На. Адава со пишинѓа о Давид сине точно хем реално.

Те дикха со пишинѓа ко акава хем ко слична стихија: „Гиљаја ка фалинав тло анав засекогаш џикоте икерава мле заветија секова диве“. „Ка фалинав тут, о Јехова Девла, цело мле вилеа, ка славинав тло анав засекогаш“. „Ка фалинав тло анав ки цели вечност“ (Пс. 61:8; 86:12; 145:1, 2).

Кеда о Давид пишинѓа акала лафија на мангља те вакерел кај никогаш нане те мерел. Ов џанља кај о мануша мерена адалеске со наслединѓе о грево хем признајнѓа кај ов да тано грешнико (1. Мој. 3:3, 17-19; Пс. 51:4, 5). Сине свесно кај чак о верна мануша сар сој о Авраам, о Исак хем о Јаков муле хем кај ов да јекх диве ка мерел (Пс. 37:25; 39:4). Ама о лафија со аракхљона ко Псалм 61:8 сикавена е Давидескири желба хем одлучност те фалинел е Девле засекогаш, јавере лафенцар џикоте сине џивдо (Пс. 61:8; 2. Сам. 7:12).

Понекогаш о Давид пишинела сине башо пле лична искуствија. Адава шај те дикха ле таро наслов сој ко 18, 51 хем 52 Псалм. Исто аѓаар, адалеске со о Давид сине пастири, ко 23 Псалм опишинѓа е Јехова сар Пастири кова со водинела, освежинела хем заштитинела. Акава керѓа те мангел те служинел е Девлеске цело пло живото (Пс. 23:6).

Ама на ваљани те бистра кај о Јехова пле духоја водинѓа е Давиде те пишинел хем башо пле лична искуствија хем несаве пророштвија со ваљани сине те исполнинен пе ки иднина. На пример, ко Псалм 110 о Давид пишинѓа башо време кеда лескоро Господари ка бешел тари е Девлескири десно страна ко небо хем ка добинел бари моќ. Соске? Те шај те владинел машкар е Девлескере душмања хем „те анел осуда против о народија“ сој ки пхув. О Господари тано о Исус кова со сине о Месија хем ов ало таро Давид. Ов ка владинел таро небо хем ка овел „свештенико засекогаш“ (Пс. 110:1-6). О Исус потврдинѓа кај о пророштво со аракхљола ко Псалм 110 керела лафи баши лесте хем ка исполнинел пе ки иднина (Мат. 22:41-45).

Значи о Јехова водинѓа е Давиде те пишинел хем башо пло време хем баши иднина кеда ка овел воскреснимо хем ка шај радосно те фалинел е Јехова засекогаш. Акава поможинела аменге те хаљова кај о Псалм 37:10, 11 хем 29 иси ле дуј исполнувања. Акала стихија прво исполнинѓе пе ко пурано време башо Израелција хем ка исполнинен пе ки иднина кеда о Девел ка керел адава со ветинѓа. (Дикх о пасус 8 тари статија „Ту ка ове манцар ко рај“, со аракхљола ки акаја кула.)

О Псалм 61:8 хем јавера слична стихија сикавена кај о Давид мангља те фалинел е Јехова цело пло живото. Хем ола сикавена со ка керел о Давид кеда о Јехова ка воскреснинел ле.