1. Сави корист ка овел амен ако кераја лафи башо адава сар запознајнѓем о чачипе?

 „САР запознајнѓан о чачипе?“ Сигурно бут пути одговоринѓан ко акава пучибе. Акава тано јекх таро прва пучиба со пучена амен амаре пхраља хем пхења. Амен бут мангаја те шуна сар амаре пхраља запознајнѓе хем замангле е Јехова (Рим. 1:11). Хем амен да мангаја те вакера ленге кобор сием бахтале со сием е Јеховаскере сведокија. Асавке разговорија поможинена аменге панда повише те ценина о чачипе. Исто аѓаар, оваја поодлучна те живина спрема о чачипе хем аѓаар те кера е Јеховаскири волја хем те добина лестар берекети (3. Јов. 4).

2. Башо со ка кера лафи ки акаја статија?

² Ки акаја статија ка дикха некобор причине соске мангаја о чачипе. Пало адава ка дикха сар шај понадари да те сикава мангипе башо акава скапоцено поклон. Сигурно акаја статија ка бајрарел амаро ценење башо адава со керѓа о Јехова те шај те привлечинел амен ко чачипе (Јован 6:44). Исто аѓаар, ка бајрарел амари желба те вакера о чачипе е јаверенге.

3. Која тани и најважно причина соске мангаја о чачипе?

³ Иси повише причине соске мангаја о чачипе. И најважно тани адаја соске мангаја е Јехова, о извор е чачипаскоро. Преку лескоро Лафи, и Библија, амен запознајнѓем ле  на само сар Семоќно Створители со керѓа о небо хем и пхув, него исто аѓаар сар небесно Дад со мангела амен хем грижинела пе аменге (1. Пет. 5:7). Амен џанаја кај амаро Девел тано „милостиво хем сочувствително, на хољанела сигате, пхердо тано верно мангипе хем чачипе“ (2. Мој. 34:6). Ов мангела и правда (Иса. 61:8). Дукхала ле кеда дикхела сар мучинаја амен, хем ов едвај аџикерела о време кеда ка чхинавел са о муке (Ерем. 29:11). Амен да едвај аџикераја те авел адава време. Са акава керела те манга е Јехова!

4-5. Соске о апостол Павле спорединѓа амари надеж котваја?

⁴ Која тани јавер причина соске мангаја о чачипе? О чачипе дела амен бут шукар буќа. Размислин башо акава. Ко библиско чачипе тани вклучими амари надеж баши иднина. Те шај те сикавел кобор врединела амари надеж, о апостол Павле вакерѓа јекх споредба: „Акаја надеж тани амаре душаке сар сигурно хем цврсто котва“ (Евр. 6:19). Исто сар и котва со поможинела јекхе бродеске те ачхол стабилно аѓаар о библиско чачипе шај те поможинел аменге те ачхова смириме кеда иси амен проблемија.

⁵ Кеда вакерѓа акала лафија, о Павле керела сине лафи баши небесно надеж со иси е помазаникон. Ама лескере лафија важинена исто аѓаар е христијаненге со иси лен надеж те живинен ко рај ки пхув (Јован 3:16). Сигурно и надеж башо вечно живото денѓа амен смисла ко амаро живото панда авдиве.

6-7. Сар поможинѓа е Ивонаке адава со дознајнѓа о чачипе баши иднина?

⁶ Те дикха јекхе пхењакоро искуство со викинела пе Ивон. Ој на барили ко чачипе хем сар тикни дарала сине таро мерибе. Ој читинѓа о лафија „јекх диве сарине ка мера“ хем нашти сине те икалел лен тари годи. Ој вакерела: „Акала лафија на мукхена ман сине те совав хем цело рат размислинава сине баши иднина. Размислинава сине, сигурно иси причина соске живинаја, соске сиум акате. На мангава сине те мерав!“

⁷ Покасно, сар тинејџерка, и Ивон запознајнѓа е Јеховаскере сведокон. Ој вакерела: „Почминѓум те верујнав кај шај те живинав вечно ко рај ки пхув“. Сар користинѓа амаре пхењаке адава со запознајнѓа о чачипе? Ој вакерела: „Акана совава мирно соске на дарава више таро мерибе“. Шај те замислина аменге кобор лаке важно о чачипе, хем кај уживинела те вакерел е јаверенге баши пли надеж (1. Тим. 4:16).

