1. Сар керела е Девлескоро мангипе те осетина амен?

О АПОСТОЛ Јован пишинѓа: „О Девел тано мангипе“ (1. Јов. 4:8). Акаја едноставно изјава сетинкерела амен ко јекх важно чачипе, а адава тано: таро Девел авела о живото, а исто аѓаар лестар авела о мангипе. О Јехова мангела амен! Лескоро мангипе керела те осетина амен безбедна, бахтале хем задоволна.

2. Спрема Матеј 22:37-40, кола тане о дуј најбаре заповедија, хем соске понекогаш шај те овел аменге пхаро те шуна и дујто заповед?

² О христијања нашти биринена дали ка сикавен мангипе или на. Адаја тани јекх заповед. (Читин Матеј 22:37-40.) Кеда пенџараја шукар е Јехова, шај те овел аменге локхо те шуна и прво заповед. О Јехова тано совршено, ов грижинела пе аменге хем љубезно тано аменцар. Ама, шај те овел аменге пхаро те шуна и дујто заповед. Соске? Амаре пхраља хем пхења таро собрание — кола тане амаре најпашутне — тане несовршена. Адалеске, понекогаш шај нане те понашинен пе аменцар ко љубезно начин. О Јехова џанља кај ка овел аменге пхаро те шуна акаја заповед, адалеске користинѓа несаве манушен со пишинѓе и Библија те сикавен амен соске ваљани те сикава мангипе хем сар ваљани те кера адава. Јекх таро адала мануша со пишинѓа асавке советија тано о Јован (1. Јов. 3:11, 12).

3. Со нагласинѓа о Јован?

³ О Јован ко лила кола со пишинѓа лен нагласинѓа кај о христијања мора те сикавен мангипе. Кеда пишинѓа о извештај башо е Исусескоро живото, о Јован користинѓа о лафија „мангипе“ хем „мангло“ повише таро јавера  трин евангелија заедно. Е Јоване сине ле околу шел берш кеда пишинѓа о лил Јован хем о трин писмија. Акала библиска лила сикавена амен кај са со кераја мора те овел мотивиримо таро мангипе (1. Јов. 4:10, 11). Ама, е Јованеске ваљани сине време те сикљол акава.

4. Дали о Јован секогаш сикавѓа мангипе е јаверенге?

⁴ Кеда о Јован сине терно, ов на сикавѓа секогаш мангипе. На пример, ки јекх прилика, о Исус хем лескере ученикија џана сине ко Ерусалим преку Самарија. О мануша таро јекх гав ки Самарија на мангле те сикавен ленге гостопримство. Со керѓа о Јован? Ов мангља те хулел јаг таро небо хем те уништинел са е манушен таро адава гав (Лука 9:52-56). Ки јавер прилика, о Јован исто аѓаар на сикавѓа мангипе е јавере апостоленге. Ов хем лескоро пхрал о Јаков родинѓе ленгири дај те пучел е Исусе те дел лен важна тхана ко Царство. Кеда о јавера апостолија шунѓе со керѓе о Јаков хем о Јован, ола сине бут хољаме! (Мат. 20:20, 21, 24). Ама, иако о Јован керѓа са акала грешке, о Исус мангела ле сине (Јован 21:7).

5. Со ка дикха ки акаја статија?

⁵ Ки акаја статија ка дикха е Јованескоро пример хем несаве буќа со пишинѓа лен башо мангипе. Ка сикљова сар шај амен те сикава мангипе спрема амаре пхраља хем пхења. Исто аѓаар, ка сикљова јекх важно начин сар шај о поглавари те сикавел кај мангела пле фамилија.

6. Сар о Јехова сикавѓа кај мангела амен?

