1. Ако јекх џувли мангела те кхувел ко брако, кола пучиба ваљани те пучел пе?

СА Е ХРИСТИЈАНЕНГЕ поглавари тано о Исус Христос, а ов тано совршено. Ама кеда јекх ромни кхувела ко брако, јекх несовршено ром овела лакоро поглавари, а адава шај те овел предизвик. Адалеске кеда размислинела те кхувел ко брако несаве пхралеа, шукар ка овел те пучел пе: „Со сикавела кај акава пхрал ка овел шукар фамилијарно поглавари? Дали о духовна буќа леске најважна? Ако на, дали ка овел шукар поглавари одкеда ка ла амен?“ Исто аѓаар јекх пхен ваљани те пучел пе: „Саве особине иси ман со ка керен о брако те овел по шукар? Дали сиум стрпливо хем дарежливо? Дали сиум паше е Јеховаја?“ (Проп. 4:9, 12). Ако јекх џувли анела шукар одлуке англедер о брако, адава ка поможинел лаке те овел ла успешно хем бахтало брако.

2. Со ка дикха ки акаја статија?

² Бут пхења дена бут шужо пример адалеа сој тане подложна пумаре ромеске. Ола заслужинена пофалба! Иси амен чест те служина е Јеховаске заедно акале верна ромњенцар! Ки акаја статија, ка кера лафи башо акала трин пучиба: 1) Саве предизвикија иси е ромњен? 2) Соске јекх ромни биринела те овел подложно пле ромеске? 3) Со шај о рома хем о ромња те сикљон баши подложност таро примерија со сикавѓе о Исус, и Авигеја хем и Марија, која со сине и ромни е Јосифескири хем и дај е Исусескири?

3. Соске на постојнела совршено брако?

³ О брако тано совршено поклон таро Девел, ама о мануша тане несовршена (1. Јов. 1:8). Адалеске е Девлескоро Лафи вакерела кај ко брако ка овен проблемија сој тане опишиме сар телесна неволје (1. Кор. 7:28). Те дикха несаве буќа со шај те овен пхаре јекхе ромњаке.

4. Соске е ромњаке шај те овел понижувачко те овел подложно пле ромеске?

⁴ Понекогаш таро начин сар барили јекх ромни, ој шај те осетинел пе кај тано понижувачко те овел подложно пле ромеске. И Марисол која со живинела ко САД, вакерела: „Ко тхан коте со бариљум е џувленге стално вакерела пе сине кај ваљани те овен иста е муршеа ко са. Џанава кај о Јехова денѓа авторитети е роменге хем кај о ромња мора те овен послушна хем заслужинена те овен поштујме. Ама пхаро тано те дикхе ко поглаварство урамнотежено“.

5. Саво погрешно мислење иси несавен муршен башо џувља?

⁵ Тари јавер страна, јекх џувли шај те овел ко брако јекхе ромеа кова со мислинела кај о ромња нане добором важна. И пхен Ивон, тари јужно Америка вакерела: „Ко тхан коте со живинава прво о мурша хана маро, а после о џувља. Таро тикне чхаја очекујнела пе те готвинен хем те чистинен, ама е тикне муршенге служинена о даја хем о пхења хем ленге вакерела пе кај тане царија ко кхер“. Јекх пхен која со викинела пе Јинглинг хем живинела ки Азија вакерела: „Ки мли чхиб иси јекх изрека која со значинела кај о џувља на ваљани те овен интелигентна или те овел лен несави способност. Ленгири улога тани те грижинен пе ко кхер хем нане ленге дозволимо те вакерен пло мислење пле ромеске“. Јекх ром кова со на сикавела мангипе хем иси ле асавке ставија со на темелинена пе ки Библија, керела о живото пле ромњаке те овел пхаро, на џала пало е Исусескоро пример хем на керела е Јеховаскири волја (Еф. 5:28, 29; 1. Пет. 3:7).

6. Со ваљани те керен о ромња те шај те овел лен попаше однос е Јеховаја?

