1-2. а) Сар шај те осетина амен кеда размислинаја башо е Исусескоро живото хем служба? б) Со ка дикха ки акаја статија?

 КЕДА мерела амендар некој со мангаја ле, ов бут фалинела аменге. Кеда сетинаја амен ко време англедер те мерел шај те осетина бари дукх, посебно ако мучинѓа пе англедер те мерел. Ама пало несаво време шај те почмина те осетина амен пошукар кеда сетинаја амен со сикавѓа амен или со керѓа или вакерѓа те шај те охрабринел амен или те асакерел амен.

² Ко слично начин, бут сием тажна кеда читинаја кај о Исус мучинѓа пе хем муло. Посебно ко периоди кеда тани и Спомен одвојнаја аменге време те размислина башо адава кобор скапоцено тани е Исусескири жртва (1. Кор. 11:24, 25). Ама радујнаја амен кеда размислинаја башо буќа со керѓа хем вакерѓа о Исус џикоте сине ки пхув. Исто аѓаар, охрабринела амен кеда размислинаја башо адава со керела акана хем со ка керел баши аменде ки иднина. Сар со ка дикха ки акаја статија, адава со ка размислина башо акала буќа хем башо мангипе со иси ле спрема аменде шај те поттикнинел амен те сикава амаро ценење ко практична начинија.

3. Саве причине иси амен те ова благодарна баши откупнина?

³ Бут сием благодарна кеда размислинаја башо е Исусескоро живото хем мерибе. Џикоте сине ки пхув, о Исус сикавѓа  е манушен башо берекетија со ка анел е Девлескоро Царство. Амен бут ценинаја акала чачипа. Бут сием благодарна баши откупнина соске ој овозможинела аменге те овел амен паше амалипе е Јеховаја хем е Исусеа. Исто аѓаар, окола со сикавена вера ко Исус иси лен надеж вечно те живинен хем палем те дикхен пумаре манглен со муле (Јован 5:28, 29; Рим. 6:23). Амен на заслужинаја акала берекетија, а ни нашти те ирана е Девлеске хем е Христосеске адава шукарипе со керѓе аменге (Рим. 5:8, 20, 21). Ама шај те сикава кај сием бут благодарна. Сар?

4. Сар и Марија Магдалена сикавѓа кај тани благодарно башо адава со керѓа лаке о Исус? (Дикх и слика.)

⁴ Те дикха о пример јекхе еврејкакоро со викинела пе Марија Магдалена. Лакири состојба сине бут лошно соске мучинена ла сине ефта демонија. Шај мислинѓа песке кај никој нашти те поможинел ла. Адалеске шај те замислина аменге кобор сине благодарно башо адава со о Исус ослободинѓа ла таро демонија. Лакири благодарност поттикнинѓа ла те овел лескоро следбенико хем те користинел пло време, пли сила хем пле материјална средствија те поддржинел ле ки служба (Лука 8:1-3). Иако и Марија бут ценинела сине о шукарипе со керѓа лаке о Исус, ој шај на сине свесно кај ки иднина ка керел лаке побаро шукарипе. А адава тано кај ка дел пло живото са е манушенге „те шај секој со верујнела ки лесте“ вечно те живинел (Јован 3:16). Сепак и Марија сикавѓа кај тани благодарно е Исусеске аѓаар со сине верно. Џикоте о Исус сине ко стубо мучибаске, и Марија сине адатхе соске на мангља те мукхел ле коркори хем мангља те утешинел е јаверен со сине исто аѓаар адатхе (Јован 19:25). Одкеда муло о Исус, и Марија хем дуј јавера џувља анѓе мирисливо масло башо лескоро погреб (Мар. 16:1, 2). Е Маријакири верност сине бут наградими. Ла сине ла и предност те дикхел е Исусе одкеда воскреснинѓа хем те керел леа лафи. Само хари џенен сине лен акаја предност (Јован 20:11-18).

