1. Со сикавела кај авдиве ко фамилие нане мангипе?

И БИБЛИЈА вакерѓа кај ко последна диве о мануша нане те манген пумаре фамилија (2. Тим. 3:1, 3). Амен дикхаја кај акава пророштво исполнинела пе авдиве. На пример, бут родителија развединена пе хем адалеске тане хољаме јекх јекхеа, хем о чхаве осетинена пе кај нане мангле. Чак о фамилие со живинена ко исто кхер нане добором паше. Јекх советнико башо фамилие вакерела: „И дај, о дад хем о чхаве на керена лафи јекх јекхеа адалеске со накхавена бут време ко компјутерија, таблетија, телефонија или видеоигре. Иако живинена ко исто кхер, ола на пенџарена пе шукар“.

2-3. а) Спрема Римјаните 12:10, кас ваљани те манга таро вило? б) Со ка дикха ки акаја статија?

² Амен на мангаја те ова сар о свето кова со на сикавела мангипе (Рим. 12:2). Наместо адава, амен ваљани те сикљова таро вило те манга амаре фамилија хем е пхрален хем е пхењен таро собрание. (Читин Римјаните 12:10.) Со значинела те манга таро вило? Адава тано о мангипе со осетинена ле о членија тари фамилија кеда тане бут паше јекх јекхеа. Асавко мангипе ваљани те сикава амаре духовно фамилијаке — амаре пхраленге хем пхењенге таро собрание. Кеда сикаваја асавко мангипе, амен поможинаја те овел јекхипе ко собрание, а адава тано бут важно башо чачутно обожавање (Мих. 2:12).

³ Те шај те сикава мангипе тари вило, те дикха библиска примерија со ка поможинен амен ко адава.

4. Сар о лафија таро Исаија 63:9 поможинен аменге те ценина е Јеховаскоро мангипе?

⁴ И Библија вакерела аменге башо е Девлескере бут шуже особине. На пример, вакерела кај „о Девел тано мангипе“ (1. Јов. 4:8). Кеда џанаја акава башо Јехова, мангаја те ова леа амала. Ама, исто аѓаар и Библија вакерела кај о Јехова мангела пле слуген. (Читин Исаија 63:9.)

5. Сар о Јехова сикавела милост, хем сар шај амен те џа пало лескоро пример?

⁵ Приметин кај ко Исаија 63:9 тани спомними панда јекх особина е Јеховаскири со керела те ова попаше леа — и милост (2. Мој. 34:6). Јекх начин сар о Јехова сикавела милост тано аѓаар со простинела амаре грешке (Пс. 51:1). Ки Библија, и милост значинела нешто повише него само те простинел пе некаске со грешинѓа. Ој тани јекх силно чувство со јекх мануш осетинела ле кеда дикхела некас ко пхаре ситуацие хем адава теринела ле те поможинел адале манушеске. О Јехова вакерела кај и силно желба со иси ле те поможинел аменге тани панда побари таро чувство со иси јекхе даја спрема пло чхаво (Иса. 49:15). Кеда сием ко пхаре ситуацие, е Јеховаскири милост поттикнинела ле те поможинел аменге (Пс. 37:39; 1. Кор. 10:13). Амен шај те сикава милост амаре пхраленге хем пхењенге аѓаар со ка простина ленге хем нане те икера холи кеда ка разочаринен амен (Еф. 4:32). Ама, о главно начин сар сикаваја милост тано аѓаар со поможинаја амаре пхраленге хем пхењенге кеда иси лен проблемија. Кеда о мангипе поттикнинела амен те сикава милост е јаверенге, амен постапинаја сар о Јехова, о најбаро пример башо мангипе (Еф. 5:1).

6. Сар о Јонатан хем о Давид сикавѓе кај мангена пе таро вило?

⁶ И Библија вакерела аменге башо несовршена мануша со сикавѓе мангипе таро вило. Те дикха е Јонатанескоро хем  е Давидескоро пример. И Библија вакерела: „О Јонатан хем о Давид уле бут паше амала, хем о Јонатан почминѓа те мангел ле сар коркори песте“ (1. Сам. 18:1). О Јехова биринѓа е Давиде те овел цари пало Саул. Пало адава, о Саул уло бут љубоморно е Давидеске хем мангља те мударел ле. Ама, е Саулескоро чхаво, о Јонатан, на поддржинѓа пле даде кеда ов мангља те мударел е Давиде. О Јонатан хем о Давид денѓе песке лафи кај ка ачховен амала хем кај секогаш ка поддржинен јекх јекхе (1. Сам. 20:42).

