1. Слично сар о Давид, со шај некој амендар те пучел пе?

САРИНЕ амен мангаја те овел амен јекх мирно живото. Никој на мангела те овен ле секирацие. Ама, понекогаш осетинаја амен бут секириме. Адалеске, несаве слуге е Јеховаскере шај пучена пе адава со о Давид пучља е Јехова: „Џи кеда ка мучинен ман о секирацие, џи кеда мле диве ка овен пхерде жал?“ (Пс. 13:2).

2. Со ка дикха ки акаја статија?

² Иако сарине амен понекогаш сием секириме, иси буќа со шај те кера те на ова добором секириме. Ки акаја статија прво ка дикха кола буќа керена те осетина амен аѓаар. Пало адава ка дикха шов буќа со шај те поможинен аменге те ачхова смириме кеда иси амен проблемија.

3. Башо кола буќа шај те секирина амен, хем дали шај те чхинава лен?

³ Иси бут буќа со керена те осетина амен секириме, хем шај нане амен контрола упро несаве таро адала буќа. На пример, амен нашти те чхинава те бајрон секова берш о цене баши храна, башо шеја хем башо трошакија ко кхер. Исто аѓаар нане амен контрола упро адава кобор пути амаре колеге или соученикија ка чхивен амен ко искушение те ова нечесна или те кера неморал. Нашти те чхинава о криминал со иси ко тхан коте  со живинаја. Амен иси амен проблемија адалеске со побаро дело таро мануша на анена одлуке спрема е Девлескере начелија. О Сатана, о девел акале светоскоро, џанела кај о секирацие таро живото ко акава свето, чхинавена е манушен те служинен е Јеховаске (Мат. 13:22; 1. Јов. 5:19). На изненадинела амен со о свето тано пхердо стресна ситуациенцар!

4. Со шај те овел ако претерано секиринаја амен башо амаре проблемија?

⁴ Понекогаш шај добором те секирина амен башо проблемија, со нашти те мислина ко јавера буќа. На пример, шај те секирина амен кај нане те заработина доволно паре те шај те кина адава со ваљани аменге, или кај ка насваљова хем ка нашти те џа ки бути, па шај чак те нашава ла. Исто аѓаар шај секиринаја амен кај нане те ова верна кеда ка ова ко искушение те на шуна е Девлескоро закони. Панда хари о Сатана ка поттикнинел е манушен те нападинен е Девлескере народо, адалеске шај секиринаја амен башо адава со ка кера кеда о мануша ка нападинен амен. Шај пучеа тут: „Дали тано погрешно те секиринав ман башо асавке буќа?“

5. Ко со мислинѓа о Исус кеда вакерѓа: „Ма секиринен тумен“?

⁵ Џанаја кај о Исус вакерѓа пле учениконге: „Ма секиринен тумен“ (Мат. 6:25). Дали акава значинела кај ов очекујнела амендар те на секирина амен башо ништо? Сигурно на! Ма бистре кај несаве таро е Јеховаскере верна слуге ко пурано време исто аѓаар сине секириме, сепак о Јехова мангела лен сине * (1. Цар. 19:4; Пс. 6:3). Уствари, о Исус мангља те охрабринел амен. Ов на мангела те ова добором секириме со ка бистра те чхива и служба башо Девел ко прво тхан ко амаро живото. Тегани со шај те кера кеда осетинаја амен претерано секириме? (Дикх и рамка „ Сар те кере адава“.)

6. Спрема Филипјаните 4:6, 7, со ка поможинел аменге те ова смириме?

⁶ 1) Молин тут секогаш. Кеда сиан секиримо башо јекх проблеми, молин е Јехова те поможинел туке (1. Пет. 5:7). О Јехова шај те одговоринел ко тле молитве адалеа со ка дел тут мир „кова сој упредер секоја [манушикани] мисла“. (Читин Филипјаните 4:6, 7.) О Јехова ка дел тут мир преку пло свети дух (Гал. 5:22).

7. Со ваљани те овел амен ки годи кеда молинаја амен е Јеховаске?

⁷ Кеда молинеа тут е Јеховаске вакер леске са со иси тут ко вило. Ов конкретно. Вакер леске кова тано о проблеми хем објаснин сар осетинеа тут башо адава. Ако шај те решине о проблеми роде лестар мудрост хем сила те џане сар те кере адава. Ако нашти те решине о проблеми, роде е Јеховастар те поможинел туке те на секирине тут претерано. Кеда конкретно молинеа тут баши несави бути, сар со накхела о време ка шај пошукар те дикхе сар о Јехова одговоринела ко тле молитве. Ако о Јехова на одговоринела туке одма откеда молинѓан тут, ма откажин тут. О Јехова освен со мангела те ова конкретна, ов исто аѓаар мангела те ова упорна (Лука 11:8-10).

8. Со ваљани те спомнина ко амаре молитве?

