинена пе те охрабринен хем те обучинен е јаверен! Амен шај бут те сикљова лендар. Ола тане бут шуже англо е Јеховаскере хем амаре јакхја (Изр. 16:31).

11-12. Сар сиан охрабримо таро терне ко тло собрание?

¹¹ Размислин башо амаре терне да. Лен иси лен бут проблемија адалеске со бајрона ко акава свето коте со владинела о Сатана о Бенг хем коте со влијајнена лескере румиме идее (1. Јов. 5:19). Ама, амен сием бут охрабриме кеда дикхаја сар амаре терне коментиринена ко состанокија, џана ки служба хем храбро бранинена пумаре верувања. Тернален, тумен иси тумен важно тхан ко е Јеховаскоро собрание! (Пс. 8:2).

¹² Ама, несаве пхраленге хем пхењенге тано пхаро те хаљон кај тане скапоцена ко собрание. Ако амен да осетинаја амен аѓаар, со шај те поможинел аменге те уверина амен кај сар поединција иси амен тхан ко собрание? Те дикха.

13-14. Соске некаске тано пхаро те хаљол кај тано скапоцено ко собрание?

¹³ Те дикха и дујто бути со шај те сикљова тари е Павлескири споредба. Ов спомнинела јекх проблеми колеа со бут џене боринена пе. Ленге тано пхаро те хаљовен кај тане скапоцена ко собрание. О Павле пишинѓа: „Ако о про вакерела: ’Адалеске со на сиум вас, ме на сиум дело таро тело‘, адава на значинела кај нане дело таро тело. Хем ако о кан вакерела: ’Адалеске со на сиум јакх, ме на сиум дело таро тело‘, адава на значинела кај нане дело таро тело“ (1. Кор. 12:15, 16). Со мангља о Павле те вакерел акалеа?

¹⁴ Ако спорединеа тут е јаверенцар таро собрание, шај ка мислине кај на врединеа. Несаве ко собрание шај тане способна те сикавен е јаверен, те организиринен о буќа или те утешинен хем те охрабринен е јаверен. Шај мислинеа кај ту нашти те кере са акала буќа добором шукар сар ола со керена. Акава сикавела кај сиан понизно хем скромно (Фил. 2:3). Ама, мора те пазине. Ако стално спорединеа тут е јаверенцар со иси лен посебна талентија, шај коркори тутар те разочарине тут. Сар со вакерѓа о Павле, шај те осетине тут кај о собрание нане ле нисави корист тутар. Со ка поможинел туке те икљове ко крајо акале чувствонцар?

15. Спрема 1. Коринќаните 12:4-11, со ваљани те хаљова башо талентија со иси амен?

¹⁵ Размислин башо акава: Ко прво веко, о Јехова преку пло свети дух денѓа несаве христијаненге поклонија или талентија. Ама, са о христијања на добинѓе иста поклонија. (Читин 1. Коринќаните 12:4-11.) Иако о Јехова денѓа лен различна поклонија хем способностија, секова христијани сине скапоцено англи лесте. Авдиве нане амен асавке поклонија таро свети дух. Ама аменге да важинела о исто начело — саринен нане амен о иста талентија, ама сарине сием скапоцена англо Јехова.

16. Кова совет таро апостол Павле ваљани те применина ле?

 ¹⁶ Наместо те споредина амен амаре пхраленцар хем пхењенцар, ваљани те применина акава совет таро апостол Павле: „Секова мануш ваљани те испитинел пле постапке, хем тегани ка овел ле причина те овел бахтало башо буќа со керела лен ов, а на адалеске со спорединела пе е јаверенцар“ (Гал. 6:4).

17. Сави корист ка овел амен ако шунаја е Павлескоро совет?

¹⁷ Ако шунаја е Павлескоро совет хем испитинаја амаре постапке, шај ка почмина те дикха кај иси амен несаве способностија со е јаверен нане. На пример, јекх старешина шај нане ле способност сар говорнико ки бина, ама шај те овел бут шукар ки служба те керел ученикија. Или, шај нане добором организиримо сар о јавера старешине, ама тано пенџардо сар грижливо хем сочувствително пастири кастар со о објавителија осетинена пе слободна те роден библиско совет. Или шај тано пенџардо сар гостопримливо пхрал (Евр. 13:2, 16). Кеда сием свесна башо амаре јака стране, тегани ка осетина амен шукар башо адава со шај те кера ко собрание. Адава ка поможинел аменге те на ова љубоморна амаре пхраленге башо способностија со нане амен.

