1. Сој тано „о мир таро Девел“, хем соске тано шукар те овел амен? (Филипјаните 4:6, 7).

 ИСИ јекх мир башо кова о свето на џанела. Адава тано „о мир таро Девел“ — андруно мир кова со авела таро паше амалипе амаре небесно Дадеа. Кеда иси амен асавко мир осетинаја амен сигурна. (Читин Филипјаните 4:6, 7.) Уживинаја ко паше амалипе околенцар со мангена ле хем ко паше амалипе е Девлеа кастар со авела о мир (1. Сол. 5:23). Кеда џанаја амаре Даде, иси амен доверба ки лесте хем шунаја ле, тегани о мир таро Девел шај те смиринел амаро вило кеда накхаја таро пхаре ситуацие.

2. Соске сием сигурна кај шај те овел амен о мир таро Девел?

² Дали шај чаче те овел амен мир со авела таро Девел кеда соочинаја амен пхарипаја сар сој заразно насвалипе, природно катастрофа, граѓанска немирија или прогонство? Асавке пхаре проблемија шај те даравкерен амен. Ама о Исус вакерѓа пле учениконге: „Ма те вознемиринел пе тумаро вило хем ма те дарал“ (Јован 14:27). Бут пхраља хем пхења шунѓе е Исусескоро совет, ола дозволинѓе о Јехова те поможинел ленге хем шај сине те овел лен мир џикоте накхле таро акала пхаре проблемија.

3. Сар шај несави епидемија или пандемија те лел амаро мир?

³ Јекх епидемија или пандемија шај бут те влијајнел скоро ко секова дело таро амаро живото. Размислин сар влијајнѓа о КОВИД-19 упро бут џене. Јекх истражување сикавѓа кај повише таро екваш мануша со сине пучле вакерѓе кај сине лен проблеми сојбаја џикоте трајнела сине и пандемија. Ко адава периоди бут мануша нашавѓе пло мир, пеле ки депресија, почминѓе те пиен хем те користинен дрога, о насилство ки  фамилија барило хем бут џене пробинѓе те мударен пе. Ако ширинела пе несаво насвалипе ко тхан коте со живинеа, сар шај те на ове бут секиримо хем те овел тут о мир таро Девел?

4. Соске адава со џанаја е Исусескоро пророштво башо последна диве дела амен мир?

⁴ О Исус пророкујнѓа кај ко последна диве ко „разна тхана“ ка овен заразна насвалипа (Лука 21:11). Сар адава со џанаја акава дела амен мир? Кеда почминела те ширинел пе несаво насвалипе, тегани амен на сием изненадиме. Хаљоваја кај акала буќа случинена пе соске о Исус пророкујнѓа кај ка овен асавке буќа. Адалеске мангаја те шуна е Исусескоро совет со денѓа ле околенге со живинена ко последна диве. Ов вакерѓа: „Пазинен те на даравел тумен адава“ (Мат. 24:6).

5. а) Спрема Филипјаните 4:8, 9, башо со ваљани те молина амен кеда иси заразно насвалипа? б) Сар поможинѓа јекхе пхењаке адава со шунела сине о аудиоснимке тари Библија, хем со шај те сикљова таро лакоро пример?

⁵ Кеда појавинела пе јекх заразно насвалипе шај бут локхесте те секирина амен хем те дара. Баш акава случинѓа пе јекхе пхењаке со викинела пе Деси. b Откеда лакоро како, лакоро братучети хем о доктори муле таро КОВИД-19, ој дарандили кај ој да шај те астарел о вирус хем те пренесинел ле пле дајаке. Ој исто аѓаар дарандили кај шај те нашавел пли бути хем кај ка нашти те кинел о основна буќа хем те платинел и кирија. Добором бут секиринела пе сине башо акала буќа со нашти сине те совел, ама палем иранѓа пло мир. Сар керѓа адава? Молинѓа е Јехова конкретно те поможинел лаке те ачхол смирими хем те размислинел позитивно. (Читин Филипјаните 4:8, 9.) Ој шунела сине сар о Јехова одговоринела лаке преку аудиоснимке тари Библија. Ој вакерела: „Е пхраленгоро гласо таро адала аудиоснимке сине добором пријатно со смиринѓе ман хем адава сетинкерѓа ман кај о Јехова грижинела пе манге“ (Пс. 94:19).