⁸ Кеда вакереа е Јеховаске ки молитва со мучинела тут, ма бистре те благодарине тут леске. Чак кеда иси амен бут проблемија, шукар тано те размислина башо са  о берекетија со добинѓем лестар. Ама, со шај те кере кеда нашти те аракхе исправна лафија те вакере е Јеховаске сар осетинеа тут? Ма бистре ка о Јехова ка одговоринел ки тли молитва чак кеда шај само те вакере: „Молинава тут поможин манге!“ (2. Лет. 18:31; Рим. 8:26).

9. Сар шај те ова чаче безбедна?

⁹ 2) Нека овел тут доверба ки е Јеховаскири мудрост, а на ки тли. Ко време таро пророко Исаија, о народо тари Јуда дарана сине те на овен нападиме таро Асирција. Адалеске со о мануша тари Јуда на мангена сине о Асирција те освојнен лен, родинѓе помош таро Египќања (Иса. 30:1, 2). О Јехова предупрединѓа лен кај ленгири одлука ка ингарел лен ки пропаст (Иса. 30:7, 12, 13). Преку о Исаија, о Јехова вакерѓа е народоске сар ка овен чаче безбедна. Ов вакерѓа: „Ачховен смириме хем сикавен доверба [ко Јехова], адава ка овел тумари сила!“ (Иса. 30:15б).

10. Ко кола ситуацие шај те сикава кај иси амен доверба ко Јехова?

¹⁰ Сар шај те сикава доверба ко Јехова? Те дикха несаве примерија. Замислин кај нудинела пе туке јекх шукар платими бути, ама родела тутар те кере повише саатија бути хем ка спречинел тут те служине е Јеховаске добором кобор со служинеа акана. Или, замислин туке кај јекх таро тле колеге иси ле романтична чувствија спрема туте, ама адаја личност нане крстими. Или замислин туке кај некој тари тли фамилија вакерела туке: „Или ме или тло Девел“. Ки секоја таро акала ситуацие шај те овел туке пхаро те ане одлука, ама о Јехова ки секоја ситуација ка дел тут пло водство (Мат. 6:33; 10:37; 1. Кор. 7:39). Ама, о пучибе тано: „Дали ка овел тут доверба ко Јехова хем дали ка ове послушно ко лескоро водство?“

11. Кола библиска извештаија шај те проучина те шај те ачхова смириме кеда о јавера противинена пе аменге?

¹¹ 3) Сикљов таро шукар хем таро лошна примерија. Ки Библија иси бут извештаија со сикавена кај тано бут важно те ачхова смириме хем те овел амен доверба ко Јехова. Џикоте проучинеа акала извештаија, дикх со поможинѓа акале слугенге те ачховен смириме кеда о јавера противинена пе сине ленге. На пример, о апостолија на дарандиле кеда о еврејско Судско совет денѓа наредба те чхинавен те проповединен. Наместо адава, ола храбро вакерѓе: „Мора повише те шуна е Девле него е манушен“ (Дела 5:29). Чак кеда сине прогониме о апостолија на сине ки паника. Соске? Адалеске со џанле кај о Јехова тано тари ленгири страна. Ов сине задоволно адалеа со ола керена сине. Адалеске, ола понадари да проповединена сине о шукар хабери (Дела 5:40-42). Слично, кеда о ученико о Стефан ваљани сине те овел мудардо, ов ачхило добором смиримо со лескоро лико дикхјола сине „сар о лико јекхе ангелескоро“ (Дела 6:12-15). Соске? Адалеске со сине сигурно кај угодинела е Јеховаске.

12. Спрема 1. Петрово 3:14 хем 4:14, соске шај те ова бахтале кеда сием прогониме?

¹² Е апостолен сине лен јасна доказија кај о Јехова сине ленцар. Ов денѓа лен моќ те керен чудија (Дела 5:12-16; 6:8). Ама, авдиве о Јехова на дел амен асавки моќ. Сепак, о Јехова преку пло Лафи, љубезно уверинела амен кај кеда сием прогониме баши праведност, ов тано задоволно аменцар хем дела амен пло свети дух. (Читин 1. Петрово 3:14; 4:14.) Адалеске на ваљани те секирина амен башо адава со ка кера ако сием прогониме ки иднина. Наместо адава, ваљани те да са амендар те бајрара амари  доверба ко Јехова кај ов ка поддржинел амен хем ка спасинел амен. Исто сар со керѓе е Исусескере ученикија, амен да ваљани те овел амен доверба ко лескоро ветување: „Ка дав тумен лафија хем мудрост колаја со са тумаре противникија заедно нашти ка противинен пе туменге“. Ов исто аѓаар ветинѓа аменге: „Преку тумари истрајност ка спасинен тумаре животија“ (Лука 21:12-19). Никогаш ма бистре кај о Јехова памтинела о најтикне деталија башо пле слуге со муле верна. Адалеске ов ка воскреснинел лен.

13. Сави корист шај те овел амен ако проучинаја башо адала со на ачхиле смириме хем со на сине лен доверба ко Јехова?

