1. Сар влијајнела упри аменде адава со размислинаја башо е Јеховаскоро ветување башо вечно живото?

 О ЈЕХОВА ветинела кај окола со шунена ле ка добинен „вечно живото“ (Рим. 6:23). Кеда размислинаја башо адава со дела амен о Јехова амаро мангипе спрема лесте бајрола повише. Размислин само, амаро небесно Дад добором бут мангела амен со дела амен вечно живото те шај те на одвојна амен лестар.

2. Сар поможинела амен и надеж башо вечно живото?

² Е Девлескоро ветување башо вечно живото поможинела амен те истрајна ко неволје. Чак кеда амаре душмања заканинена пе аменге кај ка мударен амен, нане те чхинава те служина е Јеховаске. Соске? Адалеске со џанаја кај ако ачховаја верна е Јеховаске џи ко амаро мерибе, ов ка воскреснинел амен хем ка дел амен и надеж кај никогаш нане те мера (Јован 5:28, 29; 1. Кор. 15:55-58; Евр. 2:15). Соске шај те ова сигурна кај шај те живина вечно? Те дикха некобор причине.

3. Соске шај те ова сигурна кај о Јехова шај те дел амен вечно живото? (Псалм 102:12, 24, 27).

³ Амен џанаја кај о Јехова шај те дел амен вечно живото соске лестар авела о живото хем ов живинела засекогаш (Пс. 36:9). Те дикха некобор библиска стихија со докажинена кај о Јехова отсекогаш постојнѓа хем секогаш ка постојнел. Ко Псалм 90:2 пишинела кај о Јехова „постојнела отсекогаш засекогаш“. Нешто слично пишинела ко Псалм 102. (Читин Псалм 102:12, 24, 27.) А о пророко о Авакум  пишинѓа башо амаро небесно Дад: „На постојнеа ли отсекогаш, Јехова? Девла, ту кова со сиан свето, ту на мереа“ (Авак. 1:12).

4. Дали ваљани те секирина амен ако на хаљоваја кај о Јехова отсекогаш постојнѓа? Објаснин.

⁴ Дали туке пхаро те хаљове кај о Јехова постојнѓа „отсекогаш“? (Иса. 40:28). Буте џененге тано пхаро те хаљовен акава. О Елиу башо Девел вакерѓа: „О број таро лескере берша нашти те хаљовел пе“ (Јов 36:26). Ама, само адалеске со на хаљоваја нешто на значинела кај нане аѓаар. На пример, иако шај на хаљоваја шукар сар функциониринела и струја, дали адава значинела кај ој на постојнела? На. Слично, амен шај никогаш нане те хаљова целосно сар о Јехова отсекогаш постојнела сине хем ка постојнел засекогаш. Ама акава на значинела кај нане аѓаар. О чачипе башо Створители на зависинела таро адава со шај те хаљова, а со на (Рим. 11:33-36). Ов постојнѓа англедер са сој ко универзум, коте сој вклучимо о кхам хем о ѕвезде. Шај те ова сигурна кај о Јехова тано адава со „керѓа и Пхув пле силаја“. Хем ов постојнѓа англедер „те ширинел о небо“ (Ерем. 51:15; Дела 17:24). Која тани јавер причина соске шај те ова сигурна кај шај те живина вечно?

5. Сави надеж сине е прва манушен?

⁵ Са о џивде буќа со створинѓа лен о Јехова иси лен крајо, ама е манушен на керѓа лен аѓаар. Ов денѓа лен и посебно прилика никогаш те на мерен. Сепак, о Јехова предупрединѓа е Адаме: „Таро каш башо пенџарибе сој шукар хем сој лошно, на смејнеа те ха соске ко адава диве кеда ка ха лестар сигурно ка мере“ (1. Мој. 2:17). О Адам хем и Ева никогаш на би мерена сине те шунен сине е Јехова. Те на грешинен сине, пало несаво време најверојатно о Јехова ка дозволинел ленге сине те хан таро „каш е животоскоро“. Адава ка сикавел ленге сине кај о Јехова денѓа лен „вечно живото“ b (1. Мој. 3:22).

6-7. а) Со јавер сикавела кај о мануша нане створиме те мерен? б) Со би мангеа те кере ко нево свето? (Дикх и слика.)

