1. Сар бут џене трудинена пе те керен повише ки служба башо Јехова?

 СО ПОПАШЕ авела о крајо акале светоскоро, добором повише бути иси амен (Мат. 24:14; Лука 10:2; 1. Пет. 5:2). Сарине амен мангаја те служина е Јеховаске со шај повише. Бут џене бајрарена пли служба. Несаве мангена те служинен сар пионерија. Јавера мангена те служинен ко Бетел или ки изградба ко теократска објектија. Хем бут пхраља трудинена пе те исполнинен о условија те шај те служинен сар слуга-помошникија или старешине (1. Тим. 3:1, 8). О Јехова тано бут бахтало кеда дикхела кај лескоро народо тано спремно те служинел леске! (Пс. 110:3; Иса. 6:8).

2. Сар шај те осетина амен ако на исполнинѓем несаве таро амаре духовна целија?

² Ама, шај те разочарина амен ако пало несаво време панда на исполнинѓем несаве таро амаре духовна целија. Или шај те обесхрабрина амен со нашти те кера несаве буќа ки организација адалеске со пхурилем, или таро јавера причине (Изр. 13:12). Аѓаар осетинела пе и Мелиса. * Ој бут би мангела те служинел ко Бетел или те џал ки Школа башо полновремена објавителија, ама вакерела: „Адалеске со сиум попхури адала буќа акана манге тане само јекх суно. Адалеске, понекогаш сиум разочарими“.

3. Со ваљани те кера те шај те добина несаве одговорностија?

³ Несаве кола сој терне хем састе шај ка ваљани те овен позрела хем те развинен несаве особине англедер те добинен јавера да одговорностија. На пример, несаве шај тане  интелегентна, одлучна хем спремна те керен бути, ама шај ка ваљани те овен пострплива, пошукар те керен пумари задача хем повише те поштујнен е јаверен. Ако трудинеа тут те развине о потребна особине, о пхраља шај ка ден тут одговорностија кеда најхари очекујнеа лен. Размислин башо Ник. Кеда сине ле 20 берш, бут разочаринѓа пе со на уло слуга-помошнико. Ов вакерела: „Мислинава сине кај нешто фалинела манге“. Ама о Ник на откажинѓа пе, него ов понадари да трудинела пе сине те развинел о потребна особине. Трудинела пе сине те керел са со шај ко собрание хем ки служба. Хем авдиве, ов служинела сар члени ко Одбор е подружницакоро.

4. Со ка дикха ки акаја статија?

⁴ Дали сиан обесхрабримо адалеске со панда на исполнинѓан несави тли духовно цел? Ако оја, молин тут е Јеховаске хем вакер леске со мучинела тут (Пс. 37:5-7). Исто аѓаар, шај те пуче несаве зрела пхрален те ден тут предлогија башо адава сар те ове пошукар ко тле задаче хем пало адава, трудин тут те применине ленгоро совет. Ако кереа аѓаар, тегани ка шај те исполнине тли цел. Ама слично сар и Мелиса, кола со спомнинѓем ла англедер, моментално шај нашти те добине и задача која со мангеа те овел тут. Сепак, сар шај понадари да те ове бахтало? Те шај те аракха о одговор, ки акаја статија ка кера лафи башо адава 1) коте шај те аракхе бахталипе, 2) сар те бајраре тло бахталипе, хем 3) саве целија шај те чхиве туке со ка керен тут те ове побахтало.

5. Те шај те ова бахтале, ко со ваљани те концентририна амен? (Проповедник 6:9)

⁵ Спрема Проповедник 6:9, шај те аракха о бахталипе ако родаја ле ко исправно тхан. (Читин.) Окова со уживинела ко буќа со шај јакхенцар те дикхел лен задоволно тано адалеа со иси ле, хем пле моментално околностенцар. А окова со секогаш мангела буќа со нашти те овен ле, никогаш нане те овел задоволно. Значи, со сикљоваја амен таро акава? Те шај те ова бахтале, ваљани те концентририна амен ко буќа со иси амен хем ко целија со шај те исполнина лен.

6. Баши која споредба ка кера лафи, хем со шај те сикљова латар?

⁶ Дали чаче шај те ове задоволно адалеа со више иси тут? Бут мануша мислинена кај нашти, соске амен обично мангаја те кера хем те сикљова неве буќа. Ама, уствари шај те ова задоволна хем бут повише таро адава — амен шај те уживина ко буќа со више иси амен. Сар шај те кера адава? Те шај те открина, те дикха е Исусескири споредба башо талантија која со аракхљовела ко Матеј 25:14-30. Тари акаја споредба ка дикха сар шај те ова бахтале хем сар шај чак те бајрара амаро бахталипе башо одговорностија со више иси амен.

7. Кратко раскажин е Исусескири споредба башо талантија.

