1. Сар влијајнѓа упро јекх терно чхаво јекх говор со сине икердо ко јекх конгрес ко 1935 берш?

КО 1926 БЕРШ јекх терно чхаво крстинѓа пе кеда сине ле 18 берш. Лескере родителија сине Истражувачија е Библијакере, сар со викинена пе сине е Јеховаскере сведокија ко адава време. Лен сине лен трин мурша хем дуј чхаја. Акала родителија сикавена сине пумаре чхавен те служинен е Јеховаске хем те џан пало е Исусескоро пример. Сар са о Истражувачија е Библијакере ко адава време, акава да терно мануш лела сине таро маро хем тари мол секова берш ки е Господарескири вечера. Ама, и надеж башо лескоро живото ки иднина менинѓа пе јекхе важно говореа со сине ле наслов „О баро мноштво“. Акава говор икерѓа ле о Ратерфорд ко 1935 берш, ко јекх конгрес ко Вашингтон, САД. Со сине откримо ко адава конгрес?

2. Кова чачипе о пхрал Ратерфорд објаснинѓа ле ко пло говор?

² Ко акава говор, о пхрал Ратерфорд објаснинѓа кој тане адала со припадинена ко „баро мноштво“ сој тано спомнимо ко Откровение 7:9. Џи тегани, о Истражувачија е Библијакере мислинена сине кај акаја да група ка џал те живинел ко небо, ама нане те овен царија заедно е Исусеа адалеске со сине похари верна. О пхрал Ратерфорд користинѓа стихија те шај те објаснинел кај о мануша таро баро мноштво нане бириме те живинен ко небо, ама ола тане о јавера  бакхре * е Христосескере кола со ка преживинен и бари неволја хем ка живинен вечно ки Пхув (Отк. 7:14). О Исус ветинѓа: „Иси ман јавера да бакхре, кола со нане таро акава трло. Ленде да мора те анав, хем ола ка шунен мло гласо, па сарине ка овен јекх стадо јекхе пастиреа“ (Јован 10:16). Акала јавера бакхре тане е Јеховаскере сведокија кола сој верна хем иси лен надеж те живинен засекогаш ко рај ки Пхув (Мат. 25:31-33, 46). Те дикха сар акава нево објаснување менинѓа о животија буте пхраленгоро хем пхењенгоро коте со сине вклучимо акава терно пхрал да (Пс. 97:11; Изр. 4:18).

3-4. Со халиле бут џене баши пумари надеж ко конгрес ко 1935 берш, хем соске?

³ Ко адава конгрес бут сине возбудливо кеда о пхрал со икерѓа о говор пучља е публика: „Шај ли те уштен сарине адала со иси лен надеж те живинен вечно акате ки Пхув?“ Јекх пхрал, кова со сине ко адава конгрес вакерѓа кај ов дикхља повише таро екваш таро адала мануша со сине ки публика сар уштена. О пхрал Ратерфорд вакерѓа: „Дикхен! О баро мноштво!“ Пало адава сарине ки публика гласно аплаудиринѓе. Адала со уштиле халиле кај о Јехова на биринѓа лен те живинен ко небо хем кај на сине помазиме е Девлескере духоја. О јавер диве ко конгрес, 840 џене крстинѓе пе а повише лендар сине таро јавера бакхре.

⁴ Пало акава говор, о терно чхаво со спомнинѓем ле англедер хем милја јавера сине спремна више те на лен таро маро хем тари мол ки е Господарескири вечера. Бут џене осетинѓе пе исто сар јекх понизно пхрал кова со вакерѓа: „Последно пути со лељум таро симболија сине ки Спомен-свеченост ко 1935 берш. Џанљум кај о Јехова пле свети духоја на денѓа ма надеж те живинав ко небо. Наместо адава, сине ман надеж те живинав ки Пхув хем те поможинав те керел пе о рај“ (Рим. 8:16, 17; 2. Кор. 1:21, 22). Оттегани, о број таро окола сој тане таро баро мноштво бајрола хем ола соработинена заедно е помазаниконцар со ачхиле ки Пхув хем со лена понадари да таро симболија ки е Господарескири вечера.

