Бијамо сиум ко Сент Пол (Минесота, САД) ко 1954 берш. Бариљум ки католичко фамилија, хем сиум сине о дујто таро панџ чхаве. На сием сине ни бут барвале а ни чороле. Сар тикно, џава сине ки католичко школа хем поможинава сине е свештенико џикоте трајнела и миса. Ама, на џанава сине скоро ништо баши Библија. Иако верујнава сине кај мора те овел Девел кова со створинѓа са, на сине ман нисави доверба ки црква.

Ко прво берш откеда пишинѓум ма ко правно факултети, ко удар ало манге јекх брачно пари е Јеховаскере сведокија. Ко адава моменти керава сине нешто бути, хем ола љубезно вакерѓе манге кај ка иранен јавер пути. Кеда але о дујто пути, пучљум лен дуј пучиба: „Соске о шукар мануша накхена полошно ко живото?“ хем „Сар шај некој те овел чаче бахтало?“ Денѓе ман о лил Вистина која води до вечен живот хем Светото писмо — превод Нов свет, коле со сине ле впечатлива зелена корице. Исто аѓаар, прифатинѓум те проучинав и Библија ленцар. Адава чаче пхравѓа ме јакхја. Сиум сине бут бахтало кеда дознајнѓум кај е Девлескоро Царство тано  влада која со ка владинел упри цели Пхув. Сине манге јасно кај о манушикане владе целосно промашинѓе хем анѓе бут муке, дукха хем неправде.

Ко почеток таро 1982 берш, денѓум завет е Јеховаске хем адава исто берш крстинѓум ман ко конгрес „О чачипе башо Царство“, кова со икерѓа пе ко културно центар Сент Пол. О јавер курко, ко исто адава центар положинѓум адвокатско испит. Ко почеток таро октомври дознајнѓум кај положинѓум о испит, со значинела сине кај шај те овав адвокати.

Ко конгрес „О чачипе башо Царство“ запознајнѓум е пхрале Мајк Ричардсон, кова со служинела сине ко Бетел ко Бруклин. Ов вакерѓа манге кај ко главно седиште сине кердо правно одделение. Сетинѓум ман ко лафија е етиопско службеникоскере, кола сој пишиме ко Дела 8:36, хем пучљум ман: „Со чхинавела ман те пријавинав ман те служинав ко правно одделение?“ Хем денѓум молба башо Бетел.

Мле родителија на сине бахтале со уљум е Јеховаскоро сведоко. Мо дад пучља ман сар и бути ко Бетел ка користинел манге ки мли адвокатско кариера. Објаснинѓум леске кај ка служинав сар доброволцо хем кај ко масек ка добинав по 75 доларија, кобор со тегани добинена сине о бетелска слуге.

Адалеске со англедер сине ман договор те стажиринав ко јекх судо, нашти сине одма те почминав ко Бетел. Гељум ко Бетел ко Бруклин (Њујорк) ко 1984 берш. Адари добинѓум задача те служинав ко правно одделение. О искуство со добинѓум ко судо спреминѓа ман башо адава со авела.

Амари организација кинѓа о театар Стенли ко Џерси Сити (Њу Џерси) ко ноември 1983 берш. О пхраља родинѓе дозвола те реновиринен и водоводно хем и електроинсталација ко објекти. Кеда дикхле пе е претставниконцар тари локално управа, ола објаснинѓе кај мангена те користинен о театар Стенли сар конгресно сала е Јеховаскере сведоконге. Ама акава сине проблеми соске е дизјакоро урбанистичко плани дозволинела сине те овен верска објектија само ко станбена подрачја. Адалеске со о театар Стенли сине ко деловно подрачје ко центар, е дизјакири управа одбинѓа те дел дозволе. О пхраља денѓе жалба ки адаја одлука, ама и жалба сине одбими.