18. Сар шај те ова пошукар ки служба?

¹⁸ Бизи разлика кова тано амаро тхан ко собрание, саринен ваљани те овел амен желба пошукар те кера амари служба хем те развина амаре способностија. Те шај те поможинел аменге ко адава, о Јехова сикавела амен ко јекх бут шукар начин преку пли организација. На пример, ко состанок Амаро живото хем служба, добинаја упатствија со поможинена аменге те сикава е манушен ко поделотворно начин. Дали деа тутар са те применине адала упатствија?

19. Сар шај те ресе и цел те џа ки Школа башо полновремена објавителија?

¹⁹ Јекх јавер посебно обука шај те добина ла ки Школа башо полновремена објавителија. Ки акаја школа шај те учествујнен пхраља хем пхења сој тане ки полновремено служба хем со иси лен таро 23 џи ко 65 берш. Шај мислинеа кај акаја цел никогаш нане те ресе ла. Ама, наместо те размислине таро кола причине нашти те џа ки адаја школа, размислин таро кола причине мангеа те џа. Пало адава, кер плани кова со ка поможинел туке те пхере о условија. Ако трудинеа тут хем ако родеа о Јехова те поможинел туке, ка шај те кере адава со мислинѓан кај нашти те кере.

20. Со шај те сикљова таро Римјаните 12:6-8?

²⁰ И трито бути со сикљоваја тари е Павлескири споредба тани пишими ко Римјаните 12:6-8. (Читин.) Акате о Павле панда јекх пути вакерела кај саринен ко собрание иси амен различна поклонија или способностија. Ама, акана нагласинела кај амен ваљани те користина секоја способност со иси амен те шај те изградина хем те зајакнина амаре пхрален хем пхењен ко собрание.

21-22. Со шај те сикљова таро Роберти хем таро Фелис?

²¹ Те дикха о пример јекхе пхралескоро со викинела пе Роберт. * Откеда служинѓа ки јавер пхув, ов добинѓа задача те служинел ко Бетел ки пли пхув. Иако о пхраља вакерѓе леске кај адаја промена нане адалеске со керѓа несави грешка, ов вакерела: „Масеконцар на сиум сине бахтало адалеске со  мислинѓум кај на керѓум шукар мли задача. Понекогаш мангава сине те откажинав ман тари мли бетелско служба“. Со поможинѓа леске палем те овел бахтало? Јекх јавер старешина потсетинѓа ле кај ки секоја задача о Јехова обучинела амен те шај ки следно повише те користинел амен. О Роберти халило кај ваљани сине те чхинавел те мислинел ко адава со сине поангле, хем те почминел те мислинел ко адава со шај акана те керел.

²² О пхрал Фелис Епископо сине ле слично искуство. Ов хем лескири ромни дипломиринѓе ки Школа Гилеад ко 1956 берш, хем служинѓе ки патувачко служба ки Боливија. Ко 1964 берш бијандило ленге чхаво. О Фелис вакерела: „Сине аменге бут пхаро те мукха и служба со бут мангаја ла сине. Мора те признајнав кај скоро јекх берш сиум сине обесхрабримо башо адава. Ама, о Јехова поможинѓа манге те менинав мло стави хем те посветинав ман ки мли неви одговорност сар родители“. Дали ту да осетинеа тут сар о Роберти или о Фелис? Дали сиан обесхрабримо адалеске со акана нане тут о иста одговорностија ки служба сар со сине тут поангле? Ако тано аѓаар, ка ове побахтало ако почминеа те мислине ко адава со шај те кере акана те шај те служине е Јеховаске хем е пхраленге. Ов зафатимо аѓаар со ка користине тле талентија хем способностија те поможине е јаверенге хем тегани ка ове бахтало џикоте изградинеа о собрание.

23. Башо со ваљани те одвојна аменге време, хем со ка дикха ки следно статија?

²³ Секова јекх амендар тано скапоцено е Јеховаске. Ов мангела те ова дело тари лескири фамилија. Ако одвојнаја аменге време те размислина сар те зајакнина амаре пхрален хем е пхењен, хем ако даја амендар са те кера адава, тегани ка уверина амен кај иси амен важно улога ко собрание. Ама сар ваљани те дикх ко јавера пхраља хем пхења? Сар шај те сикава кај ценинаја лен? Акала важна пучиба ка овен одговориме ки следно статија.