⁷ Ки споредба, јекх мануш спреминела пе сине те џал ко друмо. Ама англедер те џал, ов викинѓа пле робон хем секоле јекхеске денѓа талантија коленцар со ваљани сине те керен бути. * Адалеске со о мануш џанела сине секоле робоскере способностија, ов денѓа е прво робоске панџ талантија, е дујто робоске дуј хем јекх таланти е трито робоске. О прва дуј робија керѓе бут бути те шај те заработинен повише паре  пле господареске. Ама о трито робо на керѓа ништо е паренцар со добинѓа лен хем адалеске о господари бркинѓа ле тари бути.

8. Соске шај сине о прво робо тари споредба те овел бахтало?

⁸ О прво робо сигурно сине бут бахтало адалеске со о господари денѓа ле панџ талантија. Адаја сине бари сума паре, хем адалеа о господари сикавѓа кај иси ле бут доверба ки лесте. А сар сине е дујто робоја? Ов шај сине те обесхрабринел пе адалеске со на добинѓа добором талантија кобор о прво робо со добинѓа. Ама сар реагиринѓа ов?

9. Со на вакерѓа о Исус башо дујто робо? (Матеј 25:22, 23)

⁹ Читин Матеј 25:22, 23. О Исус на вакерѓа кај о дујто робо разочаринѓа пе хем хољанѓа адалеске со добинѓа само дуј талантија. Хем исто аѓаар о Исус на вакерѓа кај ов жалинѓа пе хем вакерѓа: „Само добором добинѓум? Ме да сиум исто аѓаар способно сар о робо со добинѓа панџ талантија! Ако мло господари на ценинела ман, тегани шај те парунав акала дуј талантија хем те дикхав мли бути“.

10. Со керѓа о дујто робо пле талантенцар?

¹⁰ Исто сар о прво робо, о дујто да робо халило кај и задача со денѓа ле лескоро господари сине бут важно хем адалеске керѓа бут бути пле господареске. Сар резултати, заработинѓа дупло повише. О господари наградинѓа акале робо башо лескоро баро трудо. На само со о господари сине бахтало, него исто аѓаар денѓа ле повише одговорностија.

11. Сар шај те ова побахтале?

 ¹¹ Слично, амен шај те бајрара амаро бахталипе ако цело душаја кераја било која задача со ка добинала ки служба башо Јехова. Ов „целосно зафатимо“ ки служба, хем ко собраниска активностија (Дела 18:5; Евр. 10:24, 25). Спремин тут шукар башо состанокија те шај те де охрабрувачка коментарија. Дикх сериозно ки било која задача со добинеа ла ко состанок Амаро живото хем служба. Ако замолинѓе тут те поможине ки несави собраниско задача, икер тут ко време хем ов одговорно. Ма мислин кај и задача со денѓе тут нане важно хем кај на ваљани те трошине тло време ки лате. Де тутар са те шај те ове повешто ки тли задача (Изр. 22:29). Со позафатимо ка ове ко тле духовна активностија хем задаче, добором посигате ка напредујне хем ка ове побахтало (Гал. 6:4). Исто аѓаар, ка овел туке полокхо те ове бахтало кеда о јавера ка добинен и задача која со ту би мангеа те добине ла (Рим. 12:15; Гал. 5:26).

12. Со поможинѓа дује објавителенге те овен побахтале?

¹² Дали сетинеа тут ки Мелиса, и пхен која со мангела те служинел ко Бетел или те џал ки Школа башо полновремена објавителија? Иако нашти те исполнинел акала целија, ој вакерела: „Дава мандар са ки пионерско служба хем трудинава ман те учествујнав ко различна методе проповедибаске. Акава анѓа манге баро бахталипе“. Хем со керѓа о Ник адалеске со сине разочаримо кеда на сине именујмо сар слуга-помошнико? Ов вакерела: „Концентриринѓум ман ко адава со шај сине те керав — те џав ки служба хем те дав охрабрувачка коментарија ко состанокија. Исто аѓаар, денѓум молба башо Бетел хем о јавер берш викинѓе ман адари“.

13. Со ка овел ако сиан целосно зафатимо е задаченцар со иси тут акана? (Проповедник 2:24)

¹³ Дали ка добине повише одговорностија ки иднина, ако сиан целосно зафатимо ко тле задаче со иси тут акана? Исто сар о Ник, ту да шај те добине. Ама ако на, тегани исто сар и Мелиса, шај те бајраре тло бахталипе хем ка ове задоволно башо адава со шај те кере е Јеховаске. (Читин Проповедник 2:24.) Исто аѓаар, ка ове бахтало адалеске со џанеа кај амаро Господари, о Исус Христос тано задоволно туја.

14. Со на ваљани те бистра кеда размислинаја башо амаре духовна целија?