⁶ Сар со спомнинѓем ки англуни статија, о Јехова очекујнела о рома те грижинен пе башо пле фамилијакере духовна, емоционална хем материјална потребе (1. Тим. 5:8). Ама, јекх пхен сој ко брако мора те одвојнел песке секова диве време те читинел е Девлескоро Лафи хем те размислинел баши лесте, а исто аѓаар искрено те молинел пе е Јеховаске. Адава шај те овел предизвик. Е ромњен иси лен бут бути адалеске шај те мислинен песке кај нане лен доволно време хем сила башо адала буќа, ама бут тано важно те одвојнен песке време. Соске? Адалеске со о Јехова мангела секоле јекхе те овел ле лично однос леа (Дела 17:27).

7. Сар ка овел полокхо е ромњаке те исполнинел пли задача?

⁷ Џанѓола пе, јекх ромни ваљани бут те трудинел пе те овел подложно пле несовршено ромеске. Ама, ка овел лаке полокхо те прифатинел пли задача таро Јехова, ако хаљола хем прифатинела о библиска причине соске ваљани те овел подложно пле ромеске.

8. Сар сој пишимо ко Ефешаните 5:22-24, соске јекх ромни одлучинела те овел подложно пле ромеске?

⁸ Јекх ромни одлучинела те овел подложно пле ромеске адалеске со о Јехова родела латар адава. (Читин Ефешаните 5:22-24.) Ла иси ла доверба ко лакоро небесно Дад адалеске со џанела кај ов мангела ла хем кај  нане те родел латар нешто со нане башо лакоро шукарипе (5. Мој. 6:24; 1. Јов. 5:3).

9. Со овела кеда јекх пхен поштујнела пле ромескоро авторитети?

⁹ О свето поттикнинела е ромњен те на шунен е Јеховаскере мерилија хем ко поглаварство те дикхен сар нешто понижувачко. Џанѓола пе, адала со ширинена асавке идее на пенџарена амаре Девле сој пхердо мангипе. О Јехова никогаш нане те дел пле скапоцено чхаенге јекх заповед која со ка понижинел лен. О пхења со трудинена пе те исполнинен пли улога со денѓа лен о Јехова поможинена ки фамилија те овел мир (Пс. 119:165). Адава ка овел корисно лаке, лакере ромеске хем лакере чхавенге.

10. Со сикљоваја таро адава со вакерѓа и Карол?

¹⁰ Јекх ромни која тани подложно пле несовршено ромеске сикавела кај мангела хем поштујнела е Јехова, кова со воспоставинѓа о поглаварство. И Карол, тари Јужно Америка вакерела: „Џанава кај мо ром ка керел грешке. Ама исто аѓаар џанава кај о начин сар реагиринава ко лескере грешке сикавела кобор ценинава мло амалипе е Јеховаја. Адалеске трудинава ман те овав подложно соске мангава те керав мле небесно Дадескири волја“.

11. Со поможинела јекхе пхењаке те простинел, хем со шај те сикљова амен таро адава со вакерѓа?

¹¹ Јекхе ромњаке шај те овел предизвик те поштујнел пле роме хем те овел леске подложно ако ов на лела ко предвид лакере чувствија хем адава со мислинела ој. Дикх сар реагиринела јекх пхен со викинела пе Анис кеда случинела пе акава. Ој вакерела: „Трудинава ма те на хољанав, на бистрава кај сарине кераја грешке. Мли цел тани, сар о Јехова, спремно те простинав. Кеда простинава осетинава ман смирими“ (Пс. 86:5). Кеда јекх ромни простинела, обично полокхо тано лаке те овел подложно.

12. Саве примерија иси ки Библија?

¹² Некој шај те мислинел кај о мануша со сикавена подложност тане слаба личностија. Ама адава воопшто нане точно. Ки Библија иси бут примерија таро мануша со сине подложна, ама сине бут храбра. Те дикха со  шај те сикљова таро Исус, тари Авигеја хем и Марија.

13. Соске о Исус тано подложно е Јеховаске? Објаснин.

