1. Кола шукар буќа керѓе бут терне?

 СЕКОВА берш повише милја терне крстинена пе. Дали ту да керѓан о исто? Ако оја, тле духовна пхраља хем пхења тане бахтале хем исто аѓаар о Јехова! (Изр. 27:11). Размислин башо шукар буќа со више керѓан. На пример, редовно проучинѓан и Библија, шај чак некобор берша. Адава со сиклиљан уверинѓа тут кај и Библија тани е Девлескоро Лафи. Ама на само адава, ту запознајнѓан хем замангљан околе кастар со авела и Библија. Тло мангипе спрема о Јехова добором барило со одлучинѓан те де лафи кај ка служине леске хем те крстине тут. Адалеа анѓан јекх бут шукар одлука!

2. Башо со ка кера лафи ки акаја статија?

 ² Англедер те крстине тут веројатно тли вера сине испитими ко различна начинија. Ама сар со накхена о берша ка овен тут јавера да испитија. О Сатана ка мангел те шудрарел тут таро Јехова хем те цидел тут лестар (Еф. 4:14). На смејнеа те мукхе те случинел пе адава. Со шај те поможинел туке те ачхове верно е Јеховаске хем те икере тут ко тло завет? Ваљани понадари да те де тутар са те шај те напредујне џи ки зрелост (Евр. 6:1). Ама сар шај те кере адава?

3. Со ваљани сарине амен те кера откеда крстинѓем амен?

³ Откеда крстинѓем амен, сарине амен ваљани те применина о совет со денѓа ле о апостол Павле е пхраленге ко  Ефес. Ов поттикнинѓа лен те овен „возрасна“ христијања (Еф. 4:13). Јавере лафенцар, ов мангља те вакерел ленге понадари да те напредујнен. О Павле спорединѓа о духовно напредок адалеа сар бајровела јекх чхаво. Кеда бијанѓовела јекх бебе, о родителија мангена ле хем дичинена пе леа. Ама ов нашти цело живото те ачховел бебе. Сар со накхела о време, ов ка ваљани те чхинавел те понашинел пе сар чхаво (1. Кор. 13:11). Слично тано аменцар. Откеда ка крстина амен, ваљани понадари да те напредујна. Те дикха некобор буќа со ка поможинен аменге те кера адава.

4. Со шај те поможинел туке духовно те напредујне? Објаснин. (Филипјаните 1:9).

⁴ Бајрар тло мангипе спрема о Јехова. Ту бут мангеа е Јехова, ама тло мангипе спрема лесте шај панда повише те бајрол. Сар? О Павле ко Филипјаните 1:9 спомнинѓа јекх начин сар шај те кера адава. (Читин.) О Павле молинѓа пе е Филипјаненгоро мангипе „са повише хем повише“ те бајрол. Значи, амен да шај те бајрара амаро мангипе. Шај те кера адава аѓаар со панда пошукар ка пенџара е Девлескири волја хем ка овел амен панда побари разборитост. Со повише пенџараја е Јехова, добором повише мангаја ле хем ценинаја о начин сар постапинела. Оваја са поодлучна те кера ле бахтало хем никогаш на мангаја те кера нешто колеа со ка разочарина ле. Даја амендар са те шај те хаљова која тани лескири волја хем сар шај те постапина спрема лате.

5-6. Сар шај те бајрара амаро мангипе спрема о Јехова? Објаснин.

⁵ Шај те бајрара амаро мангипе спрема о Јехова аѓаар со пошукар ка запознајна лескере Чхаве соске ов совршено сикавѓа пле Дадескере особине (Евр. 1:3). Најшукар начин сар шај те запознајна е Исусе тано аѓаар со ка проучина о 4 евангелија. Ако панда нане тут навика редовно те читине и Библија шај те почмине акана, аѓаар со ка читине о извештаија башо Исус. Џикоте читинеа лен, концентририн тут ко лескере особине. Ов сине пристапливо, мангела сине е чхавен хем лела лен сине ки ангали (Мар. 10:13-16). Ов сине љубезно хем слободно пле учениконцар, хем ола на дарана сине те вакерен леске сар осетинена пе хем со мислинена (Мат. 16:22). Адава со џанаја кај о Исус постапинела исто сар пло Дад поможинела амен те хаљова кај о Јехова да тано пристапливо. Шај те молина амен леске хем те вакера леске са амаре мисле хем чувствија. Увериме сием кај ов нане те осудинел амен соске мангела амен хем грижинела пе аменге (1. Пет. 5:7).