⁶ Бут пути мислинаја кај о мангипе тано јекх пријатно чувство кова со вакерела пе љубезна лафенцар. Ама, ако чаче мангаја некас, адава ваљани те сикава ле амаре постапкенцар да. (Споредин Јаков 2:17, 26.) На пример, о Јехова мангела амен (1. Јов. 4:19). Преку о шуже лафија сој пишиме ки Библија ов вакерела кај мангела амен (Пс. 25:10; Рим. 8:38, 39). Ама, амен сием увериме кај о Девел мангела амен на само адалеа со вакерела аменге, него адалеа со керела. О Јован пишинѓа: „Е Девлескоро мангипе баши аменде сикавѓа пе аѓаар со: о Девел бичхалѓа пле единствено бијаме Чхаве ко свето, те шај преку лесте те добина живото“ (1. Јов. 4:9). О Јехова мукхља лескоро мангло чхаво те цидел муке хем те мерел баши аменде (Јован 3:16). Адалеске амен сием сигурна кај о Јехова мангела амен.

7. Сар о Исус сикавѓа кај мангела амен?

⁷ О Исус вакерѓа пле учениконге кај мангела лен (Јован 13:1; 15:15). Ов сикавѓа кобор мангела лен на само адалеа со вакерела  сине, него адалеа со керела да сине. О Исус вакерѓа: „Никас нане побаро мангипе таро акава: те дел пло живото пле амаленге“ (Јован 15:13). Кеда размислинаја со керѓе о Јехова хем о Исус аменге, сар ваљани адава те влијајнел упри аменде?

8. Со ваљани те кера спрема 1. Јованово 3:18?

⁸ Амен сикаваја кај мангаја е Јехова хем е Исусе адалеа со сием ленге послушна (Јован 14:15; 1. Јов. 5:3). О Исус денѓа амен заповед те манга амен јекх јекхеа (Јован 13:34, 35). На ваљани само лафенцар те вакера амаре пхраленге хем пхењенге кај мангаја лен, него адава ваљани исто аѓаар те сикава ле амаре постапкенцар. (Читин 1. Јованово 3:18.) Кола тане несаве буќа со шај те кера ленге те шај те сикава кај мангаја лен?

9. Со керѓа о Јован адалеске со сине ле мангипе?

⁹ О Јован шај сине те ачхол пле дадеа хем те заработинел паре адалеа со ка овел сине рибари. Ама наместо адава, ов користинѓа цело пло живото те поможинел е јаверенге те сикљон о чачипе башо Јехова хем башо Исус. О живото со биринѓа о Јован на сине локхо. Ов сине прогонимо, хем ко крајо таро прво веко кеда сине бут пхуро, сине бичхалдо ко јекх тхан сар затворенико (Дела 3:1; 4:1-3; 5:18; Отк. 1:9). Чак џикоте сине ко затвор адалеске со проповединела сине башо Исус, о Јован сикавѓа кај мангела е јаверен. На пример, џикоте сине ко остров Патмос, ов пишинѓа о лил Откровение хем бичхалѓа ле ко собранија те шај те џанен со ка случинел пе панда хари (Отк. 1:1). Пало адава, кратко откеда сине ослободимо таро Патмос, о Јован пишинѓа пло евангелие коте со сине извештај башо е Исусескоро живото хем и служба. Ов исто аѓаар пишинѓа трин писмија те охрабринел хем те зајакнинел е пхрален хем е пхењен. Сар шај те џа пало е Јованескоро пример кова со сине спремно те керел жртве?

10. Сар шај те сикаве кај мангеа е манушен?

¹⁰ Адалеа со ка кере ко тло живото шај те сикаве дали мангеа е манушен. Е Сатанаскоро свето мангела те трошине тло време хем тли енергија само туке, адалеа со ка трудине тут те заработине повише паре хем те ове популарно. Наместо адава, е Девлескере слуге ко цело свето трошинена кобор со шај повише време те шај те проповединен о шукар хабери хем те шај те поможинен е манушенге те овен попаше е Јеховаја. Несаве лендар шај полновремено те проповединен хем те сикавен е манушен.

11. Сар бут верна објавителија сикавена кај мангена е Јехова хем е пхрален хем е пхењен?

