ДУЈ терне џувља пхирена сине заедно ки диз Багујо, ко Филипини. Ола дикхле и количка проповедибаске, ама на приближинѓе пе лаке. И пхен со терѓола сине узи количка со викинела пе сине Хелен, асандили. О дуј џувља продолжинѓе ко пумаро друмо ама памтинѓе е Хеленакири пријатно насмевка.

Покасно џикоте џана песке сине кхере автобусеа, дикхле и дворана коте со сине о баро знако jw.org. Ола сетинѓе пе кај англедер дикхле адала букве ки количка проповедибаске. Солдуј хулиле таро автобуси хем геле ки дворана. Англо удар тари дворана дикхле о распоред кеда икерена пе о состанокија.

О дуј џувља але ко јекх таро амаре состанокија. Хем кас дикхле кеда кхувѓе андре ки дворана? Е Хелена! Ола одма пенџарѓе ла тари лакири насмевка. И Хелен вакерела: „Сиум сине хари вознемирими соске на џанава сине соске авена ки манде“. Ама, о џувља вакерѓе е Хеленаке кај англедер дикхле ла ко количке проповедибаске.

О дуј терне џувља уживинѓе ко состанок хем сине ленге шукар е пхраленцар хем е пхењенцар. Кеда дикхле е јаверен сар чистинена и дворана пало состанок, ола да мангле те поможинен. Јекх таро џувља на живинела више ко Филипини, а и јавер почминѓа те џал ко состанокија хем почминѓа те проучинел и Библија. И причина башо адава сине јекх насмевка!