5. Со мислинела о Јехова башо адала со чхинавѓе те лен таро симболија ки Спомен-свеченост?

⁵ Сар дикхела о Јехова ко адала со чхинавѓе те лен таро симболија ки Спомен-свеченост пало 1935 берш? Хем со ако акана јекх Сведоко кова со лела таро симболија ки е Господарескири вечера покасно хаљола кај ов уствари нане помазимо е Девлескере духоја? (1. Кор. 11:28). Несаве почминѓе те лен таро симболија адалеске со на халиле шукар која тани ленгири надеж. Ама, ако ола искрено признајнена пумари грешка, чхинавена те лен таро симболија, хем понадари да верно служинена е Јеховаске, ов сигурно ка прифатинел лен сар дело таро јавера бакхре. Иако више на лена таро маро хем тари мол, ола понадари да ка овен присутна ки Спомен-свеченост адалеске со бут ценинена адава со о Јехова хем о Исус керѓе баши ленде.

6. Со заповединѓа о Исус е ангеленге?

⁶ Адалеске со и бари неволја тани бут  паше, ка овел охрабрувачко те дикха со вакерела о Откровение 7 поглавје башо помазиме христијања хем башо баро мноштво. О Исус заповединѓа е ангеленге понадари да те икерен о штар бавлала е уништибаскере. Ола на ваљани те мукхен адала бавлала те пхуден ки Пхув џикоте са о помазиме христијања нане запечатиме, а адава значинела кај конечно ка овен одобриме таро Јехова (Отк. 7:1-4). Сар награда башо адава со ачхиле верна, е Христосескере помазиме пхраља ка овен царија хем свештеникија заедно леа ко небо (Отк. 20:6). О Јехова, о Исус хем о ангелија ка овен бут бахтале кеда са о помазаникија ка добинен пумари награда упре ко небо.

7. Спрема Откровение 7:9, 10, кас дикхља о Јован ки визија, хем со керена? (Дикх и слика ки насловно страна.)

⁷ Откеда керела лафи башо акала 144.000 царија хем свештеникија, о Јован дикхела нешто возбудливо — јекх „баро мноштво“ кова со преживинела о Армагедон. Акала дуј групе разликујнена пе јекх јекхатар, адалеске со ко баро мноштво иси повише мануша него ко 144.000 хем ленгоро број нане одредимо. (Читин Откровение 7:9, 10.) Ола тане уравде ко парне шеја, адава сикавела кај тане бизи флека таро е Сатанаскоро свето хем кај ачхиле верна е Девлеске хем е Христосеске (Јак. 1:27). Ола гласно викинена адалеске сој тане спасиме таро Јехова хем таро Исус, е Девлескоро бакхро. Ола исто аѓаар ко пумаре васта иси лен палменгере гранке кова со сикавела кај прифатинена е Исусе сар поставимо цари таро Јехова. (Споредин Јован 12:12, 13.)

8. Со вакерела аменге о Откровение 7:11, 12 баши е Јеховаскири небесно фамилија?

⁸ Читин Откровение 7:11, 12. Сар реагиринѓе адала сој ко небо кеда дикхле е баре мноштво? О Јован дикхља кај сарине ко небо тане бахтале хем фалинена е Девле кеда дикхле е баре мноштво. Е Јеховаскири небесно фамилија едвај аџикерела те дикхел сар ка исполнинел пе акаја визија кеда о баро мноштво ка преживинел и бари неволја.

9. Спрема Откровение 7:13-15, со керела о баро мноштво акана?

⁹ Читин Откровение 7:13-15. О Јован пишинела кај о баро мноштво тховѓа пле шеја хем парнарѓа лен ко рат е бакхрескоро. Акава значинела кај иси лен чисто совест хем кај англо е Јеховаскере јакхја тане праведна (Иса. 1:18). Ола ветинѓе е Јеховаске кај ка служинен леске, крстинѓе пе, сикавена вера ки е Исусескири жртва хем паше тане е Јеховаја (Јован 3:36; 1. Пет. 3:21). Адалеске, о Девел тано задоволно ленцар хем ола шај те служинен леске диве хем рат акате ки Пхув. Акана ола ревно проповединена башо Царство хем керена ученикија соске е Девлескоро Царство тано ленге најважно таро са (Мат. 6:33; 24:14; 28:19, 20).

