1-2. Соске хем ко кова начин о Јехова денѓа амен прилика те ова дело тари лескири фамилија?

О ЈЕХОВА викинѓа амен те ова дело тари лескири фамилија таро верна слуге. Адалеа сикавѓа аменге бари чест! Ки амари фамилија иси мануша кола со денѓе лафи кај ка служинен е Девлеске хем кола со сикавена вера ки откупно жртва лескере Чхавескири. Амен сием дело тари јекх бахтали фамилија. Панда акана иси амен смисловно живото, хем едвај аџикераја те живина вечно — бизи разлика дали ко небо или ко рај ки Пхув.

² Адалеске со мангела амен, о Јехова платинѓа бут бари цена баши аменде, хем адалеа денѓа амен прилика те ова дело тари лескири фамилија (Јован 3:16). И Библија вакерела: „Скупо сиен кинде“ (1. Кор. 6:20). Преку и откупнина, о Јехова дела амен прилика те ова леа паше. Иси амен чест те викина ле „мо Дад“ иако ов тано и најбари личност ко универзум. Сар со дикхлем ки англуни статија, о Јехова тано о најшукар Дад со постојнела.

3. Кола пучиба шај те пуча амен? (Дикх и рамка „ Дали о Јехова дикхела ман?“)

³ Исто сар јекх библиско писатели, амен да шај пучаја амен: „Солеа те иранав е Јеховаске башо са о шукар буќа со керѓа лен манге?“ (Пс. 116:12). О одговор тано кај амен никогаш нашти те ирана амаре Дадеске сој ко небо. Ама, лескоро мангипе теринела амен те ирана леске мангипаја. О апостол Јован пишинѓа: „Амен сикаваја мангипе, адалеске со прво ов сикавѓа мангипе спрема аменде“ (1. Јов. 4:19). Ко саве начинија шај те  сикава амаре Дадеске сој ко небо кај мангаја ле?

4. Спрема Јаков 4:8, соске ваљани те трудина амен те ова паше е Јеховаја?

⁴ О Јехова мангела те ова леа паше хем редовно те молина амен леске. (Читин Јаков 4:8.) Ов поттикнинела амен те истрајна ки молитва, хем секогаш тано спремно те шунел амен (Рим. 12:12). О Девел никогаш нане превише зафатимо те шај те шунел амен, хем никогаш на уморинела пе. А амен шунаја ле кеда читинаја лескоро Лафи, и Библија, хем о публикацие со поможинена аменге те хаљова ла. Исто аѓаар, шунаја ле кеда шукар шунаја ко состанокија. Исто сар јекх шукар комуникација со поможинела е чхавенге те овен паше пле родителенцар, аѓаар и редовно комуникација е Јеховаја ка поможинел аменге те ачхова леа паше.

5. Сар шај те кера амаре молитве те овен пошукар?

⁵ Размислин саве тане тле молитве. О Јехова мангела те вакера леске са адава со иси амен ко вило (Пс. 62:8). Шукар тано те пуча амен: „Дали ко мле молитве само механички вакерава са јекх иста лафија или лафија со шунѓум лен јаверестар? Или, трудинава ман те молинав ман е Јеховаске мле лафенцар хем искрено таро вило?“ Ту сигурно бут мангеа е Јехова, хем мангеа те ове леа паше. Адалеске мора редовно те кере леа лафи. Вакер леске тле најискрена чувствија. Вакер леске со керела тут бахтало хем со керела тут тажно. Ов сигурно кај секогаш шај те роде лестар помош.

6. Со мора те кера те шај те ачхова паше амаре Дадеа сој ко небо?