7. Со шај сине те чхинавел е Јонатане хем е Давиде те овен амала?

⁷ О мангипе со сикавѓе песке о Јонатан хем о Давид сине добором баро со ништо нашти сине те руминел ленгоро амалипе. На пример, о Јонатан сине околу 30 берш попхуро таро Давид. О Јонатан шај сине те мислинел кај нашти те овел добором паше амал некасаја сој тано бут потерно лестар хем со иси ле похари искуство ко живото. Ама ов на размислинѓа аѓаар. Ле сине ле баро поштовање спрема о Давид.

8. Соске о Јонатан сине шукар амал е Давидеа?

⁸ О Јонатан шај сине те овел љубоморно е Давидеске. Адалеске со сине е царескоро чхаво, о Јонатан шај сине упорно те родел те овел о следно цари (1. Сам. 20:31). Ама о Јонатан сине понизно хем сине верно е Јеховаске. Ов целосно поддржинѓа е Јеховаскири одлука о Давид те овел о следно цари. Исто аѓаар, ов сине верно е Давидеске иако адава хољанкерѓа е Сауле (1. Сам. 20:32-34).

9. Котар џанаја кај о Јонатан на сине љубоморно е Давидеске? Објаснин.

⁹ Адалеске со о Јонатан мангела сине е Давиде, ов на сине леске љубоморно. О Јонатан џанела сине шукар те користинел и стрела хем сине храбро војнико. О народо вакерела сине кај ов хем лескоро дад сине „побрза таро орлија“ хем „посилна таро лавија“ (2. Сам. 1:22, 23). Адалеске о Јонатан шај сине те фалинел пе башо храбра буќа со керѓа. Ама, ов на мангела сине те овел пошукар таро Давид хем на сине љубоморно башо шукар буќа со керела лен сине ов. Наместо адава, о Јонатан сине воодушевимо тари е Давидескири храброст хем тари лескири доверба ко Јехова. На пример, откеда о Давид мударѓа е Голијате, о Јонатан почминѓа те мангел ле сар коркори песте. Сар шај амен да те сикава асавко мангипе спрема амаре пхраља хем пхења?

10. Со значинела те манга амен „јекх јекхеа силно таро вило“?

¹⁰ И Библија вакерела аменге те манга амен „јекх јекхеа силно таро вило“ (1. Пет. 1:22). О Јехова денѓа амен пример башо адава. Лескоро мангипе тано добором силно, со ако амен сием леске верна ништо нане те чхинавел ле те мангел амен (Рим. 8:38, 39). О грчко лафи сој преведимо сар „силно“ пренесинела и идеја кај некој ваљани бут те трудинел пе те шај те керел нешто. Понекогаш, нане локхо те сикава мангипе амаре пхраленге хем пхењенге. Кеда о јавера разочаринена амен, амен ваљани понадари да ’мангипаја те трпина амен јекх јекхеа аѓаар со искрено ка трудина амен те икера о јекхипе е духоскоро ко мир кова со поврзинела амен‘ (Еф. 4:1-3). Ако трудинаја амен те ова ко мир амаре пхраленцар хем е пхењенцар, нане те концентририна амен ко ленгере грешке. Ка трудина амен те дикха ко амаре пхраља хем  пхења сар со дикхела о Јехова (1. Сам. 16:7; Пс. 130:3).

11. Соске понекогаш шај те овел пхаро те сикава мангипе таро вило?

¹¹ Нане секогаш локхо те сикава мангипе таро вило амаре пхраленге хем пхењенге, посебно кеда џанаја ленгере грешке. Акава сине проблеми несаве христијаненге таро прво веко. На пример, и Еводија хем и Синтихија на сине лен проблеми заедно е Павлеа те проповединен о шукар хабери. Ама, таро несаве причине ола на накхена сине шукар јекх јекхаја. Адалеске о Павле охрабринѓа лен „те овел лен иста мисле џикоте служинена е Девлеске“ (Фил. 4:2, 3).

12. Сар шај таро вило те манга амаре пхрален хем пхењен авдиве?

¹² Сар шај таро вило те манга амаре пхрален хем пхењен авдиве? Кеда пенџараја лен пошукар, полокхо аменге те хаљова лен хем те манга лен таро вило. Шај те ова ленцар амала иако тане амендар попхуре или потерне, или иси лен јавер култура. Ма бистре, о Јонатан сине околу 30 берш попхуро таро Давид, ама сепак сине леа паше амал. Иси ли некој ко тло собрание сој попхуро или потерно тутар касаја со шај те ове амал? Кеда кереа адава, ту сикавеа кај мангеа са е пхрален (1. Пет. 2:17).