6. Сар о проучибе хем адава со ка џа редовно ко состанокија ка поможинел туке?

⁶ Џикоте трајнела несаво заразно насвалипе, најверојатно ка нашти те кера са о буќа со кераја лен сине англедер. Ама ма дозволин адава те чхинавел тут редовно те проучине и Библија хем те џа ко состанокија. О искуствија таро амаре публикацие хем о видеоклипија ка поможинен туке те на бистре кај тле пхраља хем пхења служинена е Јеховаске понадари да иако иси лен слична предизвикија (1. Пет. 5:9). О состанокија ка поможинен туке те овен тут позитивна мисле. Исто аѓаар, адатхе ка шај те охрабрине е јаверен хем те ове охрабримо (Рим. 1:11, 12). Џикоте размислинеа башо адава сар о Јехова поддржинѓа пле верно  слуген кеда сине насвале, кеда дарана сине или кеда сине осамена тли вера ка бајрол панда повише хем ка ове уверимо кај туте да ка поддржинел тут.

7. Со шај те сикљове таро апостол Јован?

⁷ Трудин тут те ачхове ко контакт тле пхраленцар хем пхењенцар. Понекогаш, башо несаво заразно насвалипе шај ка ваљани те ова ки физичко дистанца таро амаре пхраља хем пхења. Ко асавке ситуацие шај те осетине тут сар о апостол Јован. Ов хем о Гај сине паше амала, адалеске мангља лично те дикхел ле (3. Јов. 13, 14). Сепак, о Јован халило кај несаво време ка нашти те дикхен пе. Ама ов керѓа адава со шај сине те керел, пишинѓа леске писмо. Ако нашти секогаш лично те дикхе тут тле пхраленцар хем пхењенцар тегани трудин тут те контактирине ленцар преку телефони, видео-конференције или те бичхале ленге пораке. Кеда ачховеа ко контакт е пхраленцар, тегани нане те осетине тут осамено хем ка ове посмиримо. Ако туке пхаро хем нашти више те издржине, кер лафи е старешиненцар хем прифатин ленгоро охрабрување (Иса. 32:1, 2).

8. Сар шај јекх природно катастрофа те лел тло мир?

⁸ Ако доживинѓан поплава, земјотрес или пожар шај пало адава ка ваљани те накхел бут време те шај те смирине тут. Ако муло тутар некој со мангеа ле или ако нашавѓан тло кхер, шај сиан пхаго тари дукх, нане тут нисави надеж или шај чак сиан хољамо. Ама акава на значинела кај сиан материјалисти или нане тут вера. Ту накхљан таро баре неволје хем нормално тано те реагирине аѓаар (Јов 1:11). Ама, иако накхљан таро асавке пхаре ситуацие тут шај те овел тут мир. Сар?

9. Сар спреминѓа амен о Исус башо природна катастрофе?

⁹ Сетин тут со пророкујнѓа о Исус. Несаве мануша мислинена кај лен лично никогаш нане те погодинел лен несави катастрофа. Ама амен џанаја кај ко акава време ка случинен пе са повише хем повише природна катастрофе кола со шај лично те погодинен амен. О Исус вакерѓа пле следбениконге кај ка случинен пе баре земјотресија хем јавера катастрофе англедер те авел о крајо (Лука 21:11). Ов исто аѓаар пророкујнѓа кај о лошнипе ка бајрол, баш сар со шај те дикха авдиве. На пример, дикхаја криминал, насилство хем терористичка нападија (Мат. 24:12). О Исус никогаш на вакерѓа кај акала неволје ка погодинен само околен со на служинена е Јеховаске. Уствари, бут таро е Јеховаскере верна слуге доживинѓе асавке неволје (Иса. 57:1; 2. Кор. 11:25). О Јехова шај нане те керел чудо те шај те заштитинел амен таро са о катастрофе, ама ов ка дел амен са со ваљани аменге те шај те овел амен мир.

10. Соске адава со ка спремина амен баши несави катастрофа акана сикавела кај иси амен вера? (Изреки 22:3).

