1. Сар шај те накхава време е Јеховаја?

АМЕН бут мангаја те накхава време е манушенцар сој аменге важна. О брачна парија сој бахтале ко брако уживинена кеда тане заедно. О терне осетинена пе шукар кеда тане пумаре амаленцар. Хем сарине амен ценинаја о време со шај те накхава ле амаре пхраленцар хем пхењенцар. Ама сој најважно, амен мангаја те накхава време амаре Девлеа. Адава шај те кера ле аѓаар со ка молина амен леске, ка читина лескоро Лафи хем ка размислина баши лескири намера хем башо лескере бут шуже особине. О време со накхаваја ле е Јеховаја тано бут скапоцено (Пс. 139:17).

2. Соске шај нане амен доволно време башо духовна активностија?

² Иако уживинаја те накхава време е Јеховаја, адава нане секогаш локхо. Адалеске со сием бут зафатиме шај те овел аменге пхаро те аракха време башо духовна активностија. Амари бути, и фамилија хем јавера буќа со ваљани те кера лен шај те лен амендар добором време со ка мислина аменге кај сием бут зафатиме те молина амен, те проучина хем хор те размислина.

3. Со јавер шај те лел амаро време?

³ Иси јекх јавер да опасност со шај те лел амаро време. Ако на пазинаја, шај те дозволина несаве активностија кола со нане погрешна те чорен амаро време кова со шај те користина ле те ова попаше е Јеховаја. На пример,  шукар тано те одвојна аменге време башо одмор хем рекреација. Ама чак и шукар рекреација шај те лел амендар добором бут време со нане те ачхол аменге време башо духовна активностија. На ваљани те бистра кај и рекреација нане и најважно бути ко амаро живото (Изр. 25:27; 1. Тим. 4:8).

4. Со ка дикха ки акаја статија?

⁴ Ки акаја статија ка дикха соске ваљани те одлучина сој тано најважно ко амаро живото. Исто аѓаар, ка дикха сар шај најшукар те користина о време со одвојнѓем ле е Јеховаске хем сави корист ка овел амен таро адава.

5. Сар адава со ка размислинен башо совет кова со аракхљовела ко Ефешаните 5:15-17, ка поможинел е терненге те одлучинен те биринен о најшукар живото?

⁵Бирин о најшукар друмо ко живото. О терне бут пути размислинена башо адава кова друмо ка овел ленге о најшукар ко живото. Тари јекх страна, о учителија хем и фамилија кола со нане е Јеховаскере сведокија шај те охрабринен лен те џан ко факултети те шај те аракхен шукар бути хем те заработинен бут паре. Ако биринена асавко друмо, адава шај те лел лендар бут време. А тари јавер страна, о родителија хем о пхраља шај охрабринена е тернен те посветинен пумаро живото е Јеховаске ки служба. Со шај те поможинел јекхе тернеске кова со мангела е Јехова, те анел и најшукар одлука? Ка овел шукар ако читинела хем размислинела башо Ефешаните 5:15-17. (Читин.) Откеда ка читинел акала стихија шај те пучел пе: „Која тани е Јеховаскири волја? Сави одлука ка керел ле бахтало? Која одлука ка поможинел манге најшукар те користинав мло време?“ Ма бистре, „о диве тане лошна“ хем о крајо акале светоскоро колеа со владинела о Сатана тано бут паше. Ка овел мудро те користина амаро живото ко начин кова со ка керел е Јехова бахтало.

6. Сави одлука анѓа и Марија, хем соске адаја одлука сине мудро?