10. Ко со тано сигурно о баро мноштво, хем кова ветување аџикерела те исполнинел пе?

¹⁰ О баро мноштво кова со авела тари бари неволја тано сигурно кај о Девел ка грижинел пе ленге адалеске со „окова со бешела ко престол ка пхравел пло шатори машкар ленде“. Конечно ка исполнинел пе о ветување кова со аџикерѓе ле о јавера бакхре кај о Девел „ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха“ (Отк. 21:3, 4).

11-12. а) Спрема Откровение 7:16, 17, саве берекетија ка добинел о баро мноштво? б) Со шај о јавера бакхре те керен ки Спомен-свеченост, хем соске?

¹¹ Читин Откровение 7:16, 17. Авдиве, несаве таро е Јеховаскере сведокија тане  бокхале адалеске со нане лен доволно паре те кинен песке хајбаске или адалеске со иси граѓанска немирија хем војне. Јавера тане ко затвор баши пли вера. Ама, окола таро баро мноштво тане бут бахтале соске џанена кај откеда ка овел уништимо акава лошно свето, лен ка овел лен бут духовно хем физичко храна. Кеда о Јехова ка уништинел е Сатанаскоро лошно свето, ов ка заштитинел е баре мноштво тари пли холи која со ка овел сар „баро татипе“. Откеда ка завршинел и бари неволја, о Исус ка водинел околен со ка ачховен ки Пхув ко „пања со дена [вечно] живото“. Размислин башо акава: сави шужи надеж иси е баре мноштво. Милијарде мануша никогаш нане те мерен! (Јован 11:26).

¹² О јавера бакхре бут тане благодарна е Јеховаске хем е Исусеске баши акаја бут шужи надеж со иси лен! Иако о Јехова на биринѓа лен те живинен ко небо, ов мангела лен исто сар со мангела е помазаникон. Солдуј групе шај те славинен е Девле хем е Христосе. Јекх начин сар шај те керен адава тано аѓаар со ка овен присутна ки е Господарескири вечера.

13-14. Соске ваљани сарине те овен присутна ки Спомен-свеченост башо е Исусескоро мерибе?

¹³ Ко берша со накхле, ки Спомен-свеченост околу јекх таро милја мануша лена таро маро хем тари мол. Ко повише собранија никој на лела таро симболија. О побаро дело таро адала сој тане присутна ки Спомен-свеченост иси лен надеж те живинен ки Пхув. Тегани, соске тане присутна ола да ки е Господарескири вечера? Адава шај те спорединел пе е манушенцар кола тане присутна ко бијав таро ленгоро амал. Ола авена ко бијав те шај те сикавен пумаро мангипе хем пумари поддршка е брачно пареске. Слично аѓаар, о јавера бакхре тане присутна ки Спомен-свеченост адалеске со мангена те сикавен пумаро мангипе хем те поддржинен е Христосе хем лескере помазаникон. Исто аѓаар, адалеа ола сикавена кај ценинена е Исусескири жртва преку која шај те живинен засекогаш ки Пхув.

¹⁴ Јавер причина соске о јавера бакхре тане присутна ки Спомен-свеченост тани  адалеске со мангена те овен послушна ки е Исусескири заповед. Кеда о Исус керѓа и прво Спомен-свеченост пле верна апостоленцар, ов вакерѓа ленге: „Керен акава те сетинен тумен ки манде“ (1. Кор. 11:23-26). Адалеске, о јавера бакхре понадари да тане присутна ки Спомен-свеченост са џикоте иси помазаникија ки Пхув. Исто аѓаар, о јавера бакхре канинена саринен те овен присутна ки Спомен-свеченост заедно ленцар.

15. Сар шај секова јекх амендар те фалинел е Девле хем е Христосе ки Спомен-свеченост?