¹⁰ Полокхо ка овел аменге те ачхова смириме ки несави итно ситуација ако англедер спреминѓем амен. Ама дали адава со англедер ка спремина амен башо асавке ситуацие значинела кај нане амен вера ко Јехова? Ни хари! Уствари, адава со англедер ка спремина амен баши несави природно катастрофа, сикавела кај иси амен вера ки е Јеховаскири способност те грижинел пе аменге. Сар? Е Девлескоро Лафи советинела амен те спремина амен башо катастрофе кола со шај те случинен пе. (Читин Изреки 22:3.) Хем преку несаве статие, состанокија хем известувања е Девлескири организација секогаш поттикнинела амен те спремина амен башо  асавке итна ситуацие. c Дали иси амен доверба ко Јехова? Ако оја, тегани панда акана ка шуна о совет, а на кеда ка случинел пе несави катастрофа.

11. Со сикљовеа тари Маргарет?

¹¹ Те дикха о искуство јекхе пхењакоро со викинела пе Маргарет. О властија нарединѓе сариненге таро лакоро подрачје те мукхен пумаре кхера соске сине баро пожар. Адалеске со бут мануша нашле ко исто време пумаре врданцар, о друмија сине блокириме. И Маргарет нашти сине те икљол аври таро пло врда соске авријал сине кало чуро. Ама ој успејнѓа те преживинел соске англедер спреминѓа пе. Ки ташна чхивѓа песке мапа хем ки адаја мапа шај сине те дикхел таро кова јавер друмо шај те возинел. Ој више англедер возинѓа таро адава друмо те шај те овел спремно ако случинела пе несави катастрофа. И Маргарет успејнѓа те преживинел адалеске со англедер спреминѓа пе.

12. Соске шунаја о упатствија баши безбедност?

¹² Те шај те заштитинен амен или те чхивен несаво редо, о властија шај ка керен полициски час, те роден амендар те мукха амаре кхера или те ден амен јавера упатствија. Несаве мануша на мангена те шунен асавке упатствија соске на мангена те мукхен пумаре кхера или адава со иси лен. Сар ваљани амен те постапина кеда добинаја асавке упатствија таро властија? И Библија вакерела аменге: „Башо Господари овен подложна секоле јекхеске со иси ле власт било те овел адава е цареске сар побаро или е управителеске касте со ов бичхалела ле“ (1. Пет. 2:13, 14). Е Девлескири организација исто аѓаар дела амен упатствија те шај те ова безбедна. Редовно сием потсетиме те да е старешиненге амаре контакт информацие те шај локхесте те аракхен амен ако случинела пе нешто итно. Дали керѓан више адава? Шај исто аѓаар те добина упатствија башо адава дали те ачхова кхере или те икљова таро амаре кхера, сар те добина помош или сар хем кеда те поможина е јаверенге. Ако на шунаја асавке упатствија, шај те чхива амаро хем е старешиненгоро живото ки опасност. Ма те бистра кај о верна пхраља грижинена пе аменге (Евр. 13:17). И Маргарет вакерѓа: „Цврсто сиум уверими кај адава со шунѓум о упатствија е старешиненгере хем е организацијакере спасинѓа мло живото“.

13. Соске шај сине бут пхраља те ачховен радосна хем те овел лен мир?

 ¹³ Бут пхраља хем пхења кола со мора сине те мукхен пумаре кхера баши несави природно катастрофа, баши војна или башо граѓанска немирија, керѓе са со шај те прилагодинен пе ко пле неве околностија хем те керен повише ки служба башо Јехова. Слично сар о христијања таро прво веко кола со сине прогониме, о пхраља да авдиве понадари вакерена „о хабери таро е Девлескоро лафи“ (Дела 8:4). О проповедибе поможинела ленге те концентриринен пе ко Царство наместо ко пумаре пхаре околностија. Адалеске шај сине те ачховен радосна хем те овел лен мир.

14. Сар шај о прогонство те лел амендар о мир?

