1. Соске буте џенен авдиве нане лен доверба ки Библија?

 БУТ мануша авдиве на џанена ки касте шај те овел лен доверба. Ола нане сигурна дали о мануша касте со поштујнена, сар на пример о политичарија, о научникија хем о бизнисменија мислинена башо ленгоро шукарипе. Исто аѓаар ола на поштујнена е христијанска верска водачен. Хем адалеске со акала верска водачија вакерена кај слединена и Библија, на изненадинела амен адава со бут мануша нане лен доверба ки лате.

2. Спрема Псалм 119:160, ко со ваљани те ова увериме?

² Сар слуге е Јеховаскере сием увериме кај ов тано о Девел е чачипаскоро хем кај ов секогаш мангела те овел аменге шукар (Пс. 31:5; Иса. 48:17). Амен џанаја кај шај те овел амен доверба ко адава со читинаја ки Библија хем шај те верујна кај „цело лафи [е Девлескоро] тано чачипе. (Читин Псалм 119:160.) Согласинаја амен адалеа со пишинѓа јекх библиско изучувачи: „Ништо таро адава со вакерѓа о Девел нане ховавно или нашти те чхинавел ле те исполнинел адава со вакерѓа. Адалеске со е Девлескоро народо иси ле доверба ки лесте ола верујнена ко адава со ов вакерела“.

3. Со ка дикха ки акаја статија?

³ Сар шај те поможина е јаверенге те овел лен и исто доверба ко е Девлескоро Лафи сар аменде? Те дикха трин причине соске шај те овел амен доверба ки Библија. Ка дикха кај и Библија тани точно, кај лакере пророштвија исполнинѓе пе хем кај иси ла моќ те менинел некаскоро живото.

4. Соске несаве мануша мислинена кај и Библија тани меними?

⁴ О Јехова користинѓа околу 40 верна муршен те пишинен и Библија. Ама авдиве нане амен ни јекх таро адала оригинална манускриптија. b Сине керде копие таро адала манускриптија хем амен авдиве иси амен копие таро адала копие. Адалеске несаве мануша мислинена кај адава со пишинела авдиве ки Библија нане о исто со пишинела сине ко оригинална манускриптија. Дали некогаш пучљан тут сар шај те ова сигурна кај и Библија со иси амен авдиве тани точно?

5. Сар сине препишиме о Хебрејска списија? (Дикх и слика ки насловно страна.)

⁵ Те шај те заштитинел и библиско порака, о Јехова заповединѓа те керен пе копие. Ов заповединѓа е израелско царенге те препишинен о Закони хем чхивѓа е Левитен те сикавен е народо адава Закони (5. Мој. 17:18; 31:24-26; Неем. 8:7). Одкеда о Евреија сине ингарде ко Вавилон, јекх група професионална препишувачија почминѓе те керен бут копие таро Хебрејска списија (Езра 7:6). Акала мануша пазинена сине сар препишинена сине акала копие. Пало несаво време, о препишувачија на само со гејнена сине секова лафи таро тексти, него исто аѓаар гејнена сине секоја буква те шај те овен сигурна кај са адава со препишинена тано точно. Сепак адалеске со о мануша тане несовршена, сине несаве тикне грешке ко несаве тхана. Ама адалеске со јекх исто тексти сине бут пути препишимо шај сине локхе те аракхен пе о грешке. Сар?

6. Сар шај те аракхен пе о грешке ко копие е Библијакере?

⁶ Е историчарен таро амаро време иси лен јекх шукар начин те аракхен о грешке околенгере со препишинѓе о библиско тексти. Аке јекх пример: Те вакера кај шеле манушенге сине дендо рачно те препишинен јекх тексти. Јекх лендар керела тикни грешка џикоте препишинела. Јекх начин сар шај те аракха адаја грешка тано ако спорединаја лескири копија са е јавере копиенцар. Слично, адалеа со о историчарија спорединена повише библиска манускриптија шај те дикхен дали нешто фалинела ко тексти или те аракхен о грешке кола со о препишувачија керѓе лен.

