1. Со вакерѓа о Исус кратко англедер те мерел јекхе криминалцоске со сине узи лесте? (Лука 23:39-43).

 О ИСУС хем о дуј криминалција со сине узи лесте сине ки бари дукх хем на ачхило лен панда бут време живибаске (Лука 23:32, 33). О солдуј вреџинѓе е Исусе хем адава сикавѓа кај на сине лескере следбеникија (Мат. 27:44; Мар. 15:32). Ама јекх лендар менинѓа пло стави. Ов вакерѓа: „Исус, сетин тут ки манде кеда ка ове Цари“. А о Исус одговоринѓа: „Чаче вакерава туке авдиве, ту ка ове манцар ко рај“. (Читин Лука 23:39-43.) Иако акава криминалцо шај шунѓа башо небесно Царство џикоте о Исус сине ки пхув хем проповединѓа адава, сепак ов на уло лескоро ученико. Хем о Исус никогаш на вакерѓа кај акава мануш ка овел ко Царство ко небо (Мат. 4:17). О Исус керѓа лафи башо рај со ка овел ки пхув. Соске шај те вакера адава?

2. Саве фактија иси амен со сикавена кај о криминалцо со каинѓа пе сине Евреи?

² О криминалцо со каинѓа пе веројатно сине Евреи. Ов вакерѓа е јавере криминалцоске: „Зарем на дараја таро Девел? Тут да иси тут и исто осуда!“ (Лука 23:40). О Евреија обожавинена сине јекхе девле, ама о мануша таро јавера нацие верујнена сине ко бут девела (2. Мој. 20:2, 3; 1. Кор. 8:5, 6). Те овен сине о криминалција таро јавера нацие тегани о пучибе би овела сине: „Зарем на дараја таро девела?“ Исто аѓаар о Исус на сине бичхалдо е манушенге таро јавера нацие него башо „бакхре со нашавдиле таро Израелско народо“ (Мат. 15:24). О Девел откринѓа е Израелцонге кај ов ка воскреснинел е мулен. О криминалцо со каинѓа пе веројатно џанља башо акава хем таро лескере лафија  шај те дикха кај претпоставинела сине кај о Јехова ка воскреснинел е Исусе те шај те владинел ко е Девлескоро Царство. Исто аѓаар, надинѓа пе кај о Девел ле да ка воскреснинел.

3. Ко со веројатно мислинѓа о криминалцо кеда о Исус керѓа лафи башо рај? Објаснин (1. Мојсеева 2:15).

³ Сар Евреи, о криминалцо со каинѓа пе сигурно џанља башо Адам хем и Ева хем башо рај коте со о Јехова чхивѓа лен. Значи кеда о Исус вакерѓа леске башо рај, о криминалцо веројатно мислинѓа ки јекх бут шужи градина акате ки пхув. (Читин 1. Мојсеева 2:15.)

4. Ко со ваљани те поттикнинен амен о лафија со вакерѓа лен о Исус е криминалцоске?

⁴ Адава со вакерѓа о Исус е криминалцоске ваљани те поттикнинел амен те размислина сар ка овел о живото ко рај. Уствари, шај бут те дознајна башо адава саво ка овел о живото ко рај таро време кеда владинѓа о цари о Соломон. И Библија вакерела кај о Исус тано побаро таро Соломон, адалеске шај те очекујна кај ов, заедно околенцар со ка владинен леа, ка керен и пхув бут шужо рај (Мат. 12:42). Џанѓола пе, о „јавера бакхре“ ваљани те манген те дознајнен со мора те керен те шај те живинен вечно ко рај (Јован 10:16).

5. Сар замислинеа туке о живото ко рај?

