1-2. Спрема Матеј 5:11, сар ваљани те дикха ко искушенија?

О ИСУС ветинѓа пле учениконге кај ка овен чаче бахтале. Ов исто аѓаар, предупрединѓа лен кај ка овен лен неволје (Мат. 10:22, 23; Лука 6:20-23). Амен сием бахтале со сием е Исусескере ученикија. Ама, сар осетинаја амен кеда амари фамилија противинела пе аменге, кеда о властија прогонинена амен или кеда о колеге хем о соученикија теринена амен те кера нешто сој погрешно? Кеда размислинаја башо акала буќа, адава шај те керел те осетина амен секириме.

² Обично о мануша ко прогонство на дикхена сар причина те овен бахтале. Ама, е Девлескоро Лафи вакерела аменге те кера баш адава. На пример, о Јаков пишинѓа кај наместо те ова бут секириме, амен ваљани те ова бахтале кеда иси амен искушенија (Јак. 1:2, 12). А о Исус вакерѓа кај ваљани те ова бахтале чак ако сием прогониме. (Читин Матеј 5:11.) Сар шај те ова бахтале иако иси амен неволје? Шај бут те сикљова таро адава со ка дикха таро писмо со пишинѓа ле о Јаков е христијаненге ко прво веко. Прво, те дикха саве предизвикија сине адале христијанен.

3. Со случинѓа пе кратко откеда о Јаков уло е Исусескоро ученико?

³ Кратко откеда е Исусескоро пхрал, о Јаков уло ученико, о христијања ко Ерусалим сине прогониме (Дела 1:14; 5:17, 18). А кеда сине мудардо о ученико о Стефан, бут христијања нашле тари диз хем геле ки Јудеја хем ки Самарија. А несаве геле чак џи ко Кипар хем ки Антиохија  (Дела 7:58 — 8:1; 11:19). Шај само те замислина аменге кобор сине пхаро е учениконге. Сепак, било коте со геле ола ревно проповединена сине о шукар хабери хем формиринѓе собранија ки Римско Империја (1. Пет. 1:1). Ама пало акава, лен сине лен панда бут попхаро периоди.

4. Саве јавера неволје сине е христијанен таро прво веко?

⁴ Е христијанен таро прво веко сине лен различна неволје. На пример, околу о 50 берш а.е., о римско императори, о Клавдиј, денѓа наредба са о Евреија те џан песке таро Рим. Адалеске, о Евреија со уле христијања силаја сине териме те мукхен пумаре кхера хем те џан те селинен пе ко јавера тхана (Дела 18:1-3). Околу о 61 берш а.е., о апостол Павле пишинѓа кај о мануша вреџинена сине буте христијанен англо јавера, чхивена лен сине ко затвор хем чорена сине ленгоро имот (Евр. 10:32-34). Хем исто сар о јавера мануша, о христијања да сине чороле хем насвале (Рим. 15:26; Фил. 2:25-27).

5. Башо кола пучиба ка добина одговор?

⁵ Кеда о Јаков пишинѓа пло писмо англедер о 62 берш а.е., ов бут шукар џанела сине башо проблемија со сине лескере пхрален хем пхењен. О Јехова водинѓа е Јакове те пишинел акале христијаненге хем те дел лен корисна советија кола со ка поможинен ленге те ачховен бахтале иако сине лен проблемија. Акана те разгледина о писмо таро Јаков хем те одговорина ко акала пучиба: Сој тано о бахталипе башо кова со пишинѓа о Јаков? Со шај те керел о христијања те нашавен пумаро бахталипе? Хем сар шај и мудрост, и вера хем и храброст те поможинен аменге те ачхова бахтале иако иси амен неволје?

6. Спрема Лука 6:22, 23, соске јекх христијани шај те овел бахтало кеда иси ле искушенија?

⁶ О мануша шај мислинена кај некој шај те овел бахтало само ако иси ле шукар састипе, бут паре хем слога ки фамилија. Ама, о бахталипе башо кова со пишинѓа о Јаков тано јекх таро особине со авена таро свети дух хем на зависинела таро околностија со иси јекхе мануше (Гал. 5:22). Јекх христијани тано бахтало кеда џанела кај керела е Јеховаскири волја хем кај џала пало е Исусескоро пример. (Читин Лука 6:22, 23; Кол. 1:10, 11.) Амаро бахталипе шај те спорединел пе јекхе јагаја ки јекх лампа. Адалеске со и јаг тани заштитими тари бавлал хем таро бршим ој шај понадари да те тхабљол. Слично аѓаар, амен да шај понадари да те ова бахтале бизи разлика со случинела пе ко амаро живото. Амен нане те нашава амаро бахталипе кеда сием насвале или кеда нане амен паре. Чак ка ова бахтале кеда о мануша асана аменге или кеда амари фамилија или о јавера противинена пе аменге. Уствари, тегани амаро бахталипе ка овел панда побаро, соске џанаја кај о искушенија со иси амен баши амари вера докажине кај амен сием чачутне ученикија е Христосескере (Матеј 10:22; 24:9; Јован 15:20). Адалеске о Јаков шај сине те пишинел: „Пхраљален, кеда ка овен тумен различна искушенија, дикхен ко адава сар причина те овен бахтале“ (Јак. 1:2).