5. Сар шај те сикава амари благодарност башо са со керѓе аменге о Јехова хем о Исус?

 ⁵ Амен да шај те сикава кај сием благодарна башо са со керѓе аменге о Јехова хем о Исус аѓаар со ка користина амаро време, амари сила хем амаре материјална средствија те шај те поддржина о активностија башо Царство. На пример, шај те пријавина амен сар доброволција те поможина ко градибе хем ко одржибе амаре теократска објектија.

6. Соске шај те вакера кај и откупнина тани лично поклон?

⁶ Кеда размислинаја башо адава кобор бут мангена амен о Јехова хем о Исус поттикниме сием амен да те манга лен (1. Јов. 4:10, 19). Амен мангаја лен панда повише кеда хаљоваја кај о Исус муло аменге лично. О апостол Павле сине свесно башо адава хем сикавѓа пли благодарност кеда пишинѓа е пхраленге тари Галатија: „Е Девлескоро Чхаво... мангља ман хем денѓа пло живото манге“ (Гал. 2:20). Адалеске со о Исус денѓа пло живото сар откупнина, о Јехова привлечинѓа тут ки песте те шај те ове лескоро амал (Јован 6:44). На радујнеа тут ли башо адава со џанеа кај о Јехова дикхља нешто шукар ки туте хем кај платинѓа туке и најбари цена те шај те ове лескоро амал? На бајрарела ли акава тло мангипе спрема о Јехова хем о Исус? Адалеске ка овел шукар те пуча амен: „Со поттикнинела ман акава мангипе те керав?“

7. Сар со дикхаја ки слика, сар шај секова јекх амендар те сикавел пло мангипе спрема о Јехова хем о Исус? (2. Коринќаните 5:14, 15; 6:1, 2).

⁷ Амаро мангипе спрема о Девел хем о Христос поттикнинела амен те манга е јаверен. (Читин 2. Коринќаните 5:14, 15; 6:1, 2.) Јекх начин сар сикаваја амаро мангипе тано аѓаар со ревно проповединаја. Амен кераја секасаја лафи бизи разлика  тари која нација тано, дали тано барвало или чороло, или дали иси ле бари школа или на. Аѓаар кераја е Јеховаскири волја соске лескири намера тани „различна мануша те спасинен пе хем шукар те џанен о чачипе“ (1. Тим. 2:4).

8. Сар шај те сикава кај мангаја амаре пхрален хем пхењен?

⁸ Исто аѓаар сикаваја кај мангаја амаре Девле хем е Христосе аѓаар со сикаваја мангипе амаре пхраленге хем пхењенге (1. Јов. 4:21). Искрено интересинаја амен ленге хем поможинаја ленге кеда накхена таро пхаре времија. Утешинаја лен кеда мерела лендар некој, посетинаја лен кеда тане насвале хем трудинаја амен те охрабрина лен кеда тане обесхрабриме (2. Кор. 1:3-7; 1. Сол. 5:11, 14). Амен понадари да молинаја амен ленге соске џанаја кај „и молитва таро вило е праведникоскири иси ла бари сила“ (Јак. 5:16).

9. Кова тано јавер начин те сикаве мангипе спрема тле пхраља хем пхења?

⁹ Амен исто аѓаар сикаваја мангипе амаре пхраленге хем пхењенге аѓаар со даја амендар са те ова ко мир ленцар. Трудинаја амен те простина сар о Јехова со простинела. Ако о Јехова сине спремно те дел пле Чхаве те мерел башо амаре гревија, тегани на ваљани ли амен да спремно те простина амаре пхраленге хем пхењенге со грешинѓе аменге? Сигурно на мангаја те ова сар о лошно робо колеске со керела пе лафи ко јекх таро е Исусескере споредбе. Иако лескоро господари простинѓа лескоро бут баро борчи, акава робо на мангља те простинел јавере робоске бут потикно борчи (Мат. 18:23-35). Ако на накхеа некасаја шукар таро собрание дали шај ту те кере нешто те шај те смиринен тумен англедер те авел и Спомен-свеченост? (Мат. 5:23, 24). Адалеа ка сикаве кај бут мангеа е Јехова хем е Исусе.