⁶ Те шај те ачхова паше амаре Дадеа сој ко небо, мора секогаш те ова леске благодарна. Сложинаја амен е псалмистеа кова со пишинѓа: „Ту керѓан бут чудесна буќа, о Јехова, Девла, хем бут буќа иси тут намера те кере аменге — никој нашти те спорединел пе туја. Те пробинав сине те раскажинав хем те керав лафи баши ленде, ка нашти сине, соске ола тане бут повише него со шај те гејнав лен“(Пс. 40:5). Амен на само со осетинаја благодарност, него исто аѓаар трудинаја амен амаре лафенцар хем постапкенцар те сикава е Јеховаске кобор сием леске благодарна. Аѓаар дикхела пе кај разликујнаја амен таро јавера. О мануша ко свето нане благодарна башо са адава со керела ленге о Девел. Уствари, јекх таро доказија кај живинаја „ко последна диве“ тано кај о мануша „нане те овен благодарна“ (2. Тим. 3:1, 2). Никогаш те на дозволина те ова асавке!

7. Со мангела о Јехова те кера, хем соске?

⁷ О родителија на мангена ленгере чхаве те распрајнен пе, него те овен ко мир хем те поможинен пе. Слично, о Јехова мангела са лескере чхаве те овен ко мир машкар песте. Уствари, о мангипе со иси машкар аменде тано јасно доказ кај сием чачутне христијања (Јован 13:35). Сложинаја амен е псалмистеа кова со пишинѓа: „Кобор тано шукар хем пријатно кеда о пхраља живинена заедно ко јекхипе!“ (Пс. 133:1). Кеда мангаја амаре пхрален хем пхењен сикаваја е Јеховаске кај мангаја ле (1. Јов. 4:20). Кобор тано шукар со сием дело тари јекх фамилија ки која со сарине тане милостива хем сочувствителна јекх јекхеа! (Еф. 4:32).

8. Спрема 1. Јованово 5:3, соске сием послушна е Јеховаске?

⁸ О Јехова родела амендар те ова леске послушна исто сар со родела е чхавендар те овен послушна пле родителенге (Еф. 6:1). Ов заслужинела те шуна ле соске тано амаро Створители кова со икерела амен ко живото  хем соске тано о најмудро Дад со постојнела. Ама, и главно причина соске сием послушна е Јеховаске тани адаја со мангаја ле. (Читин 1. Јованово 5:3.) Ов на чхивела амен силаја те ова леске послушна иако иси ле право те родел амендар адава. О Јехова денѓа амен слободно волја, адалеске тано бахтало кеда сием леске послушна таро мангипе.

9-10. Соске тано важно те џана е Девлескере мерилија хем те живина спрема ленде?

⁹ О родителија мангена ленгере чхаве те овен безбедна. Адалеске чхивена правилија кола тане башо ленгоро шукарипе. Кеда о чхаве шунена акала правилија, сикавена кај иси лен доверба ко пле родителија хем кај поштујнена лен. Кобор тано поважно те џана хем те шуна о мерилија со дела лен амаро Дад сој ко небо. Аѓаар ка сикава е Јеховаске кај мангаја ле хем кај поштујнаја ле, а адава ка овел амаре шукарипаске (Иса. 48:17, 18). Ама окола со отфрлинена е Девле хем лескере мерилија ко крајо иси лен лошна последице (Гал. 6:7, 8).

¹⁰ Кеда живинаја сар со мангела о Јехова, амен сием заштитиме таро буќа кола со шај те уништинен амаро састипе, те керен амен тажна или те руминен амаро амалипе е Јеховаја. О Јехова џанела сој аменге најшукар. И Аурора, која со живинела ко САД, вакерела: „Џанава кај, ако сиум послушно е Јеховаске, ка овел ман о најшукар живото со постојнела“. Акава важинела сариненге. Шукар тано те одвојна време те размислина сар лично аменге користинена о мерилија кола со о Јехова мангипаја денѓа лен.

11. Сар поможинела аменге и молитва?

 ¹¹ И молитва поможинела аменге те ова послушна е Девлеске, чак кеда адава нане локхо. Адалеске со сием грешникија, понекогаш шај те овел аменге бут пхаро те икера е Девлескере мерилија. Сепак, мора секогаш те борина амен те шај те постапина аѓаар сар со мангела о Јехова. О псалмисти таро вило молинѓа е Јехова: „Бајрар ки манде желба те керав тли волја“ (Пс. 51:12). И Дениза, која со служинела сар општо пионери, вакерела: „Кеда манге пхаро те шунав несави заповед таро Јехова, молинава ман баши сила те шај те керав адава сој исправно“. Шај те ова сигурна кај о Јехова секогаш ка одговоринел аменге ко асавке молитве (Лука 11:9-13).

