1. Соске шај те добина совет, хем соске сариненге аменге ваљани адава?

ПОНЕКОГАШ сариненге аменге ваљани совет. Ко несаве случаја шај амен коркори родаја совет некастар касте со поштујнаја. А ко јавера случаја шај несаво пхрал со секиринела пе аменге ка вакерел кај џаја ко погрешно друмо хем кај ка кера нешто башо со покасно ка каина амен (Гал. 6:1). Или, шај те добина совет откеда керѓем несаво сериозно грево. Бизи разлика соске добинаја совет, ваљани те шуна ле. Адава тано башо амаро шукарипе хем шај те спасинел амаро живото (Изр. 6:23).

2. Спрема Изреки 12:15, соске ваљани те шуна о совет?

² Амаро главно стихо охрабринела амен те шуна „о лафија е мудра манушенгере“ (Изр. 22:17). Нијекх мануш на џанела са. Секогаш иси некој со џанела повише амендар хем тано поискусно. (Читин Изреки 12:15.) Кеда шунаја совет, сикаваја кај сием понизна хем кај сием свесна башо амаре границе. Исто аѓаар, адава сикавела кај хаљоваја кај ваљани аменге помош те шај те исполнина амаре целија. О Јехова водинѓа е мудро царе е Соломоне те пишинел: „О планија успејнена кеда иси бут советникија“ (Изр. 15:22).

3. Ко кола начинија шај те добина совет?

³ Шај те добина совет ко директно или ко индиректно начин. Кола советија тане индиректна? Шај ка читина нешто ки Библија или ко амаре публикацие со ка чхивел амен те размислина башо амаре ставија или постапке хем адава ка поттикнинел амен те кера промене (Евр. 4:12). Адава тано јекх индиректно совет. А кола советија тане директна? Јекх старешина или јавер зрело пхрал шај те вакерел аменге  нешто коте со ваљани те променина амен. Адава тано директно совет. Ако некој таро мангипе дела амен библиско совет, ваљани те ценина ле, те шуна ле хем те применина ле.

4. Спрема Проповедник 7:9, со на ваљани те кера кеда добинаја совет?

⁴ Обично попхаро аменге те прифатина директно совет, шај чак ка осетина амен повредиме. Соске? Иако сием свесна кај сием несовршена, шај те овел аменге пхаро те прифатина совет кеда некој ка вакерел аменге баши несави амари негативно особина. (Читин Проповедник 7:9.) Шај ка почмина те оправдина амен. Шај ка вакера кај таро погрешна мотивија денѓа амен о совет или те жалина амен башо начин сар денѓа амен адава совет. Шај чак те критикујна ле хем те вакера: „Котар лела песке право те дел ман совет? Со на дикхела песте!“ Хем ако на париринела аменге о совет, шај нане ни те шуна ле или ка рода јаверестар совет кова со ка вакерел аменге адава амен со мангаја те шуна.

5. Со ка дикха ки акаја статија?

⁵ Ки акаја статија ка дикха библиска примерија таро мануша со отфрлинѓе совет хем таро мануша со прифатинѓе ле. Исто аѓаар, ка дикха со ка поможинел аменге те прифатина совет хем те овел амен корист таро адава.

6. Со сикљоваја таро начин сар постапинѓа о цари Ровоам кеда добинѓа совет?

⁶ Размислин башо Ровоам. Кеда уло цари ко Израел, о народо родинѓа лестар те локхљарел о пхарипа кова со лескоро дад, о Соломон, чхивѓа упро Израелција. О Ровоам постапинѓа шукар адалеа со пучља е попхурен таро Израел те вакерен леске сар те одговоринел е манушенге. О попхуре советинѓе ле кај о мануша секогаш ка поддржинен ле ако керела адава со родена лестар (1. Цар. 12:3-7). Изгледа, е Ровоамеске на свиџинѓа пе о совет со денѓе ле о попхуре адалеске ов пучља околен со бариле леа заедно. Адале манушен веројатно сине лен околу 40 берш хем веројатно сине лен несаво искуство ко живото (2. Лет. 12:13). Ама ко акава случај, ола денѓе лошно совет е Ровоамеске. Вакерѓе леске те чхивел панда побаро пхарипе е народоске (1. Цар. 12:8-11). Адалеске со о Ровоам акана добинѓа дуј различна советија, ов шај сине те пучел е Јехова кова совет те шунел. Наместо адава, ов одлучинѓа те шунел о совет кова со леске повише париринѓа хем керѓа адава со вакерѓе леске о потерне. Адалеске о последице сине страшна хем е Ровоамеске хем е Израелцонге. Амен да шај те добина совет кова со нане баш те свиџинел пе аменге. Сепак, ако тано библиско совет ваљани те прифатина ле.

7. Со сикљоваја таро е Озијаскоро пример?