7. Кобор точна сине о библиска препишувачија?

⁷ Окола со препишинѓе о библиска манускриптија денѓе пло најшукар те шај те керен ле адава точно. Те дикха јекх пример кова со потврдинела акава. О најпуране копие таро комплетна Хебрејска списија тане таро 1008 или 1009 берш а.е., хем акаја комплетно копија викинела пе Ленинградско кодекс. Ама ко последна берша откринѓе пе повише Библиска манускриптија хем делија таро манускриптија кола сој тане милја берша попуране таро Ленинградско кодекс. Несаве шај те мислинен кај адава со пишинела ко Ленинградско кодекс нане исто е попуране манускриптонцар адалеске со керѓе пе повише копие таро адала пуране манускриптија ко периоди таро милја берша. Ама акава нане точно. Кеда о историчарија спорединѓе о попуране манускриптија е поневенцар, ола откринѓе кај машкар ленде сине само несаве тикне разлике ко лафија хем кај о значење на сине ни хари менимо.

8. Која тани и разлика машкар о копие таро Христијанска грчка списија хем о копие таро пуране световна лила?

⁸ О христијања таро прво веко исто аѓаар керѓе копие таро Хебрејска списија. Ола внимателно препишинѓе о 27 лила таро  грчка списија кола со пало адава користинена лен сине ко пумаре состанокија хем ки служба. Јекх историчари спорединѓа о манускриптија таро Христијанска грчка списија јавере световна лиленцар со сине пишиме ко адава исто време, хем ов вакерѓа: „Општо авдиве иси бут повише манускриптија таро Христијанска грчка списија него било кола јавера лила таро адава време“. Ко лил Anatomy of the New Testament пишинела: „Шај те овел амен доверба кај адава со читинаја ко јекх шукар современо превод таро грчка списија пренесинела и исто порака која со пишинѓе ла о писателија таро пурано време“.

9. Спрема Исаија 40:8, ко со шај те ова сигурна кеда керела пе лафи баши библиско порака?

⁹ Веконцар бут препишувачија напорно керѓе бути те шај внимателно те препишинен и Библија хем адалеске амен авдиве иси амен точно Библија со читинаја хем проучинаја ла. c Амен џанаја кај о Јехова сине адава со керѓа те ачхол лескоро Лафи џи авдиве хем те овел точно. (Читин Исаија 40:8.) Тари јавер страна несаве шај те вакерен: „Само адалеске со и библиско порака џи акана на менинѓа пе, адава на значинела кај и Библија авела таро Девел“. Адалеске, те дикха акана несаве доказија кола со сикавена кај и Библија авела таро Девел.

10. Вакер пример башо исполнимо пророштво кова со сикавела кај о лафија таро 2. Петрово 1:21 тане точна. (Дикх о слике.)

¹⁰ Ки Библија иси бут пророштвија со исполнинѓе пе. Несаве лендар сине пишиме веконцар англедер те исполнинен пе. И историја потврдинела кај акала пророштвија чаче исполнинѓе пе. Акава на изненадинела амен соске џанаја кај са о библиска пророштвија авена таро Јехова. (Читин 2. Петрово 1:21.) Те размислина башо пророштвија коленде со сине вакердо кај и пурани диз Вавилон ка овел уништими. Ко 8 веко а.а.е., о Исаија сине водимо те пророкујнел кај и моќно диз Вавилон ка овел освојми. Ов чак  пророкујнѓа кај о мануш со ка освојнел и диз ка викинел пе Кир хем вакерѓа сар ка освојнел ла (Иса. 44:27—45:2). О Исаија исто аѓаар пророкујнѓа кај о Вавилон ко крајо ка овел уништимо хем кај никој више нане те живинел ки адаја диз (Иса. 13:19, 20). Баш адава случинѓа пе. Ко 539 берш а.а.е., о Медијција хем о Персијција освојнѓе акаја диз хем авдиве адава тхан нане населимо. (Дикх о видеоклипи И Библија пророкујнѓа кај ка перел о Вавилон, кова со аракхљола ко електронско издание таро лил Ов бахтало засекогаш, лекција 3, точка 5.)