10-11. Сар шај о старешине те сикавен кај мангена е Јехова хем е Исусе? (1. Петрово 5:1, 2).

¹⁰ Сар шај о старешине те сикавен кај мангена е Јехова хем е Исусе? Јекх важно начин тано аѓаар со грижинена пе башо потребе е Исусескере бакхренгере. (Читин 1. Петрово 5:1, 2.) Хем баш адава о Исус јасно истакнинѓа е Петареске. Одкеда трин пути вакерѓа кај на пенџарела е Исусе, е Петаре сине ле бари желба те сикавел е Исусеске кај мангела ле. Одкеда воскреснинѓа, о Исус пучља е Петаре: „Симон, чхаво е Јованескоро, дали мангеа ман?“ Шај те ова сигурна кај о Петар са би керела сине само те шај те докажинел кај мангела пле Господаре. О Исус вакерѓа е Петареске: „Аракх мле тикне бакхрен“ (Јован 21:15-17). Хем цело пло живото о Петар грижинѓа пе лескере бакхренге хем аѓаар сикавѓа кај мангела е Исусе.

¹¹ Тумен о старешине, сар шај о курке англедер хем пали Спомен те сикавен кај туменге важна о лафија со вакерѓа лен о Исус е Петареске? Шај те сикавен кобор мангена е Јехова хем е Исусе аѓаар со редовно ка керен пастирска посете хем ка трудинен тумен те поможинен околенге со нане активна те иранен пе ко Јехова (Езек. 34:11, 12). Шај исто аѓаар те трудинен тумен те охрабринен е интересентен хем околен со прво пути авена ки Спомен. Амен мангаја те осетинен пе шукар соске надинаја амен кај јекх диве ола да ка овен е Исусескере следбеникија.

12. Соске дена амен храброст о лафија е Исусескере кола со вакерѓа лен и рат англедер те мерел? (Јован 16:32, 33).

¹² И рат англедер те мерел, о Исус вакерѓа пле следбениконге: „Ко свето ка овел тумен неволје, ама овен храбра, ме побединѓум о  свето!“ (Читин Јован 16:32, 33.) Со поможинѓа е Исусеске храбро те соочинел пе пле душманенцар хем те ачхол верно џи ко пло мерибе? Ле сине ле доверба ко Јехова. Адалеске со џанља кај лескере ученикија ка овел лен слична испитија, о Исус молинѓа е Јехова те аракхел лен (Јован 17:11). Соске шај акава те дел амен храброст? Адалеске со о Јехова тано бут посилно таро било саво душмани (1. Јов. 4:4). О Јехова дикхела са. Увериме сием кај ако иси амен доверба ко Јехова шај те накхава амари дар хем те сикава храброст.

13. Сар о Јосиф тари Ариматеја сикавѓа храброст?

¹³ Те дикха о пример е Јосифескоро тари Ариматеја. Ов сине бут поштујмо таро Евреија. Ама иако сине члени ко Синедриум, о Еврејско судско совет, сепак џикоте о Исус керела сине пли служба ки пхув о Јосиф на сикавѓа храброст. О Јован вакерѓа кај „ов сине е Исусескоро ученико, ама гаравела сине адава соске дарала сине таро Евреија“ (Јован 19:38). Иако о Јосиф мангела сине те шунел о хабери башо Царство, сепак ов гаравела сине е јаверендар кај сине ле вера ко Исус. Ов најверојатно дарала сине кај о мануша нане више те поштујнен ле ако дознајнена кај тано е Исусескоро ученико. Бизи разлика со сине и причина, и Библија вакерела аменге кај одкеда о Исус муло о Јосиф конечно „кхединѓа храброст, гело ко Пилат хем родинѓа е Исусескоро тело“ (Мар. 15:42, 43). О Јосиф на гаравѓа више кај тано е Исусескоро ученико.