8-9. а) Кобор сине вредно јекхе манушеске о барвалипе со аракхља ле тари споредба со вакерѓа ла о Исус? б) Кобор туке вредно о чачипе?

⁸ Ко библиско чачипе исто аѓаар тано вклучимо о шукар хабери башо е Девлескоро Царство. О Исус спорединѓа о чачипе башо Царство гаравде барвалипаја. Ко Матеј 13:44 ов вакерѓа: „О небесно Царство тано сар јекх гаравдо барвалипе ки нива, кова со о мануш аракхља ле хем гаравѓа ле, хем адалеске со сине бут бахтало гело хем бикинѓа са со сине ле хем кинѓа адаја нива“. Приметин кај о мануш на родела сине адава барвалипе. Ама кеда аракхља ле, ов керѓа баре жртве те шај те добинел ле. Уствари ов бикинѓа са со сине ле. Соске? Сине свесно кај адава барвалипе врединела бут повише таро са со денѓа.

⁹ Дали ту да дикхеа аѓаар ко чачипе? Сигурно кај оја! Ништо таро акава свето нане повредно таро адава те служина е Јеховаске хем тари надеж со иси амен башо вечно  живото тело е Девлескоро Царство. Амаро паше амалипе е Јеховаја врединела бут повише тари било сави жртва со кераја ла. Амаро најбаро бахталипе тано „целосно те кера лескири волја“ (Кол. 1:10).

10-11. Со поттикнинѓа јекхе пхрале те керел баре промене ко пло живото?

¹⁰ Бут џене амендар керѓе баре жртве те шај те керен е Јеховаскири волја. Несаве мукхле бари кариера ко свето. Јавера откажинѓе пе тари желба те овен барвале. Ама иси несаве со кеда запознајнѓе е Јехова целосно менинѓе пло начин сар живинена. Баш адава керѓа о Мајкл. Ов на барило ко чачипе. Сар терно трениринела сине карате. Ов вакерела: „Сине манге важно те овав силно. Понекогаш, осетинава сине сар те пхене никој нашти те побединел ман“. Ама кеда почминѓа те проучинел и Библија, ов дознајнѓа со мислинела о Јехова башо насилство (Пс. 11:5). Башо брачно пари со проучинѓа леа, о Мајкл вакерела: „Ола никогаш на вакерѓе манге те откажинав ман таро карате, него продолжинѓе те сикавен ман башо библиско чачипе“.

¹¹ Со повише о Мајкл сикљовела сине башо Јехова, добором повише замангела ле сине. Бут влијајнѓа упри лесте адава со о Јехова сикавела сочувство пле слугенге. Пало несаво време, халило кај ваљани те анел јекх бут важно одлука ко пло живото. Ов вакерела: „Џанљум кај и најпхари одлука ко мло живото ка овел те откажинав ман таро карате. Ама, исто аѓаар џанљум кај акава ка керел е Јехова бахтало хем кај врединела те керав било сави жртва те шај те служинав леске“. О Мајкл џанља кобор бут врединела о чачипе хем адалеске сине спремно те керел баре промене ко пло живото (Јак. 1:25).

12-13. Сар о библиско чачипе поможинѓа јекхе пхењаке?

¹² Те шај те сикавел кобор врединела о чачипе, и Библија спорединела ле лампаја која со светинела ки темница (Пс. 119:105; Еф. 5:8). И Мајли таро Азербејџан, бут ценинела и светлина со добинѓа ла таро е Девлескоро Лафи. Лакере родителен сине лен различна религие. Лакоро дад сине муслимани, а лакири дај еврејка. Ој пхенела: „Иако никогаш на сумнинава ман сине кај постојнела о Девел, сепак мучинена ман сине несаве пучиба. Пучава ман сине: ’Соске о Девел створинѓа е манушен хем соске некој ваљани те цидел муке цело пло живото хем пало адава те овел вечно мучимо ко пекол?‘ Адалеске со о мануша вакерена сине кај са со случинела пе, случинела пе е Девлескере волјаја пучава ман сине: ’Дали о Девел контролиринела е манушен сар кукле хем уживинела те дикхел сар мучинена пе?‘“