¹⁴ Дали адава со сием задоволна е задаченцар со иси амен акана значинела кај на ваљани те трудина амен те бајрара амари служба башо Јехова? Ни хари! Амен ваљани те чхива аменге духовна целија кола со ка поможинен аменге те ова пошукар ки служба хем те поможина амаре пхраленге хем пхењенге. Ка успејна те исполнина адала целија ако на концентриринаја амен ки аменде, него мудро хем скромно трудинаја амен те служина е јаверенге (Изр. 11:2; Дела 20:35).

15. Кола тане несаве целија со шај те поможинен туке те ове побахтало?

¹⁵ Саве целија шај те чхиве туке? Молин е Јехова те поможинел туке те хаљове кола целија шај те исполнине (Изр. 16:3; Јак. 1:5). Шај ли те трудине тут те исполнине јекх таро целија сој спомниме ко  прво пасус — те ове помошно или општо пионери, те служине ко Бетел или те служине ки изградба башо теократска објектија? Или шај те сикљове неви чхиб те шај те проповедине е манушенге ко јавер подрачје. Шај те дознајне нешто повише башо несаве таро акала целија ако читинеа о 10 поглавје  таро лил Организирани за да ја вршиме Јеховината волја хем ако кереа лафи е старешиненцар таро тло собрание. * Кеда трудинеа тут те исполнине акала целија, о јавера шај те дикхен кај духовно напредујнеа хем ка ове побахтало.

16. Со шај те кере ако акана нашти те исполнине несави цел?

¹⁶ Ама со ако нашти те исполнине јекх таро акала целија со спомнинѓем лен англедер? Тегани, трудин тут те чхиве туке несави цел која со шај те исполнине ла. Дикх саве јавера целија шај те чхиве туке.

17. Спрема 1. Тимотеј 4:13, 15, со шај јекх пхрал те керел те шај те овел пошукар учители?

¹⁷ Читин 1. Тимотеј 4:13, 15. Ако сиан крстимо пхрал, шај те трудине тут те ове пошукар говорнико хем учители. Соске? Ако трудинеа тут пошукар те читине, те ове пошукар говорнико хем учители, тегани ка шај повише те поможине околенге со шунена тут. Шај те чхиве туке цел те проучине хем те применине секоја лекција тари брошура Ов са пошукар ко читибе хем сикајбе. Проучин секоја лекција посебно, вежбин ла кхере шукар хем трудин тут те применине ла кеда иси тут говорија. Роде предлогија таро помошно советнико хем таро јавера старешине кола со бут трудинена пе те овен шукар говорникија хем учителија * (1. Тим. 5:17). Ма концентририн тут само ко адава сар ка применине и лекција, него исто аѓаар дикх сар шај те поможине околенге  со шунена тут те бајрарен пумари вера хем те поттикнине лен те применинен адава со шунена. Ако кереа аѓаар, ка бајраре тло бахталипе хем околенгоро со шунена тут.

18. Со шај те поможинел аменге те исполнина амаре целија ки служба?

¹⁸ Саринен амен иси амен задача те проповедина хем те кера ученикија (Мат. 28:19, 20; Рим. 10:14). Мангеа ли те ове повешто ки акаја најважно задача? Чхив туке конкретна целија џикоте проучинеа хем применинеа адава со сикљовеа тари брошура Читибе хем сикајбе. Повише предлогија шај те аракхе ко Амаро живото хем служба — листија спремибаске хем о видеоклипија коленде со иси предлогија башо разговор. Пробин повише предлогија те шај те дикхе кова најшукар одговоринела. Ако применинеа акала буќа, ка ове повешто ки служба хем акава ка керел тут побахтало (2. Тим. 4:5).

19. Сар шај те развине о христијанска особине?

¹⁹ На ваљани те бистре кај и најважно цел која со шај те чхиве ла туке тани те развине о христијанска особине (Гал. 5:22, 23; Кол. 3:12; 2. Пет. 1:5-8). Со ваљани те кере те шај те исполнине акаја цел? На пример, шај мангеа те овел тут позорали вера. Шај те читине статие таро амаре публикацие коте со иси советија башо адава сар те кере позорали тли вера. Исто аѓаар сигурно бут ка користинел туке ако дикхеа делија таро JW Broadcasting^® коте сој сикавдо сар амаре пхраља хем пхења сикавѓе бари вера џикоте соочинѓе пе различна неволјенцар. Пало адава, размислин ко саве начинија шај те сикаве сар ленгири вера ко тло живото.

20. Сар шај те ова побахтале хем похари разочариме?

²⁰ Сигурно сарине амен мангаја те кера повише башо Јехова него со кераја акана. Ко нево свето, ка шај те служина леске целосно. Ама џи тегани, ако користинаја секоја прилика со иси амен панда акана, шај те ова побахтале хем те на ова добором разочариме. Ама сој најважно, ка ана чест хем слава е Јеховаске, амаре бахтале Девлеске (1. Тим. 1:11). Адалеске, те ова бахтале башо буќа со акана шај те кера лен е Јеховаске!