О доказија сикавена кај о Исус уло Првосвештенико кеда крстинѓа пе ко 29 берш а.е. Котар џанаја акава? Кеда крстинѓа пе, о Исус сикавѓа кај тано спремно те дел пло живото сар жртва ко симболично жртвенико кова со претставинела е Девлескири „волја“ (Гал. 1:4; Евр. 10:5-10). О симболично жртвенико постојнела таро моменти кеда о Исус крстинѓа пе. Адалеске шај те вакера кај о баро духовно храми постојнела таро адава моменти, соске о жртвенико тано главно дело таро адава духовно храми. Ко акава храми, окола со сикавена вера ки откупно жртва е Девлескере Чхавескири шај те служинен е Јеховаске ко прифатливо начин (Мат. 3:16, 17; Евр. 5:4-6).

Откеда почминѓа те постојнел о баро духовно храми, потребно сине првосвештенико те служинел адари. Адалеске о Јехова помазинѓа е Исусе „свети духоја хем силаја“ (Дела 10:37, 38; Мар. 1:9-11). Сепак, соске шај те ова сигурна кај о Исус сине чхивдо сар Првосвештенико англедер те мерел хем те воскреснинел? Е Аронескоро пример хем е првосвештениконгоро со служинѓе пали лесте ка поможинен аменге те одговорина ко акава пучибе.

Спрема е Мојсеескоро закони, само о првосвештенико смејнела сине те кхувел ки Најсвето светиња. Акаја просторија сине одвојми завесаја тари Светиња. О првосвештенико кхувела сине пали адаја завеса само ко Диве простибаске о гревија (Евр. 9:1-3, 6, 7). О Арон хем лескере наследникија сине помазиме сар првосвештеникија англедер те кхувен пали дословно завеса ко свето шатори. Значи, о Исус да мора сине те овел чхивдо сар Првосвештенико ко е Јеховаскоро баро духовно храми англедер те мерел хем пало адава те накхел ко живото ко небо преку и симболично завеса, која со претставинела лескоро манушикано тело (Евр. 10:20). Тари адаја причина, о апостол Павле вакерела кај о Исус ало „сар првосвештенико“ хем пало адава кхувѓа „ко небо“ (Евр. 9:11, 24).

О нево сојуз сине воспоставимо хем почминѓа те важинел ко исто време. Соске вакераја акава? Те шај адава сојуз те овел воспоставимо хем те почминел те важинел, сине потребна трин чекорија. Кола сине адала?

Прво, о Исус појавинѓа пе англо Јехова; дујто, о Исус родинѓа таро Јехова те прифатинел и жртва која со ов денѓа ла; хем трито, о Јехова прифатинѓа лескири жртва. О нево сојуз нашти сине те почминел те важинел са џикоте на сине керде акала трин чекорија.

И Библија на вакерела аменге кеда точно о Јехова прифатинѓа е Исусескири жртва. Адалеске, нашти точно те вакера ко кова моменти о нево сојуз сине воспоставимо хем почминѓа те важинел. Сепак, џанаја кај о Исус гело ко небо деш диве англедер и Педесетница (Дела 1:3). Ко несаво моменти таро адава кратко периоди, ов денѓа пли жртва е Јеховаске, која со ов прифатинѓа ла (Евр. 9:12). Акава јасно дикхља пе ки Педесетница (Дела 2:1-4, 32, 33). Јасно тано кај тегани о нево сојуз више важинела сине.

Значи, о нево сојуз сине воспоставимо хем почминѓа те важинел откеда о Јехова прифатинѓа е Исусескири жртва хем вклучинѓа е помазаникон ко адава сојуз. О Првосвештенико о Исус уло посреднико ко адава сојуз (Евр. 7:25; 8:1-3, 6; 9:13-15).