1-2. а) Кеда посебно сетинаја амен ко амаре мангле со муле? б) Со керѓа о Исус и рат англедер те мерел?

ШАЈ накхља бут време откеда муло амендар некој со мангаја ле, ама амен на бистраја ле. Посебно сетинаја амен ки лесте панда повише кеда авела паше о диве кеда муло.

² Секова берш, заедно милиоња манушенцар таро цело свето кхедаја амен те шај те сетина амен ко диве кеда муло некој касте со бут мангаја ле — о Исус Христос (1. Пет. 1:8). Кхедаја амен те шај те сетина амен ко мануш кова со денѓа пло живото сар откупнина те шај те спасинел амен таро грево хем таро мериба (Мат. 20:28). Уствари, о Исус мангља лескере следбеникија те сетинен пе ко лескоро мериба. И рат англедер те мерел ов воспоставинѓа е Господарескири вечера хем заповединѓа: „Керен акава те сетинен тумен манде“ (Лука 22:19).

3. Башо со ка кера лафи ки акаја статија?

³ Јекх тикно број таро адала сој тане присутна ки Спомен-свеченост иси лен надеж те џан ко небо. А о милиоња јавера кола сој присутна иси лен надеж те живинен ко рај ки Пхув. Ки акаја статија ка дикха таро кола причине о солдуј групе мангена те овен присутна ки Спомен-свеченост секова берш. Исто аѓаар, ка дикха сави корист иси амен таро адава со сием присутна. Прво, те дикха несаве причине соске о помазаникија тане присутна.

4. Соске о помазаникија лена таро маро хем тари мол ки Спомен-свеченост?

⁴ Секова берш о помазаникија присуствујнена ки Спомен-свеченост хем лена таро маро хем тари мол. Соске лена таро акала симболија? Те шај те одговорина ко адава, те дикха со случинѓа пе ки последно рат ко е Исусескоро живото акате ки Пхув. Одма пали Пасха, о Исус воспоставинѓа јекх посебно вечера која со покасно ули пенџарди сар е Господарескири вечера. Ов денѓа пле 11 апостоленге маро хем мол хем вакерѓа ленге те хан хем те пиен. Ов керѓа ленцар дуј сојузија или договорија — о нево сојуз хем о сојуз башо Царство * (Лука 22:19, 20, 28-30). Преку акала сојузија, адала апостолија хем ограничимо број јавера мануша шај те овен царија хем свештеникија ко небо (Отк. 5:10; 14:1). Адалеске сој тане вклучиме ко акала дуј сојузија, само о помазаникија со ачхиле ки Пхув шај те лен таро маро хем тари мол ки Спомен-Свеченост.

5. Со џанена о помазаникија баши пумари надеж која сој ленге денди?

⁵ Те дикха панда јекх причина соске о помазаникија мангена те присуствујнен ки Спомен-свеченост. Акава настан дела лен прилика те размислинен баши пумари надеж. О Јехова денѓа лен јекх бут шужи надеж. Ола шај те уживинен ко бесмртно живото ко небо, те владинен заедно хем е Исус Христосеа хем е јавере помазаниконцар кола со воскреснинѓе, а сој најважно, ка шај те дикхен е Јехова! (1. Кор. 15:51-53; 1. Јов. 3:2). О помазаникија тане свесна кај шај те служинен ко небо само адалеске сој тане викиме баши адаја задача. Ама те шај те џан ко небо мора те ачховен верна џи ко пумаро мерибе (2. Тим. 4:7, 8). Ола тане бут бахтале кеда размислинена баши пумари небесно надеж (Тит 2:13). А сар тано е „јавере бакхренцар“? (Јован 10:16) Соске ола тане присутна ки Спомен-свеченост?

6. Соске о јавера бакхре тане присутна ки Спомен-свеченост?

⁶ О јавера бакхре тане присутна ки Спомен-свеченост ама ола на лена таро симболија. Ко 1938 берш, ола прво пути сине каниме те овен присутна ки Спомен-свеченост. Ки Стражарско кула таро 1 март 1938 берш сине вакердо: „Ка овел шукар о јавера да бакхре те овен присутна ко акава состанок хем те дикхен со керела пе... Ленге да акава настан ваљани те овел причина башо бахталипе“. Исто сар о гостија сој бахтале соске тане каниме ко јекх бијав хем со шај те овен присутна, аѓаар о јавера да бакхре тане бахтале со шај те овен присутна ки Спомен-свеченост.

7. Соске о јавера бакхре тане бахтале со шај те шунен о говор ки Спомен-свеченост?

