1. Кола пучиба шај те пуча амен кеда размислинаја башо са о буќа со керѓа о Јехова?

КЕДА ка размислина башо баро универзум кова со о Јехова створинѓа ле, шај те осетина амен исто сар о псалмисти о Давид кова со ки молитва пучља: „Кеда дикхава тло небо, кердо таро тле васта, и месечина хем о ѕвезде со керѓан лен, сој тано о мануш кова со мерела, па те мислине ки лесте, хем јекх манушикано чхаво па те грижине тут леске?“ (Пс. 8:3, 4). Исто сар о Давид, амен да шај размислинаја башо адава кобор сием тикне кеда спорединаја амен е ѕвезденцар хем воодушевинела амен адава со о Јехова мислинела ки аменде. Ама сар со ка дикха, о Јехова на само со грижинѓа пе е прво манушенге, е Адамеске хем е Еваке, него исто аѓаар керѓа лен дело таро пли фамилија.

2. Која сине е Јеховаскири намера лескере прво чхавенцар ки Пхув?

² О Адам хем и Ева сине е Јеховаскере прва чхаве теле ки Пхув колен со бут мангела сине. Ов очекујнела сине ола те ден пло дело ки фамилија. О Девел вакерѓа ленге: „Те овел тумен пхердо чхаве хем те овен бут џене, пхерен и пхув хем керен ла бути“ (1. Мој. 1:28). Ов мангља те овен лен чхаве хем те грижинен пе е пхувјаке. Ако о Адам хем и Ева соработинена сине те шај те исполнинел пе е Јеховаскири намера, тегани ола хем ленгере чхаве вечно ка ачховен сине дело тари лескири фамилија.

3. Соске шај те вакера кај о Јехова денѓа е Адаме хем е Ева јекх важно тхан ки лескири фамилија?

³ Е Адаме хем е Ева сине лен важно тхан ки е Јеховаскири фамилија. О Давид башо мануш вакерѓа: „Керѓан ле хари потикно таро ангелија, хем денѓан ле слава хем чест“ (Пс. 8:5, фус.). Точно тано адава кај е манушен нане  лен сила, интелигенција хем способностија сар е ангелен (Пс. 103:20). Сепак, о мануша тане само „хари потеле“ таро адала моќна ангелија. Замислин само! О Јехова чаче денѓа е прво манушенге бут шужо живото!

4. Со случинѓа пе е Адамеа хем е Еваја адалеске со на сине послушна е Јеховаске, хем со ка дикха ки акаја статија?

 ⁴ Жално тано адава со о Адам хем и Ева нашавѓе пло тхан ки е Јеховаскири фамилија. Адава анѓа баре последице ленгере чхавенге, сар со ка дикха ки акаја статија. Ама е Јеховаскири намера на менинѓа пе. Ов мангела о послушна мануша те овен вечно лескере чхаве. Прво, те кера лафи башо адава сар о Јехова сикавѓа аменге чест. Пало адава, ка дикха со шај амен панда акана те кера те шај те сикава кај мангаја те ова дело тари е Јеховаскири фамилија. Ко крајо, ка дикха несаве таро берекетија коленде со е Јеховаскере чхаве ка уживинен вечно ки Пхув.

5. Сар шај те сикава е Девлеске кај сием благодарна со керѓа амен спрема пло лико?

⁵ О Јехова сикавѓа аменге чест аѓаар со керѓа амен спрема пло лико (1. Мој. 1:26, 27). Адалеске, шај те развина хем те сикава бут таро лескере шуже особине сар сој мангипе, сочувство, верност хем праведност (Пс. 86:15; 145:17). Адалеа со развинаја асавке особине, славинаја е Јехова хем сикаваја кај сием леске благодарна (1. Пет. 1:14-16). Исто аѓаар кеда трудинаја амен те постапина сар ов со мангела, тегани амен да сием бахтале. Хем адалеске со иси амен сар е Јеховаскере особине, амен шај те ова мануша кола со о Јехова мангела те овен ки лескири фамилија.

6. Сар сикавѓа о Јехова чест е манушенге кеда спреминѓа и Пхув?

