1-2. Соске секова берш сием присутна ки Спомен-свеченост?

 ОКОЛУ 2000 берша англедер, о Исус денѓа пло живото аменге хем аѓаар денѓа аменге прилика те овел амен вечно живото. И рат англедер те мерел, о Исус заповединѓа пле следбениконге те сетинен пе ки лескири жртва аѓаар со ка икерен јекх едноставно вечера мареа хем мољаја (1. Кор. 11:23-26).

² Амен шунаја е Исусескири заповед адалеске со бут мангаја ле (Јован 14:15). Секова берш о курке англедер хем пали Спомен-свеченост сикаваја амари благодарност адалеа со одвојнаја аменге време те молина амен хем те размислина башо адава со значинела лескоро мерибе. Исто аѓаар радујнаја амен со шај те бајрара амари служба те шај те канина со повише манушен те овен присутна ки акаја посебно прилика. Хем џанѓола пе одлучна сием те на дозволина ништо те чхинавел амен те ова присутна ки Спомен-свеченост.

3. Башо со ка кера лафи ки акаја статија?

³ Ки акаја статија ка дикха трин начинија сар е Јеховаскере сведокија денѓе пестар са те шај те икерен и Спомен-свеченост: 1) аѓаар со икерена и Спомен-свеченост ко начин сар со о Исус вакерѓа ленге те икерен ла, 2) аѓаар со канинена  е јаверен те авен ки Спомен-свеченост хем 3) аѓаар со икерена и Спомен-свеченост чак ко пхаре околностија.

4. Кола чачипа тане истакниме секова берш ки Спомен-свеченост хем соске ваљани бут те ценина лен? (Лука 22:19, 20).

⁴ Секова берш ки Спомен-свеченост шунаја јекх библиско говор коте со одговоринела пе ко бут пучиба. Дознајнаја соске е манушенге ваљани откупнина хем сар о мерибе јекхе манушескоро шај те платинел о гревија буте џененгоро. Ко адава говор шунаја со претставинена о маро хем и мол хем кој ваљани те лел таро адала симболија. (Читин Лука 22:19, 20.) Хем размислинаја саве берекетија ка овел околен со иси лен надеж те живинен ки пхув (Иса. 35:5, 6; 65:17, 21-23). Амен ваљани бут те ценина акала чачипа соске милијарде мануша на џанена лен хем ола на хаљовена кобор бут врединела е Исусескири жртва. Ола исто аѓаар на икерена и Спомен-свеченост ко начин сар о Исус со вакерѓа те икерел пе. Соске тано адава аѓаар?

5. Откеда муле повише џене таро е Исусескере апостолија, сар почминѓе о мануша те сетинен пе ко е Исусескоро мерибе?

⁵ Кратко откеда повише џене таро е Исусескере апостолија муле, о ховавне христијања уле дело таро собрание (Мат. 13:24-27, 37-39). Ола вакерена сине „ховавне сикајба те шај те циден пали песте е ученикон“ (Дела 20:29, 30). Јекх таро акала „ховавне сикајба“ кола со о ховавне христијања пало несаво време почминѓе те вакерен лен сине кај о Исус на денѓа пло тело „јекх пути засекогаш те шај те лел о гревија буте џененгере“, него ола вакерѓе кај лескири жртва мора те дел пе секова пути (Евр. 9:27, 28). Авдиве бут мануша верујнена ко акава ховавно сикајба. Ола секова курко џана ки црква, понекогаш секова диве, те шај те сетинен пе ки е Исусескири жртва. Ола верујнена кај џикоте икерена акава настан о маро хем и мол овена е Исусескоро тело хем лескоро рат. Исто аѓаар верујнена кај е Исусескоро тело хем о рат тане секова пути жртвујме кеда некој учествујнела ко акава настан. О мануша таро јавера религие поретко сетинена пе ко е Исусескоро мерибе. Бут џене лендар на хаљовена целосно со значинела е Исусескири жртва. Несаве шај пучена пе: „Дали е Исусескере мерибаја чаче шај те простинен пе ме гревија?“ Соске пучена пе асавко нешто? Ко несаве случаија упри ленде влијајнѓе о мануша со вакерена кај преку е Исусескири жртва нашти те овен простиме о гревија. Сар е Исусескере следбеникија поможинѓе е јаверенге те хаљовен со значинела е Исусескири жртва хем сар ваљани те сетинен пе ко лескоро мерибе?

6. Со халиле јекх група истражувачија е Библијакере ко 1872 берш?