⁷О цари Озија отфрлинѓа совет. Ов кхувѓа ко јекх дело таро храми коте со само о свештеникија смејнена сине те кхувен хем мангља те тхарел темјан. Е Јеховаскере свештеникија вакерѓе леске: „Озија нане тут право те тхаре темјан е Јеховаске! Само о свештеникија смејнена те керен адава“. Сар реагиринѓа о Озија? Те прифатинел сине понизно о совет хем одма те икљол сине таро храми, о Јехова шај ка простинел леске сине. Наместо адава, о Озија хољанѓа. Соске на прифатинѓа о совет? Ов сигурно мислинѓа песке кај сине ле право те керел са со мангела адалеске со сине цари. Ама о Јехова на мислинѓа аѓаар. Адалеске со сине арогантно, о Јехова  казнинѓа ле лепраја хем „ачхило лепрозно са џикоте на муло“ (2. Лет. 26:16-21). Таро е Озијаскоро пример сикљоваја кај бизи разлика кој сием ако на шунаја о библиско совет о Јехова нане те прифатинел амен сар пле слуге.

8. Сар реагиринѓа о Јов кеда добинѓа совет?

⁸ Бут појавер таро лошна примерија со дикхлем лен акана, ки Библија иси исто шукар примерија таро мануша кола со сине наградиме соске прифатинѓе совет. Размислин башо Јов. Иако бут мангела сине е Девле хем мангела сине те керел лескири волја, ов на сине совршено. Кеда сине ки бут пхари ситуација почминѓа те вакерел несаве погрешна буќа. Адалеске добинѓа директно совет хем таро Елију хем таро Јехова. Сар реагиринѓа о Јов? Ов понизно прифатинѓа о совет. Ов вакерѓа: „Керава сине лафи ама бизо те хаљовав... иранава палал са со вакерѓум, хем каинава ман ки прашина хем ко право“. О Јехова денѓа берекети е Јовеске соске сине понизно (Јов 42:3-6, 12-17).

9. Соске о Мојсеј тано шукар пример кеда керела пе лафи башо прифатибе совет?

⁹О Мојсеј тано шукар пример соске прифатинѓа укор откеда керѓа сериозно грешка. Ки јекх прилика, ов бут хољанѓа хем на денѓа чест е Јеховаске. Адалеске, е Мојсејеске на сине дозволимо те кхувел ки Ветими пхув (4. Мој. 20:1-13). Кеда родинѓа таро Јехова те менинел пли одлука, о Јехова вакерѓа леске: „Доста, ма спомнин манге више адава“ (5. Мој. 3:23-27). О Мојсеј на хољанѓа. Наместо адава, ов прифатинѓа е Јеховаскири одлука хем о Јехова понадари да користинѓа ле те шај те водинел е Израелцон (5. Мој. 4:1). Хем о Јов хем о Мојсеј прифатиѓе совет хем ола тане шукар пример пало кова со ваљани те џа. О Јов на оправдинѓа пе, него менинѓа пло стави. О Мојсеј сикавѓа кај прифатинѓа е Јеховаскоро совет адалеа со ачхило верно иако нашавѓа и предност која со бут мангела ла сине.

10. а) Спрема Изреки 4:10-13, сави корист иси амен ако прифатинаја совет? б) Саво шукар стави сикавѓе несаве пхраља хем пхења кеда добинѓе совет?

¹⁰ Бут ка користинел аменге ако џаја пало пример е верна манушенгоро, сар со сине о Јов хем о Мојсеј. (Читин Изреки 4:10-13.) Бут таро амаре пхраља хем пхења керѓе баш адава. Дикх со вакерела о пхрал о Емануел, кова со живинела ко Конго, башо совет со добинѓа ле: „Несаве зрела пхраља таро мло собрание дикхле кај ка перав ко духовно поглед хем адалеске пробинѓе те поможинен манге. Применинѓум ленгоро совет хем адава поможинѓа манге те избегинав бут проблемија“. * И Меган, јекх пионерка тари Канада, башо совет вакерела: „На свиџинела пе сине манге секогаш адава со шунава сине, ама адава ваљани сине те шунав. А о Марко, јекх пхрал тари Хрватска, вакерела: „Нашавѓум јекх одговорност ко собрание. Ама кеда размислинава башо адава со уло, хаљовава кај о совет со добинѓум ле поможинѓа манге палем те овав духовно зорало“.

11. Со вакерѓа о пхрал Карл Клајн башо адава те прифатинел пе совет?

¹¹ Јекх јавер пример баши некасте со сине ле корист таро адава со прифатинѓа совет сине о пхрал Карл Клајн кова со служинѓа сар члени ко Водечко тело. Ко пло искуство о пхрал Клајн спомнинела јекх ситуација кеда добинѓа јекх строго совет таро пло паше амал о Џозеф Ратерфорд. О  пхрал Клајн признајнела кај ко почеток на сине леске локхо те прифатинел о совет. Ов вакерела: „О јавер пути кеда [о пхрал Ратерфорд] дикхља ман, асандор вакерѓа: ‘Здраво Карл!’ Ама, адалеске со сиум сине панда повредимо едвај пхравѓум мо муј те поздравинав ле. Тегани ов иранѓа манге: ‘Карл пазин! О Бенг тано пали туте!’ Сине манге незгодно хем вакерѓум леске: ‘Нане ништо, на сиум туке хољамо пхрала Ратерфорд’. Ама ов џанља кај сиум леске хољамо хем адалеске палем вакерѓа манге: ‘Хаљовава тут, само пазин, о Бенг тано пали туте’. Ов сине ко право! Ако икераја холи против јекх пхрал, посебно некаске со иси ле право те вакерел аменге нешто, ка мукха тхан е Сатанаске те астарел амен“ * (Еф. 4:25-27). О пхрал Клајн пхрифатинѓа совет хем адалеске ов хем о Ратерфорд ачхиле паше амала.