⁶ Ко теко таро амаро живото амари годи кхедела бут информацие, ама интересно тано адава со несаве научникија аракхле доказија кај е гоѓа иси ла капацитети те кхедел бут повише информацие. Ко 2010 берш јекх списание објаснинѓа кај амари годи шај те кхедел отприлика трин милиоња саатија видео-материјали. А те шај те  дикха адава видео-материјали ка ваљани аменге 300 берша. Ама, акава на значинела кај нашти те примина панда бут повише информацие тари адаја бројка. Акава сикавела кај о Јехова керѓа амари годи те кхедел бут повише информацие таро адава со шај те кхеда лен башо 70 или 80 берш (Пс. 90:10).

⁷ О Јехова исто аѓаар створинѓа амен силно желбаја башо вечно живото. Башо мануша и Библија вакерела кај о Девел „чхивѓа и вечност ко ленгоро вило“ (Проп. 3:11). Адаја тани јекх причина соске ко мерибе дикхаја сар душмани (1. Кор. 15:26). Ако сием бут насвале, дали само бешаја хем аџикераја о диве кеда ка мера? На. Обично џаја ко доктори хем ако ваљани лаја несави терапија. Уствари, кераја са со шај те ачхова ко живото. Хем кеда некој со мангаја ле мерела, бизи разлика дали терно или пхуро, осетинаја бари дукх која со трајнела бут време (Јован 11:32, 33). Амаро Створители со мангела амен сигурно на би дела амен сине и желба башо вечно живото хем о капацитети те кхеда информацие ки цели вечност ако на сине ле намера о мануша те живинен вечно. Ама иси јавера да причине кола со сикавена кај амен шај те живина вечно. Акана те дикха сар е Јеховаскере постапке таро пурано време хем таро амаро време докажинена кај ов на менинѓа пли намера.

8. Спрема Исаија 55:11, ко со шај те ова сигурна баши е Јеховаскири намера аменцар?

⁸ Иако о Адам хем и Ева грешинѓе хем анѓе мерибе пумаре чхавенге, сепак о Јехова  на менинѓа пли намера. (Читин Исаија 55:11.) Ов понадари да мангела о верна мануша вечно те живинен. Шај те ова сигурна ко акава соске о Јехова вакерѓа хем керѓа буќа коленцар со сикавела кај ка исполнинел акаја намера.

9. Со ветинѓа о Девел? (Даниел 12:2, 13).

⁹ О Јехова ветинѓа кај ка воскреснинел е мулен хем кај ка дел лен прилика те живинен вечно (Дела 24:15; Тит 1:1, 2). О Јов сине сигурно кај о Јехова едвај аџикерела те воскреснинел околен со муле (Јов 14:14, 15). О пророко о Даниел џанља кај о мануша ка воскреснинен хем кај ка овел лен прилика те живинен вечно (Пс. 37:29; читин Даниел 12:2, 13). О Евреија ко е Исусескоро време исто аѓаар џанле кај о Јехова ка дел вечно живото пле верна слугенге (Лука 10:25; 18:18). О Исус бут пути керѓа лафи башо акава ветување хем лескоро Дад воскреснинѓа ле лично (Мат. 19:29; 22:31, 32; Лука 18:30; Јован 11:25).

10. Саво доказ дена амен о воскресенија таро пурано време? (Дикх и слика.)

¹⁰ Таро Јехова авела о живото хем ле иси ле и моќ те иранел е манушен ко живото. Ов денѓа е пророкоске е Илијаске моќ те воскреснинел е удовицакере чхаве тари Сарепта (1. Цар. 17:21-23). Покасно о Девел поможинѓа е пророкоске е Елисееске те воскреснинел јекхе Сунамкакере чхаве (2. Цар. 4:18-20, 34-37). Акала хем јавера воскресенија докажинена кај е Јехова иси ле моќ те иранел е манушен ко живото. Џикоте сине о Исус ки пхув ов сикавѓа кај лескоро Дад денѓа ле адаја моќ (Јован 11:23-25, 43, 44). Акана тано ко небо хем денди леске „цели власт... хем ко небо хем ки пхув“. Адалеске шај те исполнинел о ветување кај „сарине окола сој тане ко гробо“ ка уштен хем ка овел лен прилика те живинен вечно (Мат. 28:18; Јован 5:25-29).

11. Сар и откупнина дела амен прилика те живина вечно?