13. Соске нашти сариненцар ко собрание те ова исто паше?

¹³ Дали адава со мангаја е пхрален таро вило значинела кај сариненцар ка ова паше ко собрание? Адава нашти те очекујна. Нормално тано те ова некасаја попаше адалеске со интересинена амен иста буќа. О Исус викинела сине са пле апостолен „амала“, ама сине бут паше е Јованеа (Јован 13:23; 15:15; 20:2). Сепак о Исус на постапинела сине пошукар е Јованеа него е јаверенцар. На пример, кеда о Јован хем лескоро пхрал о Јаков пучле е Исусе те дел лен важно тхан ко е Девлескоро Царство, ов вакерѓа ленге: „Ме нашти те дав тумен те бешен тари мли десно или лево страна“ (Мар. 10:35-40). Сар о Исус, амен да на ваљани те кера разлика машкар амаре  паше амала хем о јавера ко собрание (Јак. 2:3, 4). Соске ако кераја адава, ко собрание ка овен поделбе хем нане те овел мир (Јуда 17-19).

14. Спрема Филипјаните 2:3, со ка поможинел аменге те на овел амен натпреварувачко духо?

¹⁴ Кеда сикаваја мангипе таро вило јекх јекхеске, амен заштитинаја о собрание таро натпреварувачко духо. Сетин тут кај о Јонатан на сине љубоморно е Давидеске хем на мангела сине те овел цари наместо лесте. Сарине амен шај те џа пало е Јонатанескоро пример. Ма ов љубоморно башо е пхраленгере способностија, него „понизно дикх е јаверен сар побаре тутар“. (Читин Филипјаните 2:3.) Нека овел тут ки годи кај секова јекх амендар шај те поможинел ко собрание. Ако сием понизна ка шај те дикха о шукар особине ко амаре пхраља хем пхења хем ка овел амен корист таро ленгоро верно пример (1. Кор. 12:21-25).

15. Со сикљоваја таро адава со доживинѓа и Тања хем лакири фамилија?

¹⁵ Кеда нешто лошно случинела пе аменге ко живото, о Јехова утешинела амен преку о мангипе со сикавена ле аменге амаре пхраља хем пхења хем преку и практично помош со дена амен. Те дикха со уло јекхе фамилијаја со иси лен трин чхаве кола со присуствујнѓе ко меѓународно конгрес ко 2019 берш ко САД, е насловеа „О мангипе никогаш на чхинавѓола“. И дај и Тања, раскажинела: „Џикоте сабота иранаја амен сине таро конгрес ко хотели, јекх врда кхувѓа амен. Никој на сине повредимо, ама сием сине шокириме. Иклилем таро врда хем тердилем ко  друмо. Некој тари јавер страна тари улица викинѓа амен вастеа те џа ко лескоро врда те ова ко безбедно. Адава сине јекх пхрал со иранела пе сине таро конгрес. Ама, на ачхило само ов, него ачхиле јавера панџ делегатија тари Шведска. О пхења силно гушинѓе ман хем ме чхаја хем адава керѓа те осетина амен пошукар. Вакерѓем ленге кај сием шукар, ама ола сепак ачхиле аменцар. Ола панда ачхиле аменцар откеда али и брза помош да, хем мангле те овен сигурна дали иси амен са со ваљани аменге. Ко акава пхаро моменти амен осетинѓем е Јеховаскоро мангипе. Адава со доживинѓем бајрарѓа амаро мангипе спрема о пхраља хем о пхења, хем исто аѓаар бајрарѓа амаро мангипе хем амари благодарност спрема о Јехова. Дали сетинеа тут ко време кеда ваљани сине туке помош хем о пхраља хем о пхења сикавѓе туке мангипе таро вило?

16. Кола причине иси амен те сикава мангипе таро вило јекх јекхеске?

¹⁶ Размислин башо шукар буќа со овена кеда сикаваја мангипе таро вило јекх јекхеске. Амен даја утеха амаре пхраленге хем пхењенге кеда иси лен проблемија. Поможинаја ленге те служинен е Јеховаске ко јекхипе. Докажинаја кај амен сием е Исусескере следбеникија, хем адава керела о искрена мануша те манген те служинен е Јеховаске. Сој најважно таро са, амен фалинаја е Јехова, амаре ’Даде сој пхердо милост хем е Девле секоле утехакоро‘ (2. Кор. 1:3). Те ова одлучна сарине амен те бајрара амаро мангипе хем те сикава ле!