• „Секова пути кеда мло ром дикхела сине порнографија осетинава ман сине сар те пхене керела неморал“

• „Осетинава ман сине кај сиум понижими, кај на сиум привлечно хем кај на врединава“

• „Нашти сине никасаја те керав лафи башо адава, адалеске икерава сине адаја бари дукх ки манде“

• „Осетинава ман сине сар те пхене о Јехова на грижинела пе манге“

Таро акала изјаве дикхаја кобор баре муке цидела и ромни кеда лакоро ром дикхела порнографија. А ако ов керѓа адава гаравиндор, хем адава масеконцар или бершенцар, шај мислинела кај нашти те овел ла више доверба ки лесте. Јекх ромни вакерѓа: „Пучава ман сине дали чаче џанава кој тано мо ром? Дали иси јавера да буќа со гаравела лен мандар?“

Акаја статија тани башо ромња коленгере рома дикхена порнографија. a Ки лате тане објасниме библиска начелија кола со шај те ден лен утеха, те уверинел лен кај о Јехова грижинела пе ленге хем те поможинен лен ко емоционално хем духовно поглед. b

Иако нашти те контролирине са со керела то ром, сепак иси несаве буќа со шај те кере те шај те тикњаре тли дукх хем те овел тут андруно мир. Те дикха о следна предлогија.

Ма кривин коркори тут. Јекх ромни шај те мислинел кај ој тани криво адалеске со лакоро ром дикхела порнографија. И Алиса c мислинѓа песке кај нане доволно привлечно пе ромеске. Ој пучела пе сине: „Соске мо ром мангела те дикхел јавере џувлен наместо манде“? Несаве ромња кривинена коркори песте соске мислинена кај ола анѓе и ситуација те овел полошно. И Даниела вакерела: „Дикхава сине ки манде сар адаја со уништинела пло брако себепи со нашти сине контролиринава мли холи“.

Ако ту да осетинеа тут аѓаар, ов уверими кај о Јехова на кривинела тут башо те ромескере постапке. Ко Јаков 1:14 пишинела: „Секова јекх тано искушимо аѓаар со цидела ле хем ховавела ле лескири желба“ (Рим. 14:12; Фил. 2:12). Наместо те кривинел тут, о Јехова ценинела со сиан леске верно (2. Лет. 16:9).

 Исто аѓаар шај ка поможинел туке адава со ка хаљове кај адава со то ром дикхела порнографија на значинела кај ту на сиан привлечно. Несаве експертија кола со керела лафи баши акаја тема вакерена кај и порнографија керела те овел тут сексуална фантазие кола со нане реална хем возможно те керел јекх ромни.

Ма секирин тут претерано. И Кетрин вакерела кај нашти сине ко ништо јавер те размислинел освен ко адава кај лакоро ром дикхела порнографија. И Франческа вакерела: „На астарела ман тхан кеда на џанава кај тано мо ром. Цело диве сиум ко стрес“. Јавера ромња вакерена кај осетинена бари лаџ кеда тане заедно пхраленцар хем пхењенцар кола со шај џанена о проблеми со иси ленгере ромен. А јавера признајнена кај осетинена пе коркори адалеске со мислинена кај никој нашти те хаљол ленгири ситуација.

Асавке чувствија тане нормална. Ама ако цело време размислинеа башо акала буќа адава шај те вознемиринел тут панда повише. Наместо те кере адава, пробин те концентририне тут ко тло амалипе е Јеховаја. Ако кереа адава, сар со накхела о време, ка овел тут повише сила те трпине (Пс. 62:2; Еф. 6:10).

Шај ка поможинел тут адава со ка читине несаве библиска извештаија башо ромња со сине лен слична проблемија хем кола со родинѓе утеха таро Јехова. Ов на решинѓа секогаш ленгере проблемија ама денѓа лен мир. На пример, и Ана баши пли ситуација сине бут вознемирими. Ама откеда молинѓа пе е Јеховаске ој осетинѓа андруно мир, иако панда на џанља сар о Јехова ка решинел лакоро проблеми (1. Сам. 1:10, 12, 18; 2. Кор. 1:3, 4).

Роде помош таро старешине. Ола шај те овен „сар тхан гарајбаске тари бавлал, сар заштита тари бура“ (Иса. 32:2). Ола шај чак те препорачинен туке несаве пхења колаја со шај те кере лафи хем која со шај те утешинел тут (Изр. 17:17).

Дали шај те поможине те ромеске те чхинавел те дикхел порнографија? Шај оја ама шај хем на. И Библија истакнинела кај ако мангаја те решина несаво проблеми или мангаја те победина несаве моќно душмане тегани дуј тане пошукар таро јекх (Проп. 4:9-12). Несаве испитувања сикавена кај иси бут шукар резултатија кеда о ром хем и ромни заедно соработинена о ром те на овел више зависно тари порнографија хем аѓаар палем те овел лен доверба ко пумаро брако.