⁷ О јавера да бакхре размислинена баши пумари надеж. Ола тане бахтале со шај те шунен о говор ки Спомен-свеченост, соске ко адава говор истакнинела пе со ка керен о Христос хем о 144.000 башо верна мануша џикоте трајнена о 1.000 берша. О Цари, о Исус Христос, ка водинел околен со ка владинен таро небо те поможинен и Пхув те керел пе рај хем те поможинен е манушен те овен совршена. Чаче тано нешто посебно е милиоња манушенге сој тане присутна ки Спомен-свеченост те шунен сар ки иднина ка исполнинен пе о библиска  пророштвија, сар сој окола со аракхљона ко Исаија 35:5, 6; 65:21-23; хем ко Откровение 21:3, 4. Адава со замислинена песте хем пумаре манглен ко адава нево свето, керела ленгири надеж баши иднина позорали хем керела лен те овен одлучна никогаш те на чхинавен те служинен е Јеховаске (Мат. 24:13; Гал. 6:9).

8. Која тани панда јекх причина соске о јавера бакхре присуствујнена ки Спомен-свеченост?

⁸ Те дикха панда јекх причина соске о јавера бакхре присуствујнена ки Спомен-свеченост. Ола мангена те сикавен кај мангена е помазаникон хем кај поддржинена лен. Е Девлескоро Лафи пророкујнѓа кај о помазаникија хем окола со иси лен надеж те живинен ки Пхув паше ка соработинен. Ко саво начин? Те дикха некобор примерија.

9. Сар о пророштво таро Захарија 8:23 сикавела саве чувствија иси е јавере бакхрен башо помазаникија?

⁹ Читин Захарија 8:23. Акава пророштво керела аменге јекх бут шужи слика башо адава саве чувствија иси е јавере бакхрен башо пумаре помазиме пхраља хем пхења. Е лафенцар „Евреи“ хем „туменцар“ мислинела пе ки исто група — о помазаникија со ачхиле ки Пхув (Рим. 2:28, 29). О „деш мануша таро са о чхибја со керена лафи о народија“ претставинена е јавере бакхрен. Ола ка „астарен таро шеј“ е помазаникон аѓаар со верно ка поддржинен лен хем заедно ленцар ка служинен е Јеховаске ко исправно начин. Адалеске, и рат кеда икерела пе и Спомен-свеченост, о јавера бакхре сикавена кобор паше тане е помазаниконцар аѓаар сој тане присутна заедно ленцар.

10. Со керѓа о Јехова те шај те исполнинел о пророштво таро Езекиел 37:15-19, 24, 25?

¹⁰ Читин Езекиел 37:15-19, 24, 25. О Јехова исполнинѓа акава пророштво аѓаар со керѓа о помазаникија хем о јавера бакхре паше те соработинен. Ко акава пророштво спомнинена пе дуј прачке. Окола со иси лен небесно надеж тане сар и прачка „баши Јуда“ (о племе котар со биринена пе сине о Царија ко Израел), а окола со иси лен надеж те живинен ки Пхув тане сар и прачка „башо Ефрем“. * О Јехова спојнѓа акале дује групен хем ола уле „јекх прачка“. Акава значинела кај ола служинена заедно јекхе Цареске, е Исус Христосеске. Секова берш, о помазаникија хем о јавера бакхре тане присутна ки Спомен-свеченост на сар дуј посебна групе, него сар „јекх стадо јекхе пастиреа“ (Јован 10:16).

11. Сар „о бакхре“ сој тане спомниме ко Матеј 25:31-36, 40 поддржинена е Христосескере пхрален?

¹¹ Читин Матеј 25:31-36, 40. „О бакхре“ тари акаја споредба претставинена е праведникон таро последна диве колен со иси надеж те живинен ки Пхув. Ола верно поддржинена е Христосескере пхрален кола сој тане панда ки Пхув аѓаар со поможинена лен те исполнинен и бари одговорност — те проповединел пе хем те керел пе ученикија ко цело свето (Мат. 24:14; 28:19, 20).

12-13. Ко саве јавера начинија сикавена о јавера бакхре кај поддржинена е Христосескере пхрален?

¹² Секова берш, некобор курке англедер и Спомен-свеченост, о јавера бакхре сикавена кај поддржинена е Христосескере пхрален аѓаар со целосно учествујнена ко посебна акцие те канинен е манушен ки Спомен-свеченост. (Дикх и рамка „ Дали спреминеа тут башо периоди околу и Спомен-свеченост?“)  Исто аѓаар, ола поможинена те керен пе са о потребна подготовке те шај те икерел пе и Спомен-свеченост ко са о собранија ко цело свето, иако ко повише собранија нане помазаникија. О јавера бакхре тане бахтале со шај те поддржинен е Христосескере пхрален ко асавко начин. Ола џанена кај о Исус дикхела ко са адава со керена лескере помазиме пхраленге сар те пхене леске керена ле (Мат. 25:37-40).

¹³ Кола тане панда несаве причине соске сарине амен, бизи разлика тари амари надеж, присуствујнаја ки Спомен-свеченост?

14. Сар сикавѓе аменге о Јехова хем о Исус баро мангипе?

