1. Соске о пророко о Даниел мукхља баро впечаток е Вавилонцонге?

 О ПРОРОКО о Даниел сине терно кеда о Вавилонција леле ле сар робо хем ингарѓе ле дур таро Ерусалим. Ама иако о Даниел сине терно ов мукхља баро впечаток е вавилонско службениконге. Ола „дикхле адава со дикхела пе јакхенцар“ — приметинѓе кај о Даниел тано шужо хем кај авела тари јекх важно фамилија (1. Сам. 16:7). Адалеске ола обучинѓе ле те шај ов покасно те служинел ки палата (Дан. 1:3, 4, 6).

2. Сар дикхела сине о Јехова ко Даниел? (Езекиел 14:14).

² О Јехова мангља е Даниеле, ама на башо лескоро изглед или адалеске со служинела сине ки палата, него башо адава саво мануш сине. Уствари, кеда о Јехова вакерѓа кај о Даниел тано сар о Ное хем о Јов, ле веројатно сине ле околу 20 берш. Значи, иако о Даниел сине бут терно о Јехова ки лесте дикхела сине исто добором праведно сар ко Ное хем ко Јов кола со бершенцар верно служинѓе леске. (1. Мој. 5:32; 6:9, 10; Јов 42:16, 17; читин Езекиел 14:14.) О Јехова понадари да мангела сине е Даниеле ко цело лескоро живото (Дан. 10:11, 19).

3. Со ка дикха ки акаја статија?

³ Ки акаја статија ка дикха дуј таро е Даниелескере особине кола со керѓе ле скапоцено англо е Јеховаскере јакхја. Прво, ка дикха ко кола ситуацие сикавѓа акала особине. Пало адава, ка дикха со поможинѓа е Даниелеске те развинел лен. А ко крајо ка дикха сар шај те џа пало лескоро пример. Иако акаја статија тани керди е терненге, сарине амен шај те сикљова таро е Даниелескоро пример.

4. Сар сикавѓа о Даниел храброст? Вакер пример.

⁴ О храбра мануша шај те даран, ама ола на дозволинена адаја дар те чхинавел лен те керен адава сој исправно. Иако о Даниел сине терно ов сине бут храбро. Те размислина башо дуј прилике коленде со сикавѓа храброст. И прво сине отприлика  околу дуј берш откеда о Вавилонција уништинѓе о Ерусалим. О вавилонско цари о Навуходоносор дикхља јекх страшно суно башо јекх баро кипи. Ов заканинѓа пе кај ка мударел са е мудра манушен, машкар коленде со сине хем о Даниел, ако на вакерена леске саво суно дикхља хем со значинела адава (Дан. 2:3-5). О Даниел мора сине те керел нешто одма иначе ка овен сине мударде бут мануша. Ов гело ко цари хем молинѓа ле те дел ле време те шај те вакерел леске со значинела о суно (Дан. 2:16). А башо адава ваљанѓа леске храброст хем вера. Соске? Ки Библија нигде на пишинела кај о Даниел англедер објаснинѓа со значинела несаво суно. Ов замолинѓа пле амален е Седрахо, е Мисахо хем е Авденаго b „те молинен баши милост е Девле сој ко небо баши адаја тајна“ (Дан. 2:18). О Јехова одговоринѓа ко ленгере молитве. Адалеске со о Јехова поможинѓа е Даниелеске, ов шај сине те објаснинел е царескоро суно хем аѓаар о Даниел хем лескере амала ачхиле џивде.

5. Ки која јавер прилика о Даниел сикавѓа храброст?

⁵ Пало несаво време откеда о Даниел објаснинѓа со значинела о суно башо баро кипи, лескири храброст панда јекх пути сине чхивди ко испит. О Навуходоносор дикхља панда јекх страшно суно. Акава пути ко суно дикхља јекх баро каш. О Даниел храбро вакерѓа леске со значинела о суно, ов чак вакерѓа леске кај ка мукхел ле и годи хем кај несаво време нане те овел цари (Дан. 4:25). О цари шај сине те мислинел песке кај о Даниел бунинела пе против лесте хем локхе шај сине те нарединел те мударен ле. Сепак, о Даниел сикавѓа храброст хем објаснинѓа леске со значинела о суно.

6. Со веројатно поможинѓа е Даниелеске те овел храбро?