⁶ О Исус сикавѓа сочувство е манушенге. О апостол Матеј вакерѓа: „Кеда дикхља буте манушен, жалинѓа лен соске сине мучиме хем отфрлиме сар бакхре бизо пастири“ (Мат. 9:36). А саво тано о Јехова? О Исус вакерѓа: „Мо Дад да, кова сој ко небо, на мангела те мерел нијекх таро акала тикне“ (Мат. 18:14). Кобор само утешна тане акала лафија! Џикоте запознајнаја пошукар е Исусе, амаро мангипе спрема о Јехова бајрола.

7. Сар шај те поможинел туке адава со ка дружине тут зрела пхраленцар?

⁷ Ту да шај те сикљове те сикаве побаро мангипе е Јеховаске хем те напредујне сар христијани ако дружинеа тут зрела пхраленцар хем пхењенцар таро тло собрание. Приметин кобор тане бахтале. Ола на пеле пишмани со одлучинѓе те служинен е Јеховаске. Пуч лен саве искуствија сине лен  џи акана ки служба. Кеда ваљани те ане несави важно одлука, роде лендар совет соске „о успех авела преку бут советникија“ (Изр. 11:14).

8. Со шај те кере ако сумнинеа тут ко адава со вакерела и Библија?

⁸ Циде тутар о сумње. Сар со дикхлем ко  дујто пасус, о Сатана ка пробинел те чхинавел тут духовно те напредујне. Јекх начин сар шај те керел адава тано аѓаар со ка чхивел тут те сумнине тут ко несаве буќа со вакерела лен и Библија. На пример, несаве шај ка манген те убединен тут те верујне ки еволуција. Кеда сиан сине потерно шај на размислинѓан бут баши акаја тема, ама акана кеда бариљан шај сикљовеа баши акаја тема ки школа. Шај изглединела туке логично адава со вакерена те наставникија баши еволуција. Ама ола шај никогаш на родинѓе доказија башо адава дали иси Створители. Сетин тут ко начело со аракхљола ко Изреки 18:17: „Окова со прво керела лафи изглединела кај тано ко право, са џикоте на авела јавер те родел лестар те докажинел адава со вакерела“. Наместо те верујне ко са со шунеа ки школа, ваљани шукар те проучине адава со пишинела ко е Девлескоро Лафи. Истражин ко амаре публикацие, кер лафи пхраленцар хем пхењенцар кола со поангле верујнена сине ки еволуција хем пуч лен со уверинѓа лен кај иси Створители со мангела амен. Асавке разговорија шај те поможинен туке те дикхе кај иси доказија башо Створители.

9. Со сикљовеа тари Мелиса?

⁹ Јекх пхен со викинела пе Мелиса истражинѓа нешто повише башо створибе хем адава поможинѓа лаке те цидел пестар о сумње. * Ој вакерела: „Ки школа о наставникија керена лафи баши еволуција ко јекх уверливо начин. Ко почеток на мангава сине те истражинав соске дарава сине те на икљол кај и еволуција тани точно. Ама халиљум кај о Јехова мангела те овел амен шукар причине соске верујнаја ки лесте, адалеске почминѓум те истражинав. Читинѓум о лил Постојнела ли Створители кова со грижинела пе туке? хем о брошуре Дали о живото авела таро Девел? хем Котар  авела о живото — панџ пучиба коленге со ваљани одговор. * Баш адава ваљани сине манге. Кај те керав сине адава поангле“.

10-11. Со шај те поможинел туке те ачхове морално чисто? (1. Солуњаните 4:3, 4).

