1. Соске о Исус молинѓа е Јехова те аракхел лескере следбеникон?

 И РАТ англедер те мерел, о Исус родинѓа нешто посебно таро пло Дад. Ов молинѓа ле те аракхел лескере следбеникон (Јован 17:15, 20). Џанѓола пе, о Јехова секогаш сикавѓа пле народоске кај аракхела ле, грижинела пе леске хем заштитинела ле. Ама ов молинѓа е Јехова соске џанља кај лескере следбеникон ка овел лен баро противибе таро Сатана. Ов исто аѓаар џанља кај те шај те издржинен адава противибе ка ваљани ленге е Јеховаскири помош.

2. Спрема Псалм 33:18-20, соске на ваљани те дара кеда иси амен неволје?

² Акава свето колеа со владинела о Сатана керела баре проблемија е верна христијаненге. Доживинаја неволје кола со шај те обесхрабринен амен хем те чхивен ко испит амари верност спрема о Јехова. Ама сар со ка дикха ки акаја статија, нане соске те дара. О Јехова аракхела амен, дикхела саве проблемија иси амен хем мангела те поможинел аменге. Акана ка дикха дуј библиска примерија кола со сикавена сар „е Јеховаскере јакхја тане упро окола со дарана лестар“. (Читин Псалм 33:18-20.)

3. Кеда шај осетинаја амен коркори?

³ Иако иси амен бут пхраља хем пхења понекогаш шај те осетина амен коркори. На пример, о терне шај осетинена пе коркори кеда менинена о собрание или кеда мора те објаснинен англо цело класи ко со верујнена. Шај сием тажна или обесхрабриме хем  мислинаја кај ваљани коркори те соочина амен асавке чувствонцар. Шај дараја те вакера сар осетинаја амен соске мислинаја кај о јавера нане те хаљовен амен. Понекогаш, шај чак мислинаја кај никој на интересинела пе аменге. Бизи разлика соске осетинаја амен коркори, адава шај те керел те секирина амен хем те мислина кај никој нашти те поможинел аменге. О Јехова на мангела те осетина амен аѓаар. Соске шај те вакера адава?

4. Соске о Илија вакерѓа „само ме ачхиљум“?

⁴ Те дикха о пример таро верно пророко о Илија. И Језавела заканинѓа пе кај ка мударел ле, адалеске ов прастандило повише таро 40 диве те шај те спасинел пло живото (1. Цар. 19:1-9). Кеда сине коркори ки јекх пештера ов жалинѓа пе е Јеховаске: „Само ме ачхиљум сар пророко“ (1. Цар. 19:10). Ама ки адаја пхув сине јавера да пророкија, соске о Авдија спасинѓа шеле пророкон тари Језавела (1. Цар. 18:7, 13). Тегани соске осетинѓа пе коркори о Илија? Дали мислинѓа кај о пророкија со сине спасиме таро Авдија више муле? Дали осетинѓа пе аѓаар соске о јавера на мангле те служинен е Јеховаске чак откеда о Јехова ки планина Кармил докажинѓа кај ов тано о чачутно Девел? Дали шај мислинѓа кај никој на џанела ки сави опасност аракхљола сине или кај никој на интересинела пе леске? О извештај на вакерела бут башо адава сар осетинѓа пе о Илија, ама шај те ова сигурна кај о Јехова халило соске о Илија осетинела пе сине коркори хем џанља сар шај те поможинел леске.

5. Сар о Јехова уверинѓа е Илија кај нане коркори?

⁵ О Јехова керѓа бут буќа те шај те поможинел е Илија. Ов поттикнинѓа е Илија те керел леа лафи. Адалеске дуј пути пучља ле: „Со кереа акате?“ (1. Цар. 19:9, 13). Секова пути шунѓа ле о Јехова џикоте пхравѓа леске по вило. О Јехова одговоринѓа е Илијаске аѓаар со сикавѓа леске кај ов тано леа хем кај иси ле бари моќ. Исто аѓаар уверинѓа ле кај иси јавера да Израелција кола со панда обожавинена е Јехова (1. Цар. 19:11, 12, 18). Сигурно о Илија осетинѓа пе бут пошукар  откеда вакерѓа е Јеховаске сар осетинела пе хем откеда о Јехова одговоринѓа леске. О Јехова денѓа е Илијаске некобор важна задаче. Ов вакерѓа леске те помазинел е Азаиле сар цари упри Сирија, е Јује сар цари упро Израел хем е Елисее сар пророко (1. Цар. 19:15, 16). Аѓаар со денѓа ле акала задаче о Јехова поможинѓа леске те концентриринел пе ко позитивна буќа. О Девел исто аѓаар денѓа ле паше амал, е Елисее. Сар шај ту те добине е Јеховаскири помош кеда осетинеа тут коркори?