⁶ Со веројатно поможинѓа е Даниелеске те овел храбро ко цело пло живото? Џикоте сине тикно, о Даниел сигурно сиклило бут таро пример пле дајакоро хем пле дадескоро. Ола сигурно икерѓе пе ко упатствија со денѓа о Јехова е израелско родителенге хем сикавѓе пумаре чхаве башо е Девлескоро закони (5. Мој. 6:6-9). О Даниел на џанела сине само о основна буќа таро Закони сар со сине о Деш заповедија, него исто аѓаар џанела сине бут деталија таро Закони сар на пример,  со смејнена а со на смејнена те хан c (3. Мој. 11:4-8; Дан. 1:8, 11-13). Ов исто аѓаар џанела сине и историја е Девлескере народоскири хем со случинѓа пе ленцар кеда ола на сине послушна ко е Јеховаскере мерилија (Дан. 9:10, 11). Са адава со доживинѓа о Даниел ко пло живото уверинѓа ле кај бизи разлика со ка случинел пе о Јехова хем лескере моќна ангелија ка поможинен ле (Дан. 2:19-24; 10:12, 18, 19).

7. Со јавер поможинѓа е Даниелеске те овел храбро? (Дикх хем и слика.)

⁷ О Даниел проучинела сине адава со пишинѓе о пророкија, машкар коленде сој хем о пророштво таро Еремија. Таро адава со проучинѓа, о Даниел покасно халило кај панда хари о Евреија со сине бершенцар ко Вавилон ка овен ослободиме таро ропство (Дан. 9:2). Адава со дикхља сар исполнинена пе о пророштвија, сигурно бајрарѓа е Даниелескири доверба ко Јехова. А околен со иси лен бари доверба ко Девел шај те сикавен бари храброст. (Споредин Римјања 8:31, 32, 37-39.) А сој најважно, о Даниел бут пути молинела пе сине пле небесно Дадеске (Дан. 6:10). Ов признајнела сине леске пле гревија хем вакерела леске сине сар осетинела пе. А исто аѓаар, родела лестар сине помош (Дан. 9:4, 5, 19). О Даниел да сине мануш сар аменде, ов да на бијандило храбро него развинѓа акаја особина соске проучинѓа, молинѓа пе хем сине ле доверба ко Јехова.

8. Сар шај те развина храброст?

⁸ Со ваљани те кера те шај те ова храбра? Амаре родителија шај те поттикнинен амен те ова храбра, ама ола нашти те пренесинен аменге акаја особина сар ка пхене тани несаво фамилијарно наследство. Кеда трудинаја амен те развина храброст, адава тано сар ка пхене сикљоваја неви вештина. Јекх начин сар шај те ове шукар ки несави вештина тано аѓаар со внимателно ка дикхе со керела о мајстори хем пало адава ту да ка пробине те кере о исто. Слично, амен сикљоваја те ова храбра аѓаар со внимателно дикхаја сар о јавера сикавена акаја особина хем пало адава трудинаја амен те кера о исто. Значи, со сиклилем таро Даниел? Исто сар лесте, амен да ваљани шукар те пенџара е Девлескоро Лафи. Амен ваљани те ова паше е Јеховаја аѓаар со ка молина амен леске често хем ка вакера леске сар осетинаја амен. Исто аѓаар, ваљани те овел амен доверба ки лесте аѓаар со ка ова увериме кај ов секогаш ка овел узи аменде. Тегани кеда амари вера ка овел испитими, ка ова храбра.

9. Сар користинела аменге адава со сием храбра?

⁹ Кеда сием храбра адава ка користинел аменге ко повише начинија. Размислин башо Бен тари Германија. Ки школа коте со џала сине ов сарине верујнена сине ки еволуција хем мислинена сине кај о библиско извештај башо створибе тано парамис. Јекх диве сине ле прилика англо цело класи те објаснинел соске верујнела кај о живото тано створимо. Тегани ов храбро објаснинѓа пло верување. Саво сине о резултати? О Бен вакерела: „Мло наставнико внимателно шунела сине хем леља те керел копие таро материјали со користинѓум хем пало адава денѓа секоле ученикоске копија таро адава материјали“. Сар реагиринѓе е Бенескере соученикија? Ов вакерела: „Бут џене сине спремна те шунен хем вакерѓе манге кај поштујнена ман башо адава со керѓум“. Сар со дикхела пе таро е Бенескоро искуство, о јавера бут пути поштујнена околен со сикавена храброст. Исто аѓаар,  ола шај те поможинен околенге сој искрена те запознајнен е Јехова. Значи, иси амен шукар причине соске ваљани те развина храброст.

10. Сој тани и верност?