⁶ О Јехова спреминѓа аменге јекх бут шужо кхер. Бут време англедер те створинел е прво мануше, о Јехова спреминѓа е манушенге и Пхув (Јов 38:4-6; Ерем. 10:12). Адалеске со ов тано љубезно хем дарежливо, ов створинѓа бут шукар буќа те шај амен те уживина ки ленде (Пс. 104:14, 15, 24). Пало несаво време, о Јехова дикхља са адава со створинѓа хем „дикхља кај адава тано шукар“ (1. Мој. 1:10, 12, 31). Ов сикавѓа чест е манушенге адалеа со денѓа лен „те владинен упро“ са о шуже буќа ки Пхув (Пс. 8:6). Е Девлескири намера тани о совршено мануша вечно те уживинен џикоте грижинена пе башо са о шуже буќа со створинѓа лен. Дали редовно благодаринеа е Јеховаске башо акава бут шужо ветување?

7. Сар о лафија таро Исус Навин 24:15 сикавена кај е мануше иси ле слободно волја?

⁷ О Јехова денѓа амен слободно волја. Амен шај те бирина со ка кера амаре животоја. (Читин Исус Навин 24:15.) И способност те бирина викинела пе слободно волја. Амаро Девел тано бахтало кеда биринаја те служина леске (Пс. 84:11; Изр. 27:11). Шај те користина амари слободно волја те ана јавера да шукар одлуке. Размислин башо е Исусескоро пример.

8. Кова тано јекх начин сар о Исус користинѓа пли слободно волја?

⁸ Шај те џа пало е Исусескоро пример, аѓаар со ка бирина те чхива е јаверенгере потребе англо амаре. Јекх диве кеда ов хем лескере ученикија сине бут уморна, геле ко јекх мирно тхан коте со мангле те одморинен пе. Ама на успејнѓе, соске јекх баро мноштво аракхља лен хем ола едвај аџикерена сине о Исус те сикавел лен. Кеда дикхља лен на хољанѓа ленге него пело леске жал.  Со керѓа ов? „Ов почминѓа те сикавел лен башо бут буќа“ (Мар. 6:30-34). Кеда амен да сар о Исус користинаја амаро време хем сила те шај те поможина е јаверенге, славинаја амаре небесно даде (Мат. 5:14-16). Хем сикаваја е Јеховаске кај мангаја те ова дело тари лескири фамилија.

9. Саво посебно поклон денѓа о Јехова е манушенге?

⁹ О Јехова денѓа е манушенге и способност те овен лен чхаве, хем и одговорност те сикавен лен те манген ле хем те служинен леске. Ако сиан родители, дали ценинеа акава посебно поклон? Иако о Јехова денѓа е ангеленге бут шуже способностија, ов на денѓа лен и способност те овен лен чхаве. Адалеске, ов благодарно баши предност со иси тут те бајраре чхавен. Е родителенге тани денди и важно одговорност, те ден лен опомене хем те „воспитинен лен аѓаар сар со вакерела о Јехова“ (Еф. 6:4; 5. Мој. 6:5-7; Пс. 127:3). Те шај те поможинел е родителенге, е Јеховаскири организација дела бут буќа со темелинена пе ки Библија, сар сој публикацие, видеоклипија, музика хем интернет статие. Акава сикавела кај амаро небесно Дад хем лескоро Чхаво бут мангена амаре тернен (Лука 18:15-17). О Јехова тано бахтало кеда е родителен иси лен доверба ки лесте хем дена пестар са те шај те грижинен пе пумаре чхавенге. Асавке родителија поможинена пумаре чхавенге јекх диве те овен дело тари е Јеховаскири фамилија, хем те ачховен ки лате вечно!

10-11. Сави прилика дела аменге о Јехова преку и откупнина?