⁶ Ко 1870 берш јекх група истражувачија е Библијакере колен со водинела сине о Чарлс Тејз Расел почминѓе темелно те истражинен и Библија. Ола мангле те џанен со чаче значинела е Исусескири жртва хем сар ваљани те сетина амен ко лескоро мерибе. Џи ко 1872 берш ола халиле кај о Исус чаче денѓа пе сар откупнина са е манушенге. Ола на гаравѓе акава со откринѓе, наместо адава почминѓе те вакерен адава е јаверенге преку лила, новине хем списанија. Хем кратко пало адава, исто сар о христијања таро прво веко ола да почминѓе те икерен и Спомен-свеченост јекх пути ко берш.

7. Сар о буќа со откринѓе о истражувачија е Библијакере користинена аменге?

 ⁷ Авдиве иси амен корист таро буќа со истражинѓе адала христијања бут берша англедер. Сар? О Јехова поможинѓа аменге те хаљова со значинела е Исусескири жртва хем со ка керел аменге хем са е манушенге (1. Јов. 2:1, 2). Исто аѓаар дознајнѓем кај ки Библија иси надеж башо дуј групе мануша со керена е Девлескири волја — бесмртно живото ко небо несавенге хем вечно живото ки пхув милиоња манушенге. Оваја попаше е Јеховаја кеда размислинаја кобор бут мангела амен хем кобор бут бари корист иси амен лично тари е Исусескири жртва (1. Пет. 3:18; 1. Јов. 4:9). Адалеске слично сар амаре пхраља англедер, амен да канинаја е јаверен те авен ки Спомен-свеченост хем те икера ла ко начин сар о Исус со сикавѓа пле следбеникон те керен адава.

8. Со керѓа е Јеховаскоро народо те шај те канинел е јаверен ки Спомен-свеченост? (Дикх и слика.)

⁸ Е Јеховаскере сведокија више бершенцар канинена е јаверен те авен ки Спомен-свеченост. Панда таро 1881 берш сине јекх известување ки Стражарско кула колеа со сине каниме о пхраља хем о пхења тари Америка те кхеден пе баши акаја посебно прилика ко јекхе пхралескоро кхер ко Алегени, Пенсилванија. Покасно секова собрание посебно икерела сине и Спомен-свеченост. Ко март 1940 берш е објавителенге сине вакердо кај шај те канинен секоле јекхе таро подрачје кова со сикавела сине интерес. Ко 1960 берш о Бетел прво  пути бичхалѓа ко са о собранија печатиме покане баши адаја прилика. Оттегани милијарде покане баши Спомен-свеченост сине денде. Соске добором бут трудинаја амен те канина е јаверен?

9-10. Кас иси корист таро адава со трудинаја амен те канина е јаверен ки Спомен-свеченост? (Јован 3:16).

⁹ Јекх причина соске канинаја е јаверен те авен ки Спомен-свеченост тани адаја со мангаја окола со авена прво пути те дознајнен башо адава со керѓа о Јехова хем о Исус сариненге аменге. (Читин Јован 3:16.) Надинаја амен кај адава со ка дикхен хем ка шунен ки Спомен-свеченост ка поттикнинел лен те манген те сикљовен повише хем те овен е Јеховаскере слуге. Ама е јаверен да исто аѓаар иси лен корист.

¹⁰ Исто аѓаар канинаја околен со чхинавѓе те служинен е Јеховаске, адава кераја ле те шај те сетинкера лен кај о Девел панда мангела лен. Бут џене авена хем амен радујнаја амен со шај те дикха лен. Адава сој тане присутна ки Спомен-свеченост сетинкерела лен кобор сине ленге шукар кеда англедер служинена сине е Јеховаске. Те дикха е Моникакоро искуство. b Џикоте трајнела сине и пандемија КОВИД-19 ој ули палем активно. Откеда присуствујнѓа ки Спомен-свеченост ко 2021 берш, ој вакерѓа: „Акаја Спомен-свеченост сине манге нешто посебно. Прво пути пало 20 берш гељум ки служба хем канинѓум е манушен те авен ки Спомен-свеченост. Керѓум са со шај те канинав е јаверен соске сиум бут благодарно е Јеховаске хем е Исусеске башо адава со керѓе манге“ (Пс. 103:1-4). Бизи разлика дали о мануша ка прифатинен амари покана или на, амен даја амендар са те канина е манушен ки Спомен-свеченост соске џанаја кај о Јехова ценинела амаро трудо.

11. Сар наградинѓа о Јехова амаро трудо со канинѓем е манушен ки Спомен-свеченост? (Агеј 2:7).

¹¹ О Јехова бут наградинѓа амаро трудо те канина е манушен ки Спомен-свеченост. Ко 2021 берш иако сине ограничувања баши пандемија КОВИД-19, сине амен најбаро број присутна џи акана 21.367.603. Адава тано скоро дуј текваш пути повише таро број е Јеховаскере сведоконгоро ко цело свето. Џанѓола пе, е Јеховаске нане само важно кобор мануша тане присутна, леске тано важно секова јекх со авела ки Спомен-свеченост (Лука 15:7; 1. Тим. 2:3, 4). Шај те ова сигурна кај кеда даја покане е јаверенге о Јехова поможинела аменге те аракха околен сој искрена. (Читин Агеј 2:7.)