⁶Чхив о поважна буќа ко прво тхан. Ако мангаја шукар те користина амаро време понекогаш ка ваљани те бирина машкар дуј буќа кола со нане погрешна. Акава шај те дикха ле таро извештај кеда о Исус гело ки Марија хем ки Марта. Ки адаја прилика, и Марта спреминѓа бут хајбаске соске сине бут бахтали со о Исус ало ленде ко гости. Ама и Марија користинѓа адаја прилика те бешел узо Исус хем те шунел адава со вакерела. Иако адава со керѓа и Марта на сине погрешно, ама о Исус вакерѓа кај и Марија биринѓа о пошукар дело (Лука 10:38-42). Пало несаво време, и Марија шај бистерѓа со хаља адава диве, ама шај те ова сигурна кај ој никогаш на бистерѓа адава со сиклили таро Исус. Исто сар и Марија со ценинѓа адава кратко време е Исусеа, амен да ценинаја амаро време со иси амен е Јеховаја. Сар шај најшукар те користина адава време?

7. Соске и молитва, о проучибе хем о хор размислибе тане важна?

⁷Ваљани те хаљова кај и молитва, о проучибе хем о хор размислибе тане дело таро амаро обожавање. Кеда молинаја амен, кераја лафи амаре небесно Дадеа кова со бут мангела амен (Пс. 5:7). Кеда проучинаја и Библија, сикљоваја таро Девел кастар со авела и цело мудрост  (Изр. 2:1-5). А кеда хор размислинаја башо адава со сиклилем, дикхаја е Јеховаскере шуже особине хем на бистраја и бут шужи намера со иси ле аменцар. Нане пошукар начин сар шај те користина амаро време. Ама сар шај те овел амен најбари корист таро време со одвојнаја ле башо акала духовна активностија?

8. Со шај те сикљова таро адава сар о Исус користинѓа пло време ки пустина?

⁸Ако шај, аракх туке јекх мирно тхан. Размислин башо е Исусескоро пример. Англедер те почминел пле службаја ки Пхув, ов сине 40 диве ки пустина (Лука 4:1, 2). Ко адава мирно тхан, о Исус шај сине те молинел пе е Јеховаске хем те размислинел сави намера иси лескере Даде леа. Акава спреминѓа е Исусе башо испитија коленцар со панда хари ваљани сине те соочинел пе. Со шај те сикљове таро е Исусескоро пример? Ако иси тут бари фамилија, шај нане секогаш те овел локхо кхере те аракхе јекх мирно тхан. Ко асавко случај шај ка ваљани те џа негде авријал. Баш адава керела и Џули тари Франција кеда мангела те молинел пе е Јеховаске. Ој хем лакоро ром живинена ки јекх соба, адалеске нане лаке секогаш локхо те овел коркори хем ништо те на лел лакоро внимание. И Џули вакерела: „Адалеске, секова диве џава ко парко. Адари шај те овав коркори, те концентриринав ман хем шукар те керав лафи е Јеховаја“.

9. Иако сине бут зафатимо, сар сикавѓа о Исус кај сине леске бут важно те овел паше е Јеховаја?

⁹ О Исус сине бут зафатимо. Сегде коте со џала сине ки служба авена сине пали лесте бут мануша хем сарине мангена сине те овен леа. Ки јекх прилика кхединѓа пе „цело диз англо удар“ те шај те дикхен ле. Иако сине бут зафатимо, о Исус секогаш аракхела сине време те молинел пе е Јеховаске. Рано сабајле, англедер те икљол о кхам, џала сине ко тхан коте со шај сине коркори те накхел време пле Дадеа (Мар. 1:32-35).

10-11. Спрема Матеј 26:40, 41, со охрабринѓа о Исус пле апостолен те керен, ама со случинѓа пе?

¹⁰ И последно рат таро пло живото ки Пхув, ко крајо тари пли служба, о Исус палем родинѓа јекх мирно тхан коте со шај сине хор те размислинел хем те молинел пе. Ов аракхља асавко тхан ки Гетсеманско градина (Мат. 26:36). Ки адаја прилика о Исус вакерѓа пле учениконге нешто бут важно баши молитва.