14. Со ваљани те кере кеда иси тут дар таро мануша?

¹⁴ Дали шај те хаљове е Јосифескири дар таро мануша? Дали ки школа или ки бути понекогаш лаџаја те вакере кај сиан е Јеховаскоро сведоко? Дали на почминеа е службаја или на крстинеа тут адалеске со дараја со ка мислинен о јавера тутар? Ма дозволин асавке чувствија те чхинавен тут те кере адава сој исправно. Молин тут е Јеховаске таро вило. Роде лестар храброст те кере лескири волја. Кеда ка дикхе сар о Јехова одговоринела ко тле молитве ка ове посилно хем похрабро (Иса. 41:10, 13).

15. Откеда о Исус појавинѓа пе пле учениконге, ко со поттикнинѓа лен ленгири радост? (Лука 24:52, 53).

¹⁵ Е Исусескере ученикија сине бут тажна кеда ов муло. Шај ли те чхиве тут ленге ки кожа? На само со нашавѓе пумаре мангле амале, него исто аѓаар мислинѓе кај нашавѓе пумари надеж (Лука 24:17-21). Ама кеда појавинѓа пе ленге о Исус, поможинѓа ленге  те хаљовен сар исполнинела о библиско пророштво. Ов исто аѓаар денѓа ленге јекх бут важно задача (Лука 24:26, 27, 45-48). Кеда пало 40 диве о Исус гело ко небо, лескере ученикија на сине више тажна него радосна. Ола сине радосна соске џанле кај о Исус тано џивдо хем кај шај те поможинел ленге ки ленгири неви задача со денѓа лен. Ленгири радост поттикнинѓа лен те фалинен е Јехова бизо те чхинавен. (Читин Лука 24:52, 53; Дела 5:42).

16. Сар шај те џа пало пример е Исусескере учениконгоро?

¹⁶ Сар шај те џа пало пример е Исусескере учениконгоро? Шај те ова радосна кеда обожавинаја е Јехова цело берш, а на само кеда авела о периоди тари Спомен-свеченост. Адава сикавела кај чхиваја е Девлескоро Царство ко прво тхан. На пример, бут џене керѓе промене ки пумари бути те шај те џан ки служба, те овен присутна ко состанокија хем редовно те икерен и Фамилијарно рат. А несаве чак откажинѓе пе таро материјална буќа коленге со о јавера мислинена кај тане бут потребна, само те шај те овен панда покорисна е собраниеске или те шај те служинен ко тхана коте со иси побари потреба таро објавителија. Иако ваљани аменге истрајност те шај постојано те служина е Јеховаске, сепак ов ветинѓа аменге кај бут ка наградинел амен ако чхиваја о Царство ко прво тхан (Изр. 10:22; Мат. 6:32, 33).

17. Со сиан одлучно те кере ко периоди тари акаја Спомен-свеченост? (Дикх и слика.)

¹⁷ Едвај аџикераја те ова присутна ки Спомен-свеченост со ка икерел пе вторник, 4 април. Сепак, ма аџикер џи тегани те шај те размислине башо е Исусескоро живото хем мерибе хем башо мангипе со сикавѓе ле аменге ов хем о Јехова. Користин секоја прилика те размислине башо акала буќа англедер хем пали Спомен-свеченост. На пример, одвојн туке време те читине хем хор те размислине башо настанија со случинѓе пе ко последно курко таро е Исусескоро живото. Адава шај те аракхе ко Амаро живото хем служба таро април 2019, страна 4. Џикоте кереа адава, роде библиска стихија со ка бајрарен тли благодарност, тло мангипе, тли храброст хем тли радост. Тегани размислин ко саве начинија шај те сикаве ти бари благодарност. Шај те ове сигурно кај о Исус ценинела са со кереа те шај ко периоди тари Спомен-свеченост те сетине тут ки лесте (Отк. 2:19).