¹³ Исто аѓаар шај те сикљова таро примерија таро окола со на ачхиле смириме хем со на сине лен доверба ко Јехова. Адава со ка проучина акала лошна примерија ка поможинел аменге те избегина те кера иста грешке со керѓе лен ола. На пример, кеда о Аса уло цари ки Јуда хем јекх бари војска али те нападинел ле, ле сине ле доверба ко Јехова хем ов денѓа ле берекети (2. Лет. 14:9-12). Покасно, о цари Васа таро Израел ало те нападинел е Аса потикне војскаја, ама акава пути е Аса на сине ле доверба ко Јехова кај ка спасинел ле сар со керѓа порано. Наместо адава, платинѓа е сириско војскаке те поможинел леске (2. Лет. 16:1-3). Хем ко крајо таро лескоро живото, кеда сине бут насвало, ле на сине ле доверба ко Јехова кај ка поможинел леске (2. Лет. 16:12).

14. Со шај те сикљова таро е Асаскере грешке?

¹⁴ Ко почеток, о Аса родела сине е Јехова кеда сине ле проблемија. Ама покасно ов на родела сине помош таро Девел, наместо адава ов пробинѓа коркори те решинел пле проблемија. Ко почеток, е Асаскоро плани те пучел е Сиријцон те поможинен леске против о Израелција изглединела сине сар шукар идеја. Ама акава мир на трајнѓа бут време. О Јехова преку јекх пророко вакерѓа леске: „Адалеске со сине тут доверба ко сириско цари, а на ко Јехова тло Девел, и војска таро сириско цари нашља таро тле васта“ (2. Лет. 16:7). Амен да ваљани те на мислина кај шај коркори те решина амаре проблемија бизо те рода водство таро Јехова преку лескоро Лафи. Чак кеда ваљани сигате те ана несави одлука, ваљани те овел амен доверба ко Јехова хем ов ка поможинел аменге те ана исправно одлука.

15. Со ваљани те кера кеда читинаја и Библија?

¹⁵ 4) Памтин библиска стихија. Кеда ка читине библиска стихија со сикавена кобор тано важно те ачхове смиримо хем те овел тут доверба ко Јехова, трудин тут те памтине лен. Те шај те кере адава читин лен ко гласо или пишин лен негде, хем пало адава повторин лен често. О Јехова вакерѓа е Исус Навинеске редовно те читинел о лил е законескоро те шај те постапинел мудро. Адава со читинела сине ко е Девлескоро закони ваљани сине поможинел леске ма те дарал хем храбро те водинел е Девлескере народо (Ис. Нав. 1:8, 9). Бут стихија ко е Девлескоро Лафи шај те поможинен туке те ове смиримо ко ситуацие со керена те осетине тут секиримо или те дара (Пс. 27:1-3; Изр. 3:25, 26).

16. Сар о Јехова преку о собрание поможинела аменге те ачхова смириме хем те овел амен доверба ки лесте?

¹⁶ 5) Дружин тут е Девлескере народоја. О Јехова користинела амаре пхрален хем пхењен те поможинел аменге те ачхова смириме хем те овел амен доверба ки лесте. Ко амаре состанокија иси амен корист таро говорија со икерена пе, таро коментарија со дена лен о присутна хем таро охрабрувачка разговорија со иси амен амаре пхраленцар  хем пхењенцар (Евр. 10:24, 25). Исто аѓаар, шај бут те охрабрина амен кеда вакераја амаре паше амаленге таро собрание башо адава со секиринела амен. „О шукар лафи“ таро јекх шукар амала шај те поможинел аменге похари те секирина амен (Изр. 12:25).

17. Спрема Евреите 6:19, сар и надеж башо Царство шај те поможинел аменге те ачхова смириме кеда иси амен проблемија?

¹⁷ 6) Кер позорали тли надеж. Амари надеж башо Царство тани „сар котва баши душа“ со поможинела аменге те ачхова смириме кеда иси амен проблемија или секирацие. (Читин Евреите 6:19.) Размислин башо е Јеховаскере ветувања баши иднина коте со никој нане те овел секирими башо ништо (Иса. 65:17). Замислин тут ко нево свето коте со ка овел мир хем коте со о лошна буќа нане више те постојнен (Мих. 4:4). Ка кере позорали тли надеж аѓаар со ка вакере е јаверенге башо нево свето. Де тутар са те проповедине хем те кере ученикија. Ако кереа акава, са џи ко крајо ка ове целосно сигурно кај ка исполнинел пе тли надеж (Евр. 6:11).

18. Саве предизвикија шај те овен амен ки иднина, хем сар шај успешно те икљова ко крајо ленцар?

¹⁸ Адалеске со о крајо акале светоскоро тано паше, ка овен амен повише проблемија со ка керен амен те ова секириме. Е бершескоро стихо башо 2021 берш шај те поможинел аменге те икљова ко крајо е проблеменцар хем те ачхова смириме, на амаре силаја него адалеа со ка овел амен доверба ко Јехова. Ко берш со авела, те сикава амаре постапкенцар кај иси амен вера ко е Јеховаскоро ветување: „Ачховен смириме хем сикавен доверба, адава ка овел тумари сила!“ (Иса. 30:15).