1. Сар шај те влијајнел о натпреварувачко духо упро мануша?

БУТ мануша авдиве тане себична хем сикавена натпреварувачко духо. На пример, јекх бизнисмени шај те керел штета е јаверенге само те шај те овел по успешно е јаверендар ко пло бизнис. Јекх спортисти шај чак намерно те поврединел јекхе играче таро јавер тими само те шај те побединел. Јекх ученико шај ка препишинел ко тести само те шај те кхувел ко несаво познато факултети. Сар христијања амен хаљоваја кај асавке буќа тане погрешна, ола тане дело таро „постапке е грешно телоскере“ (Гал. 5:19-21). Ама, дали шај несаве пхраља или пхења те сикавен натпреварувачко духо ко собрание бизо те овен свесна башо адава? Важно тано те размислина башо акава соске о натпреварувачко духо шај те влијајнел упро јекхипе ко собрание.

2. Башо со ка кера лафи ки акаја статија?

² Ки акаја статија ка кера лафи башо негативна особине кола со шај те чхивен амен те натпреварина амен амаре пхраленцар. Исто аѓаар, ка дикха о пример е Јеховаскере верна слугенгоро таро пурано време кола со на дозволинѓе ки ленде те развинел пе асавко духо. Прво, те дикха сар шај те испитина амаре мотивија.

3. Кола пучиба ваљани те пуча амен?

³ Шукар тано несаво пути те испитина амаре мотивија. Шај те пуча амен: „Дали меринава мли вредност аѓаар со  спорединава ман е јаверенцар? Дали дава мандар са ко собрание само те шај те овав о најшукар или барем пошукар таро несаво пхрал или пхен? Или, адава со керава мангава те керав ле е Јеховаске?“ Соске ваљани те пуча амен акала пучиба? Дикх со вакерела е Девлескоро Лафи.

4. Сар со пишинела ко Галатите 6:3, 4, соске на ваљани те споредина амен е јаверенцар?

⁴ И Библија поттикнинела амен те на споредина амен е јаверенцар. (Читин Галатите 6:3, 4.) Соске? Прво, ако мислинаја кај сием пошукар амаре пхралендар, тегани шај те ова горда. Хем дујто, ако мислинаја кај о јавера тане пошукар амендар, тегани веројатно ка обесхрабрина амен. Нане мудро те размислина аѓаар (Рим. 12:3). Јекх пхен со викинела пе Катерина, * која со живинела ки Грција, вакерела: „Англедер спорединава ман сине е јаверенцар со мислинава сине кај тане пошуже мандар, пошукар ки служба хем со сине лен повише амала. Адава керѓа те мислинав кај на врединава“. Никогаш на ваљани те бистра кај о Јехова привлечинѓа амен ки песте на адалеске со сием шуже, со кераја шукар лафи или соске о јавера мангена амен, него адалеске со сием спремна те манга ле хем те шуна лескере Чхаве (Јован 6:44; 1. Кор. 1:26-31).

5. Со сикљовеа таро искуство е пхралескоро Хјун?

⁵ Јавер пучибе со шај те пуча амен тано: „Дали о пхраља дикхена ки манде сар некој со керела мир или бут пути на согласинава ман е јаверенцар?“ Приметин со случинѓа пе е пхралеске Хјун, кова со живинела ки Јужно Кореа. Несаво време дикхела сине сар конкуренција ко пхраља колен со исто аѓаар сине лен одговорностија ко собрание. Ов вакерела: „Критикујнава сине акале пхрален, хем често на сложинава ман сине адалеа со ка вакерен“. Сави сине и последица? Ов признајнела: „Мло стави руминѓа о мир ко собрание“. Несаве таро лескере амала поможинѓе леске те хаљол кај иси ле проблеми. О Хјун керѓа промене ко пло стави, хем авдиве тано бут шукар старешина. Ако дикхаја кај почминаја те натпреварина амен наместо те кера мир, мора одма те кера промене.

6. Спрема Галатите 5:26, кола негативна особине шај те анен џи ко адава те сикава натпреварувачко духо?

⁶ Читин Галатите 5:26. Кола негативна особине шај те анен џи ко адава те сикава натпреварувачко духо? Јекх лендар тани о егоизам. Окола сој егиостија тане горда хем себична. Јавер негативно особина тани и завист. Окова со завидинела некаске, на само со мангела те овел ле адава со иси е јавере него исто аѓаар, мангела те лел лестар адава со иси ле. Значи кеда јекх мануш завидинела е јавереске, ов уствари мрзинела ле. Адалеске, амен мангаја со по дур те цида амен таро асавке особине!

7. Кова пример сикавела соске о егоизам хем и завист тане штетна?