Ко мло прво курко ко Бетел, и организација почминѓа правно постапка ко федерално окружно судо против е дизјакири управа која со одбинѓа те дел амен о дозволе. Адалеске со на  накхља бут време откеда завршинѓум мле дује бершенгоро стажирибе ко федерално окружно судо ко Сент Пол (Минесота), асавке случаија сине манге пенџарде. Јекх таро аргументија амаре адвокатенгоро сине кај о театар Стенли више сине користимо башо најразлична јавна настанија, таро филмија џи ко рок-концертија. Тегани, соске на би овела законски те икерен пе верска настанија? Откеда дикхља о случај, о федерално окружно судо анѓа одлука кај и управа таро Џерси Сити на поштујнѓа амари верско слобода. О судо нарединѓа е дизјакере властенге те ден о потребна дозволе. Одма сине манге јасно кај о Јехова дела берекети ко адава со лескири организација користинела законска средствија те шај те керел пе лескири активност. Сиум сине бут бахтало со шај сине те овел ман дело ко адава.

О реновирибе сине бут баро проекти. Сепак, на накхља нијекх берш откеда о пхраља почминѓе е буќаја, ки акаја конгресно сала ко Џерси Сити икерѓа пе о дипломирибе таро 79-то класи ки Школа Гилеад ко 8 септември 1985 берш. Сине манге чест со шај сине те поддржинав о Царство заедно е јавере пхраленцар таро правно одделение. Керѓа ман побахтало тари бути со керава сине сар адвокати англедер те авав ко Бетел. Тегани ни на мислинѓум кај о Јехова ка користинел ман ко панда бут јавера случаија.

Ко 1980-та берша, бут пути случинела пе сине о докторија хем о болнице те на поштујнен о право башо лечибе бизо рат е возрасна Јеховаскере сведоконгоро. Е кхамне џувлен сине лен панда побаре пречке соске о судие бут пути мислинена сине кај посебно лен нане лен законско право те одбинен трансфузија. Вакерена сине кај, ако на дела пе трансфузија е џувљаке, о бебе шај те ачхол бизи дај.

Ко 29 декември 1988 берш, и пхен Дениз Николо нашавѓа бут рат откеда бијанѓа пле чхаве. Лакоро хемоглобин пело похари таро 5.0, хем о доктори мангља те дел пе лаке рат, ама ој одбинѓа. О јавер сабај, и болница родинѓа судско дозвола те шај те дел е пхењаке трансфузија, која со спрема о докторија сине лаке бут потребно. Бизо те шунел о стави е пхењакоро Николо, хем бизо те известинел лате хем лакере роме, о судија денѓа дозвола е болницаке те дел пе лаке рат.

Петок, ко 30 декември, е пхењаке Николо денѓа пе трансфузија иако лакоро ром хем јавера џене тари лакири фамилија, кола со сине лаја, противинѓе пе. Адаја рат, некобор џене тари лакири фамилија хем јекх или дуј старешине, сине астарде адалеске со сине обвиниме кај блокиринѓе о друмо е докторенгоро те шај те чхинавен  лен те ден ла рат. Сабота сабајле, ко 31 декември, бут новине, телевизије хем радиостанице, ко Њујорк хем ко Лонг Ајленд известинѓе баши акаја ситуација.

Понеделник сабајле, керѓум лафи е претседавачко судијаја, о Милтон Молен. Објаснинѓум леске о фактија таро акава случај, хем јасно вакерѓум леске кај о судија таро потикно судо потпишинѓа наредба баши трансфузија бизо те овел судибе. О судија Молен замолинѓа ма те џав ко лескоро кабинети палоручко те шај те дикха о фактија хем и законија кола со важинена башо акава случај. Адаја рат, мло надгледнико о Филип Брамли ало заедно манцар ко судија о Молен. О судија исто аѓаар викинѓа е болницакере адвокате. Сине силно дискусија. Ко јекх моменти, о пхрал Брамли пишинѓа манге ко пло тефтери: „Похари, посмирено“. Адава сине чаче шукар совет соске силно пробинава сине те сикавав кај е адвокатескере аргументија на важинена.

Отприлика пало јекх саати, о судија Молен вакерѓа кај о јавер диве акава случај ка овел прво ко редо. Џикоте икљоваја сине таро лескоро кабинети, ов вакерѓа кај е болницакере адвокате аџикерела ле пхаро диве, јавере лафенцар нане те овел леске локхо те бранинел пле аргументија. Ко несаво начин, о Јехова уверинѓа ма кај иси амен баре шансе те добина акава случај. Иако сием сине обична мануша, о Јехова користинѓа амен те шај те керел пли волја!