¹⁰ О хебрејско лафи сој преведимо ки Библија сар „верност“ или „верно мангипе“ бут пути користинела пе те шај те опишинел пе кобор баро мангипе иси е Девле спрема пле слуге. О исто лафи користинела пе те шај те сикавел пе саво мангипе иси машкар е Девлескере слуге (2. Сам. 9:6, 7). Сар со накхела о време амари верност шај те овел панда посилно. Те дикха сар е Даниелескири верност ули панда посилно.

11. Сар сине испитими е Даниелескири вера кеда пхурило? (Дикх и слика тари насловно страна.)

¹¹ Е Даниелескири верност спрема о Јехова сине испитими ко бут ситуацие ко лескоро живото. Ама јекх таро најбаре испитија со сине ле ко живото случинѓа пе кеда сине ле повише таро 90 берш. Ко адава време о Вавилон сине освојмо таро Медијција хем Персијција хем цари сине о Дариј. Е царескере службеникија на мангена сине е Даниеле хем на поштујнена сине лескере Девле. Адалеске керѓе плани те мударен е Даниеле. Ола убединѓе е царе те потпишинел јекх закони колеа со ка дикхел пе дали о Даниел ка ачхол верно е цареске или пле Девлеске. Са со ваљани сине о Даниел те керел тано те на молинел пе е Јеховаске 30 диве те шај те докажинел кај тано верно е цареске сар са о јавера. О Даниел одлучинѓа те ачхол верно е Јеховаске, адалеске сине фрдимо ки дупка пхерди лавенцар. Ама, о Јехова наградинѓа е Даниелескири верност аѓаар со спасинѓа ле таро лавија (Дан. 6:12-15, 20-22). Сар шај амен да те ачхова верна е Јеховаске исто сар о Даниел?

12. Со поможинѓа е Даниелеске секогаш те ачхол верно е Јеховаске?

¹² О баро мангипе спрема о Јехова поттикнинела амен те ачхова леске верна. О Даниел ачхило цело пло живото верно е Јеховаске адалеске со таро вило мангела ле сине. О Даниел сигурно развинѓа акала особине соске бут размислинела сине башо е Јеховаскере особине хем башо начин сар ов сикавела лен сине (Дан. 9:4). Исто аѓаар, о Даниел сине благодарно башо са о буќа со керѓа о Јехова пле народоске хем леске (Дан. 2:20-23; 9:15, 16).

13. а) Ко кола начинија тани испитими амаре терненгири вера? Вакер пример. (Дикх хем и слика.) б) Сар сој сикавдо ко видеоклипи, сар ка одговорине ако некој пучела тут дали е Јеховаскере сведокија поддржинена околен со биринена те живинен сар хомосексуалција?

 ¹³ Исто сар о Даниел, амаре терне да тане опколиме таро мануша кола со на поштујнена е Јехова хем лескере мерилија. Асавке мануша шај на мангена околен со вакерена кај мангена е Девле. Несаве чак малтретиринена амаре тернен те шај те на ачховен верна е Јеховаске. На пример, приметин со случинѓа пе јекхе терне пхралеске тари Австралија кова со викинела пе Грејми. Кеда сине ки средно школа сине ле јекх пхари ситуација. И наставничка пучља цело класи сар ка реагиринен ако јекх таро ленгере амала признајнела кај тано хомосексуалцо. Ој вакерѓа ленге са окола со поддржинена пле амале кова со биринѓа те овел хомосексуалцо те терѓон тари јекх страна тари училница, а окола со на поддржинена ле те терѓон тари јавер страна. О Грејми вакерела: „Цело класи гело тари страна која со поддржинела асавко живото освен ме хем панда јекх Сведоко“. Тегани и ситуација ули панда попхари хем о Грејми мора сине те сикавел дали ка ачхол верно е Јеховаске. О Грејми вакерела: „Џи ко крајо таро часи о јавера соученикија па чак и наставничка асана аменге сине хем вреџинена амен сине. Денѓум са мандар те шај ко јекх смирено хем разумно начин те бранинав мли вера ама ола на мангле те шунен нијекх лафи со вакерава сине“. Сар осетинѓа пе о Грејми? Ов вакерела: „На сине манге са јекх адава со мле соученикија нападинѓе ман ама сиум сине бут радосно со шај сине те бранинав мли вера“. d

14. Кова тано јекх начин сар шај те ова панда поодлучна те ачхова верна е Јеховаске?