7-8. Со овела амаре вераја кеда иси амен искушенија?

⁷ О Јаков спомнинѓа панда јекх причина соске о христијања тане спремна те издржинен чак попхаре неволје. Ов вакерѓа: „Адава со тумари вера тани искушими, керела те овен истрајна“ (Јак. 1:3). О неволје шај те спорединен пе јагаја која со користинела пе те шај те обликујнел пе јекх мачи. Кеда о мачи таќарела пе хем шудрарела пе, ов овела поцврсто. Слично аѓаар, кеда трпинаја неволје, амари вера овела позорали. Адалеске о Јаков пишинѓа: „И истрајност нека завршинел пли бути, те шај те овен совршена хем целосна бизи нисави мана“ (Јак. 1:4). Кеда дикхаја кај о искушенија керена амари вера те овел позорали, амен шај те ова бахтале џикоте истрајнаја.

⁸ Ко акава писмо, о Јаков спомнинѓа несаве буќа со шај те керен те нашава амаро бахталипе. Кола тане адала предизвикија, хем сар шај те накхава лен?

9. Соске ваљани аменге мудрост?

⁹ Предизвик: Кеда на џанаја со те кера. Кеда иси амен проблемија, амен мангаја о Јехова те поможинел аменге те ана одлуке со фалинена ле, поможинена амаре пхраленге хем пхењенге, хем поможинена аменге  те ачхова верна е Јеховаске (Ерем. 10:23). Ваљани аменге мудрост те џана со те кера хем со те вакера адаленге со противинена пе аменге. Шај те осетина амен обесхрабриме кеда на џанаја со те кера, хем адава шај сигате те лел амаро бахталипе.

10. Спрема Јаков 1:5, со ваљани те кера те шај те добина мудрост?

¹⁰ Решение: Роде е Јеховастар мудрост. Ако мангаја те издржина ко искушенија хем те ова бахтале, мора прво е Јеховастар те рода ки молитва те дел амен мудрост те шај те ана шукар одлуке. (Читин Јаков 1:5.) Со ваљани те кера ако мислинаја кај о Јехова на одговоринела одма ко амаре молитве? Ваљани понадари да те молина амен е Девлеске. Амен на досадинаја е Јехова кеда родаја лестар мудрост хем ов нане те хољанел аменге. Амаро небесно Дад дела дарежливо кеда молинаја ле баши мудрост те издржина ко искушенија (Пс. 25:12, 13). Ов дикхела амаре неволје, сикавела аменге сочувство хем спремно тано те поможинел аменге. Сигурно акава керела амен те ова побахтале! Ама, сар о Јехова дела амен мудрост?

11. Со ваљани јавер те кера те шај те добина мудрост?

¹¹ О Јехова дела амен мудрост преку пло Лафи (Изр. 2:6). Те шај те добина адаја мудрост, мора те проучина и Библија хем амаре публикацие. Ама, нане доволно само те проучина, него мора хем те живина спрема е Девлескере мудра советија. О Јаков пишинѓа: „Ма шунен само о лафи, него живинен спрема лесте“ (Јак. 1:22). Кеда применинаја е Девлескере советија, тегани панда повише ка трудина амен те кера мир, ка ова поразумна хем помилостива (Јак. 3:17). Акала особине поможинена аменге те ова бахтале џикоте истрајнаја ко искушение.

12. Соске тано важно те џана шукар и Библија?

¹² Е Девлескоро Лафи тано сар ајна. Ов  поможинела аменге те дикха со ваљани те кера пошукар хем сар ваљани те кера адава (Јак. 1:23-25). На пример, откеда проучинаја е Девлескоро Лафи, амен хаљоваја кај ваљани те кера промене ко амаро карактер. Адалеа со поможинела аменге о Јехова, амен сикљоваја те ова кротка кеда о мануша или несаво проблеми нервиринела амен. Адалеске со на хољанаја сигате, пошукар реагиринаја кеда иси амен проблемија. Шај пошукар те размислина хем те ана пошукар одлуке (Јак. 3:13). Бут тано важно те џана шукар и Библија!

13. Соске ваљани те проучина о примерија сој тане денде ки Библија?

¹³ Понекогаш сикљоваја со на ваљани те кера, одкеда керѓем јекх грешка. Ама, адава тано пхаро начин те сикљовел пе. Пошукар начин те добина мудрост тано те сикљова таро е јаверенгере шукар постапке хем таро ленгере грешке. Адалеске о Јаков охрабринела амен те дикха о примерија таро мануша сој пишиме ки Библија, сар сој о Авраам, и Раав, о Јов хем о Илија (Јак. 2:21-26; 5:10, 11, 17, 18). Адала верна слуге е Јеховаскере шај сине те овен бахтале иако трпинѓе неволје. Акала примерија баши истрајност сикавена аменге кај амен да шај те кера адава ако о Јехова поможинела амен.

14-15. Соске ваљани те расчистина амаре сумње?