¹³ И Мајли продолжинѓа те родел о одговорија башо пле пучиба. Пало несаво време ој прифатинѓа те проучинел и Библија хем ули јекх таро е Јеховаскере сведокија. Ој вакерела: „О логична библиска сикљојба поможинѓе манге пошукар те дикхав ко живото. О разумна објаснувања со аракхљум лен ко е Девлескоро Лафи денѓе ман андруно мир“. Исто сар и Мајли, сарине амен фалинаја е Јехова, околе со викинѓа амен тари темнина ки пли бут шужи светлина (1. Пет. 2:9).

14. Сар шај те бајрара амаро мангипе спрема о чачипе? (Дикх хем и рамка „ Јавера споредбе“.)

¹⁴ Акала тане само некобор споредбе кола со сикавена кобор врединела о чачипе. Сигурно шај те сетине тут ко бут јавера да споредбе. Шај те чхиве туке цел ки тли  лично студија те аракхе јавера причине соске те манге о чачипе. Со повише мангаја о чачипе, добором повише начинија ка аракха те сикава амаро ценење спрема лесте.

15. Кова тано јекх начин сар шај те сикава амаро мангипе башо чачипе?

¹⁵ Шај те сикава кај мангаја о чачипе аѓаар со редовно ка проучина и Библија хем о библиска публикацие. Бизи разлика кобор време сием ко чачипе секогаш иси нешто со шај те сикљова. Ко прво број тари Стражарско кула пишинела: „О чачипе тано учхардо таро бут ховајба акале светоскере исто сар јекх тикни шужи лулуди која сој гаравди машкар бут чарја. Те шај те аракхе ла ваљани бут шукар те роде ла. А те шај те овел тли, мора те тељове хем те ле ла. Ма ов задоволно само јекхе лулуѓаја таро чачипе. Понадари да кхеде лен, ма чхинав те роде лен!“ О проучибе нане локхо, ама врединела те трудина амен.

16. Кова начин проучибаске тано туке најшукар? (Изреки 2:4-6).

¹⁶ На уживинаја сарине ко читибе хем проучибе. Ама о Јехова вакерела аменге „понадари  да те рода“ те шај пошукар те хаљова о чачипе. (Читин Изреки 2:4-6.) Секогаш ка овел амен корист ако кераја аѓаар. О Кореј вакерела кај ки пли лично библиско студија концентриринела пе ко секова стихо посебно. Ов објаснинела: „Читинава секоја фуснота хем секоја референца хем истражинава јавер да материјали. Акава начин поможинела манге те сикљовав бут буќа!“ Бизи разлика дали користинаја акава начин или јавер, амен сикаваја кај ценинаја о чачипе кеда одвојнаја аменге време хем трудинаја амен те проучина (Пс. 1:1-3).

17. Со значинела те живина спрема о чачипе? (Јаков 1:25).

¹⁷ Џанѓола пе, нане доволно само те проучина башо чачипе. Те шај те овел амен целосно корист мора те живина спрема о чачипе, јавере лафенцар те применина ко амаро живото адава со сикљоваја. Само тегани ка шај о чачипе те керел амен бахтале. (Читин Јаков 1:25.) Сар шај те џана кај живинаја спрема о чачипе? Јекх пхрал вакерела кај тано шукар лично те испитина амен, те дикха дали применинаја адава со сикљоваја хем коте шај панда те подобрина амен. О апостол Павле вакерѓа: „Бизи разлика кобор напредујнѓем џи акана, ваљани понадари да те напредујна, те џа ко акава исто друмо“ (Фил. 3:16).

18. Соске даја амендар са те шај те живина спрема о чачипе?

¹⁸ Размислин само сар поможинела аменге адава со даја амендар са те живина спрема о чачипе. На само со овела амен пошукар живото, него исто аѓаар кераја е Јехова бахтало хем амаре пхрален хем пхењен (Изр. 27:11; 3. Јов. 4). Акала тане о најбаре причине те манга о чачипе хем те живина спрема о чачипе.