1. Сави сине е Јаковескири фамилија?

О ЈАКОВ, е Исусескоро пхрал, барило ки јекх духовно фамилија. * Лескере родителија, о Јосиф хем и Марија, мангена сине бут е Јехова хем денѓе пестар са те шај те служинен леске. Е Јакове сине ле панда јекх берекети — лескоро побаро пхрал уло о ветимо Месија. Кобор бари чест сине е Јакове те овел дело тари адаја фамилија!

2. Кола причине сине е Јакове те џал пало пример пле побаре пхралескоро?

² Е Јакове сине ле бут причине те џал пало пример пле побаре пхралескоро (Мат. 13:55). На пример, кеда е Исусе сине ле 12 берш, ов добором шукар џанела сине о списија со чак о верска учителија сине лестар бут воодушевиме (Лука 2:46, 47). О Јаков шај керела сине столарско бути заедно е Исусеа. Ако сине адава аѓаар, тегани сине ле прилика те џанел пе пхрале бут шукар. О Натан Нор бут пути вакерела сине: „Сикљовеа бут башо јекх мануш кеда кереа леа заедно бути“. * Исто аѓаар, о Јаков веројатно приметинѓа кај о Исус бајрола сине хем „овела сине помудро хем понадари да мангена ле сине о Девел хем о мануша“ (Лука 2:52). Адалеске шај мислинаја аменге кај о Јаков би ваљани сине те овел јекх таро прва ученикија е Исусескере. Ама адава на сине аѓаар.

3. Саво стави сине е Јакове џикоте о Исус керела сине пли служба ки Пхув?

 ³ Џикоте трајнела сине е Исусескири служба ки Пхув, о Јаков на уло јекх таро лескере ученикија (Јован 7:3-5). Уствари, ов шај мислинела сине исто сар несаве тари фамилија кола со мислинена сине кај е Исусе „мукхља ле и годи“ (Мар. 3:21). Хем ништо на сикавела сине кај о Јаков сине пумаре дајаја е Маријаја кеда о Исус сине ковимо ко стубо мучибаске (Јован 19:25-27).

4. Кола поуке ка дикха ки акаја статија?

⁴ Пало несаво време, о Јаков почминѓа те верујнел ко Исус хем уло старешина коле со о јавера таро христијанско собрание поштујнена сине. Ки акаја статија ка дикха дуј поуке кола со шај те сикљова лен таро Јаков: 1) Соске ваљани те ачхова понизна? 2) Сар шај те ова шукар учителија?

5. Со керѓа о Јаков откеда о Исус воскреснинѓа хем појавинѓа пе леске?

⁵ Кеда уло о Јаков е Исусескоро верно следбенико? Откеда о Исус воскреснинѓа „појавинѓа пе е Јаковеске, а пало адава са е апостоленге“ (1. Кор. 15:7). Откеда случинѓа пе адава, е Јаковескоро живото скроз менинѓа пе. Ов сине заедно е јавере апостоленцар ки јекх упруни соба ко Ерусалим џикоте аџикерена сине те добинен о свети дух (Дела 1:13, 14). Пало несаво време, е Јакове сине ле бари чест те служинел сар члени ко водечко тело таро прво веко (Дела 15:6, 13-22; Гал. 2:9). Хем отприлика англедер 62 берш а.е., о Девел користинѓа ле те пишинел јекх писмо е помазиме христијаненге. Акава писмо поможинела аменге да авдиве, бизи разлика дали иси амен надеж те живина вечно ко небо или ки Пхув (Јак. 1:1). Спрема о историчари Јосиф Флавиј, о еврејско првосвештенико о Ана (Ананија), нарединѓа о Јаков те овел мудардо. О Јаков ачхило верно е Јеховаске џи ко крајо таро пло живото ки Пхув.

6. Ко саво начин разликујнела пе сине о Јаков таро религиозна водачија ко адава време?

⁶О Јаков сине понизно. Соске шај те вакера адава? Размислин саво стави сине е Јакове спрема о Исус а саво сине е религиозна водачен. Кеда о Јаков дикхља јасна доказија кај о Исус тано е Девлескоро Чхаво, ов понизно прифатинѓа адава. Ама о главна свештеникија ко Ерусалим на керѓе адава. На пример, нашти сине те вакерен кај о Исус на ваздинѓа е Лазаре таро муле. Ама, наместо те прифатинен кај о Исус  сине бичхалдо таро Јехова, ола мангле те мударен хем е Исусе хем е Лазаре (Јован 11:53; 12:9-11). Покасно кеда о Исус воскреснинѓа, ола пробинѓе те гаравен адава таро мануша (Мат. 28:11-15). Адалеске со акала религиозна водачија сине горда ола отфрлинѓе е Месија.

7. Соске на ваљани те ова горда?

