Кеда о Јехова заповединѓа е манушенге те пхерен и пхув хем те владинен упри лате ов адалеа сикавѓа кај цело пхув пало несаво време ваљани сине те овел рај (1. Мој. 1:28). Окола со ка наслединен и пхув ваљани те керен о исто. И пхув ко почеток нане те овел рај соске и Еденско градина одамна на постојнела. Одма пало Армагедон ка овел амен бут бути соске бут тхана ка овен уништиме хем амен ка ваљани те чистина лен, а адава ка овел бут бари бути.

Акава сетинкерела амен кај е Израелцон сине лен бут бути те керен кеда иранѓе пе таро Вавилон соске ленгири пхув 70 берш на сине населими. Ама о Исаија пророкујнѓа кај о Јехова ка поможинел ленге те обновинен и пхув. Ко адава пророштво пишинела: „Ов ка керел лескири пустина те овел сар Еден хем лескоро пусто тхан сар е Јеховаскири градина“ (Иса. 51:3). О Израелција успејнѓе те обновинен и пхув. Слично, о Јехова ка поможинел са околенге со ка наслединен и пхув те керен ла рај. Хем ту панда акана шај те сикаве кај мангеа те учествујне ки адаја бари бути.

 Јекх начин сар шај те кере адава тано ако трудинеа тут те икере тло кхер хем тло дворо чисто хем уредно. Ту ваљани те кере адава бизи разлика дали те комшие керена адава или на. Исто аѓаар шај те поможине кеда чистинела пе хем одржинела пе и дворана хем и конгресно сала. Ако дозволинена тле околностија ту да шај те де молба те шај те поможине коте со сине несави природно катастрофа. Аѓаар ка сикаве кај сиан спремно те поможине ако иси потреба. Шај те сикљове несаве вештине кола со ка користине лен ако добинеа и награда те живине вечно ки пхув.

Одма одкеда воскреснинѓа е Јаирескере чхаја, о Исус вакерѓа ленге те ден ла нешто те хал (Мар. 5:42, 43). Сигурно е родителенге на сине пхаро те грижинен пе пумаре чхајаке кола со сине ла 12 берш. Ама размислин само кобор бут бути ка овел амен кеда о Исус ка исполнинел пло ветување кај „сарине окола сој тане ко гробо ка шунен е Девлескере Чхавескоро гласо хем ка икљон“ (Јован 5:28, 29). Иако и Библија на вакерела аменге са о деталија ама јасно тано кај околенге со ка воскреснинен ка ваљани хајбе, шеја хем тхан живибаске. Сар шај панда авдиве те сикаве кај сиан спремно те поможине? Аке некобор буќа баши коленде со шај те размислине.

Кеда ко собрание известинела пе кај ка овел тумен посета таро покраинско надгледнико дали пријавинеа тут те викине ле ко ручко? Ако несаво пхрал икљола таро Бетел соске добинела неви задача хем префрлимо тано ко тло собрание или ако несаво покраинско надгледнико завршинела пле патувачко службаја дали шај те поможине аѓаар со ка аракхе ленге тхан живибаске? Ако икерела пе регионално или специјално конгрес ко тхан коте со живинеа дали шај доброволно те поможине англедер или пало конгрес, или те доџакере е пхрален со авена таро јавера пхувја?

Спрема Дела 24:15 шај те очекујна кај милијарде мануша ка овен воскресниме. Бут џене лендар на сине лен прилика те запознајнен е Јехова џикоте сине џивде. Ама одкеда ка воскреснинен ка дел пе ленге панда јекх прилика башо адава. a О верна слуге е Девлескере ка поможинен ко поучибе е воскреснимен (Иса. 11:9). И Шарлот која со проповединѓа ки Европа, Јужно Америка хем Африка едвај аџикерела адава време. Ој радосно вакерела: „Едвај аџикерава те поучинав околен со ка воскреснинен. Кеда читинава баши некасте со живинѓа ко пурано време бут пути размислинава манге кобор појавер живото би овела ле сине те пенџарел сине е Јехова. Едвај аџикерава те вакерав околенге со ка воскреснинен башо Јехова хем башо адава кобор шукар живото ка овел лен ако служинена леске“.

Чак о верна слуге е Јеховаскере кола со живинѓе англедер о Исус те авел ки пхув, ка ваљани бут буќа те сикљовен. Замислин само кобор ка радујна амен хем која бари чест ка овел амен те објаснина е Даниелеске сар исполнинѓе пе о пророштвија кола со ов пишинѓа лен а на халило лен (Дан. 12:8). Или која бари чест ка овел амен те поможина е Рутаке хем е Ноеминаке те дознајнен кај ола сине дело тари фамилијарно лоза котар со ало о Месија. Кобор бут ка уживина те поучина е манушен таро цело свето хем нане те овен амен о проблемија таро авдисутно лошно свето.

Сар шај панда авдиве те сикаве кај сиан спремно те поучине околен со ка воскреснинен? Јекх начин тано аѓаар со ка трудине тут те ове пошукар ки служба хем редовно те проповедине (Мат. 24:14). Чак ако нашти џаја ки служба добором кобор со би мангеа адалеске со сиан попхуро или башо јавера причине, адава со ка де тло најшукар панда авдиве сикавела кај мангеа те поучине околен со ка воскреснинен.

Шукар тано те размислина башо акала важна пучиба: Дали чаче едвај аџикерава те наслединав и пхув? Дали едвај аџикерава те керав и пхув рај, те грижинав ман околенге со ка воскреснинен хем те поучинав лен? Шај те сикаве кај сиан спремно ако панда авдиве користинеа секоја прилика те учествујне ко задаче сој слична е задаченцар со ваљани те кере лен ко рај.