¹⁴ Предизвик: Кеда иси амен сумње. Понекогаш шај те овел аменге пхаро те хаљова нешто со вакерела и Библија или шај о Јехова на одговоринела ко амаре молитве ко начин сар со очекујнѓем амен. Адава шај те керел те сумнина амен. Ако на кераја нешто против адава, о сумње ка слабонкерен амари вера хем ка руминен амаро амалипе е Јеховаја (Јак. 1:7, 8). Хем адава шај те керел чак те нашава амари надеж баши иднина.

¹⁵ О апостол Павле спорединѓа амари надеж баши иднина сар јекх котва (Евр. 6:19). Јекх котва икерела о броди ко јекх тхан чак кеда иси силно бура хем аѓаар на мукхела о броди те кхувел ко баре бара. И котва тани закачими ко броди јекхе синџиреа. Ама, ако о синџири чхинѓола тегани и котва нане корисно. Сар и ’рѓа со оштетинела о синџири, аѓаар о сумње со нане расчистиме слабонкерена амари вера. Кеда иси ле противибе, јекх мануш со сумнинела пе шај те нашавел пли вера кај е Јеховаскере ветувања нане те исполнинен пе. Ако нашаваја амари вера, амен нашаваја амари надеж. Сар со пишинѓа о Јаков, о мануш со сумнинела пе „тано сар морско брани касте со и бавлал ингарела ле адари акари“ (Јак. 1:6). Асавко мануш шај никогаш нане те овел бахтало!

16. Со ваљани те кера ако иси амен сумње?

¹⁶ Решение: Расчистин тле сумње; кер позорали тли вера. Сигате кер нешто те расчистине тле сумње. Ко време кеда живинела сине о пророко о Илија, е Јеховаскоро народо сумнинела пе сине ко буќа ко кола со верујнела сине. О Илија вакерѓа ленге: „Џи кеда ка овен неодлучна? Ако о Јехова тано чачутно Девел служинен леске, а ако тано о Ваал, служинен леске“ (1. Цар. 18:21). Исто тано авдиве да. Амен ваљани те испитина хем те уверина амен кај о Јехова тано чачутно Девел, кај и Библија тани лескоро Лафи хем кај е Јеховаскере сведокија тане лескоро народо (1. Сол. 5:21). Ако кераја адава, ка расчистина амаре сумње хем ка кера амари вера позорали. Ако ваљани аменге помош башо адава шај те рода таро старешине. Мора сигате те расчистина амаре сумње ако мангаја те ачхова бахтале џикоте служинаја е Јеховаске!

17. Со ка случинел пе ако нашаваја амари храброст?

¹⁷ Предизвик: Обесхрабрување. Е Девлескоро Лафи вакерела: „Ако обесхрабринеа тут ко диве кеда иси тут неволја, тли сила ка  слабонел“ (Изр. 24:10). О хебрејско лафи сој акате преведимо сар „обесхрабринеа тут“ шај те значинел „те нашаве тли храброст“. Ако нашавеа тли храброст, сигате ка нашаве тло бахталипе.

18. Со значинела те ова истрајна?

¹⁸ Решение: Нека овел тут доверба ко Јехова кај ка дел тут храброст те истрајне. Ваљани аменге храброст те шај те издржина ко неволје (Јак. 5:11). О лафи со користинѓа о Јаков акате баши „истрајност“ пренесинела и мисла баши некасте кова со терѓола одлучно ко пло тхан. Шај мислинаја ко јекх војнико кова со храбро терѓола ко пло тхан хем на нашела кеда нападинена ле о душмања.

19. Со шај те сикљова таро е Павлескоро пример?

¹⁹ О Павле денѓа амен бут шужо пример баши храброст хем баши истрајност. Понекогаш ов осетинѓа пе слабо. Ама, ов шај сине те истрајнел адалеске со сине ле доверба ко Јехова кај ов ка дел ле и сила сој леске потребно (2. Кор. 12:8-10; Фил. 4:13). Амен да шај те овел амен асавки сила хем храброст ако понизно признајнаја кај ваљани аменге е Јеховаскири помош (Јак. 4:10).

20-21. Ко со шај те ова увериме?

²⁰ Шај те ова сигурна кај о неволје со доживинаја лен нане казна таро Јехова. О Јаков уверинела амен: „Нијекх, кеда ка овел ко искушение те на вакерел: ’О Девел искушинела ман‘. Соске, нијекх нашти искушинела е Девле лошнипаја, а ов да на искушинела никас лошнипаја“ (Јак. 1:13). Кеда сием увериме ко акава, амен оваја попаше амаре мангле небесно Дадеа (Јак. 4:8).

²¹ О Јехова „на менинела пе“ (Јак. 1:17). Ов поможинѓа е христијаненге таро прво веко кеда сине лен неволје, а исто аѓаар ка поможинел аменге да авдиве. Искрено молин е Јехова те поможинел туке те добине мудрост, вера хем храброст. Ов ка одговоринел ко тле молитве. Тегани ка уверине тут кај ов ка поможинел туке те ачхове бахтало кеда иси тут неволје!