12. Спрема Ефешаните 5:1, со ваљани те кера?

¹² Читин Ефешаните 5:1. Адалеске со сием е Јеховаскере „мангле чхаве“, амен даја са амендар те шај те ова сар лесте. Трудинаја амен те развина сар лескере особине аѓаар со сием обѕирна хем шукар спрема о јавера, хем аѓаар со спремно простинаја. Кеда дикхена кај шукар понашинаја амен, окола со на пенџарена е Девле шај те овен поттикниме те дознајнен нешто повише баши лесте (1. Пет. 2:12). Е родителен иси лен шукар причине те постапинен пле чхавенцар исто сар о Јехова со постапинела аменцар. Ако керена адава, о чхаве шај те овен поттикниме те овен паше амаре Дадеа сој ко небо.

13. Со ка поможинел аменге те ова храбра?

 ¹³ Јекх чхаво дичинела пе пле дадеа хем бахтало тано кеда керела лафи баши лесте. Амен да дичинаја амен амаре Дадеа, е Јеховаја, хем мангаја те кера лафи е јаверенцар баши лесте. Сарине осетинаја амен сар о цари о Давид, кова со пишинѓа: „Е Јеховаја ка дичинел пе ми душа“ (Пс. 34:2). Ама, со ако сием лаџутне? Сар шај те ова храбра? Оваја храбра кеда размислинаја кобор бахтало ка овел о Јехова ако кераја лафи баши лесте хем кобор ка користинел е јаверенге адава со ка пенџарен ле. О Јехова ка дел амен и храброст со ваљанела аменге. Ов поможинѓа амаре пхраленге ко прво веко те овен храбра, а ка поможинел аменге да (1. Сол. 2:2).

14. Соске тано важно те проповедина?

¹⁴ О Јехова нане пристрасно хем ов тано бахтало кеда дикхела кај сикаваја мангипе е манушенге, бизи разлика котар авена или саве околностија иси лен (Дела 10:34, 35). Јекх таро најшукар начинија те сикава кај мангаја е јаверен тано аѓаар со ка вакера ленге о шукар хабери (Мат. 28:19, 20). Со шај те успејна е проповедибаја? Шај те поможина околенге со шунена амен те овел лен пошукар живото панда акана хем те овел лен прилика те живинен вечно ко рај (1. Тим. 4:16).

15-16. Таро кола причине шај те ова бахтале?

¹⁵ Сар родители пхердо мангипаја, о Јехова мангела лескири фамилија те овел бахтали (Иса. 65:14). Иси амен бут причине те ова бахтале панда акана, иако шај соочинаја амен пхарипаја. На пример, сигурна сием кај амаро Дад сој ко небо мангела амен бут. Џанаја о чачипе таро е Девлескоро Лафи (Ерем. 15:16). Хем сарине сием дело тари јекх посебно фамилија колате со иси мануша со мангена е Јехова, мангена лескере уче морална мерилија хем мангена пе јекх јекхеа (Пс. 106:4, 5).

¹⁶ Шај те ачхова бахтале адалеске со сием сигурна кај о живото ка овел панда пошукар ки иднина. Џанаја кај панда хари о Јехова ка цидел са о лошнипе, хем кеда ка владинел е Девлескоро Царство и Пхув ка овел рај. Освен адава, иси амен бут шужи надеж кај окола со муле ка уштен хем палем ка овен заедно пле најмангленцар (Јован 5:28, 29). Адава ка анел аменге баро бахталипе! А сој најважно, сигурна сием кај панда хари сарине — хем ко небо хем ки Пхув — ка служинен амаре Дадеске хем ка ден ле и слава хем и чест која со заслужинела ла.