⁷ О егоизам хем и завист шај те спорединен пе мелале горивоја со користинела пе ко авиони. О авиони шај те почминел те летинел, ама о мелалипе шај те запушинел о цревија башо гориво, хем аѓаар о авиони кратко англедер те хулел шај те нашавел сила хем те перел. Слично, некој сој егоисти хем завидинела, несаво време шај те служинел е Јеховаске, ама јекх диве ка перел (Изр. 16:18). Ов ка чхинавел те служинел е Јеховаске хем ка керел штета песке хем е јаверенге. Тегани, со шај те кера те на ова горда хем те на завидина?

8. Сар шај те борина амен против о егоизам?

 ⁸ Шај те борина амен против о егоизам аѓаар со ка применина о совет кова со о Павле денѓа ле е Филипјаненге: „Ма керен ништо тари холи или тари гордост, него понизно дикхен е јаверен сар побаре тумендар“ (Фил. 2:3). Ако дикхаја е јаверен сар побаре амендар, тегани нане те натпреварина амен околенцар кола со шај тане поталентирана хем поспособна амендар. Наместо адава, ка овел аменге мило баши ленде, посебно кеда користинена пумаре способностија те фалинен е Јехова. Хем ако о пхраља или о пхења колен со иси повише способностија применинена е Павлескоро совет, тегани ола да ка концентриринен пе ко амаре шукар особине. Аѓаар, сарине ка кера те овел мир хем јекхипе ко собрание.

9. Со ка поможинел аменге те на завидина е јаверенге?

⁹ Јекх бути со шај те поможинел аменге те на завидина е јаверенге тани ако сием скромна. Јавере лафенцар, ако хаљоваја кај иси буќа со нашти те кера. Ако сием скромна, нане те манга те докажина кај сием пошукар таро јавера. Наместо адава, ка дикха со шај те сикљова таро јавера сој по способна амендар. На пример, ако јекх пхрал икерела шукар говорија ко собрание шај те пуча ле сар спреминела пе баши ленде. Ако јекх пхен шукар керела хајбаске, шај те пуча ла башо идее со ка поможинен аменге пошукар те готвина. Или ако несаве терне пхралеске тано пхаро те керел песке амала, шај те пучел некас со локхе керела песке амала. Ако кераја аѓаар нане те завидина е јаверенге хем ка ова повешта.

10. Солеа соочинѓа пе о Гедеон?

¹⁰ Размислин со случинѓа пе машкар о Гедеон, таро племе Манасија, хем о мануша таро племе Ефрем. О Јехова поможинѓа е Гедеонеске хем лескере 300 манушенге те побединен ки јекх борба хем адалеске ола шај сине те овен бут горда. О мануша таро племе Ефрем геле ко Гедеон, на те пофалинен ле, него те распрајнен пе леа. Веројатно  ленгири гордост сине повредими, соске о Гедеон на викинѓа лен таро почеток те џан леа ки борба. Добором сине ленге важно те поштујнел пе о анав ленгере племескоро, со бистерѓе кај тано најважно адава со о Гедеон поможинѓа те славинел пе е Јеховаскоро анав хем те заштитинел пе лескоро народо (Суд. 8:1).

11. Со вакерѓа о Гедеон е манушенге таро Ефрем?

¹¹ О Гедеон понизно вакерѓа е манушенге таро Ефрем: „Со керѓум ме ки споредба туменцар?“ Тегани, ов сетинкерѓа лен ко адава сар о Јехова денѓа лен берекети. Кеда шунѓе акала лафија, ола на сине више хољаме (Суд. 8:2, 3). О Гедеон сикавѓа понизност те шај те икерел о мир машкар е Девлескоро народо.

12. Со сикљоваја е манушендар таро Ефрем хем таро Гедеон?

¹² Со шај те сикљова таро акава извештај? Е манушендар таро Ефрем сикљоваја кај амари чест хем амаро анав на ваљани те овен аменге поважна таро адава те славинел пе е Јеховаскоро анав. А сар поглаварија хем старешине, шај те сикљова нешто важно таро Гедеон. Ако некој хољанела башо нешто со керѓем, ваљани те хаљова ле соске тано хољамо. Шај исто аѓаар те пофалина ле башо о шукар буќа со керѓа. Те шај те кера адава, ваљани те ова понизна, посебно ако аменге јасно кај о јавер тано криво. Бут поважно тано те ачхова ко мир амаре пхраленцар, него те докажина кај сием ко право.

13. Саво предизвик сине е Ана, хем со керѓа ој?

¹³ Размислин исто аѓаар башо пример со денѓа и Ана. Лакоро ром сине о левити о Елкана, кова со бут мангела ла сине. Ама ле сине ле јавер да ромни, и Фенина. Ов мангела сине повише е Ана него е Фенина. Ама е Фенина сине ла чхаве, а е Ана на сине ла. Адалеске и Фенина стално вреџинела ла сине „те шај те вознемиринел ла“. Сар осетинела пе сине и Ана? Ој сине бут разочарими! „Ровела сине хем на хала сине“ (1. Сам. 1:2, 6, 7). Сепак, и Библија на вакерела кај и Ана лошнипаја иранѓа е Фенинаке. Наместо адава, ки молитва вакерѓа е Јеховаске са со сине ла ко вило хем сине ла доверба кај ов ка поможинел ла. Дали е Фенинакоро стави спрема и Ана менинѓа пе? И Библија на вакерела ништо башо адава. Ама, адава со џанаја тано кај и Ана палем иранѓа пло андруно мир. „Лакоро муј на сине више тажно“ (1. Сам. 1:10, 18).