⁵ Со авела туке ки годи кеда размислинеа башо живото ко рај? Шај мислинеа ко јекх бут шужо парко сар и градина Еден (1. Мој. 2:7-9). Шај сетинеа тут ко пророштво сој пишимо ко Михеј кај секова јекх таро е Девлескоро народо ка бешел „тели пли дракх хем тели пли смоква“ (Мих. 4:3, 4). Шај исто аѓаар размислинеа башо стихија тари Библија коте со пишинела кај ка овел амен бут хајбаске (Пс. 72:16; Иса. 65:21, 22). Шај замислинеа тут ки јекх бут шужи градина сар бешеа ко астали пхердо шуже хајбаја. Шај замислинеа туке сар похари пхудела и балвал хем осетинеа о шужо мирис е лулугенгоро. Хем веројатно шунеа сар тли фамилија хем те амала, заедно околенцар со воскреснинѓе, асана хем уживинена ко бут шукар друштво. Акава нане само суно. Шај те ова сигурна кај са акала буќа ка овен чаче. Ама ко рај ка ваљани исто аѓаар те кера бути колате со ка уживина.

6. Со ка кера ко рај? (Дикх и слика.)

⁶ О Јехова створинѓа амен аѓаар те шај те уживина ки амари бути (Проп. 2:24). Посебно џикоте ка трајнен о милја берша ка овел амен бут бути. Околенге со ка преживинен и бари неволја хем е милиоња манушенге со ка воскреснинен ка ваљанен шеја, хајбе хем тхан живибаске. Адава значинела кај ка овел амен бут бути, ама адаја бути ка  керел амен радосна! Исто сар о Адам хем и Ева со одржинѓе и Еденско градина, аѓаар аменде да ка овел амен и чест те одржина о рај ки пхув. Исто аѓаар, замислин кобор ка уживина кеда ка сикава околен со ка воскреснинен башо Јехова хем лескири намера хем те поможина е верна слугенге со живинѓе англедер те авел о Исус ки пхув те сикљовен повише.

7. Ко со шај те ова сигурна хем соске?

⁷ Шај те ова увериме кај ко рај ка живина ко мир, ка овел амен са со ваљани аменге хем ка ова шукар организириме. Соске? Адалеске со о Јехова више сикавѓа аменге сар ка овел о живото кеда лескоро Чхаво ка владинел. Адава шај те дикха ле таро извештај башо цари о Соломон.

8. Сар исполнинѓе пе о лафија таро Псалм 37:10, 11, 29 ко пурано време? (Дикх о „Пучиба таро читателија“ со аракхљола ки акаја кула.)

⁸ О цари о Давид сине водимо таро Девел те пишинел башо адава саво ка овел о живото ки иднина кеда ка владинел јекх мудро хем верно цари. (Читин Псалм 37:10, 11, 29.) Кеда кераја е јаверенцар лафи башо рај бут пути читинаја ленге таро Псалм 37:11. Соске шај те кера адава? Адалеске со о Исус цитиринѓа о иста лафија ки Проповед ки гора хем адалеа сикавѓа кај ка исполнинен пе ки иднина (Мат. 5:5). Ама е Давидескере лафија исто аѓаар сикавена саво ка овел о живото ко е Соломонескоро време. Кеда о Соломон владинела сине ко Израел, е Девлескоро народо уживинела сине ко мир хем сине лен са со ваљани ленге ки пхув коте со „тхавдела тхуд хем авгин“. О Девел вакерѓа: „Ако живинена спрема мле законија... ка керав те овел мир ки пхув, хем кеда ка пашљовен нане никастар те даран“ (3. Мој. 20:24; 26:3, 6). Акала лафија исполнинѓе пе џикоте владинела сине о Соломон (1. Лет. 22:9; 29:26-28). О Јехова исто аѓаар ветинѓа кај о лошна мануша нане више те постојнен (Пс. 37:10). Значи о лафија таро Псалм 37:10, 11, 29 исполнинѓе пе ко пурано време хем ка исполнинен пе исто аѓаар ки иднина.

9. Со вакерѓа и царица тари Сава башо владибе е Соломонескоро?