⁷И поука аменге: Ма ов гордо хем ов спремно те сикљове таро Јехова. Исто сар јекх насвалипе со шај те керел амаро дословно вило те на керел шукар бути, аѓаар и гордост шај те керел амаро симболично вило те на керел шукар бути хем аѓаар те на ова послушна ко е Јеховаскере упатствија. О Фарисеија сине добором бут горда со на мангле те верујнен ко јасна доказија кај о Исус сине водимо таро е Девлескоро духо хем кај тано е Девлескоро Чхаво (Јован 12:37-40). Адава сине опасно друмо ко кова со џана сине, соске аѓаар нашавѓе и прилика те добинен о вечно живото (Мат. 23:13, 33). Бут тано важно понадари да те дозволина е Девлескоро Лафи хем лескоро духо те керен промене ки амари личност хем те влијајнен ко амаро размислување хем ко амаре одлуке (Јак. 3:17). Адалеске со о Јаков сине понизно, ов сине спремно те сикљовел таро Јехова. Хем сар со ка дикха, адалеске со ов сине понизно шај сине те овел шукар учители.

8. Со шај те поможинел амен те ова шукар учителија?

⁸ Е Јакове на сине ле бари школа. О религиозна водачија таро лескоро време сигурно дикхена сине ки лесте исто сар со дикхена сине ко Петар хем ко Јован — сар „неписмена хем обична“ (Дела 4:13). Ама кеда читинаја о библиско лил кова со пхиравела лескоро анав, дикхјола пе кај ов сиклило те овел шукар учители. Сар о Јаков шај амен да нане амен бари школа. Ама адалеске со о Јехова поможинела амен преку пло духо хем дела амен обука преку пли организација, амен да шај те ова шукар учителија. Те дикха акана саво учители сине о Јаков хем со шај амен те сикљова лестар.

9. Ко саво начин сикавѓа о Јаков?

⁹О Јаков на користинела сине пхаре лафија хем на објаснинела сине о буќа ко  комплицирано начин. Адалеске, окола со шунена ле сине џанена сине со ваљани те керен. На пример, размислин ко саво едноставно начин о Јаков вакерѓа е христијаненге кај мора те овен спремна те трпинен неправда бизо те икерен холи. Ов пишинѓа: „Башо окола со истрајнѓе вакераја кај тане бахтале. Шунѓен кобор издржинѓа о Јов хем дикхлен сар о Јехова наградинѓа ле ко крајо таро искушенија — дикхлен кај о Јехова тано пхердо сочувство хем милост“ (Јак. 5:11). Приметин кај о Јаков користинела сине е Девлескоро Лафи. Аѓаар, ов поможинѓа пле публикаке те дикхен кај о Јехова секогаш наградинела околен кола со слично сар о Јов тане леске верна. О Јаков истакнинѓа адаја поука едноставна лафенцар хем ко логично начин. Аѓаар сикавѓа кај адаја поука на авела лестар него таро Јехова.

10. Кова тано јекх начин сар шај те сикава сар о Јаков?

¹⁰И поука аменге: Користин едноставна лафија хем сикав таро е Девлескоро Лафи. Амари цел на ваљани те овел те сикава е јаверенге кобор бут џанаја, него ваљани те сикава ленге кобор бут о Јехова џанела хем кобор грижинела пе ленге (Рим. 11:33). Адава шај те кера ле ако адава со вакераја ле секогаш темелинела пе ки Библија. На пример, наместо те вакера амаре интересентенге со би кераја амен ко ленгоро тхан, ваљани те поможина ленге те размислинен башо библиска примерија хем те хаљовен саво тано е Јеховаскоро размислување хем чувствија. Тегани, ола ка манген те применинен адава со сиклиле башо Јехова, а на баши аменде.

11. Саве проблеменцар боринена пе сине несаве христијања, хем саво совет денѓа лен о Јаков? (Јаков 5:13-15)

¹¹О Јаков дикхела сине реално ко буќа. Таро лескоро писмо јасно дикхела пе сине кај ов сине свесно коле проблеменцар боринена пе сине о пхраља хем о пхења, хем јасно вакерѓа ленге со ваљани те керен. На пример, несаве христијаненге сине пхаро те шунен несаво совет (Јак. 1:22). А јавера сине пристрасна спрема о барвале (Јак. 2:1-3). Исто аѓаар, сине несаве со нашти сине те контролиринен пумари чхиб (Јак. 3:8-10). Адале христијанен сине лен сериозна проблемија, ама о Јаков на откажинѓа пе лендар. Ов денѓа лен совет ко јекх љубезно ама директно начин хем охрабринела сине околен со сине духовно слаба те роден помош таро старешине. (Читин Јаков 5:13-15.)

12. Сар шај те ачхова позитивна кеда поможинаја амаре интересентенге?

¹²И поука аменге: Ов реално ама дикх позитивно ко јавера. Буте џененге коленцар со проучинаја и Библија шај те овел пхаро те применинен о библиско совет (Јак. 4:1-4). Шај ваљани ленге повише време те шај те чхинавен е лошна навикенцар хем те развинен о христијанска особине. Сар о Јаков, амен да мора храбро те вакера ленге коте ваљани те керен промене. Исто аѓаар, ваљани те ачхова позитивна, те овел амен доверба кај о Јехова ка привлечинел е понизна манушен ки песте хем кај ка дел лен сила те керен промене ко пумаро живото (Јак. 4:10).