6. Башо со шај те молине тут кеда осетинеа тут коркори? (Псалм 62:8).

⁶ О Јехова мангела те молине тут леске. Ов дикхела саве проблеменцар соочинеа тут хем уверинела тут кај ка шунел тле молитве ко било саво време (1. Сол. 5:17). Ов тано бут бахтало кеда шај те шунел пле слуген (Изр. 15:8). Башо со шај те молине тут кеда осетинеа тут коркори? Исто сар о Илија пхрав леске тло вило. (Читин Псалм 62:8.) Вакер леске тле муке хем кобор туке пхаро. Молин е Јехова те поможинел туке те џане со те кере кеда осетинеа тут коркори или тажно. На пример, ако осетинеа тут коркори или дараја те сведочине ки школа, молин е Јехова те дел тут храброст те кере лафи. Шај чак те молине е Јехова баши мудрост те шај тактично те објаснине ко со верујнеа (Лука 21:14, 15). Ако сиан разочаримо молин е Јехова те поможинел туке те кере лафи јекхе зрело христијанеа. Шај те молине е Јехова те поможинел адале пхралеске те хаљовел тут. Пхрав е Јеховаске тло вило, дикх сар одговоринела ко тле молитве хем прифатин е јаверенгири помош. Тегани нане више те осетине тут коркори.

7. Со сикљовеа таро Маурицио?

⁷ О Јехова денѓа сариненге аменге јекх бут важно задача. Шај те ове уверимо кај ов дикхела хем ценинела са со кереа ко собрание хем ки служба (Пс. 110:3). Сар шај адава со ачховеа зафатимо ки тли задача те поможинел туке кеда осетинеа тут коркори? Те дикха о пример јекхе терне пхралескоро кова со викинела пе Маурицио. * Кратко откеда крстинѓа пе, јекх таро лескере најпаше амала почминѓа похари те мукхел о чачипе. Ов вакерела: „Адава со дикхљум кај мукхља е Јехова влијајнѓа лошно упри манде. Пучава ман сине дали шај те икерав ман ко мло завет хем те ачховав дело тари е Јеховаскири фамилија. Осетинава ман сине коркори хем мислинава сине кај никој нашти те хаљол ман“. Со поможинѓа леске? Ов вакерела: „Почминѓум повише те џав ки служба. Адава поможинѓа ман те на концентриринав ман само ки манде хем башо адава сар  осетинава ман. Адалеске со џава сине е јаверенцар ки служба сиум сине бахтало хем на осетинава ман сине више коркори. Чак ако нашти лично те џа ленцар ки служба шај те охрабрина амен кеда сведочинаја преку писмија или телефони“. Со јавер поможинѓа е Маурициоске? Ов вакерела: „Исто аѓаар, почминѓум повише те поможинав ко собрание. Трудинѓум ман кобор со шај пошукар те спреминав хем те икерав мле задаче. Адала задаче керѓе те осетинав ман ценимо таро Јехова хем таро јавера“.

8. Сар шај о проблемија те влијајнен упри аменде?

⁸ Ко акала последна диве џанаја кај ка овен амен неволје (2. Тим. 3:1). Сепак, кеда ка случинел пе аменге нешто асавко шај те ова изненадиме. Шај таро јекх пути те овел амен финансиска проблемија, те дознајна кај иси амен јекх пхаро насвалипе или те мерел амендар некој паше. Ко асавке ситуацие шај те ова разочариме хем те на овел амен сила, посебно кеда о неволје авена јекх пало јекх или доживинаја повише неволје ко исто време. Ама те на бистра кај о Јехова џанела таро со накхаја хем шај те издржина било сави неволја соске ов поможинела амен.