12. Со шај те керел аменге пхаро те икера и Спомен-свеченост? (Дикх и слика.)

¹² О Исус пророкујнѓа кај ко последна диве ка овен амен пхаре околностија сар сој противибе тари фамилија, прогонство, војне, заразна насвалипа хем панда бут повише буќа (Мат. 10:36; Мар. 13:9; Лука 21:10, 11). Понекогаш ко асавке условија шај те овел аменге пхаро те икера и Спомен-свеченост. Со керѓе амаре пхраља хем пхења ко асавке ситуацие хем сар о Јехова поможинѓа ленге?

13. Сар наградинѓа о Јехова е Артемескири храброст хем одлучност те икерел и Спомен џикоте сине ко затвор?

¹³ Ко затвор. Амаре пхраља сој пханле баши пумари вера керена са со шај те икерен и Спомен-свеченост. Те дикха е Артемескоро искуство. Ко 2020 берш, о курке англедер хем пали Спомен, ов сине чхивдо ки јекх келија која со сине бари само  17 квадратија хем колате со сине панџ џене. Иако сине ко затвор, ов успејнѓа те лел несаве буќа те шај те користинел лен сар симболија баши Спомен хем планиринѓа те икерел о говор баши Спомен коркори песке. Ама о јавера затвореникија со сине леа ки келија пушинена сине хем бут акошена сине. Со керѓа ов? Замолинѓа лен ако шај барем јекх саати те на пушинен хем те на акошен. Ов сине изненадимо кеда ола согласинѓе пе ко адава. О Артем вакерела: „Пучљум лен дали мангена те објаснинав ленге баши Спомен-свеченост“. Иако ола вакерѓе кај на мангена те шунен ништо башо адава ама откеда шунѓе хем дикхле сар о Артем икерела и Спомен ола пучле ле бут буќа башо адава.

14 Со керѓе о пхраља те шај те икерел пе и Спомен иако сине и пандемија КОВИД-19?

¹⁴ Ки пандемија КОВИД-19. Адалеске со сине и пандемија, е Јеховаскоро народо нашти сине те икерел и Спомен-свеченост ки дворана ама адава на чхинавѓа ле те икерел и Спомен. c Ко тхана коте со  сине интернет о собранија икерѓе и Спомен преку видеоконференција. А со керѓе бут милиоња мануша со на сине лен интернет? Ко несаве пхувја о подружнице организиринѓе ола те дикхен о говор ки телевизија или те шунен ле преку радио. Исто аѓаар о подружнице сниминѓе о говор ко повише таро 500 чхибја те шај чак окола сој ко изолириме тхана те икерен и Спомен. Хем о пхраља ингарѓе акала снимке ко тхана каске со ваљани сине.

15. Со сикљовеа таро искуство јекхе интересенткакоро?

¹⁵ Кеда иси противибе тари фамилија. Несавенге тано најпхаро те икерен и Спомен кеда противинела пе ленге и фамилија. Те дикха о искуство јекхе интересенткакоро со викинела пе Су. Ко 2021 берш, јекх диве англедер и Спомен, ој вакерѓа е пхењаке со проучинела сине лаја кај адалеске со противинена пе лаке кхералдан нашти те овел ки Спомен. И пхен читинѓа о стихо таро Лука 22:44. Пало адава и пхен објаснинѓа лаке кај кеда иси амен проблемија ваљани те џа пало е Исусескоро пример аѓаар со ка молина амен е Јеховаске хем ка овел амен целосно доверба ки лесте. О тајсутно диве и Су спреминѓа о маро хем и мол хем дикхља и посебно сабалутни библиско програма ки амари интернет-страница. Адаја рат ој гели ки пли соба хем шунѓа и Спомен преку телефони. Пало адава пишинѓа е пхењаке со проучинела лаја: „Бут охрабринѓан ман ерати. Керѓум са со шај те овав присутно ки Спомен хем о Јехова поможинѓа ман. Нашти опишинава кобор сиум радосно хем благодарно“. Со мислинеа дали о Јехова туке да шај те поможинел ако аракхљовеа ки слично ситуација?

16. Соске сием сигурна кај о Јехова ка наградинел амаро трудо те ова присутна ки Спомен-свеченост? (Римјаните 8:31, 32).

¹⁶ О Јехова бут ценинела амаро трудо те икера и Спомен. Шај те ова сигурна кај ов ка дел амен берекети кеда сикаваја благодарност башо адава со керѓа аменге. (Читин Римјаните 8:31, 32.) Адалеске, те ова одлучна те ова присутна ки Спомен-свеченост акава берш, хем о курке англедер хем пали Спомен-свеченост те бајрара амари служба.