Џанѓола пе, бут тано важно дали то ром чаче  мангела те трудинел пе те чхинавел те дикхел порнографија. Дали таро вило молинѓа е Јехова те дел ле сила? Хем дали родинѓа помош таро старешине? (2. Кор. 4:7; Јак. 5:14, 15). Дали керѓа нешто со ка поможинел леске те на овел ко искушение те дикхел порнографија? На пример, дали чхивѓа песке границе кеда хем сар ка користинел пле електронска уредија, хем дали избегинела ризична ситуацие? (Изр. 27:12). Дали прифатинела тли помош хем тано чаче искрено туја? Ако оја, веројатно ка шај те поможине леске.

Сар? Те дикха јекх пример. И Фелиција женинѓа пе е Етанеа кова со таро пло тикнипе уло зависно тари порнографија. Ој поможинѓа леске слободно те керел лаја лафи кеда ка авел леске желба те дикхел порнографија. О Етан вакерела: „Сиум искрено ме ромњаја хем керава лаја слободно лафи. А ој љубезно поможинела ман те чхивав манге границе хем редовно пучела ман дали успејнава те икерав ман ки ленде. Ој исто аѓаар поможинела ман те блокиринав несаве странице таро интернет“. Џанѓола пе, е Фелицијаке нане са јекх со о Етан мангела те дикхел порнографија. Ама ој вакерела: „Свесно сиум кај мли холи хем мли дукх нане те поможинен леске те ослободинел пе тари адаја страшно зависност. Откеда кераја лафи башо лескере предизвикија, ов тано спремно те поможинел манге те накхавав мли дукх“.

Асавке разговорија поможинена е ромеске те чхинавел те дикхел порнографија. Ама исто аѓаар поможинела хем е ромњаке палем те верујнел леске. Уствари, ако о ром отворено вакерела пле ромњаке саве желбе иси ле, кај џала хем со керела тегани машкар ленде нане те овен више нисаве тајне.

Со мислинеа дали шај ту да те поможине тле ромеске ко јекх слично начин? Ако оја, дали шај те читинен акаја статија хем те керен лафи баши лате? Лескири цел ваљани те овел те чхинавел те дикхел порнографија хем те керел буќа коленцар со ка иранел тли доверба ки лесте. Наместо те хољанел адалеске со мангеа те кере леа лафи башо акава проблеми, ов ваљани те трудинел пе те хаљовел сар осетинеа тут. Тли цел ваљани те овел те поможине ле те чхинавел те дикхел порнографија хем те де ле прилика те сикавел туке кај палем шај те овел тут доверба ки лесте. О солдуј мора те хаљовен со анела е манушен џи ко адава те дикхен порнографија хем сар шај те накхавен адава проблеми. d

Ако мислинеа кај ту хем то ром нашти керена лафи ко јекх смиримо начин, шај те замолинен несаве старешина колеа со о солдуј сиен слободна несаво време те бешел туменцар заедно хем те поможинел  туменге те керен лафи ко смиримо начин. Ов свесно кај чак ако то ром чхинавѓа те дикхел порнографија, сепак шај ка ваљани те накхел повише време те шај те овел тут палем доверба ки лесте. Ма откажин тут, трудин тут те приметине чак о тикне знакија со сикавена кај тумаро брако овела пошукар. Нека овел тут надеж кај сар со накхела о време, ако о солдуј сиен стрплива, тумаро брако палем ка овел зорало (Проп. 7:8; 1. Кор. 13:4).

Ако то ром несаво време чхинавѓа те дикхел порнографија а пало адава пело ко искушение палем те дикхел, дали адава значинела кај ов на каинела пе хем кај и ситуација никогаш нане те овел пошукар? На ваљани те значинел. Ако ов тано зависно тари порнографија шај ка ваљани цело пло живото те боринел пе адалеа. Чак ако некобор берша на дикхела порнографија, пало несаво време шај палем те иранел пе леске адаја навика. Те шај те на случинел пе леске адава ки иднина шај ка ваљани те овел построго пеа хем те ачхол аѓаар, чак ако мислинела кај нане ле више проблеми порнографијаја (Изр. 28:14; Мат. 5:29; 1. Кор. 10:12). Ов ка ваљани целосно те менинел пло начин сар размислинела хем те сикљовел те мрзинел о лошнипе, коте сој вклучимо и порнографија хем са о јавера нечиста постапке сар на пример те мастурбиринел пе (Еф. 4:23; Пс. 97:10; Рим. 12:9). Дали тано спремно те дел пестар са? Ако оја, тегани лескири ситуација шај те овел пошукар. e

Ама со ако то ром на мангела те боринел пе пле проблемеа? Тегани нормално тано те осетине тут разочарими, хољами хем изневерими. Мукх о буќа е Јеховаске ко васта соске ов ка поможинел туке те овел тут андруно мир (1. Пет. 5:7). Исто аѓаар, продолжин те ове попаше е Јеховаја аѓаар со ка молине тут, ка проучине и Библија хем ка размислине баши адава со проучинеа. Џикоте кереа адава, ов уверими кај о Јехова да ка овел туја паше. Сар со пишинела ко Исаија 57:15 ов живинела околенцар сој „пхаге вилеа хем кола сој обесхрабриме“ хем мангела те поможинел ленге те иранен пли радост. Продолжин те служине е Јеховаске најшукар со шај, роде помош е старешинендар хем ма нашав тли надеж кај јекх диве то ром шај ка менинел пе (Рим. 2:4; 2. Пет. 3:9).