9. Саве неволје сине е Јове?

⁹ Размислин башо адава сар о Јехова поможинѓа е верно Јовеске. Ов башо кратко време доживинѓа некобор баре неволје. Јекх дело таро лескере животне сине чорде, а јавер дело сине мударде хем лескере слуге исто аѓаар сине мударде. А сој најлошно, дознајнѓа кај са лескере чхаве муле. Хем са акава случинѓа пе само јекхе дивеске (Јов 1:13-19). Кратко пало адава, џикоте панда бут тугујнела сине, е Јове мучинела сине јекх бут пхаро насвалипе (Јов 2:7). Лескири ситуација сине добором пхари со вакерѓа: „Бктинѓум таро мо живото, на мангава више те живинав“ (Јов 7:16).

10. Сар о Јехова денѓа е Јовеске адава со ваљани леске те шај те истрајнел? (Дикх и слика ки насловно страна.)

¹⁰ О Јехова аракхела сине е Јове. Адалеске со о Јехова мангља е Јове, денѓа ле адава со ваљани леске те шај те истрајнел. О Јехова керѓа лафи е Јовеа хем потсетинкерѓа ле баши пли бари мудрост хем кај грижинела пе са е буќенге со створинѓа лен. Ов спомнинѓа леске бут животне сој чудесна (Јов 38:1, 2; 39:9, 13, 19, 27; 40:15; 41:1, 2). О Јехова исто аѓаар користинѓа јекхе верно терне слуга кова со викинела пе Елиу те шај те утешинел ле хем те охрабринел ле. Ов уверинѓа е Јове кај о Јехова секогаш наградинела пле слуген баши ленгири истрајност. Ама о Јехова исто аѓаар поттикнинѓа ле те дел е Јове јекх љубезно совет. О Елиу поможинѓа е Јовеске те на концентриринел пе ки песте него те дикхел и цело слика аѓаар со сетинкерѓа ле кај амен сием бут тикне ки споредба е Јеховаја, о Створители таро универзум (Јов 37:14). О Јехова денѓа е Јове исто аѓаар задача — ваљанѓа те молинел пе пле трине амаленге кола со грешинѓе (Јов 42:8-10). Сар о Јехова поможинела амен авдиве кеда доживинаја неволје?

11. Сар поможинела амен и Библија кеда иси амен неволје?

¹¹ О Јехова авдиве на керела аменцар директно лафи сар со керѓа е Јовеа, ама ов керела аменцар лафи преку и Библија (Рим. 15:4). Ов утешинела амен аѓаар со дела амен надеж баши иднина. Те дикха само некобор мисле тари Библија кола со шај те утешинен амен кеда доживинаја неволје.  Ки Библија о Јехова уверинела амен кај ништо, чак ни о пхаре неволје, „нашти те одвојнен амен таро лескоро мангипе“ (Рим. 8:38, 39). Ов исто аѓаар уверинела амен „кај тано паше узи сариненде со родена ле“ ки молитва (Пс. 145:18). Ов вакерела аменге кај ако иси амен доверба ки лесте, шај те истрајна ки било сави неволја хем чак те ова бахтале кеда аменге пхаро (1. Кор. 10:13; Јак. 1:2, 12). Е Девлескоро Лафи исто аѓаар сетинкерела амен кај о неволје со доживинаја лен тане привремена хем кратка кеда ка споредина лен е вечно наградаја со ка добина ла (2. Кор. 4:16-18). О Јехова уверинела амен кај ка уништинел околен со керена о проблемија — е Сатана хем околен сој лошна сар лесте (Пс. 37:10). Дали памтинѓан несаве утешна библиска стихија со шај те поможинен туке кеда ка овел тут неволје?

12. Со очекујнела о Јехова те кера ако мангаја те овел амен целосно корист таро лескоро Лафи?