¹⁴ Кеда сием прогониме, нашти слободно те кера о буќа кола со поможинена аменге те ачхова смириме. Амен сием радосна кеда шај те џа ко состанокија, те проповедина хем те кера са о буќа кола со нормално кераја лен бизо те дара кај ка ова пханле. Ако акала буќа нашти те кера лен слободно, тегани шај те ова вознемириме хем те дара таро адава со шај те случинел пе. Асавке чувствија тане нормална ама ваљани те пазина. О Исус вакерѓа кај о прогонство шај те перавел лескере ученикон (Јован 16:1, 2). Адалеске, сар шај те овел амен мир ако сием прогониме?

15. Соске на ваљани те дара таро прогонство? (Јован 15:20; 16:33).

¹⁵ Ко е Девлескоро Лафи пишинела: „Сарине со мангена те живинен ко јекхипе е Христос Исусеа хем те обожавинен е Девле ка овен прогониме“ (2. Тим. 3:12). Откеда амаре активностија сине забраниме ки пхув коте со живинела јекх пхрал со викинела пе Андреј, ов признајнела кај сине леске пхаро те прифатинел кај са о Сведокија тари адаја пхув ка овен прогониме. Ов мислинѓа песке: „Акате иси бут Јеховаскере сведокија, нашти о властија те пханден секоле јекхе амендар“. Акава размислување повише вознемиринѓа ле него со анѓа леске мир. Јавере пхрален сине лен доверба ко Јехова хем сине реална кај јекх диве шај ола да те овен пханле. Иако ола сине свесна башо адава сепак на сине вознемириме сар лесте. О Андреј одлучинѓа те прифатинел е јавере пхраленгоро стави хем целосно те овел ле доверба ко Јехова. Башо кратко време ов иранѓа пло мир хем акана тано радосно  иако понадари да иси ле предизвикија. О исто шај те случинел пе аменге да. Иако о Исус вакерѓа кај ка ова прогониме, ов исто аѓаар уверинѓа амен кај шај те ачхова верна (Читин Јован 15:20; 16:33).

16. Саве упатствија ваљани те шуна кеда иси амен прогонство?

¹⁶ Кеда амаре активностија тане забраниме или строго ограничиме, тегани и подружница или о старешине шај ка ден амен упатствија. Асавке упатствија дена пе те шај те заштитинен амен, те ден амен духовно храна хем те поможинен аменге те проповедина кобор со шај ко неве околностија. Трудин тут те шуне акала упатствија, чак кеда на хаљовеа соске тане денде (Јак. 3:17). Исто аѓаар, никогаш ма вакер информацие башо пхраља хем пхења или башо собраниска активностија околенге со нане лен право те џанен (Проп. 3:7).

17. Слично сар о апостолија таро прво веко, со сием одлучна те кера?

¹⁷ Јекх таро главна причине соске о Сатана боринела пе против е Девлескоро народо тани адаја со ола сведочинена башо Исус (Отк. 12:17). Ма дозволин о Сатана хем лескоро свето те даравкерен тут. Адава со проповединаја хем сикаваја е јаверен иако иси амен прогонство, керела амен радосна хем анела аменге мир. Кеда ко прво веко о еврејска властија забранинѓе е апостоленге те проповединен, адала верна мануша биринѓе повише те шунен е Девле. Ола на чхинавѓе те проповединен хем адава керѓа лен радосна (Дела 5:27-29, 41, 42). Џанѓола пе, кеда амаре активностија тане ограничиме амен мора те пазина џикоте проповединаја (Мат. 10:16). Ама ако даја амендар са, ка овел амен мир соске кераја е Јеховаскири волја хем вакераја о хабери кова со спасинела животија.

18. Кој шај те дел амен о чачутно мир?

¹⁸ Шај те ова увериме кај чак ко најпхаре времија, шај те овел амен мир. Ко асавке времија на ваљани те бистра кај о мир со ваљани аменге авела таро Девел. Адава тано мир кова со само о Јехова шај те дел амен. Нека овел тут доверба ки лесте ако иси несаво заразно насвалипе, природно катастрофа или прогонство. Ачхов паше лескере организацијаја. Ма бистре и бут шужи надеж која со аџикерела тут. Џикоте кереа адава, „о Девел кастар со авела о мир“ ка овел туја (Фил. 4:9). Ки следно статија ка дикха сар шај те поможина амаре пхраленге кола со накхена таро прогонствија те овел лен о мир таро Девел.