¹⁴ Ако амен да исто сар о Даниел иси амен баро мангипе спрема о Јехова, тегани ка ова одлучна те ачхова леске верна. Амаро мангипе спрема о Јехова шај те бајрол са повише хем повише ако сикљоваја нешто башо лескере особине. На пример, шај те проучина башо буќа со створинѓа (Рим. 1:20). Ако мангеа панда повише те бајраре тло мангипе спрема о Јехова хем те поштујне ле, шај те читине о кратка статие тари рубрика „Случајно или создадено“ или те дикхе о видеоклипија. Исто аѓаар шај те дикхе и брошура Дали животот е Божје дело? хем и брошура Котар авела о живото — панџ пучиба коленге со ваљани одговор (ки српско чхиб). Приметин со вакерѓа башо акала публикацие јекх терни пхен тари Данска со викинела пе Естер: „Акала брошуре тане бут шуже, адатхе о буќа тане објасниме ко бут логично начин. Ола на вакерена туке ко со те верујне. Ки ленде шај те аракхе доказија хем аѓаар коркори те ане одлуке“. О Бен кова со сине спомнимо англедер вакерела: „Акала публикацие бут керѓе зорали мли вера. Преку ленде уверинѓум ман кај о Девел керѓа о живото“. Откеда ка проучине акала брошуре, веројатно ту да ка сложине тут адалеа со вакерела и Библија: „Моќно Јехова, ту сиан амаро Девел хем заслужинеа сарине те славинен тут хем те сикавен туке чест, соске ту керѓан са о буќа“ (Отк. 4:11). e

15. Кова тано панда јекх начин сар шај те ова панда попаше е Јеховаја?

¹⁵ Јавер начин сар шај те бајраре тло мангипе башо Јехова тано аѓаар со шукар ка проучине о живото лескере Чхавескоро е Исусескоро. Јекх терни пхен тари Германија со викинела пе Самира керѓа баш акава. Ој вакерела: „Адава со проучинѓум башо Исус керѓа пошукар те запознајнав е Јехова“. Кеда сине  тикни сине лаке пхаро те замислинел песке е Јехова сар личност коле со иси ле чувствија. Ама на сине лаке пхаро те замислинел песке е Исусе сар личност. Ој понадари вакерела: „Свиџинела пе манге со о Исус сине чачутно амал хем мангела сине е чхавен“. Со повише сикљовела сине башо Исус добором повише овела сине паше е Јеховаја. Соске? Ој вакерела: „Сар со накхела сине о време халиљум кај о Исус совршено џала пало пример пле Дадескоро, ола тане бут слична. Халиљум кај акаја сине јекх таро причине соске о Јехова бичхалѓа е Исусе ки пхув — те шај о мануша пошукар те запознајнен е Јехова“ (Јован 14:9). Ако мангеа те ове панда попаше е Јеховаја, одвојн туке време те сикљове со повише буќа башо Исус. Аѓаар, ка бајрол повише тло мангипе башо Јехова ама хем ка ове одлучно те ачхове леске верно.

16. Сар ка користинел аменге адава со ка ачхова верна е Јеховаске? (Псалм 18:25; Михеј 6:8).

¹⁶ Окола сој верна обично иси лен паше амала хем адала амалипа трајнена (Рут 1:14-17). А окола сој верна е Јеховаске иси лен шукар причине те осетинен андруно мир. Соске? Адалеске со о Јехова ветинела кај ка овел верно околенцар сој леске верна. (Читин Псалм 18:25; Михеј 6:8.) Размислин башо акава. Иако сием бут тикне ки споредба амаре Севишно Створителеа ов ветинела кај секогаш ка мангел амен! А кеда иси амен асавко паше амалипе е Јеховаја тегани нисаво проблеми, нијекх противнико, па чак ни о мерибе, нашти те одвојнел амен лестар (Дан. 12:13; Лука 20:37, 38; Рим. 8:38, 39). Чаче тано бут важно те џа пало е Даниелескоро пример хем те ачхова верна е Јеховаске!

17-18. Со јавер шај те сикљова таро Даниел?

¹⁷ Ки акаја статија дикхлем само дуј особине таро Даниел. Ама лестар шај панда бут те сикљова. На пример, о Јехова денѓа е Даниеле некобор визие хем суне, а денѓа ле хем способност те објаснинел со значинена о пророштвија. Бут таро адала пророштвија више исполнинѓе пе. А ко јавера иси деталија со ка случинен пе ки иднина хем кола со ка влијајнен упро секова јекх мануш ки пхув.

¹⁸ Ки следно статија, ка дикха дуј пророштвија кола со пишинѓа лен о Даниел. Адава со ка хаљова со значинена ка поможинел сариненге аменге, хем терненге хем пхуренге, те ана мудра одлуке панда авдиве. Исто аѓаар адала пророштвија ка бајрарен амари храброст хем амари одлучност те ачхова верна е Јеховаске хем ка спреминен амен башо адава со панда хари ваљани те случинел пе.