11. Опишин сар о Даниел 2:41-43 исполнинела пе авдиве.

¹¹ О библиска пророштвија на исполнинѓе пе само ко пурано време, шај те дикха сар исполнинена пе ко амаро да време. На пример, размислин сар исполнинела пе е Даниелескоро пророштво баши Англо-американско светско сила. (Читин Даниел 2:41-43.) Ко акава пророштво тано конкретно пророкујмо кај несаве делија тари акаја светско сила ка овен силна сар састрн, а несаве слаба сар глина. Авдиве шај те дикха кај адава тано аѓаар. И Британија хем и Америка сикавѓе кај иси лен сила сар састрн аѓаар со сине лен главно улога те побединел пе ко солдуј светска војне хем со понадари да иси лен бут воено оружје. Ама ленгири моќ исто аѓаар слабонѓа, соске ленгере граѓанија бут пути протестиринена преку синдикатија башо пумаре правија хем тане против и влада. Јекх експерти баши светско политика сигенде вакерѓа: „О САД тано и најподелими современо демократско пхув ко свето“. А о јавер дело тари акаја светско сила, и Британија, тани посебно поделими ко последна берша соске о мануша нашти те согласинен пе башо адава кобор ваљани те овен паше е пхувјенцар тари Европско Унија. Акала поделбе керена бут пхаро акале светско силаке те постапинел одлучно.

12. Ко со уверинена амен о библиска пророштвија?

¹² Адалеске со бут библиска пророштвија више исполнинѓе пе, иси амен доверба кај е Девлескере ветувања баши иднина исто аѓаар ка исполнинен пе. Осетинаја амен исто сар о псалмисти кова со ки молитва вакерѓа е Јеховаске: „Едвај аџикерава те спасине ман, соске ко тло лафи надинава ман“ (Пс. 119:81). Преку и Библија о Јехова дела амен иднина хем надеж (Ерем. 29:11). Амари надеж баши иднина на зависинела таро мануша, него таро е Јеховаскере ветувања. Адалеске понадари те бајрара амари доверба ко е Девлескоро Лафи аѓаар со хор ка проучина о библиска пророштвија.

13. Спрема Псалм 119:66, 138, која тани јавер причина соске шај те овел амен доверба ки Библија?

¹³ Јекх јавер причина соске шај те овел амен доверба ки Библија тани адаја со поможинела е манушенге кеда шунена лакоро совет. (Читин Псалм 119:66, 138.) На пример, о брачна парија кола со мангле те развединен пе акана тане радосна со применинѓе о библиско совет. Ленгере чхаве радујнена пе со иси лен христијанска родителија кола со грижинена пе ленге хем мангена лен (Еф. 5:22-29).

14. Вакер јекх пример со сикавела сар адава со применинела пе о библиско чачипе менинела е манушен ко пошукар.