¹⁰ Отфрлин о погрешна постапке. Кеда сиан тинејџери, и желба те овел тут секс шај те овел бут силно хем о јавера шај те керен туке притисок те кере адава. О Сатана мангела те постапине спрема тле желбе. Со шај те поможинел туке те ачхове морално чисто? (Читин 1. Солуњаните 4:3, 4.) Кеда молинеа тут вакер е Јеховаске сар осетинеа тут хем роде лестар те дел тут сила (Мат. 6:13). Ма бистре кај о Јехова мангела те поможинел туке, а на те осудинел тут (Пс. 103:13, 14). Исто аѓаар, и Библија шај те поможинел туке. И Мелиса кола со спомнинѓем ла англедер боринела пе сине неморална мисленцар. Ој вакерела: „Адава со читинава сине и Библија секова диве поможинѓа манге те боринав ман против о погрешна желбе хем те на бистрав кај о Јехова тано мло Девел хем кај мангава ов те водинел ман ко живото“ (Пс. 119:9).

¹¹ Ма пробин те решине тле проблемија коркори. Вакер тле родителенге со мучинела тут. Нане локхо те кере лафи башо асавке лична буќа ама важно тано те кере адава. И Мелиса вакерела: „Молинѓум ман баши храброст хем тегани керѓум лафи ме дадеа башо мло проблеми. Пало адава осетинѓум ман бут пошукар. Џанава сине кај о Јехова дичинела пе манцар“.

12. Сар шај те ане шукар одлуке?

¹² Мукх те водинен тут о библиска начелија. Сар со бајровеа, тле родителија ка дозволинен туке те ане коркори одлуке. Ама тут панда нане тут бут искуство ко живото. Сар шај те избегине те кере грешке кола со ка влијајнен упро тло амалипе е Јеховаја? (Изр. 22:3). Јекх пхен со викинела пе Кери објаснинела со поможинѓа лаке те анел пошукар одлуке. Ој халили кај јекхе зрело христијанеске на ваљани правило баши секоја ситуација. Ој вакерела: „Ваљани сине те хаљовав о библиска начелија, а на те слединав само несаве правилија“. Кеда читинеа и Библија пуч тут: „Со вакерела манге акава извештај башо адава сар размислинела о Јехова? Дали ки лесте иси начелија кола со шај те поможинен манге те постапинав исправно? Ако оја, сави корист ка овел ман ако применинава лен?“ (Пс. 19:7; Иса. 48:17, 18). Ако читинеа и Библија хем хор размислинеа башо начелија, ка овел туке полокхо те ане одлуке кола со ка керен бахтало е Јехова. Џикоте понадари да напредујнеа духовно, ка приметине кај нане те ваљанен туке правилија баши секоја ситуација соске хаљовеа сар дикхела о Јехова ко буќа.

13. Сар шај о шукар амала те поможинен туке? (Изреки 13:20).

¹³ Бирин амала кола со мангена е Јехова. Сар со спомнинѓем англедер, о амала со ка бирине лен шај те поможинен туке те ове зрело христијани. (Читин Изреки 13:20.) Јекх пхен со викинела пе Сара, на сине више бахтали сар англедер. Ама случинѓа пе нешто со менинѓа лакири ситуација. Ој вакерела: „Аракхљум шукар амала баш ко право време. Секова курко спреминава сине и Стражарско кула заедно јекхе терне пхењаја. Јавер пхен поможинѓа манге те почминав те коментиринав ко состанокија. Адалеске со мле амала поможинѓе манге халиљум кобор тано важно те овел ман  лично студија хем те молинав ман. Адава со уљум попаше е Јеховаја поможинѓа манге те овав палем бахтали“.

14. Сар аракхља о Џулиен шукар амала?