¹¹ Несаве верна христијања мора те керен бути цело работно време те шај те грижинен пе пле фамилијаке хем песке. Ама, акала објавителија верно поддржинена е Девлескере организација ко јавера да начинија. На пример, несаве шај те поможинен кеда иси природна катастрофе, или те керен бути кеда градинена пе несаве амаре објектија хем сарине шај те ден доброволна прилогија. Ола керена акава адалеске со мангена е Девле хем мангена е јаверен. Секова курко амен сикаваја кај мангаја амаре пхрален хем пхењен адалеа со сием присутна ко амаре состанокија хем учествујнаја ки ленде. Иако шај сием уморна, амен сием присутна ко адала состанокија. Иако иси амен трема, амен коментиринаја. Хем, иако саринен амен иси амен проблемија, амен охрабринаја амен јекх јекхеа англедер хем пало состанок (Евр. 10:24, 25). Бут сием благодарна башо са адава со керена амаре мангле пхраља хем пхења.

12. Ко саво јавер начин о Јован сикавѓа мангела е пхрален хем е пхењен?

 ¹² О Јован сикавѓа кај мангела е пхрален хем е пхењен на само адалеа со пофалинела лен сине него исто адалеа да со дела лен сине совет. На пример, ко пле писмија, о Јован пофалинела сине е пхрален хем е пхењен баши ленгири вера хем башо ленгере шукар делија, ама исто аѓаар дела лен сине директно совет башо ленгере грешке (1. Јов. 1:8 — 2:1, 13, 14). Слично аѓаар, амен да ваљани те пофалина амаре пхрален хем е пхењен башо шукар буќа со керена лен. Ама, ако некој почминела те сикавел лошно стави или те овел ле лошно навика амен ка сикава мангипе адалеа со љубезно ка да ле совет. Ваљани храброст де дел пе совет јекхе амалеске, ама и Библија вакерела кај о хас амала дена совет јекх јекхеске (Изр. 27:17).

13. Со на ваљани одма те кера?

¹³ Понекогаш, амен сикаваја кај мангаја амаре пхрален хем е пхењен адалеа со на кераја несаве буќа. На пример, на хољанаја сигате кеда ола ка вакерен нешто. Размислин башо адава со уло џикоте о Исус живинела сине ки Пхув. Ов вакерѓа пле учениконге кај ваљани те хан лескоро тело хем те пиен лескоро рат те шај те добинен живото (Јован 6:53-57). Акала лафија добором шокиринѓе буте џенен со бут таро лескере ученикија геле песке. Ама, е Исусескере верна амала, сар со сине о Јован, ачхиле леа. Ола да на халиле е Исусескере лафија хем адалеске сине изненадиме. Сепак, на мислинѓе кај о Исус вакерѓа нешто погрешно хем на хољанѓе. Наместо адава, лен сине лен доверба ки лесте соске џанена сине кај ов вакерела о чачипе (Јован 6:60, 66-69). Бут тано важно те на хољана сигате кеда амаре амала ка вакерен нешто. Пошукар, те да лен прилика те објаснинен аменге со мислинена адалеа со вакерена (Изр. 18:13; Проп. 7:9).

14. Соске на ваљани никогаш те мрзина амаре пхрален хем е пхењен?

¹⁴ О Јован исто аѓаар поттикнинѓа амен те на мрзина амаре пхрален хем е пхењен. Ако на шунаја акава совет, дозволинаја о Сатана те влијајнел упри аменде (1. Јов. 2:11; 3:15). Акава случинѓа пе несаве христијаненге ко крајо таро прво веко. Ко адава време о Сатана керела сине са те шај е Девлескоро народо те мрзинел пе јекх јекхеа хем те одвојнел пе. Кеда о Јован пишинѓа пле писмија, ко собрание сине мануша  кола со сикавѓе исто духо сар е Сатанаскоро. На пример, о Диотреф керѓа те овен поделбе ко собрание (3. Јов. 9, 10). Ов на поштујнела сине е патувачко надгледникон со сине бичхалде таро водечко тело. Ов чак мангља те фрдел таро собрание околен со сикавѓе гостопримливост околе манушенге со ов на мангела лен сине. Адава сине бут арогантно! О Сатана авдиве да пробинела те одвојнел е Девлескере народо. На ваљани никогаш те дозволина те мрзина амаре пхрален хем те одвојна амен лендар.