¹⁴Благодарна сием башо мангипе со сикавѓе аменге о Јехова хем о Исус. О Јехова ко бут начинија сикавѓа аменге кај мангела амен. Ама о најбаро начин сар сикавѓа пло мангипе тано аѓаар со бичхалѓа пле скапоцено Чхаве те мучинел пе хем те мерел баши аменге (Јован 3:16). О Исус исто аѓаар сикавѓа аменге баро мангипе аѓаар со спремно денѓа пло живото аменге (Јован 15:13). Никогаш нашти ки исто мера те ирана е Јеховаске хем е Исусеске башо мангипе со сикавѓе ле аменге. Ама шај те сикава кај сием благодарна аѓаар со секова диве ка живина сар о Јехова со мангела (Кол. 3:15). Хем амен присуствујнаја ки Спомен-свеченост те шај те на бистра ленгоро мангипе, хем исто аѓаар те сикава ленге кај амен да мангаја лен.

15. Соске хем о помазаникија хем о јавера бакхре бут ценинена и откупнина?

¹⁵Бут ценинаја и откупнина (Мат. 20:28). О помазаникија бут ценинена и откупнина соске преку лате иси лен бут шужи надеж. Адалеске со верујнена ки е Христосескири жртва, о Јехова дикхела ки ленде сар праведна хем посвојнѓа лен сар пле чхаве (Рим. 5:1; 8:15-17, 23). О јавера да бакхре тане благодарна баши откупнина. Адалеске со иси лен вера ки е Христосескири жртва, шај те овел лен чисто совест англо Девел, шај те керен леске свето служба хем те овел лен надеж кај ка накхен и бари неволја (Отк. 7:13-15). Јекх начин сар хем о помазаникија хем о јавера бакхре сикавена пумари благодарност баши откупнина тано аѓаар со секова берш тане присутна ки Спомен-свеченост.

16. Која тани панда јекх причина соске сием присутна ки Спомен-свеченост?

¹⁶ Јавер причина соске сием присутна ки Спомен-свеченост тани адаја соске мангаја те ова послушна е Исусеске. Бизи разлика сави надеж иси амен, сарине амен мангаја те шуна е Исусескири заповед која со денѓа ла ки рат кеда воспоставинѓа и Спомен-свеченост. Ов вакерѓа: „Керен акава те сетинен тумен манде“ (1. Кор. 11:23, 24).

17. Сар поможинела аменге и Спомен-свеченост те ова попаше е Јеховаја?

¹⁷Оваја попаше е Јеховаја (Јак. 4:8). Сар со дикхлем, и Спомен-свеченост дела амен прилика те размислина баши надеж со денѓа амен о Јехова хем башо мангипе со сикавѓа ле аменге (Ерем. 29:11; 1. Јов. 4:8-10). Кеда размислинаја баши амари сигурно надеж хем башо адава кобор о Девел мангела амен, тегани амаро мангипе спрема лесте бајровела хем амаро амалипе леа овела позорало (Рим. 8:38, 39).

18. Кеда размислинаја башо е Исусескоро пример, ко со сием поттикниме?

¹⁸Поттикниме сием те џа пало е Исусескоро пример (1. Пет. 2:21). Некобор диве  англедер и Спомен-свеченост читинаја библиска извештаија башо последно курко таро е Исусескоро живото ки Пхув, башо лескоро мерибе хем воскресение. А ки рат кеда тани и Спомен-свеченост, о говор сетинкерела амен ко е Исусескоро мангипе спрема аменде (Еф. 5:2; 1. Јов. 3:16). Џикоте читинаја башо е Исусескере жртве хем размислинаја башо адава, сием поттикниме „те живина аѓаар сар со живинела сине ов“ (1. Јов. 2:6).

19. Сар шај те ачхова ко е Девлескоро мангипе?

¹⁹Оваја панда поодлучна те ачхова ко е Девлескоро мангипе (Јуда 20, 21). Ачховаја ко е Девлескоро мангипе аѓаар со кераја са со шај те ова леске послушна, те славина лескоро свето анав хем те кера ле бахтало (Изр. 27:11; Мат. 6:9; 1. Јов. 5:3). И Спомен-свеченост поттикнинела амен те ова панда поодлучна секова диве те живина ко начин колеа со вакераја е Јеховаске: „Мангава вечно те ачховав ко тло мангипе!“

20. Кола шукар причине иси амен те ова присутна ки Спомен-свеченост?

²⁰ Бизи разлика дали амари надеж тани те живина ко небо или ки Пхув, иси амен шукар причине те ова присутна ки Спомен-свеченост. Кеда кхедаја амен секова берш ко адава диве, сетинаја амен ко мерибе е Исус Христосескоро, касте со бут мангаја ле. Ама сој најважно, сетинаја амен ко најбаро доказ башо мангипе — мангипе кова со о Јехова сикавѓа ле аменге аѓаар со денѓа пле Чхаве сар откупнина. Акава берш и Спомен-свеченост ка икерел пе петок раќате, 15 април 2022 берш. Амен мангаја е Јехова хем лескере Чхаве. Адалеске, ко адава диве ништо нане аменге поважно таро адава те ова присутна ки Спомен-свеченост.