¹³ О Исус тано подложно е Јеховаске, ама сигурно на адалеске со нане интелигентно или со нане ле способностија. Адава со сикавела сине е манушен ко едноставно хем јасно начин сикавела кај ов тано бут интелигентно (Јован 7:45, 46). О Јехова џанља кај о Исус тано бут способно хем дозволинѓа леске те керел заедно леа бути кеда о Јехова створинѓа са сој ко небо хем ки Пхув (Изр. 8:30; Евр. 1:2-4). Откеда о Исус воскреснинѓа, о Јехова денѓа ле са и власт ко небо хем ки Пхув (Мат. 28:18). Иако е Исусе иси ле бут способностија, ов сепак родела водство таро Јехова. Соске? Адалеске со мангела пле Даде (Јован 14:31).

14. Со шај те сикљовен о рома таро а) начин сар о Јехова дикхела ко ромња? б) адава со пишинела ко Изреки 31 поглавје?

¹⁴ Со шај те сикљовен о рома. О Јехова на родела и ромни те овел подложно пле ромеске адалеске со мислинела кај ој на врединела добором сар о мурш. Акава дикхела пе таро адава со биринѓа хем муршен хем џувлен те владинен заедно е Исусеа (Гал. 3:26-29). О Јехова сикавѓа доверба ко пло Чхаво адалеа со денѓа ле авторитети. Слично аѓаар, јекх мудро ром дела пле ромњаке одредено авторитети. Кеда и Библија керела лафи баши јекх способно ромни, вакерела кај ој шај те водинел о кхерутне буќа, те кинел хем те бикинел имот хем те керел бизнис. (Читин Изреки 31:15, 16, 18.) Ој нане робо коле со нане ле право те вакерел пло мислење. Наместо адава, лакере роме иси ле доверба ки лате хем шунела лакере предлогија. (Читин Изреки 31:11, 26, 27.) Кеда јекх ром ко асавко начин сикавела кај поштујнела пле ромња, ој ка мангел те овел леске подложно.

15. Со шај те сикљовен о ромња таро е Исусескоро пример?

¹⁵ Со шај те сикљовен о ромња. Иако о Исус керѓа бут буќа, ов на осетинѓа пе понижимо адалеске со сине подложно е Јеховаске (1. Кор. 15:28; Фил. 2:5, 6). Слично аѓаар, јекх способно ромни која со џала пало е Исусескоро пример, нане те осетинел пе понижими ако тани подложно пле ромеске. Ој ка поддржинел пле роме на само адалеске со мангела ле, него првенствено адалеске со мангела е Јехова хем поштујнела ле.

16. Спрема 1. Самоилова 25:3, 23-28, саве предизвикија сине е Авигеја? (Дикх и слика ки насловно страна.)

¹⁶ Е Авигеја сине ла ром со викинела пе сине Навал. Ов сине себично, гордо хем неблагодарно мануш. Иако сине асавко, и Авигеја на мангља те руминел пло брако. Ој шај сине ништо те на вакерел хем те дозволинел о Давид хем лескере мануша те мударен лакере роме. Наместо адава, ој керѓа са те шај те заштитинел е Навале хем саринен таро ленгоро кхер. Размислин башо адава кобор храбро сине ој кеда иклили англо 400 вооружиме мануша хем сикавѓа поштовање кеда керѓа е Давидеа лафи башо проблеми. Ој чак сине спремно те извининел пе башо пле ромескере постапке. (Читин 1. Самоилова 25:3, 23-28.) О Давид халило кај о Јехова користинѓа акале храбро ромња те дел ле совет кова со чхинавѓа ле те керел јекх бари грешка.

17. Со шај те сикљовен о рома таро извештај башо Давид хем и Авигеја?

¹⁷ Со шај те сикљовен о рома. И Авигеја сине мудро ромни. О Давид сине мудро хем шунѓа лакоро совет. Адалеске ов на мударѓа невино манушен. Слично аѓаар,  јекх мудро ром кеда ваљани те анел важна одлуке, лела ко предвид о мислење пле ромњакоро. Лакоро мислење шај те поможинел леске те избегинел те анел одлуке со нане мудра.

18. Со шај те сикљовен о ромња таро е Авигејакоро пример?