Керѓем бути цело рат те шај те спремина амен башо тајсутно диве. Адалеске со и судница сине паше узо Бетел ко Бруклин, повише џене таро амаро тикно правно одделение геле пешки. Откеда шунѓе амаре аргументија, и комисија таро штар судие поништинѓе и наредба баши трансфузија. О баро судо анѓа одлука ки корист е пхењаке Николо, хем вакерѓа кај о дејбе судско наредба бизо те известинел пе или те шунел пе е пациенте тано против о основна уставна правија.

Кратко пало адава, о најбаро судо ки држава Њујорк вакерѓа кај е пхења Николо сине ла право те одбинел трансфузија. Акаја сине и прво таро штар шукар одлуке поврзиме е ратеа со анѓе о најбаре судија ко сојузна државе таро САД. Акава сине о прво асавко случај коте со учествујнѓум. (Дикх и рамка „ Победе ко најбаре судија ко САД“.) Заедно е јавере адвокатенцар  таро Бетел учествујнѓум ко случаија поврзиме старателствоја упро чхаве, развод, недвижнине хем законија башо урбанистичко планирибе.

Кеда прво пути дикхљум ме ромња, и Доун, ој сине разведими дај трине чхавенцар. Керела сине бути те шај те грижинел пе пле фамилијаке, хем ко исто време служинела сине сар пионерка. Иако сине ла пхаро живото, ој сине одлучно те служинел е Јеховаске. Адава мукхља манге бут баро впечаток. Ко 1992 берш, кеда сием сине ко обласно конгрес „Светлоносци“ ко Њујорк, пучљум ла дали би мангела пошукар те запознајна амен. Венчинѓем амен јекх берш пало адава. Адава со сине ман духовно зрело ромни хем со сине ла смисла башо хумор манге сине чаче поклон таро Јехова. Откеда сием заедно, и Доун чаче „иранела манге само шукарипаја“ (Изр. 31:12).

Кеда лелем амен, е чхавен сине лен 11, 13 хем 16 берш. Мангљум те овав ленге шукар дад, хем адалеске трудинава ман сине шукар те читинав хем те применинав са о советија со шај сине те аракхав лен ко амаре публикацие башо фамилие сој очувоја или маќеаја. Иако ко са адала берша на сине секогаш локхо, бахтало сиум со о чхаве прифатинѓе ман сар доверливо амал хем љубезно дад. Амаро кхер секогаш сине пхравдо ленгере амаленге, хем чаче уживинаја сине со о кхер сине аменге пхердо терне манушенцар.

Ко 2013 берш, ме хем и Доун селинѓем амен ко Висконсин те шај те поможина амаре пхуре родителенге. Изненадинѓа ман адава со шај сине понадари да те поможинав ко Бетел. Сар привремено доброволцо, продолжинѓум те поможинав е организацијаке ко разна правна буќа.

Ко септември 2018 берш, приметинѓум кај нешто нане шукар ме крлеа. О матично доктори преглединѓа ман, ама нашти сине точно те откринел сој о проблеми. Покасно јекх доктори денѓа предлог те џав ко невролого. Ко јануари 2019 берш, о невролого вакерѓа манге кај сумнинела пе кај иси ман јекх ретко насвалипе ко нервно систем, кова со викинела пе прогресивно супрануклеарно парализа.

Трин диве пало адава, џикоте сиум сине ко лизгалиште, пељум хем пхагљум ме вастескоро зглобо. Цело живото уживинава ко лизгајбе, адава тано дело мандар. Адалеске сине манге јасно кај почминава те нашавав контрола ко мло движибе. На очекујнѓум о насвалипе те напредујнел добором сигате. Са попхаро тано манге те керав лафи, те движинав ман хем те глтинав.

Бут сиум бахтало со шај сине те користинав мло искуство сар адвокати те шај те поможинав е Јеховаскере организацијаке. Освен адава, пишинѓум бут статие ко стручна списанија со читинена лен докторија, адвокатија хем судие. Икерѓум говорија ко семинарија ко цело свето аѓаар со бранинава сине е Јеховаскере слуген те биринен операције хем лечибе бизо рат. Сепак, шај те вакерав о исто со пишинѓа о библиско писатели о Лука: „Ме сиум робо кова со на заслужинава те фалинен ман. Керѓум адава со ваљани сине те керав“ (Лука 17:10).