 ⁹ И царица тари Сава шунѓа башо мир хем барвалипе со сине е Израелцон кеда о Соломон сине цари. Ој патујнѓа таро дур тхан џи ко Ерусалим те шај те дикхел адава со шунѓа (1. Цар. 10:1). Откеда дикхља е Соломонескоро царство, ој вакерѓа: „Ни екваш на сине манге вакердо... Благо тле манушенге хем тле слугенге кола со секогаш тане англи туте хем шунена тли мудрост“ (1. Цар. 10:6-8). Ама о условија со сине е Израелцон тели е Соломонескири власт сине само јекх тикно пример башо адава со о Јехова ка керел е манушенге кеда лескоро Чхаво о Исус ка владинел.

10. Ко саво начин о Исус тано пошукар таро Соломон?

¹⁰ О Исус тано ко секова поглед пошукар таро Соломон. О Соломон сине несовршено мануш со керѓа баре гревија кола со анѓе баре проблемија е Девлескере народоске. А о Исус тано совршено владетели кова со никогаш на грешинѓа (Лука 1:32; Евр. 4:14, 15). О Исус ачхило верно е Девлеске иако сине бут пути искушимо таро Сатана. Ов докажинѓа кај никогаш нане те грешинел или те керел нешто колеа со ка анел штета пле верно народоске. Ов тано о најшукар цари со шај те овел амен.

11. Кој ка владинел заедно е Исусеа?

¹¹ О Исус хем о 144.000 помазаникија со ка владинен леа ка грижинен пе башо мануша хем ка исполнинен е Јеховаскири намера е пхувјаја (Отк. 14:1-3). Ола истрајнѓе ко бут испитија хем проблемија кеда живинѓе ки пхув хем адалеске најшукар шај те хаљовен солеа соочинена пе окола со живинена ки пхув. Со конкретно ка керен о помазаникија?

12. Сави задача ка дел о Јехова е 144. 000 помазаниконге?

¹² О Исус хем окола со ка владинен леа ка овел лен бут повише бути таро Соломон. О цари о Соломон ваљани сине те грижинел пе милиоња манушенге само тари јекх пхув. Ама окола со ка владинен ко е Девлескоро Царство ка грижинен пе милијарде манушенге тари цели пхув. О Јехова чаче денѓа бари чест е 144. 000 помазаниконге.

13. Сави посебно одговорност ка овел околен со ка владинен е Исусеа?

¹³ Исто сар о Исус, о 144. 000 ка служинен сар царија хем свештеникија (Отк. 5:10). Ко е Мојсеескоро закони јекх таро најважна задаче е свештениконгере сине те заштитинен е манушенгоро састипе ко физичко хем духовно поглед. Ама о Закони сине „само сенка башо шукар буќа со ка авен“, адалеске шај те вакера кај окола со ка владинен заедно е Исусеа ка овел лен јекх посебно задача те поможинен е Девлескере народоске ко физичко хем духовно поглед (Евр. 10:1). Амен панда на џанаја сар акала царија хем свештеникија ка комунициринен е манушенцар акате ки пхув. Бизи разлика сар ка овел, шај те ова увериме кај ко рај окола со ка овен ки пхув ка добинен о водство со ваљани ленге (Отк. 21:3, 4).

14. Сар тане поврзиме о тикно стадо хем о јавера бакхре?

¹⁴ О Исус викинела околен со ка владинен леа „тикно стадо“ (Лука 12:32). Ов исто аѓаар спомнинѓа јавер група која со викинѓа ла „јавера бакхре“. Акала дуј групе керена јекх стадо (Јован 10:16). Ола соработинена јекх јекхеа хем понадари да ка  соработинен кеда и пхув ка овел рај. Тегани окола таро „тикно стадо“ ка овен ко небо а о „јавера бакхре“ ка овел лен надеж те живинен вечно ки пхув. Ама о „јавера бакхре“ ваљани панда акана те керен нешто те шај те живинен ко рај.

15. а) Сар соработинена о јавера бакхре е Христосескере пхраленцар? б) Сар шај те џа пало е пхралескоро пример сој ки аптека? (Дикх и слика.)