12. Сар шај и понизност те поможинел аменге те прифатина совет? (Псалм 141:5).

¹² Со шај те поможинел аменге те прифатина совет? Ваљани те ова понизна хем те на бистра кај сием несовршена хем кај понекогаш постапинаја неразумно. Сар со дикхлем англедер, е Јове сине ле погрешно стави. Ама, покасно променинѓа пло размислување хем о Јехова наградинѓа ле башо адава. Ов сикавѓа кај сине понизно адалеа со прифатинѓа о совет со денѓа ле о Елију иако о Елију сине бут потерно лестар (Јов 32:6-7). И понизност исто аѓаар ка поможинел аменге те применина о совет чак кеда мислинаја кај на ваљани аменге совет или кеда окова со дела амен совет тано потерно амендар. Јекх старешина тари Канада вакерела: „Адалеске со нашти те дикха амен аѓаар сар о јавера со дикхена амен, нашти духовно те напредујна ако никој на советинела амен“. Сарине амен ваљани ки побари мера те развина о особине со авена таро свети дух хем те ова пошукар ки служба. (Читин Псалм 141:5.)

13. Сар ваљани те дикха ко совет кова со добинаја ле?

¹³Дикх ко совет сар доказ башо е Девлескоро мангипе. О Јехова мангела аменге о најшукар (Изр. 4:20-22). Кеда дела амен совет преку пло Лафи, преку библиска публикацие или преку несаво зрело христијани, ов сикавела аменге пло мангипе. Ко Евреите 12:9, 10 пишинела: „Ов керела адава башо амаро шукарипе“.

14. Ко со ваљани те концентририна амен кеда добинаја совет?

¹⁴Концентририн тут ко совет, а на ко начин сар туке дендо. Понекогаш шај те мислина аменге кај о совет со добинѓем ле  на сине вакердо баш ко најшукар начин. Џанѓола пе, секова јекх со дела совет ваљани те пазинел сар керела адава те шај о јавер полокхе те прифатинел ле (Гал. 6:1). * Ама кеда приминаја совет ваљани те размислина башо адава со шај те сикљова таро совет, чак кеда мислинаја кај окова со денѓа амен совет шај сине те керел адава ко пошукар начин. Шај те пуча амен: „Чак ако на свиџинела пе манге о начин сар добинѓум о совет, дали иси нешто со шај те применинав? Шај ли те на концентриринав ман ко грешке околескере со дела ман о совет хем те дикхав со шај те сикљовав?“ Ка овел мудро ако родаја начин сар те применина било кова совет со добинаја ле (Изр. 15:31).

15. Соске ваљани те рода совет?

¹⁵ И Библија поттикнинела амен те рода совет. Ко Изреки 13:10 пишинела: „Окола со родена совет тане мудра“. Акава тано чаче аѓаар! Окола со родена совет наместо те аџикерен те авел некој те дел лен совет, обично повише ка напредујнен ко духовно поглед таро окола со на родена совет. Адалеске, наместо те аџикере о јавера те ден тут совет, роде ту совет.

16. Ко кола ситуацие шај те рода совет?

¹⁶ Кеда шај те рода совет таро амаре пхраља хем пхења? Размислин башо акала ситуацие: 1) Јекх пхен викинела јекхе искусно пхења те џал лаја ко библиско курси хем пало адава родела латар совет башо адава сар шај пошукар те сикавел ки служба. 2) Јекх пхен со нане ко брако мангела те кинел песке пантолке, адалеске пучела јекхе зрело пхења те вакерел лаке искрено со мислинела башо пантолке. 3) Јекх пхрал со ваљани прво пути те икерел јавно предавање замолинела јекхе искусно говорнико те шунел ле хем те вакерел леске несаво совет сар шај те овел пошукар. Чак несаво пхрал со бершенцар икерела говорија шај те родел совет таро искусна говорникија хем пало адава те применинел о совет со добинела.

17. Со шај те поможинел аменге те овел амен корист таро совет?

¹⁷ Ко следна курке или масекија сарине амен ка добина совет — бизи разлика дали директно совет или индиректно совет. Ко асавке прилике, на ваљани те бистра о буќа башо кола керѓем лафи ки акаја статија. Ов понизно, концентририн тут ко совет а на ко адава сар сине дендо о совет хем применин ле. Никој амендар на бијанѓовела мудро. Ама кеда „шунаја совет хем прифатинаја о укор“, е Девлескоро Лафи ветинела аменге кај ка „ова мудра“ (Изр. 19:20).