¹² О Јехова мангела те одвојна аменге време редовно те проучина и Библија хем хор те размислина башо адава со читинаја. Кеда применинаја адава со сикљоваја амари вера овела позорали хем оваја попаше амаре небесно Дадеа. Тегани ка овел амен побари сила те издржина ко неволје. О Јехова исто аѓаар дела пло свети дух околенге со иси лен доверба ко лескоро Лафи хем адава духо шај те дел амен и сила „која со накхавела и нормално“ те шај те истрајна било сави неволја (2. Кор. 4:7-10).

13. Сар и духовно храна која со дела ла о верно хем о разборито робо поможинела аменге те истрајна ко неволје?

¹³ О Јехова поможинела е верно хем разборито робоске те дел амен бут духовно храна сар сој статие, видеоклипија хем гиља кола со поможинена амен те бајрара амари вера хем те ачхова духовно џангавде (Мат. 24:45). Ваљани целосно те користина са адава со дела амен о Јехова. Јекх пхен таро САД вакерѓа кобор тани благодарно баши акаја духовно храна. Ој вакерѓа: „Служинава е Јеховаске 40 берш хем ко адала берша мли вера сине бут пути чхивди ко испит“. Ој доживинѓа бут пхаре неволје. Лакоро папо сине мудардо таро јекх мато возачи, лакере родителија бут насвалиле хем муле, а ла сине ла дуј пути рако. Со поможинѓа лаке те истрајнел? Ој објаснинела: „О Јехова секогаш грижинела пе манге. И  духовно храна која со дела ман преку о верно хем разборито робо поможинѓа манге те истрајнав. Адалеске ме да шај те вакерав адава со вакерѓа о Јов: ’Са џикоте на мерава нане те откажинав ман тари мли беспрекорност‘“ (Јов 27:5).

14. Сар користинела о Јехова амаре пхрален те шај те поддржинел амен кеда иси амен пхарипа? (1. Солуњаните 4:9).

¹⁴ О Јехова сикавѓа пле слуген те манген пе хем те утешинен пе јекх јекхеа кеда накхена таро пхаре времија. (2. Кор. 1:3, 4; читин 1. Солуњаните 4:9.) Исто сар о Елиу, амаре пхраља хем пхења тане спремна те поможинен аменге те ачхова верна кеда доживинаја неволје (Дела 14:22). На пример, е Дајанакоро собрание охрабринѓа ла хем поможинѓа лаке те ачхол духовно зорали откеда лакоро ром бут насвалило. Ој вакерѓа: „Бут сине манге пхаро, ама осетинѓем е Јеховаскоро вас џикоте трајнѓе акала бут пхаре масекија. Амаро собрание керѓа бут те шај те поддржинел амен. Адава со посетинѓе амен, ѕвонинѓе аменге хем сине узи аменде поможинѓа аменге те истрајна. Адалеске со на џанава те возинав, о пхраља хем о пхења ингарена ман сине ко состанокија хем ки служба“. Бахтале сием со сием дело тари асавки фамилија коте со иси мангипе!

15. Соске сием увериме кај шај те истрајна ко неволје?

¹⁵ Сарине амен ка доживина несаво пхарипа. Ама сар со дикхлем на сием коркори. Исто сар јекх дад пхердо мангипаја о Јехова секогаш грижинела пе аменге. Ов тано аменцар, спремно тано те шунел амен кеда родаја лестар помош хем поддржинела амен (Иса. 43:2). Увериме сием кај шај те икљова ко крајо било саве пхарипаја соске ов дела амен са со ваљани те шај те истрајна. Ов денѓа амен и молитва, и Библија, и духовно храна хем пхраља хем пхења кола со поможинена ко пхаре времија.

16. Со ваљани те кера те шај о Јехова понадари да те грижинел пе аменге?

¹⁶ Бут сием бахтале со амаро небесно Дад грижинела пе аменге! „Баши лесте амаро вило тано бахтало“ (Пс. 33:21). Шај те сикава кај ценинаја е Јеховаскири грижа, аѓаар со ка користина са адава со дела аменге те шај те поможинел амен. Ама амен да ваљани те да амаро дело те шај о Девел понадари да те грижинел пе аменге. Јавере лафенцар, ако понадари да даја амаро најшукар те шај те ова послушна е Јеховаске хем ако кераја адава сој исправно тегани ов ка аракхел амен засекогаш! (1. Пет. 3:12).