¹¹ Соске о Јехова мукхља лескоро Чхаво те овел мучимо хем те мерел? О Исус откринѓа која тани и причина кеда вакерѓа: „Соске о Девел добором бут мангља о свето со денѓа пле единствено бијаме Чхаве, те шај секој со верујнела ки лесте те на овел уништимо него вечно те живинел“ (Јован 3:16). О Девел дела амен прилика те добина вечно живото адалеа со денѓа пле Чхаве сар откупнина те учхарел амаре гревија (Мат. 20:28). О апостол Павле објаснинѓа акава важно дело тари е Девлескири намера кеда пишинѓа: „Адалеске со о мерибе авела преку о мануш, о воскресение да авела преку о мануш. Соске сар преку о Адам сарине со мерена, аѓаар преку о Христос сарине ка овен џивде“ (1. Кор. 15:21, 22).

12. Сар ка исполнинел о Јехова пли намера аменцар?

¹² О Исус сикавѓа пле следбеникон те молинен пе те авел о Царство хем те керел пе е Девлескири волја ки пхув (Мат. 6:9, 10). Јекх дело тари е Девлескири волја тани о мануша те живинен вечно ки пхув. Те шај те исполнинел адава, о Јехова чхивѓа пле Чхаве те овел Цари ко месијанско Царство. О Девел исто аѓаар кхедела 144.000 манушен тари пхув кола со заедно е Исусеа ка исполнинел лескири волја (Отк. 5:9, 10).

13. Со керела о Јехова авдиве хем со ваљани ту те кере?

¹³ О Јехова авдиве кхедела „баро мноштво“ хем сикавела ле те поддржинел лескоро Царство (Отк. 7:9, 10; Јак. 2:8). Иако авдиве ко свето нане јекхипе соске иси омраза хем војне, сепак окола таро баро мноштво бут трудинена пе те циден пестар  секоја омраза. Ола панда авдиве ко симболично начин керена пумаре мачија ко плугија (Мих. 4:3). Наместо те учествујнен ко војне, коте со бут џене мерена, ола поможинена е манушенге те аракхен о „чачутно живото“ аѓаар со вакерена ленге о чачипе башо Девел хем баши лескири намера (1. Тим. 6:19). Адалеске со поддржинена е Девлескере Царство шај иси лен притисок тари фамилија или иси лен финансиска проблемија, ама о Јехова секогаш дела лен адава со ваљани ленге (Мат. 6:25, 30-33; Лука 18:29, 30). Акала буќа сикавена аменге кај е Девлескоро Царство чаче постојнела хем кај понадари да ка исполнинел е Девлескири намера.

14-15. Сар ка исполнинел пе е Јеховаскоро ветување кај о мерибе ка овел уништимо засекогаш?

¹⁴ О Исус акана тано Цари ко небо хем ка исполнинел о ветување со денѓа ле о Јехова (2. Кор. 1:20). Таро 1914 берш, о Исус владинела машкар пле душмања (Пс. 110:1, 2). Панда хари ов хем окола со ка владинен заедно леа целосно ка уништинен е лошнон (Отк. 6:2).

¹⁵ Џикоте трајнена о милја берша коте со ка владинел о Исус, ов ка воскреснинел е мулен хем ка поможинел околенге сој послушна е Јеховаске те овен совршена. Пало последно испит, окола коленде со о Јехова  ка дикхел сар праведна „ка наслединен и пхув хем ка живинен вечно ки лате“ (Пс. 37:10, 11, 29). Тегани „сар последно душмани, о мерибе ка овел уништимо“ (1. Кор. 15:26).

16. Која ваљани те овел и најважно причина соске служинаја е Јеховаске?

¹⁶ Сар со дикхлем, амари надеж башо вечно живото темелинела пе ко е Девлескоро Лафи. Адаја надеж шај те поможинел аменге те ачхова верна ко акала пхаре последна диве. Ама, те шај те кера е Јеховаскири волја нане доволно само те овел амен желба башо вечно живото. И најважно причина соске ачховаја верна е Јеховаске хем е Исусеске тани адаја со бут мангаја лен (2. Кор. 5:14, 15). Адава мангипе поттикнинела амен те џа пало ленгоро пример хем те вакера е јаверенге и надеж со иси амен (Рим. 10:13-15). Ако сикљоваја те ова несебична хем дарежлива, тегани о Јехова ка мангел те ова лескере амала ки цели вечност (Евр. 13:16).

17. Сави одговорност иси амен? (Матеј 7:13, 14).

¹⁷ Дали ка ова машкар окола со ка добинен вечно живото? О Јехова дела амен адаја прилика, ама амендар зависинела дали ка ачхова ко друмо кова со ингарела џи ко вечно живото. (Читин Матеј 7:13, 14.) Саво ка овел о живото кеда ка живина вечно? О одговор башо акава пучибе ка дикха ки следно статија.