13. Спрема Јаков 3:2, со признајнѓа о Јаков?

¹³Е Јакове сине ле исправно стави баши песте. Ов на мислинела сине кај тано поважно таро јавера христијања адалеске со сине е Исусескоро пхрал или адалеске со сине ле важна задаче. Ов башо јавера христијања вакерела сине кај тане лескере „мангле пхраља“ (Јак. 1:16, 19; 2:5). О Јаков на мангела сине о јавера те мислинен кај  тано совршено. Наместо адава, ов вакерѓа: „Сарине амен бут пути грешинаја“. (Читин Јаков 3:2.)

14. Соске ваљани те признајна кај кераја грешке?

¹⁴И поука аменге: Ма бистре кај сарине грешинаја. На смејнаја те мислина кај сием пошукар таро амаре интересентија. Соске на? Ако амаре интересентеске даја чувство кај сием совршена, ов шај те обесхрабринел пе хем те мислинел песке кај никогаш нашти те керел адава со родела лестар о Девел. Ама ако искрено признајнаја кај на сине аменге секогаш локхо те применина о библиска начелија хем ако објаснинаја сар о Јехова поможинѓа аменге те кера промене ко амаро живото, ка поможина амаре интересентеске те дикхел кај ов да шај те служинел е Јеховаске.

15. Саве споредбе користинела сине о Јаков? (Јаков 3:2-6, 10-12).

¹⁵О Јаков користинела сине делотворна споредбе. Иако о свети дух поможинела ле сине, ов веројатно сиклило сар те сикавел е јаверен аѓаар со размислинела сине башо споредбе кола со лескоро побаро пхрал о Исус користинела лен сине. О споредбе кола со о Јаков користинѓа ко пло писмо тане едноставна хем о поуке тане јасна. (Читин Јаков 3:2-6, 10-12.)

16. Соске ваљани те користина споредбе колендар со сикљовела пе?

¹⁶И поука аменге: Користин споредбе колендар со сикљовела пе. Кеда користинеа шукар споредбе поможинеа е јаверенге те керен песке слика ки годи. Аѓаар поможинеа тле публикаке те памтинел о важна библиска чачипа. О Исус тано најбаро пример башо користибе шукар споредбе, а лескоро пхрал о Јаков гело пало лескоро пример. Акана те дикха јекх таро е Јаковескере споредбе хем те размислина соске тани добором делотворно.

17. Соске и споредба со аракхљовела ко Јаков 1:22-25 тани делотворно?

¹⁷ Читин Јаков 1:22-25. Иси повише причине соске е Јаковескири споредба баши ајна тани делотворно. Ов мангља те истакнинел јекх важно поука: Те шај те овел амен корист таро е Девлескоро Лафи, нане доволно само те читина ле, него мора те применина адава со читинаја. Освен адава, о Јаков биринѓа споредба која со о јавера шај сине локхе те хаљовен ла — мануш со дикхела пе ки ајна. Која сине и поука? Глупаво  би овела ако јекх мануш дикхела пе ки ајна хем приметинела кај ваљани те срединел нешто, а сепак на керела ништо башо адава. Слично, глупаво би овела ако читинаја е Девлескоро Лафи хем дикхаја кај ваљани те кера промене ки амари личност, а сепак ништо на кераја башо адава.

18. Кола трин буќа ваљани те кера кеда користинаја споредба?

¹⁸ Кеда користинеа споредба, ваљани исто сар о Јаков те кере трин буќа: 1) Бирин споредба која со ка поможинел туке те истакнине и поука баши која со кереа лафи. 2) Користин споредба која со локхесте шај те хаљовел пе. 3) Објаснин сар шај те применинел пе и поука тари адаја споредба. Ако туке пхаро коркори те сетине тут ки несави шукар споредба ко амаре публикацие шај те аракхе бут споредбе кола со шај те користине лен. * Ма бистре, о споредбе тане сар јекх микрофони — ола ка керен „погласно“ и поука која со мангеа те сикаве ла. Адалеске, користин споредбе само башо важна мисле кола со мангеа те истакнине. Џанѓола пе, и најважно причина соске мангаја те ова пошукар учителија нане те шај те истакнина амен, него те поможина со шај повише манушенге те овен дело таро е Јеховаскири бахтали фамилија.

19. Сар сикаваја кај ценинаја амаре духовно фамилија?

¹⁹ О Јаков барило пле побаре пхралеа кова со сине совршено. Амен нане амен асавки предност, ама иси амен и чест те служина е Јеховаске заедно амаре духовно фамилијаја. Сикаваја кај мангаја лен адалеа со дружинаја амен ленцар, сикљоваја лендар хем заедно ленцар верно учествујнаја ки проповедничко активност. Кеда трудинаја амен те ова сар о Јаков ко амаро стави, ко амаре постапке хем ко начин сар сикаваја, тегани анаја чест е Јеховаске хем поможинаја е искрена манушенге те овен паше амаре мангле небесно Дадеа.