¹⁸ Со шај те сикљовен о ромња. Јекх ромни која со мангела хем поштујнела е Јехова шај шукар те влијајнел упри пли фамилија. Чак ако лакоро ром на служинела е Јеховаске или на живинела спрема е Јеховаскере мерилија. Ој нане те родел причине со нане ко склад е Библијаја те шај те руминел пло брако. Наместо адава, адалеа со ка сикавел поштовање хем ка овел подложно пле ромеске, ој ка мотивиринел ле те мангел те сикљол повише башо Јехова (1. Пет. 3:1, 2). Чак ако лакоро ром одлучинела те на служинел е Јеховаске, о Јехова ценинела кеда ој тани подложно пле ромеске.

19. Кеда јекх ромни нане те овел послушно пле ромеске?

¹⁹ Ама, јекх подложно ромни нане те поддржинел пле роме кеда ов ка родел латар те постапинел спротивно таро несаво библиско закони или начело. На пример, те претпоставина кај јекхе пхењакоро ром кова со нане е Јеховаскоро сведоко, вакерела пле ромњаке те ховавел, те чорел или те керел нешто јавер со о Јехова на мангела. Са о христијања, а исто аѓаар о пхења кола сој ко брако, мора те овен сар прво послушна е Јеховаске. Ако о ром родела амаре пхењатар те на шунел о библиска начелија, ој ваљани те одбинел хем те објаснинел ко љубезно, ама одлучно начин соске нашти те керел адава со ов родела латар (Дела 5:29).

20. Котар џанаја кај и Марија сине бут паше е Јеховаја?

²⁰ И Марија сине бут паше е Јеховаја. Ој бут шукар џанела сине о света списија. Кеда и Марија керѓа е Елисаветаја лафи, и дај таро Јован Крстител, ој цитиринѓа о хебрејска списија повише таро 20 пути (Лука 1:46-55). Хем размислин башо акава: Иако и Марија сине верими е Јосифеа, е Јеховаскоро ангели на керѓа прво леа лафи. О ангели прво керѓа е Маријаја лафи хем вакерѓа лаке кај ка бијанел е Девлескере чхаве (Лука  1:26-33). О Јехова шукар пенџарела сине е Марија хем сине уверимо кај ој ка мангел лескере чхаве хем ка грижинел пе леске. Хем е Марија понадари да сине ла шукар однос е Јеховаја чак откеда муло о Исус хем воскреснинѓа ко небо (Дела 1:14).

21. Со шај о рома те сикљон таро Библиско извештај баши Марија?

²¹ Со шај те сикљовен о рома. Јекх мудро ром тано бахтало кеда лескири ромни џанела шукар и Библија. Леске на сметинела адава хем на мислинела кај ој мангела те овел поглавари ки фамилија. Ов тано свесно кај јекх пхен која со џанела шукар и Библија хем о библиска начелија шај те поможинел бут пле фамилијаке. Чак ако е ромња иси ла побаро образование таро пло ром, ле иси ле одговорност те поможинел пле фамилијаке те обожавинен е Јехова, сар на пример редовно те икерен и Фамилијарно рат (Еф. 6:4).

22. Со шај те сикљовен о ромња тари Марија?

²² Со шај те сикљовен о ромња. Иако јекх ромни мора те овел подложно пле ромеске, сепак ој тани одговорно те икерел пли вера зорали (Гал. 6:5). Адалеске, ој мора те одвојнел песке време баши пли лично студија хем те размислинел башо адава со проучинѓа. Адава ка поможинел лаке понадари да те мангел хем те поштујнел е Јехова хем те овел бахтали џикоте тани подложно пле ромеске.

23. Сар адава сој подложна о ромња поможинела ленге, ленгере фамилиенге хем е собраниеске?

²³ О ромња сој тане подложна пумаре ромеске адалеске со мангена е Јехова, ка овен побахтале хем позадоволна таро адала со одбинена о поглаварство со воспоставинѓа ле о Јехова. Акала подложна ромња тане пример хем е терне муршенге хем е терне џувленге. Освен адава, ола поможинена те овел шукар атмосфера, на само ки фамилија него исто аѓаар ко собрание да (Тит 2:3-5). Авдиве, побаро дело таро е Јеховаскере слуге тане џувља (Пс. 68:11). Сарине амен, бизи разлика мурша или џувља, иси амен важно улога ко собрание. Ки следно статија ка кера лафи сар шај секова јекх амендар те исполнинел адаја улога.