¹⁰ О Јехова денѓа пле најмангле Чхаве те шај палем те ова дело тари лескири фамилија. Сар со дикхлем ко  4 пасус, о Адам хем и Ева грешинѓе, хем адалеске ола нашти сине те овен више дело тари е Јеховаскири фамилија, а ни ленгере чхаве (Рим. 5:12). Ола намерно грешинѓе против о Девел, адалеске заслужинѓе те овен цидиме тари лескири фамилија. Ама сар тано ленгере чхавенцар? Адалеске со о Јехова мангела е манушен ов денѓа прилика околенге сој послушна те овен дело тари лескири фамилија. Ов керѓа адава аѓаар со денѓа пле мангле Чхаве, е Исус Христосе сар жртва аменге (Јован 3:16; Рим. 5:19). Преку адаја жртва, о Јехова шај сине исто аѓаар те посвојнел 144.000 верна манушен сар пле чхаве (Рим. 8:15-17; Отк. 14:1).

¹¹ Исто аѓаар, милиоња јавера верна мануша тане послушна е Девлеске. Лен иси лен надеж кај ко крајо таро милја берша, пало последно испит, целосно ка овен дело тари е Девлескири фамилија (Пс. 25:14; Рим. 8:20, 21). Адалеске со иси лен акаја надеж, ола панда акана викинена е Јехова пле Створителе, „амаро Дад“ (Мат. 6:9). О воскресниме да ка овел лен прилика те сикљовен со очекујнела лендар о Јехова. Окола со ка биринен те шунен лескоро водство исто аѓаар ка овен дело тари лескири фамилија.

12. Башо кова пучибе ка добина акана одговор?

¹² Сар со дикхлем, о Јехова керѓа више бут буќа те шај те сикавел е манушенге чест. Ов посвојнѓа е помазаникон сар пле чхаве, хем денѓа надеж околенге таро „баро мноштво“ кај ола да ка овен лескере чхаве ко нево свето (Отк. 7:9). Со ваљани те кера панда акана те шај те сикава е Јеховаске кај мангаја те ова дело тари лескири фамилија ки цело вечност?

13. Со шај те кера те шај те ова дело тари е Јеховаскири фамилија? (Марко 12:30)

¹³ Сикав кај мангеа е Јехова аѓаар со ка служине леске цело вилеа. (Читин  Марко 12:30.) Таро са о поклонија со денѓа амен о Девел, најбаро лендар тани и способност те обожавина ле. Амен сикаваја е Јеховаске кај мангаја ле аѓаар со икераја лескере заповедија (1. Јов. 5:3). Јекх заповед со денѓа ла о Јехова преку о Исус тани, те кера ученикија хем те крстина лен (Мат. 28:19). Исто аѓаар, денѓа амен заповед те манга амен јекх јекхеа (Јован 13:35). Окола со икерена е Јеховаскере заповедија ка овен дело тари лескири фамилија таро верна слуге сој ко цело свето (Пс. 15:1, 2).

14. Сар шај те сикава мангипе е јаверенге? (Матеј 9:36-38; Римјаните 12:10)

¹⁴ Сикав мангипе е јаверенге. О мангипе тани е Јеховаскири најважно особина (1. Јов. 4:8). Ов сикавѓа аменге мангипе панда англедер те пенџара ле (1. Јов. 4:9, 10). Шај те џа пало лескоро пример аѓаар со амен да ка сикава мангипе е јаверенге (Еф. 5:1). Јекх таро најшукар начинија сар шај те сикава мангипе е манушенге тано аѓаар со ка сикава лен башо Јехова џикоте панда иси време. (Читин Матеј 9:36-38.) Аѓаар, даја лен прилика јекх диве ола да те овен дело тари е Девлескири фамилија. Откеда некој ка крстинел пе, амен понадари да мора те манга ле хем те поштујна ле (1. Јов. 4:20, 21). Сар шај те кера адава? Аѓаар со ка овел амен доверба ки лесте. На пример, ако нашти те хаљова соске керѓа несави бути, нане те мислина аменге кај керѓа ле адава таро погрешна или себична мотивија. Наместо адава, ка сикава чест амаре пхралеске аѓаар со ка дикха ле сар побаро амендар. (Читин Римјаните 12:10; Фил. 2:3.)

15. Касаја ваљани те ова милостива хем љубезна?