15. Со на ваљани те бистрен о фамилијарна поглаварија?

¹⁵ Јекх важно начин сар јекх фамилијарно поглавари сикавела кај мангела пле фамилија тано аѓаар со грижинела пе башо ленгере материјална потребе (1. Тим. 5:8). Ама, панда поважно тано те грижинел пе башо ленгере духовна потребе (Мат. 5:3). Размислин башо шукар пример со денѓа ле о Исус е фамилијарно поглаваренге. Спрема е Јованескоро евангелие, џикоте о Исус висинела сине ко стубо, ов панда мислинела сине баши пли фамилија. О Јован сине е Исусескере дајаја, е Маријаја, ко тхан коте со ингарѓе е Исус те мударен ле. Англедер те мерел, о Исус пучља е Јоване дали шај те грижинел пе е Маријаке (Јован 19:26, 27). Е Исусе сине ле пхраља хем пхења кола со грижинена пе сине е Маријаке ко материјално поглед, ама изгледа никој лендар панда на сине е Исусескере ученикија. Адалеске о Исус мангља те овел сигурно кај некој ка грижинел пе е Маријаке хем ко материјално поглед хем ко духовно поглед.

16. Саве одговорностија сине е Јоване?

¹⁶ Е Јоване сине ле бут одговорностија. Сар јекх таро апостолија, ов ревно проповединела сине. Ов исто аѓаар шај сине женимо, адалеске ваљани сине те грижинел пе пле фамилијаке ко материјално поглед хем ко духовно поглед (1. Кор. 9:5). Со шај те сикљовен о фамилијарна поглаварија авдиве?

17. Соске тано важно јекх фамилијарно поглавари те грижинел пе башо пле фамилијакере духовна потребе?

¹⁷ Јекх пхрал кова тано фамилијарно поглавари шај иси ле бут важна одговорностија. На пример, ов ваљани те овел вредно ко тхан коте со керела бути те шај пле понашибаја те анел слава е Јеховаске (Еф. 6:5, 6; Тит 2:9, 10). А исто аѓаар, шај служинела ко  собрание сар старешина или сар слуга-помошнико, адалеске ваљани те грижинел пе башо собрание хем баши група проповедибаске. А ко исто време, важно тано редовно те проучинел и Библија пле ромњаја хем пле чхавенцар. Ола бут ка ценинен адава со ов трудинела пе те грижинел пе башо ленгере физичка, емоционална хем духовна потребе (Еф. 5:28, 29; 6:4).

18. Ко со сине сигурно о Јован?

¹⁸ О Јован живинѓа бут берша, хем ко живото случинѓе пе леске бут возбудлива буќа. Ле сине ле исто аѓаар бут пхарипа ко живото со шај сине те слабонкерен лескири вера. Ама, ов денѓа пестар са те шај те икерел е Исусескере заповедија, сар сој те мангел е пхрален хем е пхењен. Адалеске, о Јован сине сигурно кај о Јехова хем о Исус мангена ле сине хем кај ола ка ден ле сила те шај те издржинел секоја неволја (Јован 14:15-17; 15:10; 1. Јов. 4:16). О Сатана хем лескоро свето нашти сине те чхинавен е Јоване те мангел пле пхрален хем пле пхењен хем адава те сикавел на само лафенцар него постапкенцар да.

19. Со охрабринела амен те кера о стихо таро 1. Јованово 4:7, хем соске?

¹⁹ Сар о Јован, амен да живинаја ко свето коте со владинела о Сатана, кова со никас на мангела (1. Јов 3:1, 10). Ов нашти те чхинавел амен те манга амаре пхрален хем е пхењен џикоте амен на дозволинаја леске те керел адава. Те ова одлучна те манга амаре пхрален хем е пхењен, те сикава ленге адава амаре лафенцар хем те докажина ленге кај мангаја лен амаре постапкенцар. Ако сикаваја асавко мангипе ка ова радосна со сием дело таро е Јеховаскири фамилија хем ка овел амен бахтало живото. (Читин 1. Јованово 4:7.)