¹⁴ Сар шај те аракхе амала кола со ка влијајнен шукар упри туте? О Џулиен кова со акана служинела сар старешина вакерела: „Кеда сиум сине потерно, уљум шукар амал околенцар со џава сине ки служба. Ола сине бут ревна хем поможинѓе манге те дикхав кај шај те уживинав ки служба. Адалеске чхивѓум манге цел те почминав е полновремено службаја. Исто аѓаар халиљум кај нане ман бут амала соске дружинава ман сине само мле врсниконцар. Покасно сине ман исто аѓаар шукар амала ко Бетел. Ленгоро пример поможинѓа манге те биринав пошукар забава хем адава керѓа те овав попаше е Јеховаја“.

15. Саво совет башо друштво денѓа о Павле е Тимотее? (2. Тимотеј 2:20-22).

¹⁵ Со ако дикхеа кај некој таро собрание нане туке шукар друштво? О Павле џанља кај несаве таро собрание на размислинена сине хем на постапинена сине сар христијања хем адалеске вакерѓа е Тимотееске те цидел пе лендар. (Читин 2. Тимотеј 2:20-22.) Амаро амалипе е Јеховаја тано бут скапоцено. Бут трудинѓем амен те шај те ова паше е Јеховаја, адалеске на ваљани те дружина амен некасаја со шај те руминел адава амалипе (Пс. 26:4).

16. Саве целија шај те чхиве туке?

¹⁶ Чхив туке корисна целија. Чхив туке целија со ка поможинен туке те бајраре тли вера хем со ка керен те ове позрело христијани (Еф. 3:16). На пример, шај ка манге те читине хем те проучине и Библија поредовно (Пс. 1:2, 3). Или шај ка трудине тут те молине тут поредовно хем похор. Шај ка дикхе кај ваљани те сикаве побари самоконтрола аѓаар со ка пазине сави забава биринеа или сар користинеа тло време (Еф. 5:15, 16). Кеда о Јехова ка дикхел кобор бут трудинеа тут те шај те напредујне ов ка овел бут бахтало.

17. Сар ка осетине тут ако поможинеа е јаверенге?

¹⁷ Шај те ове позрело христијани кеда поможинеа е јаверенге. О Исус вакерѓа: „Повише  иси бахталипе кеда дела пе него кеда лела пе“ (Дела 20:35). Ка ове бут бахтало ако користинеа тло време хем тли сила те шај те поможине е јаверенге. На пример, шај те чхиве туке цел те поможине е попхуренге хем околенге сој насвале. Шај те пазарине ленге или те поможине ленге те сикљовен сар те користинен пле електронска уредија. Ако сиан пхрал, чхив туке цел те ове слуга-помошнико те шај те поможине е пхраленге хем е пхењенге ки побари мера (Фил. 2:4). Ту исто аѓаар сикавеа кај мангеа е јавере да манушен аѓаар со проповединеа ленге о хабери башо Царство (Мат. 9:36, 37). Ако шај, чхив туке цел те почмине е полновремено службаја.

18. Сар шај и полновремено служба те поможинел туке те напредујне?

¹⁸ И полновремено служба шај те дел тут бут прилике духовно те напредујне. Ако сиан пионери, шај те овел тут прилика те џа ки Школа башо полновремена објавителија, те служине ко Бетел или ки изградба ко теократска објектија. И Кејтлин, јекх терни пионерка вакерела: „Адава со џава сине ки служба искусна пхраленцар хем пхењенцар бут поможинѓа манге духовно те напредујнав откеда крстинѓум ман. Ленгоро пример охрабринѓа ман похор те проучинав и Библија хем те овав пошукар ки служба“.

19. Саве берекетија ка овен тут џикоте понадари да духовно напредујнеа?

¹⁹ Џикоте понадари да духовно напредујнеа ка овен тут бут берекетија. Нане те џал то тернипе ко нешто со на врединела (1. Јов. 2:17). Адалеске со нане те ане лошна одлуке, нане те циде муке. Наместо адава, ка ове успешно хем бахтало (Изр. 16:3). Тло шукар пример ка охрабринел хем е тернен хем е попхурен (1. Тим. 4:12). А сој најважно, ка овел тут мир хем ка ове задоволно адалеске со кереа е Јеховаскири волја хем сиан леа паше (Изр. 23:15, 16).