¹¹ Те дикха со случинѓа пе. Кеда ресле ки Гетсеманско градина сине касно раќате, шај накхља екваш и рат. О Исус вакерѓа пле апостоленге „ачховен џангавде“, хем  гело те молинел пе (Мат. 26:37-39). Ама џикоте молинела пе сине, ола засуќе. Кеда дикхља кај совена, о Исус палем охрабринѓа лен „ачховен џангавде хем молинен тумен“. (Читин Матеј 26:40, 41.) Ов џанља кај сине лен баро стрес хем кај сине уморна. Ов сине сочувствително хем адалеске признајнѓа кај „о тело тано слабо“, ама о Исус гело панда дуј пути те молинел пе хем кеда иранела пе сине, ов аракхела сине е апостолен сар совена наместо те молинен пе (Мат. 26:42-45).

12. Со шај те кера ако понекогаш нашти молинаја амен соске иси амен баро стрес или сием бут уморна?

¹²Бирин о исправно време. Понекогаш шај те овел амен баро стрес или те ова бут уморна хем адалеске шај нашти те молина амен. Ако случинѓа пе туке асавко нешто џан кај јавера да осетинѓе пе аѓаар. Тегани со шај те кере? Несаве со обично молинена пе сине ко крајо таро диве дикхле кај поможинела ленге адава со почминѓе те молинен пе порано, кеда нане добором уморна. А јавера халиле кај и положба ки која со молинена пе влијајнела упри ленгири концентрација. Ама со ако сиан бут секиримо или обесхрабримо хем адалеске нашти молинеа тут? Вакер е Јеховаске сар осетинеа тут. Шај те ове сигурно кај амаро милостиво Дад ка хаљовел тут (Пс. 139:4).

13. Сар шај о електронска уредија те лен амаро внимание кеда сием зафатиме духовна активностенцар?

¹³Ма мукх нешто те лел тло внимание кеда проучинеа. И молитва нане о единствено начин сар шај те кера позорало амаро амалипе е Јеховаја. Адава со ка проучина е Девлескоро Лафи хем со ка ова присутна ко состанокија шај исто аѓаар те поможинел аменге те ова паше е Девлеа. Со шај те кере те шај те овел тут побари корист кеда проучинеа хем кеда сиан присутно ко состанокија? Пуч тут: „Со обично лела мло внимание кеда сиум присутно ко состанок или кеда мангава те проучинав?“ Дали кеда јавинела пе манге некој, или кеда добинава порака ко мло телефони или ко несаво јавер електронско уред? Авдиве, милијарде манушен иси лен акала уредија. Јекх психолого вакерела: „Ако мангеа те концентририне тут бут и попхаро те кере адава кеда тло мобилно тано узи туте, соске тегани мислинеа ко нешто  јавер“. Англедер те почминел и програма ко конгрес, бут пути сием потсетиме те местина амаре електронска уредија аѓаар со нане те сметинен е јаверенге. Дали шај те кера о исто амаре уреденцар кеда сием коркори те шај ма те сметинен амен џикоте сием зафатиме духовна активностенцар?

14. Спрема Филипјаните 4:6, 7, сар ка поможинел амен о Јехова те концентририна амен?

¹⁴Молин е Јехова те поможинел туке те концентририне тут. Кеда приметинеа кај тле мисле почминена те џан негде јавертхе џикоте проучинеа или сиан ко состанок, молин е Јехова те поможинел туке. Ако сиан секиримо шај нане те овел туке локхо те циде адала мисле ки страна хем те концентририне тут ко духовна буќа, ама бут тано важно те кере адава. Молин тут башо мир кова со ка аракхел на само тло вило него исто аѓаар тле мисле. (Читин Филипјаните 4:6, 7.)

15. Која тани јекх корист ако накхаваја време е Јеховаја?

¹⁵ Ако одвојнеа туке време те кере лафи е Јеховаја, те шуне ле хем те размислине баши лесте, тегани ка овел тут бари корист. Сар? Прво, ка шај те ане пошукар одлуке. И Библија вакерела аменге кај „кој џала мудра манушенцар, мудро ка овел“ (Изр. 13:20). Значи, ако накхавеа време е Јеховаја, кастар со авела и мудрост, ту ка ове помудро. Бут пошукар ка хаљове сар те кере лескири волја хем те на кере нешто колеа со ка повредине ле.