¹⁴ Чак о опасна криминалција уле пошукар мануша кеда почминѓе те применинен о библиска советија. Те дикха сар о библиско совет поможинѓа јекхе затвореникоске со викинела пе Џек. d Ов сине насилно криминалцо хем сине пенџардо сар  јекх таро најопасна затвореникија машкар окола со сине осудиме те мерен. Ама јекх диве о Џек присуствујнѓа ко јекх библиско курси. Ов сине бут воодушевимо тари љубезност е пхраленгири кола со водинѓе о библиско курси, адалеске ов да почминѓа те проучинел. Адалеске со почминѓа те применинел о библиско чачипе ко пло живото, менинѓа пле постапке хем уло пошукар мануш. Пало несаво време о Џек уло некрстен објавители, хем пало адава крстинѓа пе. Ов ревно проповединела сине е јавере затворениконге башо е Девлескоро Царство хем проучинѓа најхари штаре џененцар. Кеда ало о диве баши лескири смртно казна, о Џек на сине више исто мануш. Јекх таро лескере адвокатија вакерѓа: „О Џек нане више исто мануш коле со џанава ле сине англедер 20 берш. Адава со сиклило таро е Јеховаскере сведокија менинѓа лескоро живото“. Иако о Џек сине мудардо, лескоро пример сикавела кај шај те овел амен доверба ко е Девлескоро Лафи хем кај иси ле и моќ те менинел е манушен ко пошукар (Иса. 11:6-9).

15. Сар о библиско чачипе поможинела е Јеховаскере народоске те разликујнел пе? (Дикх и слика.)

¹⁵ Е Јеховаскоро народо тано ко јекхипе адалеске со применинела о библиско чачипе (Јован 13:35; 1. Кор. 1:10). О мир хем о јекхипе со иси машкар аменде посебно тано истакнимо соске авдиве ко свето иси политичка, расна хем економска поделбе. Акава јекхипе бут влијајнѓа упро јекх мануш со викинела пе Жан. Ов барило ки јекх афричко пхув. Кеда адатхе почминѓа и граѓанско војна, ов гело ки војска. Ама покасно нашља ки јавер пхув. Адари запознајнѓа е Јеховаскере сведокон. О Жан вакерела: „Дознајнѓум кај окола сој ки чачутни религија на мешинена пе ки политика хем нане поделиме. Наместо адава, ола мангена пе јекх јекхеа“. Ов понадари вакерела: „Посветинѓум цело мло живото те боринав ман баши јекх пхув. Ама кеда дознајнѓум о чачипе тари Библија адава поттикнинѓа ман те посветинав мо живото  е Јеховаске“. О Жан целосно менинѓа пе. Наместо те боринел пе против о мануша кола сој различна лестар, ов акана вакерела сариненге со аракхела лен о библиско хабери башо мир. Адава со о библиско совет поможинела буте манушенге таро различна нацие сикавела кај шај те овел амен доверба ко е Девлескоро Лафи.

16. Соске тано важно те бајрара амари доверба ко е Девлескоро Лафи?

¹⁶ Адалеске со о свето џала таро лошно ко полошно, ка овел аменге са попхаро те сикава доверба ко е Девлескоро Лафи. О мануша ка пробинен те чхивен амен те сумнина амен ко библиско чачипе или ко адава дали о Јехова чаче користинела е Верно хем разборито робо те водинел амен. Ама ако сием увериме кај е Јеховаскоро Лафи секогаш тано точно, тегани нане те дозволина асавке изјаве те слабонкерен амари вера. Наместо адава, ка ова одлучна те икера е Јеховаскере законија цело живото (Пс. 119:112). Нане те лаџа те вакера е јаверенге башо чачипе хем те охрабрина лен те живинен спрема лесте (Пс. 119:46). Ка шај те истрајна ко најпхаре ситуацие, чак прогонство, а ко исто време те ова стрплива хем радосна (Кол. 1:11; Пс. 119:143, 157).

17. Ко со ка поможинел амен е бершескоро стихо?

¹⁷ Бут сием благодарна со о Јехова дозволинѓа аменге те џана о чачипе. О чачипе поможинела аменге те ачхова смириме хем те џана со кераја хем дела амен јасно водство сар те живина ко свето кова со овела са побунимо хем коте со иси хаос. Дела амен надеж баши пошужи иднина коте со ка владинел е Девлескоро Царство. Адалеске, е бершескоро стихо башо 2023 берш нека поможинел амен те ачхова увериме кај цело Лафи е Девлескоро тано чачипе! (Пс. 119:160).