¹⁵ О криминалцо со каинѓа пе муло англедер те сикавел кај тано благодарно башо адава со керѓа леске о Исус. Ама амен, „о јавера бакхре“ иси амен бут прилике панда акана те сикава кобор сием благодарна е Исусеске. На пример, сикаваја амаро мангипе адалеа сар понашинаја амен лескере помазиме пхраленцар. Уствари о Исус вакерѓа кај спрема адава ка судинел е бакхрен (Мат. 25:31-40). Шај те поддржина е Христосескере пхрален аѓаар со ревно ка поможина лен ко проповедничко дело хем ко керибе ученикија (Мат. 28:18-20). Адалеске мангаја шукар те користина о публикацие службаке со иси амен, сар сој о лил Ов бахтало засекогаш. Ако панда нане тут библиско курси, дали шај те чхиве туке цел те нудине повише манушенге библиско курси?

16. Со ваљани те кера те шај те ова граѓанија ко е Девлескоро Царство?

¹⁶ На ваљани те аџикера те авел о рај хем тегани те постапина сар со мангела о Јехова. Амен шај панда акана те трудина амен те ова искрена ко керибе лафи хем постапке хем те ова урамнотежена ко са. Исто аѓаар шај те ова верна е Јеховаске, амаре брачно партнереске хем амаре пхраленге. Кобор повише трудинаја амен те живина спрема е Девлескере мерилија ко акава лошно свето, добором полокхо ка овел аменге те живина спрема ленде ко рај. Исто аѓаар шај те развина вештине хем особине те шај те сикава кај сием спремна те живина адатхе. Дикх и статија „Дали сиан спремно те наследине и пхув?“ со аракхљола ки акаја кула.

17. Дали ваљани те ова обесхрабриме башо гревија со керѓем лен англедер? Објаснин.

¹⁷ Ваљани исто аѓаар те чхинава те осетина амен крива башо гревија кола со керѓем лен англедер. Џанѓола пе, никогаш на ваљани те искористина и откупно жртва сар  изговор те шај намерно те грешина (Евр. 10:26-31). Ама шај те ова увериме кај ако чаче каинаја амен, прифатинаја и помош таро Јехова хем таро старешине хем менинаја амен, тегани о Јехова целосно ка простинел аменге (Иса. 55:7; Дела 3:19). Ма бистре со вакерѓа о Исус е фарисеенге: „Ме на аљум те викинав е праведна манушен, него е грешникон“ (Мат. 9:13). И откупно жртва тани добором силно со шај те учхарел са амаре гревија.

18. Башо со би мангеа те кере лафи е криминалцоја кова со муло узо Исус?

¹⁸ Замислин туке сар ко рај кереа лафи е криминалцоја со сине узо Исус. Сигурно о солдуј ка вакерен кобор ценинена е Исусескири жртва. Шај ка пуче ле нешто повише башо адава со случинѓа пе ко последна саатија таро е Исусескоро живото ки пхув хем сар осетинѓа пе кеда о Исус одговоринѓа леске. А тари јавер страна шај ов ка пучел тут сар сине о живото џикоте трајнена сине о последна диве таро е Сатанаскоро свето. Ка овел амен бари чест те проучина е Девлескоро Лафи асавке манушенцар (Еф. 4:22-24).

19. Соске о живото ко рај нане те овел досадно? (Дикх и слика ки насловно страна.)

¹⁹ О живото ко рај нане никогаш те овел досадно. Ка овел амен прилика те запознајна различна манушен хем ка овел амен бути колате со ка уживина. А сој најважно, ка шај секова диве те пенџара панда пошукар амаре небесно Даде хем те уживина ко адава со ка дел амен. Ка овел секогаш нешто со шај те сикљова баши лесте хем башо лескере створиме буќа. Со повише ка живина, добором повише ка бајрол амаро мангипе спрема о Девел. Бут сием благодарна со о Јехова хем о Исус дена амен о ветување кај шај те живина вечно ко рај.