16. Сар адава со накхаваја време е Јеховаја поможинела амен те ова пошукар учителија?

¹⁶ Дујто, ка ове пошукар учители. Јекх таро најважна целија со иси амен кеда проучинаја и Библија јекхе интересентеа тано те поможина леске те овел паше е Јеховаја. Со повише молинаја амен амаре небесно Дадеске, добором побаро ка овел амаро мангипе спрема лесте. А адава ка поможинел аменге пошукар те сикава амаре интересенте те мангел е Јехова. Баш адава керѓа о Исус. Ов истакнинѓа пле Дадескере шуже особине а адава бут поможинѓа лескере учениконге исто аѓаар те манген е Јехова (Јован 17:25, 26).

17. Соске и молитва хем о проучибе поможинена аменге те овел амен позорали вера?

¹⁷ Трито, тли вера ка овел позорали. Со случинела пе кеда молинеа е Јехова башо водство, утеха или поддршка? Секова пути кеда о Јехова одговоринела ки тли молитва тли вера овела позорали (1. Јов. 5:15). Со јавер шај те керел позорали тли вера? О лично проучибе. Ма бистре „и вера авела тари порака со шунаја“ (Рим. 10:17). Ама те шај те овел амен позорали вера ваљани те  кере нешто повише него само те џана нешто. Со ваљани те кера?

18. Објаснин соске ваљани хор те размислина.

¹⁸ Ваљани хор те размислина башо адава со сикљоваја. Дикх со керѓа о писатели таро Псалм 77. Ов сине секиримо соске мислинѓа кај о Јехова откажинѓа пе лестар хем таро јавера Израелција. Нашти сине чак раќате те совел таро акала мисле (стихија 2-8). Со керѓа башо адава? Ов вакерѓа е Јеховаске: „Ка размислинав башо адава со кереа, хор ка размислинав башо тле постапке“ (стихо 12). Џанѓола пе, о псалмисти сине свесно башо са адава со керѓа о Јехова баши леске хем башо пло народо англедер. Ама ов понадари да пучела пе сине: „Дали о Девел бистерѓа те овел милостиво, или лескири холи керѓа те чхинавѓовел лескири милост?“ (стихо 9). О псалмисти хор размислинела сине башо е Јеховаскере постапке хем башо адава кобор сикавѓа пли милост хем сочувство (стихо 11). Сар осетинѓа пе пало адава? Ов сине уверимо кај о Јехова нане те мукхел пле народо (стихо 15). Слично, тли вера ка овел позорали џикоте размислинеа башо адава со о Јехова више керѓа пле народоске хем со туке лично керѓа.

19. Сави јавер корист ка овел амен ако накхаваја време е Јеховаја?

¹⁹ Штарто хем најважно, тло мангипе спрема о Јехова ка бајрол. Повише таро са о јавера особине, о мангипе тано адава со ка поттикнинел тут те ове послушно е Јеховаске, те кере жртве, те шај те кере лескири волја хем те истрајне ко неволје (Мат. 22:37-39; 1. Кор. 13:4, 7; 1. Јов. 5:3). Ништо нане поскапоцено таро паше амалипе е Јеховаја (Пс. 63:1-8).

20. Со планиринеа те кере те шај те одвојне туке време башо Јехова?

²⁰ Ма бистре кај и молитва, о проучибе хем о размислибе тане дело таро амаро обожавање. Слично сар о Исус, роде мирно тхан коте со шај те накхаве време е Јеховаја. Циде тутар са со шај те лел тло внимание. Молин е Јехова те поможинел туке те концентририне тут кеда одвојнеа туке време башо духовна активностија. Ако шукар користинеа тло време акана, о Јехова ка дел тут вечно живото ко е Девлескоро нево свето (Мар. 4:24).