Дали внимателно читинѓан о броја тари Стражарско кула акале бершеске? Дикх дали шај те одговорине ко акала пучиба:

Сар ка ова наградиме ако одвојнаја аменге време те кера лафи е Јеховаја, те шуна ле хем те размислина баши лесте?

Ка шај те ане шукар одлуке, ка ове пошукар учители, тли вера ка овел позорали хем тло мангипе спрема о Јехова ка бајрол — (w22.01, стр. 30-31).

Сар ка поможинел аменге адава со ка овел амен доверба ко Јехова хем ко мануша касте со ов мукхља те предводинен?

Амен сикаваја кај иси амен доверба ко е Јеховаскоро водство аѓаар со шунаја о упатствија кола со добинаја лен преку и организација хем о старешине. Ки бари неволја ка ова спремна те ова послушна, чак кеда ка добина упатствија кола со шај те овен аменге чудна или нелогична — (w22.02, стр. 4-6).

Со мислинѓа о ангели кеда вакерѓа е Захаријаске башо „висако ко васта [е еврејско управителеске] е Зоровавелеске“? (Зах. 4:8-10)

И визија уверинѓе е Девлескере народо кај иако о нево храми изглединела сине бут скромно ов ка овел завршимо хем ка овел кердо аѓаар сар со мангела о Јехова — (w22.03, стр. 16-17).

Сар шај те ова пример ко керибе лафи? (1. Тим. 4:12)

Кераја љубезно лафи хем сикаваја поштовање е јаверенге ки служба, гиљаваја таро вило, редовно даја коментарија ко состанокија, вакераја о чачипе, охрабринаја е јаверен амаре лафенцар хем на оговоринаја — (w22.04, стр. 6-9).

Соске тано вакердо кај о каректеристике таро штар ѕверија сој спомниме ко Даниел 7 поглавје аракхљона ко јекх ѕверо сар сој вакердо ко Откровение 13:1, 2?

О ѕверо таро Откровение 13 поглавје на претставинела само јекхе влада или светско сила, сар сој о Рим. Акава ѕверо претставинела са е политичка силен кола со владинѓе е манушенцар ки цело историја џи акана — (w22.05, стр. 9).

Сар шај те сикава кај иси амен доверба ки е Јеховаскири правда?

Ако некој дукхавѓа амен или грешинѓа аменге, трудинаја амен те на икера холи хем мукхаја адаја бути е Јеховаске ко васта. Ов ка цидел секоја штета со керѓа о грево — (w22.06, стр.10-11).

Со на ваљани те бистрел јекх пхрал кеда молинела пе ко состанокија?

На ваљани преку и молитва те дел пе совет е собраниеске или известување. Посебно ко почеток таро состанок на ваљани те користинен пе „бут лафија“ (Мат. 6:7) — (w22.07, стр. 24-25).

Ко саво начин „окола со керѓе лошнипе“ ка воскреснинен судибаске? (Јован 5:29)

Ола нане те овен судиме ки негативно смисла башо буќа со керѓе лен англедер, него аѓаар со ка овен процениме или испитиме башо буќа со ка керен откеда ка овен воскресниме — (w22.09, стр. 18).

Саво важно поттик денѓа о пхрал Ратерфорд ко конгрес со икерѓа пе септември ко 1922 берш?

Ко јекх конгрес ко Седар Поинт (Охајо, САД) ов вакерѓа: „Дикхен, о Цари владинела! Туменге тани денди и задача те вакерен адава сариненге, адалеске објавинен, објавинен, објавинен е Царе хем лескоро Царство!“ — (w22.10, стр. 3-5).

Спрема Исаија 30 поглавје, ко кола трин начинија поможинела аменге о Девел радосно те истрајна?

Акава поглавје сикавела кај о Јехова поможинела аменге аѓаар со 1) внимателно шунела амен хем одговоринела ко амаре молитве, 2) водинела амен хем 3) наградинела амен акана хем ки иднина — (w22.11, стр. 9).

Котар џанаја кај о лафија таро Псалм 37:10, 11 хем 29 исполнинѓе пе ко пурано време хем ка исполнинен пе ки иднина?

Е Давидескере лафија сикавена саве берекетија сине е Израелцон, сар со сине лен џикоте владинела сине о Соломон. О Исус керѓа лафи башо рај со ка овел ки иднина кеда цитиринѓа о 11 стихо (Мат. 5:5; Лука 23:43) — (w22.12, стр. 8-10, 14).