¹⁵ Ов милостиво хем љубезно са е манушенцар. Ако мангаја те ова машкар окола со шај вечно те викинен е Јехова „мо Дад“, мора те применина адава со сикљоваја тари Библија. На пример, о Исус вакерѓа кај ваљани те ова милостива хем љубезна са е манушенцар, чак амаре душманенцар (Лука 6:32-36). Акава понекогаш шај те овел пхаро. Адалеске, мора те размислина хем те постапина сар о Исус. Кеда даја амендар са те ова послушна е Јеховаске хем те џа пало е Исусескоро пример, сикаваја амаре небесно дадеске кај мангаја вечно те ова дело тари лескири фамилија.

16. Сар шај те заштитина о анав е Јеховаскере фамилијакоро?

¹⁶ Заштитин о анав е Јеховаскере фамилијакоро. Ки јекх фамилија, бут пути о потикно пхрал керела адава со керела лескоро побаро пхрал. Ако о побаро пхрал применинела о библиска начелија ко пло живото, ов ка овел шукар пример пле потикне пхралеске. Ама, ако почминела те керел лошна буќа, о потикно пхрал шај те џал пало лескоро лошно пример. Слично тано ки е Јеховаскири фамилија. Ако јекх христијани кова со сине верно овела отпаднико или живинела неморално живото, о јавера шај те џан пало лескоро лошно пример. Окола со постапинена аѓаар, руминена о анав е Јеховаскере фамилијакоро (1. Сол. 4:3-8). Амен на смејнаја те џа пало асавке лошна примерија хем ма те дозволина ништо те цидел амен таро амаро небесно Дад.

17. Сар на ваљани те размислина, хем соске?

¹⁷ Те овел амен доверба ко Јехова наместо ко материјална буќа. О Јехова ветинела аменге кај ако чхиваја лескоро Царство ко прво тхан хем живинаја спрема лескере праведна мерилија, ов ка грижинел пе те овел амен хајбаске, урајбаске хем тхан живибаске (Пс. 55:22; Мат. 6:33). Ако иси амен доверба ко акава ветување, нане те мислина кај о материјална буќа таро свето ка заштитинен амен хем ка керен амен бахтале.  Џанаја кај чачутно мир шај те овел амен само ако кераја е Јеховаскири волја (Фил. 4:6, 7). Чак ако шај те кина бут буќа, мора те размислина дали чаче иси амен време хем сила те користина лен хем те одржина лен. Дали превише поврзинѓем амен е буќенцар со иси амен? На смејнаја те бистра кај о Девел очекујнела те кера амаро дело ки лескири фамилија. Адава значинела кај ваљани те ова зафатиме ки служба башо Јехова хем кај на ваљани те дозволина нешто јавер те лел амаро внимание. Сигурно нијекх амендар на мангела те овел сар о терно мануш кова со повише мангља о материјална буќа него те џал пало Исус. Адалеске, нашавѓа и прилика те служинел е Јеховаске хем те овел посвојмо сар јекх таро лескере чхаве (Мар. 10:17-22).

18. Која бари чест хем берекетија вечно ка добинен о послушна мануша?

¹⁸ О послушна мануша ка добинен и најбари чест — вечно те манген хем те обожавинен е Јехова! Окола со ка живинен ки Пхув ка овен исто аѓаар бахтале со ка шај те грижинен пе е пхувјаке која со ка овел ленгоро совршено кхер. Панда хари, е Девлескоро Царство ка керел и Пхув хем са сој ки лате те овен палем шуже. О Исус ка решинел са о проблемија кола со уле адалеске со о Адам хем и Ева одлучинѓе те мукхен е Јеховаскере фамилија. О Јехова ка воскреснинел милиоња манушен хем ка дел лен прилика те овел лен вечно живото хем совршено састипе ко рај ки Пхув (Лука 23:42, 43). Кеда о мануша со служинена е Јеховаске ка овен совршена, сарине ка добинен и слава баши која со пишинѓа о Давид (Пс. 8:5).

19. Со на ваљани те бистра?

¹⁹ Ако сиан јекх таро „баро мноштво“, тегани иси тут бут шужи надеж. О Девел мангела тут хем мангела те ове дело тари лескири фамилија. Адалеске де тутар са те кере лескири волја. Секова диве нека овен туке ки годи хем ко вило е Девлескере ветувања. Ценин и предност со иси тут те обожавине амаре небесно Даде, хем и надеж те славине ле засекогаш!