14. Со сикљоваја таро е Анакоро пример?

¹⁴ Со сикљоваја таро е Анакоро пример? Ако некој мангела те натпреваринел пе туја ко нешто, ма бистре кај на ваљани те докажине е јаверенге кобор врединеа. Ма мукх адава те чхивел тут те натпреварине тут. Наместо те иране лошнипаја, пробин те ове ко мир адале манушеа (Рим. 12:17-21).  Чак ако ов на менинела пе, тут ка овел тут андруно мир хем ка ове бахтало.

15. Ко кола буќа о Аполо хем о Павле сине слична?

¹⁵ Те дикха со шај те сикљова таро Аполо хем таро апостол Павле? О солдуј џене пенџарена сине бут шукар о списија. О солдуј сине позната сар шукар учителија хем кај керѓе бут ученикија. Ама на сине љубоморна јекх јекхеске.

16. Саво мануш сине о Аполо?

¹⁶ О Аполо сине тари Александрија, диз колате со ко адава време сине о најучиме мануша. Веројатно сине бут шукар говорнико хем шукар џанела сине о списија (Дела 18:24). Кеда о Аполо служинѓа ко Коринт, несаве пхраља ко собрание сикавѓе кај мангена ле повише таро јавера пхраља, машкар кола со сине о Павле да (1. Кор. 1:12, 13). Дали о Аполо поддржинѓа акава стави со шај сине те одвојнел о собрание? Ов на керѓа адава. Уствари, несаво време откеда гело песке таро Коринт, о Павле молинѓа ле палем те иранел пе адари (1. Кор. 16:12). Сигурно о Павле на би керела сине адава ако о Аполо одвојнела сине о собрание. Јасно тано кај о Аполо користинѓа пле способностија ко шукар начин те шај те вакерел о шукар хабери хем те охрабринел пле пхрален. Исто аѓаар, шај те ова сигурна кај о Аполо сине понизно мануш. На пример, и Библија на вакерела кај ов вреџинѓа пе кеда о Акила хем и Прискила поточно објаснинѓе леске е Девлескоро друмо (Дела 18:24-28).

17. Сар о Павле керѓа те овел мир?

¹⁷ О Павле сине свесно кобор о Аполо шукар керела сине пли служба. Ама ов на сине секиримо башо адава дали о мануша ка мислинен кај о Аполо тано пошукар лестар. Ов сине понизно, скромно хем разумно.  Адава шај те дикха ле таро совет со денѓа ле е пхраленге ко Коринт. Кеда ола вакерѓе „ме сиум е Павлескоро“, адава на свиџинѓа пе леске. Наместо адава, ов денѓа цело фалба е Јеховаске хем е Исусеске (1. Кор. 3:3-6).

18. Спрема 1. Коринќаните 4:6, 7, со сикљоваја таро Аполо хем таро Павле?

¹⁸ Со шај те сикљова таро Аполо хем таро Павле? Шај бут трудинаја амен ки служба, хем шај поможинѓем буте џененге те напредујнен те крстинен пе. Ама џанаја кај адава шај те кера ле само адалеске со о Јехова поможинела амен. Таро Аполо хем таро Павле сикљоваја панда јекх бути — со повише одговорностија иси амен ко собрание, добором повише шај те кера те овел мир. Бут сием благодарна кеда о старешине хем о слуга-помошникија керена те овел мир хем јекхипе ко собрание аѓаар со кеда дена совет користинена е Девлескоро Лафи. Ола на мангена о јавера те дикхен ки ленде сар важна мануша, него поможинена ленге те шунен е Исусе хем те џан пало лескоро пример. (Читин 1. Коринќаните 4:6, 7.)

19. Со шај секова јекх амендар те керел? (Дикх хем и рамка „ Ма натпреваринен тумен“.)

¹⁹ Секоле јекхе амендар иси ле несаве способностија хем талентија кола со денѓа ле о Девел. Шај те користина адала способностија те шај те служина јекх јекхеске (1. Пет. 4:10). Шај мислинаја аменге кај адава со кераја нане важно. Ама ма бистре, исто сар со секоја цигла тани важно те шај те керел пе јекх шужо кхер, аѓаар о тикне буќа со кераја лен тане важна те шај те овел јекхипе ко собрание. Сарине ваљани бут те трудина амен те шај те цида амен таро натпреварувачко духо. Те ова одлучна те да амендар са те кера те овел мир хем јекхипе ко собрание (Еф. 4:3).