¹⁵ Ки Спомен-свеченост, иси амен прилика те фалина е Јехова хем е Христосе кеда заедно гиљаваја хем молинаја амен. О говор со ка икерел пе акава берш иси ле наслов „Сикав кај сиан благодарно башо адава со керѓа туке о Девел хем о Исус!“ Акава говор ка бајрарел амари благодарност башо Јехова хем башо Христос. Џикоте накхена о симболија, адала сој тане присутна ка сетинен пе кај ола преставинена е Исусескоро тело хем лескоро рат. Исто аѓаар, ка размислина башо е Јеховаскоро мангипе со сикавѓа ле аменге адалеа со дозволинѓа лескоро чхаво те мерел те шај амен те добина живото (Мат. 20:28). Секој со мангела амаре небесно Даде хем лескере Чхаве ка мангел те овел присутно ки Спомен-свеченост.

16. Ко кола начинија о помазаникија хем о јавера бакхре тане слична?

¹⁶ Ко несаве начинија о помазаникија хем о јавера бакхре тане слична. О Јехова на мангела јекхе група повише тари јавер. Леске солдуј групе тане скапоцена. Џанаја адава адалеске со и цена со платинѓа те шај те кинел е помазаникон хем е јавере бакхрен тани исто — о живото лескере најмангле чхавескоро. И разлика машкар о дуј групе тани адаја со иси лен различно надеж. Ама, солдуј групе ваљани те ачховен верна е Девлеске хем е Христосеске (Пс. 31:23). Хем ма бистре, о Јехова дела пло свети дух секоле јекхеске спрема лескере потребе, бизи разлика дали тано помазанико или таро јавера бакхре.

17. Башо со радујнена пе о помазаникија сој тане ки Пхув?

¹⁷ Е помазиме христијанен нане лен небесно надеж кеда бијанѓовена. О Девел денѓа лен адаја надеж. Ола размислинена баши пли надеж, молинена пе баши лате хем едвај аџикерена те добинен пумари награда ко небо. Ола на џанена саво ка овел ленгоро тело ко небо (Фил. 3:20; 1. Јов. 3:2). Ама, едвај аџикерена заедно те овен е Јеховаја, е Исусеа, е ангеленцар хем е јавере помазаниконцар. Исто аѓаар, едвај  аџикерена те џан ко пумаре тхана со иси лен ко небесно Царство.

18. Башо со радујнена пе о јавера бакхре?

¹⁸ Е јавере бакхрен иси лен надеж те живинен засекогаш ки Пхув, а адаја тани јекх природно желба со иси секоле мануше (Проп. 3:11). Ола едвај аџикерена о диве кеда ка поможинен те керел пе цели Пхув рај. Радујнена пе башо диве кеда ка шај те градинен пумаре кхера, те садинен пумаре бавче хем кеда ола хем ленгере чхаве ка овен совршено састе (Иса 65:21-23). Исто аѓаар, едвај аџикерена те патујнен ко различна тхана ки Пхув, те дикхен о планине, о шуме хем о океанија хем те истражинен са о буќа со керѓа лен о Јехова. Ама, керела лен најбахтале адава со џанена кај ленгоро амалипе е Јеховаја ка овел са позорало.

19. Со ваљани те керел секова јекх амендар ки Спомен-свеченост, хем кеда ка икерел пе акава берш и Спомен-свеченост?

¹⁹ О Јехова денѓа са пле слугенге јекх бут шужи надеж баши иднина (Ерем. 29:11). И Спомен-свеченост башо е Исусескоро мерибе дела прилика секоле јекхеске те славинел е Девле хем е Христосе башо са адава со керѓе те шај те добина вечно живото. И Спомен-свеченост тано најважно состанок кова со о чачутне христијања икерена ле секова берш. Ов ка икерел пе сабота, 27 март 2021 берш, откеда ка перел о кхам. Бут џене живинена ко тхана коте со шај слободно те присуствујнен ко акава важно состанок. Јавера ка овен присутна иако иси лен противибе а несаве и Спомен-свеченост ка икерен ла ко затвор. Бизи разлика ко кола околностија ка икера и Спомен-свеченост, секова јекх амендар на ваљани те бистрел кај о Јехова, о Исус, хем о воскресниме помазаникија дикхена амен. Адалеске, секова собрание, група или поединцо нека накхел шукар ки Спомен-свеченост!